កាលពីម្សិលមិញ កងរាជអាវុធហត្ថខេត្តកំពតបានលើកឡើងថា ពួកគេនឹងចាប់ខ្លួនសមាជិកសហគមន៍ស្រុកឈូកនិយាយឥតសំចៃម្នាក់ដែលជាប់ពាក់ព័ន្ធក្នុងវិវាទដីធ្លីមួយជាមួយអាជ្ញាធរខេត្ត ប្រសិនបើគាត់មិនបង្ហាញប័ណ្ណកម្មសិទ្ធិដីសម្រាប់ក្រុមអ្នកភូមិរាប់រយគ្រួសារ ដោយអះអាងកាន់កាប់ដីមួយផ្នែកដែលមានវិវាទទេនោះ។
គ្រួសារជាច្រើនដែលគ្មានដីធ្លីបានតាំងទីលំនៅខុសច្បាប់លើដីទំហំ១.៣០០ហិកតា ក្នុងឃុំតេជោអភិវឌ្ឍន៍ ដែលពួកគាត់អះអាងកាន់កាប់ ត្រូវបានសន្យាផ្ដល់ឲ្យពួកគាត់ក្នុងឆ្នាំ២០១២ ជាផ្នែកនៃគម្រោងផ្ដល់ប័ណ្ណកម្មសិទ្ធិដីធ្លីទូទាំងប្រទេសរបស់លោកនាយករដ្ឋមន្ត្រី ហ៊ុន សែន។
យោងតាមលោក សែម សឿន មេបញ្ជាការរងកងរាជអាវុធហត្ថខេត្តបានឲ្យដឹងថា ទោះជាយ៉ាងណា ចាប់តាំងពីពេលនោះមក ដីនេះត្រូវបានលៃទុកជាដីសម្បទានសង្គមកិច្ចសម្រាប់ផ្ដល់ឲ្យគ្រួសារអតីតយុទ្ធជនប្រហែល២៤០គ្រួសារ។
លោក សឿន បានមានប្រសាសន៍ថា គ្រួសារដែលគ្មានដីធ្លីសរុប២០០គ្រួសារកំពុងរស់នៅលើដីនេះ ហើយថា ខេត្តនឹងមានឆន្ទៈផ្ដល់ដីមួយផ្នែកដល់ពួកគាត់ ប្រសិនបើពួកគាត់អាចផ្ដល់ឯកសារដែលបង្ហាញថា ពួកគាត់មានសិទ្ធិរស់នៅទីនោះ។
នៅក្នុងលិខិតចុះកាលបរិច្ឆេទថ្ងៃសុក្រ លោក លី គឹមហុង ដែលគ្រួសាររបស់គាត់ស្ថិតក្នុងចំណោមអ្នកភូមិ២០០គ្រួសារ ត្រូវបានបង្គាប់ឲ្យមកបង្ហាញខ្លួននៅទីបញ្ជាការដ្ឋានកងរាជអាវុធហត្ថខេត្តកំពតដើម្បីធ្វើការសាកសួរអំពីការចូលរួមធ្វើការតវ៉ាជាច្រើនលើកជុំវិញដីដែលមានវិវាទនៅក្នុងភូមិតេជោក្បាលដំរី។
កាលពីម្សិលមិញ លោក សឿន បានមានប្រសាសន៍ថា លោក គឹមហុង នឹងត្រូវចាប់ខ្លួនប្រសិនបើលោកមិនមានឯកសារដើម្បីបង្ហាញថា អ្នកទាំងនោះជាម្ចាស់ដីនេះ ពីព្រោះគាត់បានបង្កបញ្ហា ហើយបានញុះញង់ប្រជាពលរដ្ឋ”។
លោក សឿន បានមានប្រសាសន៍ថា មន្ត្រីកងរាជអាវុធហត្ថចង់សាកសួរលោក គឹមហុង ជុំវិញហេតុការណ៍កាលពីចុងខែមេសា នៅពេលលោកបានដឹកនាំមនុស្សមួយក្រុមដើម្បីព្យាយាមបញ្ឈប់ការកំណត់ព្រំប្រទល់ដីនោះ។ លោកបានមានប្រសាសន៍ថា ប៉ុន្តែលោក គឹមហុង មិនបានបង្ហាញខ្លួនទេកាលពីម្សិលមិញ ដោយបន្ថែមថា កងរាជអាវុធហត្ថនឹងកោះហៅរូបគាត់ម្ដងទៀតនៅចុងសប្ដាហ៍នេះ។
លោក សឿន បានមានប្រសាសន៍ថា “ប្រសិនបើគាត់មិនមកទេនោះ យើងនឹងធ្វើរបាយការណ៍ រួចបញ្ជូនទៅតុលាការ”។
នៅពេលត្រូវបានទាក់ទងកាលពីម្សិលមិញ លោក គឹមហុង ដែលអះអាងថាមានប័ណ្ណកម្មសិទ្ធិដីដែលទទួលស្គាល់ដោយថ្នាក់ភូមិ និងឃុំ ប៉ុន្តែមិនមែនថ្នាក់ខេត្តនោះបានមានប្រសាសន៍ថា លោកនឹងមិនទៅទីបញ្ជាការដ្ឋានកងរាជអាវុធហត្ថទេ ពីព្រោះលោកបារម្ភថា លោកនឹងត្រូវចាប់ខ្លួនចំពោះការដឹកនាំការតវ៉ា។
លោកបានមានប្រសាសន៍ថា “ខ្ញុំបារម្ភថា ខ្ញុំនឹងត្រូវចាប់ខ្លួន ពីព្រោះអាជ្ញាធរបានព្យាយាមចាប់ខ្ញុំច្រើនលើកមកហើយ”៕ សារុន