29 C
Phnom Penh

អង្គការ​សិទ្ធិមនុស្ស​​លើក​ឡើង​ថា ​ជន​ជាតិ​វៀត​ណាម​​ជីកស្រះទឹក និង​ដាំដំឡូងមី​ក្នុង​ប្រទេសកម្ពុជា

ដោយ ឌឹ ខេមបូឌា ដេលី

បទវិភាគ

អង្គការ​សិទ្ធិ​មនុស្ស​អាដ​ហុក​លើក​ឡើង​ថា អង្គការ​បាន​រក​ឃើញ​ចម្ការ​ដំឡូង​មី​ដាំ​ដោយ​ជន​ជាតិ​វៀតណាមដែល​គ្មាន​លិខិត​ស្នាម​ត្រឹម​ត្រូវ​នៅក្នុង​​ទឹក​ដី​កម្ពុជា​នៃ​ព្រំដែន​រួមរបស់​​ប្រទេស​ទាំង​ពីរ អំឡុង​ការ​ចុះទៅ​​ស្រុក​អូរយ៉ាដាវ ខេត្ត​រតនគិរី​កាល​ពី​ថ្ងៃ​ច័ន្ទ។

លោក ឆាយ ធី អ្នកសម្រប​ស្រួល​អង្គការ​អាដ​ហុក​ប្រចាំ​ខេត្ត​នេះ​បាន​មាន​ប្រសាសន៍​កាល​ពី​ម្សិលមិញ​ថា ពួកគេ​ក៏​បាន​រក​ឃើញ​ស្រះទឹក​​ទំហំ​៥ម៉ែត្រ​គុណ​១០​ម៉ែត្រ​នៅ​ក្បែរ​ចម្ការ​ទាំង​នោះ​ផង​ដែរ ​នៅ​ក្នុង​តំបន់​ដែលកំណត់​​ព្រំប្រទល់​មិន​ច្បាស់​លាស់​​តាម​​ព្រំដែន​ស្ថិត​ក្នុង​ឃុំ​ប៉ក់ញ៉ៃ។

លោក ឆាយ ធី បាន​មាន​ប្រសាសន៍​ថា ការ​ស៊ើបអង្កេត​ដល់​ទី​កន្លែង​គឺ​ដើម្បី​រក​ឲ្យ​ឃើញ​ថា តើ​មាន​ការ​កាប់​ឈើ​ខុស​ច្បាប់​​ដោយ​ក្រុម​ជនជាតិ​វៀតណាម​ដែល​ឆ្លង​ព្រំដែន​រាល់​ថ្ងៃ ​មែន​ឬ​មិន​មែន ប៉ុន្តែ​ទី​បំផុត​យើង​បាន​រក​ឃើញ​មាន​សកម្មភាព​ខុស​ប្រក្រតី​ចំនួន​បី​កើត​ឡើង​នៅ​ទីនោះ”។

លោក​បាន​បន្ថែម​ថា​ “ទី១​ស្រះទឹក​ចំនួន​​​ប្រាំដែល​ជីក​ដោយ​ជន​ជាតិ​វៀតណាម​នៅ​ក្នុង​ទឹក​ដី​កម្ពុជា ទី២​ទាហាន​ព្រំដែន​មួយ​ចំនួន​បាន​​ជួល​ដី​ខ្មែរ​ទៅ​ឲ្យ​វៀតណាម​ដើម្បី​ដាំ​ដំឡូង​មី​នៅ​ក្នុង​ប្រទេស​កម្ពុជា”។

លោក​បាន​មាន​ប្រសាសន៍​ថា ពួកគេ​ក៏​បាន​រក​ឃើញពលករ​វៀតណាម​ដែលគ្មាន​លិខិត​ស្នាម​ត្រឹម​ត្រូវ​ធ្វើ​ការ​​នៅ​លើ​ចម្ការ​ទាំង​នោះ​ផង​ដែរ។

លោក ម៉ា វិចិត្រ អភិបាល​ស្រុក​បាន​មាន​ប្រសាសន៍​ថា លោក​បាន​រៀបចំ​ការ​ធ្វើ​ដំណើរ​ដាច់​ដោយឡែក​មួយ​ទៅ​តំបន់​ព្រំដែន​នៅ​ថ្ងៃ​ដដែល​នោះ ប៉ុន្តែ​បាន​បន្ថែម​ថា វា​មិន​អាច​ទៅ​រួច​ទេ​​ក្នុងការ​កំណត់ថា ​ស្រះ​​ទឹក​ទាំង​នោះ​ស្ថិតក្នុង​​ព្រំដែន​ប្រទេស​មួយ​ណា​នោះ។

