27.1 C
Phnom Penh

ព្រះ​អង្គម្ចាស់ រណឫទ្ធិ មាន​បន្ទូលថា គណបក្ស​សង្គ្រោះ​ជាតិ​ប្រើ​ប្រាស់​ ‘វប្បធម៌សន្ទនា’ ដើម្បី​បោកប្រាស់​អ្នកគាំទ្រ​

ដោយ ឌឹ ខេមបូឌា ដេលី

បទវិភាគ

កាល​ពីម្សិលមិញ ព្រះ​អង្គម្ចាស់ នរោត្តម រណឫទ្ធិ បាន​ព្រមាន​មេដឹកនាំ​គណបក្ស​សង្គ្រោះ​ជាតិឲ្យ​​លុប​ចោល​ “វប្បធម៌​សន្ទនា” របស់​ខ្លួន​ជាមួយ​គណបក្ស​ប្រជាជន​កម្ពុជាទៅ​ ដែល​ព្រះ​អង្គ​ម្ចាស់​មាន​បន្ទូល​ថា ជា​ការ​ប៉ុន​ប៉ង​របស់​មេដឹកនាំ​គណបក្ស​ប្រឆាំង​ដើម្បី​បោក​​​ប្រាស់​អ្នក​គាំទ្រ​របស់​ខ្លួន។

ព្រះអង្គម្ចាស់​ រណឫទ្ធិ ដែល​បាន​យាង​មក​ដឹកនាំ​​​គណបក្ស​រាជានិយម​វិញ​​កាលពី​ខែ​មករា បន្ទាប់ពី​ត្រូវ​បាន​បណ្ដេញ​ចេញ​កាលពី​ឆ្នាំ​២០០៦​នោះ កាលពី​ថ្ងៃ​សៅរ៍​បាន​ប្រាប់​អ្នក​គាំទ្រ​វ័យ​ក្មេង​រាប់​រយ​នាក់​នៅ​កោះពេជ្រ​ ក្នុង​រាជធានី​ភ្នំពេញ​ថា លោក សម រង្ស៊ី ប្រធាន​គណ​បក្ស​សង្គ្រោះ​ជាតិ និង​លោក កឹម សុខា អនុប្រធានគណបក្ស​មិន​ស្មោះ​ត្រង់​ក្នុង​ការ​អះអាង​របស់​​ពួកគេ​ដែល​ថា ការ​សន្ទនា​នឹង​ត្រួស​ត្រាយ​ផ្លូវសម្រាប់ការ​ផ្លាស់​ប្ដូរ​ឡើយ​។

ព្រះអង្គម្ចាស់​ រណឫទ្ធិ ដែល​គណបក្ស​របស់​ព្រះអង្គ​បាន​ធ្លាក់ដុនដាប​​បន្តិច​ម្ដង​ៗ​បន្ទាប់ពី​ទទួល​ជ័យ​ជម្នះ​ក្នុង​ការ​បោះ​ឆ្នោត​ជាតិ​ក្នុង​ឆ្នាំ​១៩៩៣ ហើយ​​បាន​យល់​ព្រម​ចែក​អំណាច​ជាមួយ​គណបក្ស​ប្រជាជន​កម្ពុជា​នោះ​បាន​មាន​បន្ទូល​ថា “​ខ្ញុំ​សូម​ផ្ញើ​សារ​ទៅ​ឯក​ឧត្តម​ សម រង្ស៊ី និង​ឯកឧត្ដម​ កឹម សុខា​ ថា សូម​ឈប់​ប្រើ​ “​ការ​សន្ទនា​” ទៅ​ ពីព្រោះ​នេះ​​ជា​ល្បិច​​ដែល​ពួកគេ​​ប្រើ​ប្រាស់​ដើម្បី​​បោក​ប្រាស់​ប្រជាជន”​។

ព្រះអង្គម្ចាស់​បាន​មាន​បន្ទូល​ថា “ខ្ញុំ​ចង់​រំឭក​ឯក​ឧត្ដម​​ សម រង្ស៊ី និង​ឯក​ឧត្ដម​ កឹម សុខា ពីព្រោះ​ខ្ញុំ​បាន​យល់​ព្រម​ធ្វើ​នេះ​ [ការ​សហការ​ជាមួយ​គណបក្ស​ប្រជាជន​កម្ពុជា​] ពីព្រោះ​ខ្ញុំ​ចង់​បម្រើ​ប្រទេស​ជាតិ​” ដោយ​ព្រះអង្គ​បន្ត​លើក​សរសើរពី​​ការ​ខិតខំ​ប្រឹង​ប្រែង​របស់​បិតា​ព្រះអង្គ​ក្នុង​ការ​ធ្វើ​ការ​ជាមួយ​គណបក្ស​កាន់​អំណាច​។

ព្រះអង្គ​​បាន​មាន​បន្ទូល​ថា “​យើង​​បាន​ទទួល​ជ័យជម្នះ​ក្នុង​ការ​បោះ​ឆ្នោត ប៉ុន្តែ​យើង​បាន​ចែក​អំណាច​ ពីព្រោះ​ខ្ញុំ​ចង់​នាំ​មក​នូវ​សន្តិភាព​ជូន​ប្រជាពលរដ្ឋ​។ ខ្ញុំគិត​ថា នេះ​មិនមែន​​ត្រឹម​តែ​​លោក សម រង្ស៊ី និង​លោក កឹម សុខា ​ដែល​បាន​បង្កើត​វប្បធម៌​សន្ទនា​ប៉ុណ្ណោះទេ សម្ដេច​ឪ​​​ នរោត្ដម សីហនុ ធ្វើ​វា​បាន​ល្អ​ជាង​នេះ​​ទៅ​ទៀត​”។

ដោយ​ពន្យល់​​ពី​ការ​អត្ថាធិប្បាយ​របស់​ព្រះអង្គ​​កាលពី​ម្សិលមិញ លោក ញ៉េប ប៊ុនជិន អ្នក​នាំ​ពាក្យ​គណបក្ស​ហ្វុ៊នស៊ិនប៉ិច​បាន​កត់​សម្គាល់​ថា ដំបូង គណបក្ស​សង្គ្រោះ​ជាតិ​​ប្រកាន់​ជំហរ​ផ្សះផ្សា​ទៅកាន់​​គណបក្ស​ប្រជាជនកម្ពុជា​​នៅ​ពេល​សមាជិក​សភា​គណបក្ស​​​​ប្រឆាំង​ប្រាំពីរ​រូប​ជាប់​ពន្ធនាគារ​។

លោក ប៊ុនជិន បាន​មាន​ប្រសាសន៍​ថា “​ខ្ញុំ​គ្រាន់​តែ​ចង់​សួរ​លោក សម រង្ស៊ី និង​លោក កឹម សុខា​ ថា ហេតុ​អ្វី​បាន​ជា​មិន​ចាប់​​ផ្ដើម​ការ​សន្ទនា​បន្ទាប់​ពី​ការ​បោះ​ឆ្នោត​ខែ​កក្កដា ឆ្នាំ​២០១៣​ទៅ? ហេតុ​អ្វី​បាន​​ជា​ពួកគេ​ទើប​តែ​ចាប់​ផ្ដើម​​និយាយ​អំពី​ការ​សន្ទនា​នៅ​ពេល​សមាជិក​គណ​បក្ស​របស់​ខ្លួន​​ប្រឈម​​រឿង​ក្ដី​តុលាការ​ទៅវិញ?។

លោក​បាន​បន្ថែម​ថា “​ខ្ញុំ​អាច​និយាយ​បាន​ថា គណបក្ស​សង្គ្រោះ​ជាតិ​ប្រឈម​ភាព​ទាល់​ច្រក​នយោបាយ​ ពេលនោះ​ពួកគេ​បាន​ងាក​ទៅ​ប្រើ​ការ​សន្ទនា​ ពីព្រោះ​ពួកគេ​គ្មាន​ជម្រើស​ផ្សេង​ដើម្បី​ដោះ​ស្រាយ​បញ្ហា​របស់​ខ្លួន​ឡើយ​”។

លោក យ៉ែម បុញ្ញឫទ្ធិ អ្នក​នាំពាក្យ​គណបក្ស​សង្គ្រោះ​ជាតិ​បាន​មាន​ប្រសាសន៍​កាលពី​ម្សិល​មិញ​ថា ជោគជ័យ​នៃ​យុទ្ធសាស្ត្រ​របស់​គណបក្ស​ប្រឆាំង​នឹង​ត្រូវ​គេឃើញ​នៅ​ពេល​បោះ​ឆ្នោត​នាពេល​​អនាគត​​។

លោក​បានមាន​ប្រសាសន៍​ថា “​គណបក្ស​សង្គ្រោះជាតិ​កំពុង​បង្កើន​សមាជិក​របស់​​ខ្លួន ហើយ​ភាគច្រើន​នៃពួកគេ​មាន​​ភាព​ស្មោះ​ត្រង់​យ៉ាង​ខ្លាំង​ចំពោះ​គណបក្ស​។ ដូច្នេះ​ខ្ញុំ​គិត​ថា ប្រជាពលរដ្ឋ​​ប្រហែល​ជាមាន​ការ​យល់​ដឹង​ច្បាស់​លាស់ ហើយ​ពួកគាត់​នឹង​រួម​គ្នា​ដោះ​ស្រាយ​បញ្ហា​នៅ​ពេល​បោះឆ្នោត​លើក​ក្រោយ​”៕ សារុន​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស