អ្នកកាសែតក្នុងខេត្តរតនគិរី បាននិយាយកាលពីម្សិលមិញថា ពួកគេនឹងមិនគោរពតាមសំណើរបស់អាជ្ញាធរខេត្តឲ្យបញ្ឈប់ការជួបជុំគ្នានៅទីសាធារណៈ និងថតរូបភាពពេលចុះយកព័ត៌មានទេ។
អ្នកកាសែតប្រហែល៣០នាក់មកពីអង្គភាពព័ត៌មានផ្សេងៗ ត្រូវបានហៅមកការិយាល័យសាសាខេត្តកាលពីថ្ងៃអង្គារ ដែលលោកអភិបាលខេត្តរង ញ៉ែម សំអឿន បានមានប្រសាសន៍ថា អ្នកស្រុកបានត្អួញត្អែរថា ការជួបជុំរបស់ពួកគេនៅឯហាងកាហ្វេនិងទីកន្លែងដទៃទៀតនៅក្នុងក្រុងបានលុង គឺមិនល្អមើលសោះ។
អ្នកកាសែតដែលទាក់ទងបានកាលពីម្សិលមិញបាននិយាយថា លោក សំអឿន ប៉ុនប៉ងចាត់ទុកថាជារឿងខុសច្បាប់នូវការជួបជុំគ្នារបស់អ្នកកាសែត។ ទោះជាយ៉ាងនេះក្តី លោកអភិបាលខេត្តរង បានមានប្រសាសន៍ថា លោកគ្រាន់តែហៅអ្នកកាសែតទាំងនោះឲ្យធ្វើតាមសំណើ ហើយ”យោគយល់គ្នាទៅវិញទៅមក”ប៉ុណ្ណោះ។
លោក សំអឿន បាននិយាយអំពីការជួបជុំរបស់អ្នកកាសែតថា “វាមិនមែនជាការហាមប្រាមធ្ងន់ធ្ងរទេ ប៉ុន្តែ វាគ្រាន់តែរឿងបែបហ្នឹង ចំពោះភ្នែកប្រជាពលរដ្ឋវាមិនសមរម្យទេ យើងគ្រាន់តែសំណូមពរប៉ុណ្ណោះ។ នៅក្នុងក្រុងបានលុង យើងឃើញអ្នកកាសែតប្រមូលផ្តុំគ្នា ហើយវាមិនល្អមើលសោះ”។
នៅរយៈពេលប៉ុន្មានខែថ្មីៗកន្លងមកនេះ ខេត្តរតនគិរីមានព័ត៌មានជាច្រើន ខណៈដែលមានការឆ្លងចូលម៉ុងតាញ៉ារាប់សិបនាក់ ជាកុលសម្ព័ន្ធតំបន់ភ្នំមកពីតំបន់ភ្នំភាគកណ្តាលវៀតណាម ដែលនិយាយថា ពួកគេបានភៀសខ្លួនពីប្រទេសរបស់ខ្លួនដោយសារតែមានការធ្វើទុក្ខបុកម្នេញផ្នែកសាសនានិងនយោបាយ។
ម៉ុងតាញ៉ាបានបង្កឲ្យមានបញ្ហាការទូតសម្រាប់ក្រុងភ្នំពេញ ដោយរដ្ឋាភិបាលក្រុងហាណយស្នើសុំឲ្យមានការបញ្ជូនពួកគេមកវិញ ក្នុងពេលដែលអង្គការសហប្រជាជាតិបានជំរុញឲ្យពួកគេក្លាយជាអ្នកស្វែងរកសិទ្ធិជ្រកកោន។ ក្នុងខែមេសា ការិយាល័យមួយដែលយាមកាមដោយទាហាន ប៉ូលិស កងរាជអាវុធហត្ថប្រមាណ១០០នាក់ ត្រូវបានបង្កើតឡើងតាមព្រំដែនក្នុងខេត្តរតនគីរី ដើម្បីបញ្ឈប់ពួកម៉ុងតាញ៉ាមិនឲ្យឆ្លងចូលដោយខុសច្បាប់ក្នុងប្រទេសកម្ពុជា។
ខេត្តរតនគិរី គឺជាតំបន់ដែលសកម្មបំផុតមួយខាងការកាប់ឈើខុសច្បាប់។ ឧកញ៉ារកស៊ីឈើ ទ្រី ភាព មានការិយាល័យជាច្រើន កាស៊ីណូមួយ និងតំបន់សេដ្ឋកិច្ចពិសេសរបស់គាត់នៅក្នុងខេត្តនោះ។
ក្នុងខែវិច្ឆិកា ឆ្នាំ២០១២ អ្នកកាសែត ហង្ស សេរីឧត្តម ដែលបានរាយការណ៍ព័ត៌មានអំពីឧក្រិដ្ឋកម្មព្រៃឈើក្នុងខេត្តនេះឲ្យកាសែតមិនសូវឮឈ្មោះ ត្រូវបានគេសម្លាប់ញាត់ចូលក្នុងឃ្លុបរថយន្តរបស់លោក។
ទោះជាយ៉ាងនេះក្តី លោកអភិបាលរងខេត្តរូបនេះ មិនធ្វើអត្ថាធិប្បាយលើការទាក់ទងរវាងការប្រជុំរបស់លោកជាមួយអ្នកកាសែតនិងព្រឹត្តិការណ៍ព័ត៌មានណាមួយទេ ដោយគ្រាន់តែមានប្រសាសន៍ថា ការរាយការណ៍ព័ត៌មានពីខេត្តនេះ ជារឿយៗមិនត្រឹមត្រូវ។
លោក សំអឿន បានមានប្រសាសន៍ថា”សារព័ត៌មានខ្លះមិនមានព័ត៌មានពិស្តារទេ នៅពេលដែលពួកគេផ្សាយព័ត៌មាន។ កាលពីមុន យើងបានឃើញថា អ្នកកាសែតខ្លះហួសពីអ្នកកាសែតទៅទៀត ហើយពួកគេដើរតួដូចជាពួកគេប៉ូលិសអ៊ីចឹង”។
លោក ទេព សុទ្ធី អ្នកយកព័ត៌មានទូរទស្សន៍អាស៊ីអគ្នេយ៍ ដែលបានចូលរួមកិច្ចប្រជុំកាលពីថ្ងៃអង្គារ បាននិយាយថា លោក សំអឿន បានណែនាំអ្នកយកព័ត៌មានមិនឲ្យដេញតាមរឿងដើម្បីសុវត្ថិភាពផ្ទាល់ខ្លួន។
លោក សុទ្ធីបានរំឭកពីសំដីលោកអភិបាលរងខេត្តថា “ការប្រមូលផ្តុំអ្នកកាសែត ដេញតាមរឿង និងថតរូបបទល្មើសមួយចំនួន នឹងមានគ្រោះថ្នាក់សម្រាប់អ្នកកាសែត”។
ទោះជាយ៉ាងនេះក្តី អ្នកយកព័ត៌មានទូរទស្សន៍រូបនេះបាននិយាយថា លោកជឿថា ការព្រួយបារម្ភរបស់លោកអភិបាលរងខេត្ត គឺមិនមែនដើម្បីអ្នកកាសែតទេ ប៉ុន្តែសម្រាប់មនុស្សដែលអ្នកកាសែតស៊ើបអង្កេត។
អ្នកយកព័ត៌មានទូរទស្សន៍រូបនេះ បាននិយាយថា “ខ្ញុំគិតថា វាមិនមែនជាមតិរបស់ប្រជាពលរដ្ឋ ទេ វាជាមតិរបស់ឈ្មួញដែលមិនចង់ឲ្យយើងលាតត្រដាងនូវសកម្មភាពរបស់គេនិងប៉ះពាល់ដល់ផលប្រយោជន៍ពួកគេ”។
លោក អ៊ុច សាវុធ អ្នកយកព័ត៌មានកាសែតនគរវត្ត បាននិយាយថា អ្នកកាសែតតែងតែប្រមូលផ្តុំគ្នានៅឯហាងកាហ្វេមួយកន្លែងនៅក្នុងសង្កាត់បឹងកន្សែង ក្រុងបានលុង ហើយថា ពួកគេនឹងបន្តធ្វើដូចមុនទោះបីមាន “សំណើ” របស់ថ្នាក់ខេត្តក៏ដោយ។
លោក គីម សុវណ្ណរិទ្ធ ដែលធ្វើការឲ្យស៊ីធីវី៨ បាននិយាយថា ការជួបជុំគ្នា គឺជាផ្នែកសំខាន់នៃការងារអ្នកកាសែត។
លោក សុវណ្ណរិទ្ធ បាននិយាយបន្ថែមថា ការថតរូបដែលលោកអភិបាលរងខេត្តបានបញ្ជាក់ថាគ្រោះថ្នាក់ គឺចាំបាច់បំផុត “យើងជាអ្នកយកព័ត៌មាន ហើយយើងត្រូវប្រមូលផ្តុំគ្នាប្តូរព័ត៌មានគ្នាទៅវិញទៅមក”។
លោក សុវណ្ណរិទ្ធ បាននិយាយថា “ប្រសិនបើយើងមិនដេញតាមថតរូបទេ ពួកគេចោទយើងថាផ្សាយព័ត៌មានមិនពិត ក្នុងពេលដែលយើងផ្សាយព័ត៌មានរបស់យើង”។
លោក មឿន ឈានណារិទ្ធ នាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មាន ហៅសំណើរបស់លោកអភិបាលរងខេត្តថា”ចម្លែក” ហើយបាននិយាយថា ជាលើកដំបូងហើយដែលលោកបានឮពីការហាមឃាត់បែបហ្នឹងក្នុងប្រទេសកម្ពុជា។
លោក ឈានណារិទ្ធ បាននិយាយថា “វាជាការរំលោភសិទ្ធិមនុស្ស ដែលធានាដោយរដ្ឋធម្មនុញ្ញ និងសេរីភាពនិងសិទ្ធិអ្នកកាសែត។ វាអាចថាមានអ្វីអាថ៌កំបាំងនៅពីក្រោយអាជ្ញាធរដែលហាមឃាត់អ្នកកាសែតមិនឲ្យប្រមូលផ្តុំគ្នា”៕រើន