លោក​បាន​មាន​ប្រសាសន៍​ថា “​ដោយ​សារ​ខ្ញុំ​មិន​មែន​ជា​អ្នក​ជំនាញ​ខាង​ផែន​ទី​ ខ្ញុំ​មិន​​អាច​និយាយ​ថា ស្រះ​ទឹក​ទាំង​នោះ​ត្រូវ​បាន​ជីក​ដោយ​ជន​ជាតិ​វៀតណាម​ស្ថិត​ក្នុង​ទឹក​ដី​កម្ពុជា ឬ​ទឹក​ដី​វៀតណាម​ឡើយ​។ ពីព្រោះ​តំបន់​នេះ​មិន​ទាន់​ត្រូវ​បាន​កំណត់ព្រំប្រទល់​ដោយ​ការ​បោះ​បង្គោល​​ព្រំដែន​ផ្លូវ​ការ​នៅ​ឡើយ​ទេ”។

លោក ម៉ា វិចិត្រ បានមាន​ប្រសាសន៍​ថា លោក​បាន​បញ្ជូន​របាយការណ៍​ស្នើ​សុំ​ឲ្យ​​អ្នក​ជំនាញ​ចុះ​ធ្វើ​ការ​ស៊ើបអង្កេត​បន្ថែម​។

លោក ហេង រតនា ស្នង​ការ​រង​នគរ​បាល​​ខេត្ត​បាន​មាន​ប្រសាសន៍​ថា អាជ្ញាធរ​ខេត្ត​បាន​ជួប​​ប្រជុំ​កាលពី​ម្សិលមិញ ដើម្បី​ពិភាក្សា​អំពី​លទ្ធផល​ទាំង​នោះ ហើយ​នឹង​កោះ​ប្រជុំ​ជាមួយ​សមភាគី​របស់​ខ្លួន​នៅ​សប្ដាហ៍ក្រោយ​។

ការ​រក​ឃើញស្រះ​ទឹក​ និង​ចម្ការ​មួយ​ចំនួន​នៅ​តាមព្រំដែន​កើត​ឡើង​ចំពេល​ដែល​មាន​វិវាទ​ដាច់​ដោយ​ឡែក​ពី​គ្នា​ ដែល​ក្នុង​នោះប្រទេស​​វៀតណាម​អះអាង​កាន់​កាប់​ដី​ទំហំ​១៦,៦​ហិកតា​នៅ​តាម​ព្រំដែន​ក្នុង​ខេត្ត​ត្បូងឃ្មុំ ដែល​ប្រជាជន​ខ្មែរ​បាន​ធ្វើ​ស្រែចម្ការ​ជាយូរ​មក​ហើយ​។

បន្ទាប់ពី​ជន​ជាតិ​វៀតណាម​មួយ​ក្រុម​មាន​គ្នា​៦​នាក់ រួម​មាន​ទាហាន​បី​នាក់​បាន​បាញ់​ថ្នាំ​គីមី​លើ​ដំណាំ​ដែល​កសិករ​ខ្មែរ​បាន​ដាំ​កាលពី​ថ្ងៃទី១៩ ខែ​មេសា​មក ក្រុម​សមាជិក​សភា​គណបក្ស​សង្គ្រោះ​ជាតិ​បាន​ផ្ញើ​លិខិត​ជូន​លោក ហោ ណាំហុង រដ្ឋមន្ត្រី​ក្រសួង​ការ​បរទេស​ស្នើ​សុំ​ការ​​អន្តរាគមន៍របស់លោក​។

កាលពី​ថ្ងៃ​ទី​៤ ខែ​ឧសភា លោក​ ហោ ណាំហុង បាន​ឆ្លើយ​តប​ដោយ​លើក​ឡើង​ថា ដី​នេះ​ស្ថិត​ក្នុង​ប្រទេស​វៀតណាម​។ សកម្មជន​គណបក្ស​សង្គ្រោះ​​ជាតិ​ និង​អ្នក​ជាតិ​និយម​បាន​លើក​ឡើង​ពី​បញ្ហា​នេះ​ ហើយ​បាន​ដាក់​សម្ពាធ​ឲ្យ​លោក​ ហោ ណាំហុង ធ្វើ​ការ​ពន្យល់​ពី​មូលហេតុ​ដែល​ប្រទេស​កម្ពុជា​បាន​បាត់​បង់​ទឹក​ដី​ដែល​ពលរដ្ឋ​របស់​ខ្លួន​បាន​ធ្វើ​ស្រែ​ចម្ការ​ជាយូរ​មក​ហើយ​នោះ។

