29 C
Phnom Penh

តុលាការ​បញ្ជា​ឲ្យ​កម្មករ​រោងចក្រ​កាត់ដេរ​កំពុង​ធ្វើ​កូដកម្ម​ចូល​ធ្វើការ​វិញ

ដោយ ឌឹ ខេមបូឌា ដេលី

បទវិភាគ

កម្មករ​​​កាន់​​​បដា​​​តវ៉ា​​​នៅ​​​ខាង​​​ក្រៅ​​​រោង​​​ចក្រ​​​ អឹម វ៉េ កាត់ដេរ​​​អន្តរជាតិ នៅក្នុង​​​ខណ្ឌ​​​មានជ័យ ក្រុង​​​​​​ភ្នំពេញ កាលពី​​​ម្សិលមិញ។ រូបថតៈ ស៊ីវ ចាន់ណា/The Cambodia Daily
កម្មករ​​​កាន់​​​បដា​​​តវ៉ា​​​នៅ​​​ខាង​​​ក្រៅ​​​រោង​​​ចក្រ​​​ អឹម វ៉េ កាត់ដេរ​​​អន្តរជាតិ នៅក្នុង​​​ខណ្ឌ​​​មានជ័យ ក្រុង​​​​​​ភ្នំពេញ កាលពី​​​ម្សិលមិញ។ រូបថតៈ ស៊ីវ ចាន់ណា/The Cambodia Daily

យោង ​តាម​ឯកសារ​តុលាការ​ឲ្យ​ដឹង​ថា កម្មករ​រោងចក្រ​កាត់ដេរ​រាប់ពាន់​នាក់​ដែល​កំពុង​ធ្វើ​កូដ​កម្ម​ជាង​មួយ​ សប្តាហ៍​មក​ហើយ ដែល​ទាមទារ​​​សុំ​ដំឡើង​ប្រាក់​ខែ​និង​លក្ខខណ្ឌ​ការងារ​ល្អ​ប្រសើរ ត្រូវ​តុលាការ​ក្រុង​បញ្ជា​ឲ្យ​ត្រឡប់​ទៅ​ធ្វើ​ការ​វិញ។

កម្មករ​ដើរ​ចេញ​ពី​ការងារ​នៅ​រោងចក្រ អឹម វ៉េ កាត់​ដេរ​អន្តរជាតិ ដែល​ផ្គត់ផ្គង់​ក្រុមហ៊ុន​លក់​រាយ អេឆ&អឹម កាលពី​ថ្ងៃ​ទី​១៩​ខែ​ឧសភា ដើម្បី​ទាមទារ​ឲ្យ​អ្នក​គ្រប់គ្រង​រោងចក្រ​ដោះស្រាយ​១៧​ចំណុច ក្នុង​នោះ​មាន​ការ​ដំឡើង​ប្រាក់​ធ្វើ​ដំណើរ​ប្រចាំ​ខែ​របស់​ពួកគេ​ពី​១០​ ដុល្លារ​ដល់​១៥​ដុល្លារ និង​ប្រាក់​អាហារ​ប្រចាំ​ថ្ងៃ​មួយ​ដុល្លារ​ផង។

យោង ​តាម​កម្មករ​និង​សហជីព​បាន​ឲ្យ​ដឹង​ថា ករណី​នេះ​បាន​ទៅ​ដល់​ក្រុម​ប្រឹក្សា​អាជ្ញា​កណ្តាល​នៅ​ដើម​ខែ​នេះ ​ដោយ​អាជ្ញា​កណ្តាល​បញ្ជា​ឲ្យ​កម្មករ​ដែល​ធ្វើ​កូដកម្ម មាន​ចំនួន​ប្រហែល២.០០០​នាក់​ក្នុង​ចំណោម​៣.០០០​នាក់ ត្រឡប់​ទៅ​ធ្វើការ​វិញ​នៅ​ថ្ងៃ​ទី​២៣​ខែ​ឧសភា។

កម្មករ ​មិន​គោរព​​​តាម​​​ការ​សម្រេច​​​​នេះ​ទេ ហើយ​ករណី​នេះ​បាន​ទៅ​ដល់​តុលាការ​ក្រុង។ ​​​ក្នុង​ឯកសារ​តុលាការ​ដែល​ចេញ​កាលពី​ថ្ងៃ​អង្គារ​ ហើយ​ទទួល​បាន​កាលពី​ ថ្ងៃ​ពុធ​ឲ្យ​ដឹង​ថា ចៅក្រម ហេង កេសារោ បាន​បញ្ជា​ឲ្យ​​​ពួកគេ​ “វិល​ទៅ​កន្លែង​ធ្វើការ​និង​ការងារ​របស់​ពួកគេ​វិញ​ក្នុង​ពេល​៤៨​ម៉ោង បន្ទាប់ពី​ទទួល​បាន​ការ​​​ជូនដំណឹង​​​នេះ” ហើយ​រង់ចាំ​រហូត​ដល់​តុលាការ​សម្រេច​រឿង​ក្តី​នេះ។

ចៅក្រម កេសារោ បាន​និយាយ​ថា “កម្មករ​ដែល​មិន​ត្រឡប់​ទៅ​ធ្វើការ​វិញ​តាម​ពេល​កំណត់​៤៨​ម៉ោង​នេះ ហើយ​​​គ្មាន​​​មូលហេតុ​ត្រឹម​ត្រូវ ចាត់​ទុក​ថា​ មាន​​​កំហុស​ធ្ងន់”។

សហជីព​ចំនួន​ប្រាំបី ក្នុង​នោះ​មាន​សហព័ន្ធ​​​សហជីព​​​កម្មករ​​​​កម្ពុជា​ផង ក៏​បាន​ទទួល​ការ​ព្រមាន​ឲ្យ “បញ្ឈប់​សកម្មជន​ទាំង​អស់​ដែល​ញុះញង់​កម្មករ”។

ចៅក្រម កេសារោ បាន​និយាយ​ថា “កូដកម្ម ​នៅ​ថ្ងៃ​ទី​១៩​ឧសភា និង​កូដកម្ម​ជា​បន្ត​បន្ទាប់​ដោយ​កម្មករ ដែល​ក្នុង​កូដកម្ម​នោះ ពួកគេ​ត្រូវ​បាន​ដឹក​នាំ​ដោយ​សហជីព​នានា មិន​ធ្វើ​តាម​នីតិ​វិធី​និង​ច្បាប់​ការងារ​ទេ”។

កម្មករ ហែម ស្រីនាង អាយុ​៣២​ឆ្នាំ បាន​និយាយ​ថា ពួកគេ​នឹង​ធ្វើ​តាម​បញ្ជា​តុលាការ ប៉ុន្តែ​នឹង​បន្ត​ការ​ធ្វើ​កូដកម្ម ប្រសិនបើ​មិន​រក​ដំណោះស្រាយ​ឲ្យ​កម្មករ​ទេ​នោះ។

អ្នក​ស្រី​បាន​និយាយ​ថា “យើង​ធ្វើ​កូដកម្ម​ស្រប​ច្បាប់ ពីព្រោះ​យើង​បាន​ផ្តល់​ការ​ជូន​ដំណឹង​មុន​៧​ថ្ងៃ”។

លោក ប្រាក់ ចាន់ធឿន អគ្គ​លេខាធិការ​នៃ​គណៈកម្មការ​សម្រាប់​ការ​ដោះ​ស្រាយ​វិវាទ​ការងារ​នៅ​ ក្រសួង​ការងារ បាន​និយាយ​ថា លោក​បាន​ប្រាប់​សហជីព​ថា គេ​នឹង​ពិភាក្សា​អំពី​ករណី​នេះ ប៉ុន្តែ​បាន​ព្រមាន​ពួកគេ “កុំ​ឲ្យ​ធ្វើ​ស្ថានការណ៍​កាន់តែ​ក្តៅ​ឡើង”៕ និត

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស