អ្នកភូមិខេត្តមណ្ឌលគិរីបាននិយាយថា អ្នកកាប់ឈើដែលធ្វើការនៅចម្ការកៅស៊ូមួយជាកម្មសិទ្ធិរបស់អភិបាលរងម្នាក់កំពុងបន្តកាប់ដើមជ័រទឹកខុសច្បាប់ ដែលពួកគាត់ពឹងអាស្រ័យដើម្បីចិញ្ចឹមជីវិត ហើយបានស្នើឲ្យអង្គការសិទ្ធិមនុស្សអាដហុកធ្វើការស៊ើបអង្កេត។
ក្រុមអ្នកភូមិជនជាតិដើមភាគតិចព្នងបានចោទក្រុមហ៊ុន Villa Development ថាបានកាប់ដើមជ័រទឹករបស់ពួកគាត់នៅក្រៅព្រំប្រទល់ចម្ការកៅស៊ូរបស់ខ្លួនស្ថិតក្នុងសង្កាត់សុខដុម ក្រុងសែនមនោរម្យ។
ពួកគាត់បានបញ្ជូនតំណាងមករាជធានីភ្នំពេញកាលពីខែតុលា ដើម្បីដាក់ពាក្យបណ្ដឹងជាមួយខុទ្ទកាល័យលោកនាយករដ្ឋមន្ត្រី ហ៊ុន សែន ស្នើសុំឲ្យលុបចោលដីសម្បទាននេះ។
ក្រុមអ្នកភូមិនបាននិយាយថា ចម្ការកៅស៊ូនេះនៅតែធ្វើការកាប់ឈើក្រៅព្រំប្រទស់ដដែល។ អ្នកស្រី ផ្លេក ភិរម្យ បាននិយាយថា គាត់បានឮសំឡេងរណារយន្តចេញពីក្នុងព្រៃកាលពីថ្ងៃសុក្រ ហើយបានទៅពិនិត្យមើលជាមួយស្ត្រីប្រាំនាក់ទៀត។
នៅក្នុងព្រៃ និងក្រៅព្រំប្រទល់របស់ចម្ការកៅស៊ូនេះ អ្នកស្រីបាននិយាយថា ពួកគាត់បានឃើញអ្នកកាប់ឈើពីរក្រុមមានគ្នាបួននាក់កាប់ឈើ និងដើមជ័រទឹករបស់ពួកគាត់ចំនួន៤០ដើមស្ថិតក្នុងផ្នែករបស់ពួកគេ ដែលមួយចំនួនមានប្រវែងរហូតដល់៣០ម៉ែត្រ ជាមួយដើមឈើផ្សេងៗប្រហែល៦០ដើមទៀត។
អ្នកស្រីបាននិយាយថា “យើងដឹងថា មនុស្សប្រាំបីនាក់ធ្វើការឲ្យក្រុមហ៊ុននេះ ពីព្រោះពួកគេបានបើករថយន្តចូលទៅក្នុងដីរបស់ក្រុមហ៊ុន”។
អ្នកស្រី ភិរម្យ បាននិយាយថា ក្រុមអ្នកភូមិបានឃើញរថយន្តដឹកឈើបើកចូលទៅក្នុងចម្ការរាល់ថ្ងៃ។
លោក យឹម លុច អភិបាលរងខេត្តដែលកាលពីខែតុលាបានមានប្រសាសន៍ថា ភរិយារបស់លោកជាម្ចាស់ដីនេះ កាលពីម្សិលមិញបានច្រានចោលការអះអាងរបស់អ្នកភូមិ។
លោកបានមានប្រសាសន៍ថា “ខ្ញុំគិតថា ក្រុមហ៊ុនមិនកាប់ឈើក្រៅតំបន់សម្បទានឡើយ។ ការចោទប្រកាន់នេះគឺមិនពិតឡើយ”។
លោក យឹម លុច ក៏បានមានប្រសាសន៍ផងដែរថា ក្រុមហ៊ុនមិនកាប់ឈើទាំងនេះទេ ប៉ុន្តែពាណិជ្ជករពីរនាក់ឈ្មោះ លឹម បុណ្ណា និងម្នាក់ទៀតដែលលោកលើកឡើងថា លោកស្គាល់ត្រឹមតែថា ឧកញ៉ា ភក្ដី។
លោកបានមានប្រសាសន៍ថា “យើងមិនអាចដាំដុះនៅចម្ការកៅស៊ូកើតទេ លុះណាតែយើងកាប់ឈើនៅទីនោះរួចហើយ ដូច្នេះអាជ្ញាធរអនុញ្ញាតឲ្យក្រុមហ៊ុនប្រមូលឈើទាំងនោះ ហើយបង់ពន្ធជូនរដ្ឋ។ ឧកញ៉ា លឹម ប៊ុណ្ណា និងឧកញា៉ ភក្ដី ទទួលបានសិទ្ធិដឹកឈើទាំងនេះឲ្យក្រុមហ៊ុន។ ឧកញ៉ា បុណ្ណា និងឧកញ៉ា ភក្ដី អាចដឹកឈើពេលណាក៏បាន ពីព្រោះពួកគេបង់ពន្ធជូនរដ្ឋ”។
លោក សុខ រដ្ឋា អ្នកសម្របសម្រួលអង្គការអាដហុកប្រចាំខេត្តនេះបានមានប្រសាសន៍ថា លោកទទួលបានពាក្យបណ្ដឹងរបស់ក្រុមអ្នកភូមិកាលពីថ្ងៃសុក្រ ហើយនឹងចុះទៅកន្លែងនោះដើម្បីស៊ើបអង្កេតការអះអាងរបស់ពួកគាត់នៅប៉ុន្មានថ្ងៃខាងមុខនេះ៕ សារុន