លោក ហោ ណាំហុង បាន​ពន្យល់​នៅ​ក្នុង​ការ​​ពិភាក្សា​តុ​មូល​ដែល​ចាក់​ផ្សាយ​តាម​ទូរទស្សន៍​ជាតិ​កាលពី​សប្ដាហ៍​មុន​ថា ​កម្ពុជា​បាន​យល់​​ស្រប​ថា ដី​នេះ​ស្ថិត​ក្នុង​ប្រទេស​វៀត​ណាម​ផ្អែក​តាម​ផែន​ទី​ដែល​ប្រទេស​ទាំង​ពីរ​​បាន​ព្រមព្រៀង​​ប្រើ​ជាមូលដ្ឋាន​នៃ​ការ​​ចរចា​ដើម្បី​កំណត់​ព្រំដែន​។

កាលពី​ម្សិលមិញ លោក ម៉ៅ មុន្នីវណ្ណ សមាជិក​សភា​គណបក្ស​សង្គ្រោះ​ជាតិ​បាន​មាន​ប្រសាសន៍​ថា លោក​មាន​គម្រោង​ផ្ញើ​លិខិត​ទៅ​លោក វ៉ា គឹម​ហុង ប្រធាន​គណៈកម្មាធិការ​ព្រំដែន​សុំ​ឲ្យ​លោក​ផ្ដល់​ផែន​ទី​ដែល​ត្រូវ​បាន​ប្រើ​នៅ​ក្នុង​ការ​ចរចា​ ដើម្បី​បង្ហាញ​ថា តំបន់​ដែល​មាន​វិវាទ​នេះ​ស្ថិត​ក្នុង​​ប្រទេស​វៀតណាម​។

លោក​បាន​មាន​ប្រសាសន៍​ថា “​នៅ​ពេល​ណាយើង​​មាន​ផែនទី​ដែល​លោក វ៉ា គឹមហុង អះអាង​ថា យក​មក​ប្រើ​​​សម្រាប់​ការ​កំណត់​ព្រំដែននោះ​​ យើង​អាច​ផ្ទៀង​ផ្ទាត់​ជាមួយ​បង្គោល​ព្រំដែន​ពិតប្រាដក​ថា​តើ​វា​ពិត​ឬមិន​ពិត​”។

លោក ម៉ៅ ពិសេស ប្រធាន​សហព័ន្ធ​និស្សិត​បញ្ញវន្ត​កម្ពុជា​ ជា​ក្រុម​សកម្មជន​ជាតិ​និយម​ដែល​បាន​ចុះ​ទៅ​តំបន់​ដែល​មាន​វិវាទ​កាលពី​ដើម​ខែ​នេះ​បាន​មាន​ប្រសាសន៍​ថា ពួកគេ​មាន​គម្រោង​ដាក់​ជូន​ញត្តិ​ទៅ​មន្ត្រី​នានា​នៅ​សប្ដាហ៍​ក្រោយ​ជំរុញ​ឲ្យ​ពួកគាត​់​លុប​ចោល​សន្ធិសញ្ញា​​ព្រំដែន​ឆ្នាំ​២០០៥​ដ៏ចម្រូង​ចម្រាស​ជាមួយ​ប្រទេស​វៀតណាម​។

លោក ពិសេស បាន​មាន​ប្រសាសន៍​ថា “​យើង​នឹង​ដាក់​ជូន​ញត្តិ​អម​ដោយ​របាយការណ៍​ស្ដី​ពី​លទ្ធផល​របស់​យើង​ថ្វាយ​ព្រះមហាក្សត្រ ជូន​លោក​នាយក​រដ្ឋមន្ត្រី ហ៊ុន សែន និង​លោក សម រង្ស៊ី ដែល​លោក​មាន​តួនាទី​ជា​ប្រធាន​ក្រុម​ភាគតិច​នៅ​រដ្ឋសភា​​នៅ​សប្ដាហ៍​ទី១​នៃ​ខែ​មិថុនា ស្វែង​រកការ​​អន្តរាគមន៍​ដើម្បី​​ចាត់​វិធានការ​អំពី​បញ្ហា​ព្រំដែន​”។

លោក​បាន​មាន​ប្រសាសន៍​ថា “​ប្រសិន​បើ​រដ្ឋាភិបាល​មិន​ឆ្លើយ​តប​​បន្ទាប់ពី​យើង​​ដាក់​ញត្តិ និង​របាយការណ៍​ទេ​នោះ យើង​នឹង​ជួប​ប្រជុំ​​ជាមួយ​សមាជិក​របស់​យើង​ម្ដង​ទៀត​ដើម្បី​សម្រេច​ថា​តើ​ត្រូវ​​ធ្វើ​ការ​តវ៉ា​ទាម​ទារ​ឲ្យ​លោក ហោ ណាំហុង លាលែង​ពី​តំណែង​ឬ​យ៉ាង​ណា​”៕ សារុន​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស