ជនជាតិដើមភាគតិចព្នងប្រហែល១០០នាក់ នៅខេត្តមណ្ឌលគិរីបានតវ៉ានៅខាងក្រៅការិយាល័យក្រុមហ៊ុនចម្ការកៅស៊ូរបស់បារាំងឈ្មោះ សុខហ្វីន ខេឌីស៊ី (Socfin KCD) កាលពីម្សិលមិញ ដោយបានគំរាមថានឹងកាប់រំលំដើមកៅស៊ូរបស់ក្រុមហ៊ុននេះ ប្រសិនបើគេមិនប្រគល់ដីដូនតារបស់ខ្លួនមកវិញទេ។
លោក ក្លាង ផូ អាយុ៣៤ឆ្នាំ ជាអ្នកភូមិម្នាក់មកពីឃុំប៊ូស្រា ស្រុកពេជ្រាដា បាននិយាយថា អ្នកស្រុកប្រាំពីរភូមិក្នុងឃុំនេះបានមកផ្ដុំគ្នានៅខាងក្រៅការិយាល័យក្រុមហ៊ុន សុខហ្វីន ទាមទារឲ្យប្រគល់ដីរបស់ពួកគេមកវិញ។
យោងតាមលោក ផូ បានឲ្យដឹងថា ក្រុមហ៊ុន សុខហ្វីន ដែលទទួលបានដីសម្បទានសេដ្ឋកិច្ចនៅឆ្នាំ២០០៨ ដំបូងឡើយបានផ្ដល់ដីពីរទៅបីហិកតាឲ្យអ្នកភូមិជាថ្នូរនឹងដីឡូតិ៍ដែលក្រុមអ្នកភូមិកំពុងរស់នៅ និងធ្វើចម្ការ។
លោក ផូ បាននិយាយថា “ប៉ុន្តែយើងមិនអាចប្រើប្រាស់ដីនេះដើម្បីដាំស្រូវបានទេ ពីព្រោះដីនេះនៅជើងភ្នំហើយសុទ្ធតែថ្ម”។
លោកបានបន្ថែមថា នៅឆ្នាំ២០០៨ ក្រុមហ៊ុន សុខហ្វីន បានគំរាមឈូសឆាយដីរបស់អ្នកភូមិ បើទោះជាពួកគេមិនបានទទួលយកដីឡូតិ៍ថ្មី ឬប្រាក់២០០ដុល្លារក្នុងមួយហិកតាដែលក្រុមហ៊ុនផ្ដល់ឲ្យក៏ដោយ។
លោកបាននិយាយថា “យើងគ្មានជម្រើសក្រៅពី [ទទួលយក] វាទេ”។
លោក ផូ បាននិយាយថា អ្នកភូមិចង់ធ្វើជាម្ចាស់ដីដូនតារបស់ពួកគេ ហើយសុខចិត្តជួលដីនោះពីក្រុមហ៊ុន សុខហ្វីន វិញ។
ប៉ុន្តែពេលដែលលោក ផូ និងតំណាងអ្នកភូមិប្រាំមួយនាក់ផ្សេងទៀតបានជួបជាមួយក្រុមហ៊ុនកាលពីម្សិលមិញ មិនបានឈានដល់ដំណោះស្រាយឡើយ។
គាត់បាននិយាយថា “យើងផ្ដល់ពេល២សប្ដាហ៍ឲ្យក្រុមហ៊ុនរកដំណោះស្រាយឲ្យយើង ប៉ុន្តែប្រសិនបើពួកគេមិនមានដំណោះស្រាយក្នុងរយៈពេលនោះទេ យើងនឹងកាប់ចម្ការកៅស៊ូយកដីចម្ការរបស់យើងមកវិញ”។
លោក លាង សត្យា ប្រធានរដ្ឋបាលរបស់ក្រុមហ៊ុន សុខហ្វីន បានបដិសេធមិនធ្វើអត្ថាធិប្បាយទេ។
លោក ខាំ តារា អភិបាលរងស្រុកពេជ្រាដា បាននិយាយថា លោកនឹងរៀបចំការចរចាបន្តទៀតរវាងក្រុមហ៊ុន សុខហ្វីន និងប្រជាជនប្រហែល១.០០០គ្រួសារនៅឃុំប៊ូស្រា ដែលចង់បានដីរបស់ពួកគេមកវិញ។
លោក ណែត ប្រាក់ ជាអ្នកភូមិប៊ូស្រាដែលបានជួយរៀបចំការតវ៉ានេះ បាននិយាយថា ពួកគេបានជ្រើសរើសពេលកាលពីម្សិលមិញទៅជួបក្រុមហ៊ុននេះ ពីព្រោះក្រុមហ៊ុន សុខហ្វីន និងអ្នកមានភាគហ៊ុនធំរបស់ខ្លួនគឺ ប៊ុលល័រ ហ្គ្រុប (Bollore Group) គ្រោងនឹងធ្វើការប្រជុំអ្នកមានភាគហ៊ុនប្រចាំឆ្នាំរបស់ខ្លួននៅទីក្រុងបា៉រីសកាលពីម្សិលមិញ។
លោក ប្រាក់ បានបន្ថែមថា សហគមន៍នានានៅប្រទេសកាមេរូន លីបេរីយ៉ា និងប្រទេសកូឌឺវ័រ ក៏បានធ្វើការតវ៉ាស្រដៀងគ្នានេះដែរប្រឆាំងនឹងចម្ការរបស់ក្រុមហ៊ុន សុខហ្វីន ក្នុងប្រទេសរបស់ពួកគេ។
លោកបាននិយាយថា “យើងគ្រាន់តែចង់រំឭកពួកគេថា យើងមានបញ្ហាមួយចំនួនជាមួយពួកគេ”៕ មានិត (រាយការណ៍បន្ថែមដោយ Chris Mueller)