យោងតាមអ្នកនាំពាក្យក្រសួងការបរទេសបានឲ្យដឹងថា អ្នកនេសាទខ្មែរចំនួន៥៩នាក់ផ្សេងទៀតដែលត្រូវបានសង្គ្រោះចេញពីការបង្ខិតបង្ខំឲ្យធ្វើការនៅលើទូកនេសាទថៃ នឹងត្រូវបានធ្វើមាតុភូមិនិវត្តន៍ពីប្រទេសឥណ្ឌូណេស៊ីមកកម្ពុជាវិញនៅ ប៉ុន្មានសប្តាហ៍ខាងមុខនេះ។
លោក គុយ គួង អ្នកនាំពាក្យក្រសួងនេះបានលើកឡើងនៅក្នុងសេចក្តី ថ្លែងការណ៍មួយថា អ្នកនេសាទចំនួន៣៨នាក់ត្រូវ បានសង្គ្រោះចេញពីកោះបេនជីណា ជាទីដែលអ្នកនេសាទចំនួន៥៩នាក់ផ្សេងទៀតត្រូវបានធ្វើមាតុភូមិនិវត្តន៍កាលពីដើមខែមេសា បន្ទាប់ពីមាន ព័ត៌មានលេចឡើងថា កោះនេះត្រូវបានគេប្រើប្រាស់ ជាកន្លែងសម្រាប់បង្ខំឲ្យកម្មករធ្វើការ។
សេចក្តីថ្លែងការណ៍នេះមានខ្លឹមសារដូច្នេះថា “ស្ថាន ទូតកម្ពុជាបានសហការជាមួយស្ថានទូតឥណ្ឌូណេស៊ី ដើម្បីជួយសង្គ្រោះពលករខ្មែរចំណាកស្រុកចំនួន ៣៨នាក់ពីទូកនេសាទថៃនៅកោះបេនជីណា”។ សេចក្តីថ្លែងការណ៍នេះមានខ្លឹមសារបន្ថែមថា “ដោយ សារពលករខ្មែរចំណាកស្រុកចំនួន៣៨នាក់ គ្មានលិខិតឆ្លងដែនស្ថានទូតកម្ពុជានឹងចេញឯកសារធ្វើដំណើរ ហើយសហការយ៉ាងយកចិត្តទុកដាក់ជាមួយ IOM [អង្គការអន្តរជាតិទេសន្តរប្រវេសន៍] ដើម្បីធ្វើមាតុភូមិនិវត្តន៍ពួកគេនៅសប្តាហ៍ទី១នៃខែមិថុនា”។
លោក គុយ គួង បានបន្ថែមថា អ្នកនេសាទខ្មែរចំនួន២៦នាក់ ត្រូវបានសង្គ្រោះចេញពីទូកនេសាទថៃពីកោះ អាំប៊ុន(Ambon) ប្រទេសម៉ាឡេស៊ី។
សេចក្តីថ្លែងការណ៍របស់លោកមានខ្លឹមសារបន្ថែមទៀតដូច្នេះថា “ស្ថានទូត កម្ពុជាបានសហការជាមួយអាជ្ញាធរឥណ្ឌូណេស៊ីដើម្បី សង្គ្រោះពលករខ្មែរចំណាកស្រុកចំនួន២១នាក់ពីទូកនេសាទថៃពីកោះអាំប៊ុន”។ សេចក្តីថ្លែងការណ៍នេះមានខ្លឹមសារបន្តដូច្នេះថា “ដោយ សារពលករខ្មែរចំណាកស្រុកចំនួន២១នាក់គ្មានលិខិតឆ្លងដែន ស្ថានទូតកម្ពុជានឹងចេញឯកសារធ្វើដំណើរ ហើយធ្វើអន្តរាគមន៍ដើម្បីស្នើឲ្យទូកនេសាទ ថៃបើកប្រាក់ខែ និងចំណាយលើថ្លៃធ្វើដំណើរ របស់ពួកគេមកកម្ពុជាវិញនៅត្រឹមដំណាច់ខែឧសភា ”។
អ្នកនេសាទខ្មែរចំនួន៥៩នាក់ដែលត្រូវបានសង្គ្រោះចេញពីកោះបេនជីណា កាលពីខែមុនត្រូវបានគេជួញដូរទៅកាន់ប្រទេសថៃ ហើយត្រូវបានបង្ខំឲ្យឡើងទូកនេសាទថៃ ដែលបន្ទាប់មកបានចុះនេសាទក្នុងដែនទឹកឥណ្ឌូណេស៊ី ហើយបានចូលចតនៅកោះបេនជីណាជា ទីដែលក្រុមហ៊ុននេសាទពូសាកា បេនជីណា រីហ្សស៍ (Pusaka Benjina Resources) ត្រូវបានគេសង្ស័យថា បង្ខំឲ្យកម្មករធ្វើការ។
បន្ទាប់ពីការសង្គ្រោះពួកគេរួច អង្គការអន្តរជាតិទេសន្តរប្រវេសន៍បានប៉ាន់ប្រមាណថា អ្នកនេសាទបរទេសប្រមាណ៤.០០០នាក់បន្ថែមទៀតអាចនៅជាប់លើកោះផ្សេងទៀតក្នុងប្រទេសឥណ្ឌូណេស៊ី។
លោក ស្តូវ ហាមីលតុន (Steve Hamilton) អនុប្រធានបេសកម្មរបស់អង្គការអន្តរជាតិទេសន្តរប្រវេសន៍ប្រចាំប្រទេសឥណ្ឌូណេស៊ី បានលើកឡើងថា លោកគ្មានព័ត៌មានទាក់ទិននឹងអ្នកនេសាទខែ្មរទាំង២១នាក់នេះឡើយ ប៉ុន្តែ លោកបានបន្ថែមថា អ្នកនេសាទខ្មែរចំនួន៣៨ នាក់ត្រូវបានជួយសង្គ្រោះចេញពីកោះបេនជីណា ប្រហែលមួយសប្តាហ៍កន្លេងមកហើយ។
លោកបានមានប្រសាសន៍ថា “ខ្ញុំ គិតថា វាពិតជាមិនទាន់ចប់ឡើយ។ ករណីកោះបេនជីណា គឺគ្រាន់តែជាករណីមួយប៉ុណ្ណោះ និងទើបតែមានក្រុមហ៊ុនមួយប៉ុណ្ណោះ។ ខ្ញុំគិតថា ពួកគេ [ក្រសួងជលផលឥណ្ឌូណេស៊ី] នឹងរកឃើញករណីរំលោភបំពានបន្ថែមទៀត។ មានពលរដ្ឋខ្មែរត្រូវបានគេជួញដូរមកទីនេះជាយូរមក ហើយមុនពេលករណីកោះបេនជីណាទៅទៀត”៕ ស៊ុយឈាង