32 C
Phnom Penh

សាលារាជធានី​បញ្ចប់​កិច្ចសន្យា​ជាមួយ​ក្រុមហ៊ុន​សំណង់​ដែល​សាងសង់​​បញ្ជរ​បង់ថ្លៃ​

ដោយ ឌឹ ខេមបូឌា ដេលី

បទវិភាគ

រថយន្ត​​​បើក​​​កាត់​​​តាម​​​កន្លែង​​​បង់​​​ប្រាក់​​​នៅ​​​លើ​​​ផ្លូវ២០០៤ នៅ​​​ក្នុង​​​ខណ្ឌ​​​សែន​​​សុខ​​​ ក្រុង​​​ភ្នំពេញ​​​ កាលពី​​​ម្សិលមិញ​​​។ រូបថតៈ ស៊ីវ ចាន់​​​ណា​​​/The Cambodia Daily

កាលពី​ម្សិលមិញ សាលា​រាជធានី​ភ្នំពេញ​បាន​លុប​ចោល​កិច្ច​សន្យា​​ជាមួយ​ក្រុម​ហ៊ុន​សំណង់​ក្នុង​ស្រុក​មួយ​ដែលកំពុង​​​សាង​សង់​បញ្ជរ​បង់​ថ្លៃ​ពីរ​​តាម​ផ្លូវ​លេខ​២០០៤ ក្នុង​ខណ្ឌ​សែន​សុខ ដើម្បី​រៃអង្គាស​ប្រាក់​​សម្រាប់​ការ​ស្ថាបនា​ និង​ការ​ជួស​ជុល​ផ្លូវ​ដែល​កំពុង​តែ​បន្ត​នេះ​។

លោក ប៉ា សុជាតិវង្ស អភិបាល​រាជធានី​ភ្នំពេញ​បាន​​មាន​ប្រសាសន៍​​កាលពី​ម្សិលមិញ​ថា “​ក្រុម​ហ៊ុន Sarla Investment Group បាន​​ស្ថាបនា​ផ្លូវលេខ​​២០០៤ ព្រម​ទាំង​ផ្លូវ​ផ្សេងៗ​ទៀត​នៅ​ក្នុង​ខណ្ឌ​នេះ​រយៈ​ពេល​ប្រហែល​១០​ឆ្នាំ​មក​ហើយ ហើយ​ដោយ​សារ​រដ្ឋាភិបាល​មិន​អាច​រក​ប្រាក់​សម្រាប់​ចំណាយ​ការស្ថាបនានោះ ទើប​​​មាន​កិច្ច​សន្យា​អនុញ្ញាត​ឲ្យ​ក្រុម​ហ៊ុ​ន​នេះ​រ៉ាប់រង​ការ​ចំណាយ​តាម​រយៈ​ការ​ប្រមូល​ប្រាក់​បង់​ថ្លៃ​សម្រាប់​រយៈ​ពេល​៣០​ឆ្នាំ​។

លោក បា៉ សុជាតិវង្ស បានមាន​ប្រសាសន៍​ថា ប៉ុន្តែ​នៅពេល​សាលា​រាជធានី​កាលពី​ពេល​ថ្មី​ៗ​នេះ​បាន​សុំ​ឲ្យ​ក្រុមហ៊ុន Sarla ​បង្កើន​ការ​ស្ថាបនា​ផ្លូវ​​តាម​បទដ្ឋាននោះ ​ ក្រុម​ហ៊ុន​បាន​សុំ​ឲ្យ​សាលា​រាជធានី​បង្កើន​ការ​បង់​​​ថ្លៃ​ និង​បន្ត​​រយៈ​ពេល​កិច្ច​សន្យា​របស់​ខ្លួន​។

លោក​បានមាន​ប្រសាសន៍​ថា “​ក្រុម​ហ៊ុន​ចង់​យក​តម្លៃ​​ពី​អ្នក​ធ្វើ​ដំណើរ​ច្រើន​ជាង​ពេល​មុន ដូច្នេះ​ហើយ​ជាមូល​ហេតុ​ដែល​យើង​បាន​សម្រេច​លុប​ចោល​កិច្ចសន្យា”។

លោក ប៉ា សុជាតិវង្ស មិន​បង្ហើប​ឲ្យ​ដឹង​ថា តើ​កិច្ច​សន្យា​ជាមួយ​ក្រុម​ហ៊ុន Sarla មាន​ទឹក​ប្រាក់​ប៉ុន្មាន​នោះ​ឡើយ។ លោក​បានមាន​ប្រសាសន៍​ថា សាលា​រាជធានី​​នឹង​ទូទាត់​​សង​សម្រាប់​ការ​ខាត​បង់​ ហើយ​បន្ត​ទទួល​ខុស​ត្រូវ​ចំពោះ​ការ​ស្ថាបនា និង​ការ​ជួស​ជុល​ផ្លូវ​។

លោក សុខ ហួត ម្ចាស់​ក្រុម​ហ៊ុន Sarla បាន​មាន​ប្រសាសន៍​ថា លោក​មិន​ដឹង​ថា តើ​​ប្រាក់​ប៉ុន្មាន​ដែល​សាលា​រាជធានី​នឹង​បង់​ឲ្យ​លោក​​ ដើម្បី​បញ្ចប់​កិច្ច​សន្យា​​ឡើយ​។

ដោយ​បដិសេធ​មិន​ធ្វើ​អត្ថាធិប្បាយ​បន្ថែម លោក​បានមាន​ប្រសាសន៍​ថា “​រដ្ឋាភិបាល​​នឹង​ផ្ដល់​សំណង​ដល់​​ខ្ញុំ​ ប៉ុន្តែ​ខ្ញុំ​មិន​ដឹង​ថា​ប៉ុន្មាន​នោះ​ទេ”។

លោក ប៉ា សុជាតិវង្ស បាន​មាន​ប្រសាសន៍​ថា មុន​ពេល​លុប​ចោល​កិច្ច​សន្យា​ សាលា​រាជធានី​បាន​ព្យាយាម​បញ្ចុះ​បញ្ចូល​ក្រុម​ហ៊ុន​កុំ​ឲ្យ​យក​ថ្លៃពី​​អ្នកភូមិ​មូលដ្ឋាន ប៉ុន្តែ​មិន​បាន​ជោគ​ជ័យ​ឡើយ​។

លោក​បានមាន​ប្រសាសន៍​ថា “​​យើង​បាន​សុំឲ្យ​ក្រុម​ហ៊ុន​មានការ​អាណិត​អាសូរ​ចំពោះ​អ្នកភូមិ​​ដែល​ធ្វើ​ដំណើរ​តាម​ផ្លូវ ហើយ​កុំ​យក​ប្រាក់​ពីពួកគាត់​អី ប៉ុន្តែ​ក្រុម​ហ៊ុន​បាន​បដិសេធ​ ពីព្រោះ​ពួកគេ​បាន​ចំណាយ​ប្រាក់អស់​​ជាច្រើន​ដើម្បី​ស្ថាបនា​ផ្លូវ​។ យើង​សម្រេច​ទូទាត់​សង​ក្រុម​ហ៊ុន​ដើម្បី​បញ្ចប់​បញ្ហា។

អ្នកភូមិ​ដែល​រស់​នៅ​តាម​​ផ្លូវលេខ​​២០០៤​​បាន​និយាយ​ថា ក្រុម​ហ៊ុន​ Sarla បាន​​ចាប់​ផ្ដើម​កំណត់​ការ​បង់​ថ្លៃ​០,២៥​ដុល្លារ​រយៈ​ពេល​បី​ឬបួន​ឆ្នាំ​មក​ហើយ។

អ្នកភូមិ​ឈ្មោះ​ អួម ចំរើន អាយុ​៤៥​ឆ្នាំ ដែល​បាន​រស់​នៅ​ក្នុង​តំបន់​នោះ​រយៈពេល​២០​ឆ្នាំ​មក​ហើយបាននិយាយ​ថា “​ពួកគេ​មិន​គួរ​យក​ប្រាក់​ទេ ពីព្រោះ​វា​មិន​មែន​ជា​ផ្លូវ​វែង​ឡើយ។ យើង​រស់​នៅ​ពាក់​កណ្ដាល​នៃ​បញ្ជរ​បង់​ប្រាក់​ទាំង​ពីរ ហើយ​ត្រូវ​ចំណាយ​ប្រាក់​ច្រើនណាស់​​គ្រាន់​តែ​ការ​ធ្វើ​ដំណើរ​ទៅ​ធ្វើ​ការ​”។

លោក ឃឹម កុសល អាយុ​៤០​ឆ្នាំ​បាន​និយាយ​ថា លោក​បាន​ឆ្លង​កាត់​បញ្ជរ​​បង់​ប្រាក់​យ៉ាង​តិច​បី​ដង​ក្នុង​មួយ​ថ្ងៃ​។ លោក​បាន​និយាយ​ថា “​ប្រសិន​បើ​ពួកគេ​យក​លុយ​តែ​ពី​យាន​យន្ត​ឆ្លង​កាត់​នោះ វា​ជា​ការ​ប្រសើរ​ ប៉ុន្តែ​យើង​រស់​នៅ​​ទីនេះ​។ តើ​ពួកគេ​​យក​លុយ​​ពី​​យើង​រាល់​ថ្ងៃម៉េចកើត​?”៕ សារុន (រាយការណ៍​បន្ថែម​ដោយ សេក ឧត្ដម​)

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស