យោងតាមមន្ត្រីនគរបាលម្នាក់បានឲ្យដឹងថា ក្មេងប្រុសជំទង់ម្នាក់ ត្រូវបានចាប់ខ្លួនកាលពីព្រឹកម្សិលមិញ នៅក្នុងស្រុកសូទ្រនិគម បន្ទាប់ពីវីដេអូឃ្លីបដែលស្ត្ីពីក្មេងប្រុសរូបនេះវាយក្មេងស្រីមិត្តរួមថ្នាក់ម្នាក់ត្រូវបានគេចែករំលែកយ៉ាងសុះសាយតាមបណ្តាញទំនាក់ទំនងសង្គម។
លោក ទេព ចាន់ណា អធិការនគរបាលស្រុកសូទ្រនិគមបានឲ្យដឹងថា អាជ្ញាធរបានចាប់ផ្តើមតាមស្វែងរកជនសង្ស័យអាយុ១៦ឆ្នាំរូបនេះកាលពីថ្ងៃសុក្រ បន្ទាប់ ពីវីដេអូឃ្លីបដែលស្តីពីជនសង្ស័យរូបនេះវាយក្មេងស្រីរងគ្រោះអាយុ១៤ឆ្នាំនៅចំពោះមុខមិត្តរួមថ្នាក់ត្រូវបានគេចែករំលែកពាសពេញហ្វេសប៊ុក។
លោកបានមានប្រសាសន៍ថា “យើងបានតាមរកក្មេងប្រុសជំទង់រូបនេះ បន្ទាប់ពីយើងបានឃើញវីដេអូឃ្លីបនៅក្នុងហ្វេសប៊ុក ហើយបន្ទាប់មកយើងបានទទួលបណ្តឹងពីគ្រួសារជនរងគ្រោះ [នៅថ្ងៃអាទិត្យ]។ នៅថ្ងៃបន្ទាប់យើងបានចាប់ខ្លួនក្មេងប្រុសរូបនេះនៅម៉ោងប្រហែល៨ និង១៥នាទីនៅពេលក្មេងប្រុសនេះព្យាយាមគេចចូលក្នុងផ្ទះរបស់ខ្លួន”។
លោក ចាន់ណា បានបន្ថែមថា ជនសង្ស័យបានទៅលាក់ខ្លួននៅផ្ទះមិត្តភក្តិដើម្បីគេចពីការចាប់ខ្លួនតាំងពីហេតុការណ៍បានកើតឡើងម្លេ៉ះ។ហើយហេតុការណ៍នេះបានកើតឡើងបន្ទាប់ពីមានការឈ្លោះប្រកែកពាក្យសម្តីគ្នាយ៉ាងខ្លាំងរវាងជនសង្ស័យ និងជនរងគ្រោះ។
អធិការនគរបាលរូបេនះបានមានប្រសាសន៍បន្ថែមថា “យោងតាមជនសង្ស័យ និងជនរងគ្រោះ ពួកគេធ្លាប់លេងវាយគ្នាទៅវិញទៅមក ប៉ុន្តែ លើកនេះពួកគេបានលេងជ្រុលហួសហេតុពេក”។ លោកបានបន្ថែមថា ក្មេងប្រុសរូបនេះបានដាល់ អុកកែង និងបោចសក់ក្មេងស្រីរងគ្រោះ។ ជនសង្ស័យនឹងត្រូវបញ្ជូនទៅស្នងការដ្ឋាននគរបាលខេត្តនៅថ្ងៃនេះ។
យោងតាមសេចក្តីថ្លែងការណ៍មួយបង្ហោះនៅលើគេហទំព័ររបស់ក្រសួងអប់រំ យុវជន និងកីឡាកាលពីម្សិលមិញ ហេតុការណ៍នេះបានកើតឡើងនៅក្នុងវិទ្យាល័យមួយក្នុងខេត្តសៀមរាបកាលពីថ្ងៃព្រហស្បតិ៍។
សេចក្តីថ្លែងការណ៍នេះបានលើកឡើងថា “បន្ទាប់ពីបានមើលវីដេអូឃ្លីបនេះ ក្រសួងអប់រំ យុវជន និងកីឡាបានសិក្សាហើយរកឃើញថា ហេតុការណ៍នេះបានកើតឡើងនៅក្នុងថ្នាក់ទី៩Bនៅវិទ្យាល័យដំដែកក្នុងស្រុកសូទ្រនិគម ខេត្តសៀមរាប”។
សេចក្តីថ្លែងការណ៍នេះមានខ្លឹមសារបន្ថែមថា ក្រសួងអប់រំ យុវជន និងកីឡា កំពុងរៀបចំផែនការដាក់នគរបាល និងមន្ត្រីសន្តិសុខឲ្យឈរជើងនៅតាមសាលាទាំងអស់នៅទូទាំងប្រទេស។
សេចក្តីថ្លែងការណ៍នេះមានខ្លឹមសារបន្ថែមទៀតដូច្នេះថា “[នៅក្នុងថ្ងៃនេះ] ក្រសួងអប់រំ យុវជន និងកីឡា កំពុងសហការជាមួយក្រសួងមហាផ្ទៃជាពិសេសនគរបាលជាតិដើម្បីបង្កើតប្រព័ន្ធសន្តិសុខនៅតាមសាលា…យើងនឹងចាប់ផ្តើមនៅក្នុងរាជធានីភ្នំពេញមុនគេ។ នៅតាមសាលាទាំងអស់ក្នុងរាជធានីភ្នំពេញ យើងត្រូវការដាក់សន្តិសុខម្នាក់ និងមន្ត្រីនគរបាលម្នាក់ឲ្យឈរជើង”។
លីង [link] មួយនៃវីដេអូឃ្លីបដែលបានបង្ហោះនៅលេើទំព័រហ្វេសប៊ុករបស់កាសែតក្នុងស្រុកមួយកាលពីថ្ងៃអាទិត្យថា មានអ្នកចុច like កើនឡើងដល់ទៅ១២.០០០[likes] និងអ្នកចែករំលែកកើនឡើង៣.០០០[shares] គិតត្រឹមល្ងាចម្សិលមិញ៕ ស៊ុយឈាង