34 C
Phnom Penh

ប៉ូលិស​ចង់​បណ្ដេញ​មេ​ខ្លួន​ទាក់​ទិន​នឹង​អំពើ​ពុករលួយ​ និង​ការ​ប្រព្រឹត្ត​មិន​គប្បី

ដោយ ឌឹ ខេមបូឌា ដេលី

បទវិភាគ

​មន្ត្រី​បាននិយាយ​​កាលពីម្សិលមិញ​ថា មន្ត្រី​ប៉ូលិស​សង្កាត់​​ប្រាំមួយ​នាក់​​មកពី​ក្រុង​បានលុង ខេត្ត​រតនៈគិរី​បាន​ដាក់​ពាក្យ​បណ្ដឹង​នៅ​សប្ដាហ៍​នេះ​ ដោយ​ទាម​ទារ​ឲ្យ​ដក​​មេ​ប៉ូលិស​របស់​ខ្លួន​ ព្រោះ​បាន​កេង​បន្លំ​ប្រាក់​រដ្ឋ​ និង​ចាត់​ទុក​​មន្ត្រី​ក្រោម​បង្គាប់​របស់​គាត់​ “​ដូច​សំរាម​”។

ពាក្យ​បណ្ដឹង​ដែល​ចុះ​កាលបរិច្ឆេទ​ថ្ងៃ​ច័ន្ទ​ឲ្យ​ដឹង​ថា ​ប្រសិន​បើ​​គេ​មិន​ដក​លោក​ ភន ទុំ ​នាយ​ប៉ុស្តិ៍​​សង្កាត់​​​ចេញ​ទេ មន្ត្រី​ប្រាំ​មួយ​នាក់​​នឹង​លាលែង​ចេញពី​តំណែង​របស់​ខ្លួន​នៅ​សង្កាត់​ឡាបានសៀក។

ពាក្យ​បណ្ដឹង​ដែល​ប្ដឹង​ទៅ​ចៅ​​សង្កាត់​កាលពី​ថ្ងៃ​ពុធ​និយាយ​ថា “​យើង​មិន​សប្បាយ​ចិត្ត​នឹង​​លោក​ ភន ទុំ ពីព្រោះ​គាត់​មិន​មាន​លក្ខណៈ​ជា​មេដឹកនាំ​​ ក្រអើត​ក្រទម​ និង​ធ្វើ​ការ​សម្រេច​​អត្តនោម័ត​ខ្លួន​ឯង​”។

​លោក យន់ គង់ នាយ​រង​ប៉ុស្តិ៍​របស់​លោក​ ទុំ ដែល​បាន​ផ្ដិត​មេដៃ​លើ​បណ្ដឹង​នោះ​ បាន​ចោទ​មេរបស់​ខ្លួន​ថា​បន្លំ​យក​លុយ​ដែល​ទុក​សម្រាប់​ប៉ូលិស​សង្កាត់​ ដោយ​ការិយាល័យ​ប៉ូលិស​ខេត្ត។

លោក​បាន​និយាយ​ថា “​ខ្ញុំ​គិត​ថា លោក ភន ទុំ បាន​ប្រព្រឹត្ត​​អំពើ​ពុក​រលួយ​ ពីព្រោះ​គាត់​​មិន​ដែល​ឲ្យ​យើង​ដឹង​​ថា គាត់​​ប្រើ​ប្រាក់​ធ្វើ​អ្វី​នោះ​ទេ”។

លោក គង់ បាន​បន្ថែម​ថា លោក ទុំ ក៏​បាន​ប្រព្រឹត្ត​មិន​គប្បី​ម្ដង​ហើយ​ម្ដង​ទៀត​លើ​កូនចៅ​របស់​គាត់​ដែរ​។

លោក​បាន​និយាយ​ថា “​​គាត់​ជា​ក្មេង​ជំនាន់​ក្រោយ​ ប៉ុន្តែ​គាត់​ប្រើ​ពាក្យ​សម្ដី​ឈ្លើយ​ណាស់​ចំពោះ​មន្ត្រី​ថ្នាក់​ក្រោម​។ លោក ទុំ គ្មាន​ជំនាញ​ដឹកនាំ​ទេ ពីព្រោះ​គាត់​​មើល​ងាយ​មន្ត្រី​របស់​គាត់​ដូច​សំរាម​​នៅ​ពេល​គាត់​បញ្ជា​”។

នៅ​ពេល​ទាក់​ទង​កាលពី​ម្សិលមិញ លោក ទុំ បាន​និយាយ​ថា ការ​ចោទ​ថា​លោក​ប្រព្រឹត្ត​​ពុក​រលួយ​គឺ​មិន​ពិត​ទេ ហើយ​ថា​គាត់​​បាន​ប្រើ​លុយ​សម្រាប់​​ប្រតិបត្តិការ​បង្ក្រាប​​គ្រឿង​ញៀន​ ដែល​មន្ត្រី​ប្រាំមួយ​នាក់​នោះ​មិន​បាន​ដឹង​។

គាត់​បាន​និយាយ​ថា “​ខ្ញុំ​មិន​បាន​ប្រព្រឹត្ត​អំពើ​ពុករលួយ​ទេ ពីព្រោះ​ខ្ញុំ​ក្មេង​ណាស់​ ខ្ញុំ​ចង់​មាន​កេរ្តិ៍ឈ្មោះ​ល្អ​ដើម្បី​ធ្វើ​ការ​ងារ​របស់​ខ្ញុំ”។

លោក ទុំ បាន​បន្ថែម​ថា នៅ​ពេល​​លោក​ចេញ​បញ្ជា​ទៅ​​មន្ត្រី​របស់​​លោក​​ ពួកគេ​ជា​ញឹក​ញាប់​​​មិន​​ធ្វើ​តាម​ទេ។

គាត់​បាន​និយាយ​ថា “​នៅ​ពេល​ខ្ញុំ​ទទួល​បញ្ជា​ពី​មេ​របស់​ខ្ញុំ​ ខ្ញុំ​ស្នើ​មន្ត្រី​ថ្នាក់​ក្រោម​របស់​ខ្ញុំ​ឲ្យ​ធ្វើ​ការ​ ប៉ុន្តែ​ជួន​កាល​ពួកគេ​មិន​លើកទូរស័ព្ទ​របស់​ខ្ញុំ​ទេ ហើយ​​ពេល​ខ្លះ​ពួកគេ​ប្រកែក​​នឹង​បញ្ជា​របស់​ខ្ញុំ។ ខ្ញុំ​ត្រូវ​តែ​ម៉ឺងម៉ាត់​​ជាមួយ​អ្នក​ទាំង​នោះ ពីព្រោះ​ពួកគេ​មិន​គោរព​បញ្ជា​របស់​ខ្ញុំ”។

លោក ហួត បូរី អធិការ​​នគរ​បាល​ក្រុង​បានលុង​​បាន​និយាយ​ថា បណ្ដឹង​នោះ​​ត្រូវ​បាន​បញ្ជូន​មក​ដល់​​លោក​កាលពី​ថ្ងៃ​ពុធ ហើយ​ថា គាត់​បាន​បញ្ជូន​​វា​បន្ត​ទៅ​​លោក​ ងួន គឿន ​​ស្នង​ការ​​នគរ​បាល​ខេត្ត​ ដែល​បាន​បដិសេធ​មិន​ធ្វើ​អត្ថាធិប្បាយ​ទេ៕ មានិត​​​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស