មន្ត្រីតុលាការបានឲ្យដឹងថា បុរសជនជាតិចិនចំនួនបីនាក់ និងខ្មែរម្នាក់ ត្រូវបានចោទប្រកាន់កាលពីថ្ងៃសុក្រដោយសាលាដំបូងខេត្តបាត់ដំបងពីបទបើកន្លែងព្យាបាលដោយគ្មានអាជ្ញប័ណ្ណ និងផ្គត់ផ្គង់ថ្នាំខូចគុណភាព ឬក្លែងក្លាយ។
បុរសទាំងបួននាក់នេះត្រូវបានចាប់ខ្លួនកាលពីថ្ងៃពុធ ពោលគឺប្រហែលប្រាំខែបន្ទាប់ពីមានការលេចឡើងជាលើកដំបូងនូវការឆ្លងរាលដាលនៃមេរោគអេដស៍នៅក្នុងឃុំរកាស្រុកសង្កែ ដែលមានអ្នកភូមិជាង២៥០នាក់បានធ្វើតេស្តឈាមរកឃើញថា មានផ្ទុកមេរោគអេដស៍នោះ។
ការឆ្លងរាលដាលនៃមេរោគអេដស៍នៅក្នុងឃុំនេះ ត្រូវបានគេបន្ទោសលើលោក យ៉ែម ជ្រិន គ្រូពេទ្យគ្មានអាជ្ញាប័ណ្ណដែលផ្តល់សេវាកម្មព្យាបាលក្នុងតម្លៃថោកជូនអ្នកភូមិនៅក្នុងតំបន់នេះ ហើយលោកត្រូវបានបញ្ជូនទៅពន្ធនាគារពីបទមនុស្សឃាត បន្ទាប់ពីសារភាពថា ខ្លួនបានប្រើប្រាស់សឺរាំុងឡើងវិញ។
ក្រោយការឆ្លងរាលដាលនេះ ក្រសួងសុខាភិបាល និងក្រសួងមហាផ្ទៃបានប្តេជ្ញាចាត់វិធានការបិទនិងបង្ក្រាបកន្លែងព្យាបាល និងគ្រូពេទ្យគ្មានអាជ្ញាប័ណ្ណ ដែលគេឃើញមាននៅទូទាំងប្រទេស។
ព្រះរាជអាជ្ញារង ហេង លុយ ដែលចោទប្រកាន់បុរសទាំងបួននាក់នេះកាលពីថ្ងៃសុក្របានមានប្រសាសន៍ថា “តុលាការបានចោទប្រកាន់ពួកគេពីបទបើកគ្លីនិកដោយគ្មានការអនុញ្ញាតពីក្រសួង ហើយបានប្រើប្រាស់ថ្នាំក្លែងក្លាយ ឬផុតសុពលភាព”។
លោក ជេត វណ្ណី នាយការិយាល័យនគរបាលព្រហ្មទណ្ឌខេត្តេនះបានលើកឡើងថា បុរសទាំងបួននាក់នេះកំពុងត្រូវបានឃុំខ្លួនជាបណ្តោះអាសន្ន ហើយនឹងត្រូវវិលត្រឡប់មកកាន់តុលាការវិញនៅថ្ងៃទី៤ ខែមិថុនា ជាថ្ងៃគ្រោងសម្រាប់បើកសវនាការ។
ពេលទាក់ទងកាលពីថ្ងៃសុក្រ លោក វឿង ប៊ុនរ៉េត ប្រធានមន្ទីរសុខាភិបាលខេត្តបានលើកឡើងថា គ្លីនិកដែលបានបិទទាំងបីមានការយឺតយ៉ាវក្នុងការអនុវត្តតាមសេចក្តីព្រមានឲ្យមកសុំច្បាប់ធ្វើប្រតិបត្តិការពីក្រសួងសុខាភិបាល។
លោកបានមានប្រសាសន៍ថា “យើងបានស្នើឲ្យពួកគេសុំការអនុញ្ញាតពីក្រសួង ប៉ុន្តែ ពួកគេនៅតែមិនទៅសុំការអនុញ្ញាត ហេតុដូច្នេះយើងត្រូវតែចាត់វិធានការ”។
លោក វណ្ណ សៀងហេង អាយុ៣២ឆ្នាំជាជនជាតិខ្មែរកាន់លិខិតឆ្លងដែនចិនដែលស្ថិតក្នុងចំណោមបុរសដែលត្រូវបានចោទប្រកាន់ទាំងនេះ បានសារភាពកាលពីថ្ងៃសុក្រចំពោះការចោទប្រកាន់ទាំងពីរនេះ ប៉ុន្តែ បានទម្លាក់ការចោទប្រកាន់ខ្លះលើមន្ត្រីថ្នាក់ខេត្ត ដែលលោកលើកឡើងថា ជាអ្នកយឺតយ៉ាវក្នុងការចុះបញ្ជីកន្លែងព្យាបាលរបស់លោក។
លោក សៀងហេង បានលើកឡើងថា ខ្លួនបានស្តុកទុកថ្នាំចិនសែ ដែលក្រសួងមិនទទួលស្គាល់ និងថ្នាំផុតសុពលភាពមួយចំនួនតូច ប៉ុន្តែលោកបានអះអាងថា លោក ក៏ខិតខំក្នុងការធ្វើឲ្យកន្លែងព្យាបាលរបស់ខ្លួនស្របច្បាប់ផងដែរ។
លោកបាននិយាយថា “យើងបានស្នើមន្ទីរសុខាភិបាលខេត្តចំនួនបីលើក ដើម្បីសុំការអនុញ្ញាត ប៉ុន្តែ មន្ទីរនេះនៅតែមិនទាន់ផ្តល់ការអនុញ្ញាតឲ្យយើង”។
លោកស្រី កែវ សុវណ្ណារ័ត្ន សមាជិកសភាមកពីគណបក្សសង្គ្រោះជាតិ និងជាប្រធានគណៈកម្មការសុខាភិបាលនៃរដ្ឋសភាបានលើកឡើងកាលពីថ្ងៃសុក្រថា ក្រសួងសុខាភិបាល និងក្រសួងមហាផ្ទៃចាំបាច់ត្រូវតែអនុវត្តឲ្យបានត្រឹមត្រូវតាមការសន្យារបស់ខ្លួនដែលថា នឹងបិទគ្លិនិកខុសច្បាប់។
លោកស្រីបានស្នើឲ្យមានការធ្វើការសិក្សាទូទាំងប្រទេសដើម្បីរកឲ្យឃើញពីចំនួននៃ គ្រូពេទ្យខុសច្បាប់ ដែលកំពុងផ្តល់ការព្យាបាលដ៏គ្រោះថ្នាក់។
លោកស្រីបានមានប្រសាសន៍ថា “សម្រាប់ខ្ញុំ ខ្ញុំគិតថា គ្លីនិកឯកជនដែលគ្មានការអនុញ្ញាតនៅកម្ពុជាគឺមិនមែនមានត្រឹមតែរាប់រយនោះទេ គឺមានរាប់ពាន់ឯណោះ”៕ ស៊ុយឈាង