គណបក្សសង្គ្រោះជាតិបានអំពាវនាវឲ្យមានការប្ដូរភ្លាមៗនូវតំណែងអគ្គលេខាធិការនៃគណៈកម្មាធិការជាតិរៀបចំការបោះឆ្នោត (គ.ជ.ប.) គឺលោក ទេព នីថា ដែលនៅតែស្ថិតក្នុងតំណែងរបស់ខ្លួនបើទោះជាមានកំណែទម្រង់ស្ថាប័ននេះទាំងស្រុងកាលពីខែមេសាហើយក្ដី។
បន្ទាប់ពីការចរចាជាច្រើនខែ តំណាងរាស្ត្រខាងគណបក្សសង្គ្រោះជាតិ និងខាងគណបក្សប្រជាជនកម្ពុជាកំពុងកាន់អំណាចបានអនុម័តច្បាប់ គ.ជ.ប.ថ្មី និងច្បាប់បោះឆ្នោតដែលកែប្រែកាលពីខែមីនា ដោយបើកផ្លូវឲ្យមានការបង្កើតគណៈកម្មាធិការជាតិរៀបចំការបោះឆ្នោតថ្មី ដែលត្រូវបានអនុម័តយល់ព្រមដោយសភាជាតិកាលពីថ្ងៃទី៩ ខែេមសា។
គ.ជ.ប. ទ្វេបក្សថ្មីនេះ ដែលមានសមាជិកបួនរូបតែងតាំងដោយគណបក្សនីមួយៗ និងសមាជិកទី៩ជាសមាជិកអព្យាក្រឹត នឹងរៀបចំការបោះឆ្នោតឃុំ-សង្កាត់នៅឆ្នាំ២០១៧ និងការបោះឆ្នោតជាតិនៅឆ្នាំ២០១៨។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបាននិយាយកាលពីម្សិលមិញថា ការជ្រើសរើសអគ្គលេខាធិការ គ.ជ.ប.ថ្មី ដែលជារដ្ឋបាលកំពូលរបស់ស្ថាប័ននេះគួរធ្វើឡើងយូរហើយ។
លោក សុវណ្ណ បាននិយាយថា “ខ្ញុំសូមអំពាវនាវដល់ គ.ជ.ប. ឲ្យជំនួសអគ្គលេខាធិការចាស់ឲ្យបានឆាប់តាមដែលអាចធ្វើទៅបាន ដើម្បីគោរពឆន្ទៈរបស់ប្រជាពលរដ្ឋ”។
លោក សុវណ្ណ បានបន្ថែមថា លោកបានលើកបញ្ហានេះជាមួយសមាជិកបក្សនៅកិច្ចប្រជុំមួយកាលពីដើមសប្ដាហ៍នេះ។
លោកបាននិយាយថា ដើម្បីឲ្យគណៈកម្មាធិការជាតិរៀបចំការបោះឆ្នោតថ្មីនេះដាច់ស្រឡះពី គ.ជ.ប.ចាស់ ដែលទទួលរងការចោទប្រកាន់ថាបានបន្លំសន្លឹកឆ្នោតឲ្យគណបក្សប្រជាជនកម្ពុជា លោក នីថា ដែលជាអគ្គលេខាធិការស្ថាប័ននេះរយៈពេលជាងមួយទសវត្សរ៍មកហើយ ត្រូវតែចេញពីតំណែង។
លោក សុវណ្ណ បាននិយាយថា “ខ្ញុំមិនគិតថា គាត់គ្មានសមត្ថភាពនោះទេ ប៉ុន្តែគាត់កាន់តំណែងនេះអស់រយៈពេលយូរមកហើយ ហើយនៅពេលកាន់តំណែងនេះ ភាពមិនប្រក្រតីជាច្រើនបានកើតឡើង និងបណ្ដាលឲ្យមានការជាប់គាំងនយោបាយ”។
លោកបានបន្ថែមថា “ខ្ញុំមិនចង់និយាយដោយផ្ទាល់អំពីនរណាម្នាក់ទេ ប៉ុន្តែយើងចង់ធានាថា ដំណើរការទាំងមូលនៃ គ.ជ.ប. គឺឯករាជ្យ និងអព្យាក្រឹត”។
លោក ហង្ស ពុទ្ធា អ្នកអង្កេតការណ៍បោះឆ្នោតជើងចាស់ដែលទទួលបានការតែងតាំងជាសមាជិក គ.ជ.ប. អព្យាក្រឹត និងបានទទួលតួនាទីជាអ្នកនាំពាក្យរបស់ស្ថាប័ននេះ បាននិយាយថា គណៈកម្មាធិការនេះបច្ចុប្បន្នកំពុងរៀបចំរដ្ឋបាលរបស់ខ្លួនឡើងវិញ។
លោក ពុទ្ធា បាននិយាយថា “គ.ជ.ប. ឥឡូវនេះកំពុងស្ថិតក្នុងដំណើរការព្រាងអនុក្រឹត្យស្ដីពីអគ្គលេខាធិការដ្ឋាន”។ លោកបានពន្យល់ថា គណៈកម្មាធិការពិសេសមួយត្រូវបានបង្កើតឡើងដើម្បីបំពេញភារកិច្ចនេះ។
“សេចក្ដីព្រាងនេះនឹងត្រូវបញ្ជូនទៅ គ.ជ.ប. សម្រាប់ការពិនិត្យឡើងវិញ មុនពេលបញ្ជូនទៅក្រសួងមុខងារសាធារណៈដើម្បីឲ្យប្រាកដថា ឯកសាររបស់យើងស្របតាមច្បាប់”។
លោក ពុទ្ធា បានបដិសេធមិននិយាយឲ្យច្បាស់ថា ពេលណាអគ្គលេខាធិការថ្មីត្រូវតែងតាំងនោះទេ។
លោកបាននិយាយថា “ខ្ញុំមិនអាចប្រាប់កាលបរិច្ឆេទជាក់លាក់ចំពោះបញ្ហានេះទេ ប៉ុន្តែវានឹងចេញក្នុងរង្វង់ពេលបីខែគិតចាប់ពីពេលឥឡូវនេះទៅ”។
លោក នីថា បាននិយាយថា ការជ្រើសរើសអគ្គលេខាធិការថ្មីអាស្រ័យលើសមាជិក គ.ជ.ប. ទន្ទឹមនឹងនោះក៏បានលើកឡើងដែរថា លោកមានលក្ខណៈសម្បត្តិល្អសម្រាប់កិច្ចការនេះ។
លោកបាននិយាយថា “តាមពិតទៅ ខ្ញុំមិនចង់និយាយច្រើនអំពីបញ្ហានេះទេ ដោយហេតុថា ខ្ញុំមិនស្ថិតក្នុងតំណែងត្រូវជ្រើសរើស”។
លោកបានបន្ថែមថា “ជាទូទៅ ខ្ញុំមានសិទ្ធិដូចអ្នកដទៃទៀតដែរក្នុងការដាក់ពាក្យដើម្បីយកតំណែងនេះ។ មានន័យថា ខ្ញុំមានសមត្ថភាព”៕ មានិត