31.5 C
Phnom Penh

សមាជិក​សភាគណបក្ស​ប្រជាជន​កម្ពុជា​​សន្យា​ពិភាក្សា​ដេញដោល​ស្តី​ពី​ច្បាប់​អង្គការ​មិនមែន​រដ្ឋាភិបាល ​តែ​គណបក្ស​ប្រឆាំង​ចង់បាន​លើសពីនេះ

ដោយ ឌឹ ខេមបូឌា ដេលី

បទវិភាគ

លោក ឈាង​ វុន សមាជិក​សភា​គណបក្ស​ប្រជាជន​កម្ពុជា​​បាន​មាន​ប្រសាសន៍​កាល​ពី​ម្សិល​មិញ​ថា លោ​ក​នឹង​រៀប​ចំ​សិក្ខា​សាលា​មួយ​ស្តី​ពី​សេចក្តី​ព្រាង​ច្បាប់​ដ៏​ចម្រូង​ចម្រាស​ក្នុង​គោល​បំណង​ធ្វើនិយតកម្ម​​ផ្នែក​អង្គការ​មិនមែន​រដ្ឋាភិបាល​ដែល​មាន​ទឹក​ប្រាក់​រាប់​លាន​ដុល្លារ​​របស់​ប្រទេស​ ប្រសិន​បើ​ច្បាប់​នេះ​បញ្ជូន​ទៅ​គណៈកម្មការ​របស់​លោក​នៅ​រដ្ឋសភា ខណៈ​ដែល​គណបក្ស​ប្រឆាំង​​អះ​អាង​ថា កិច្ច​ប្រជុំ​​បែប​នេះ​នឹង​ជា​ការ​យឺត​ពេល​​។

អង្គការ​មិន​មែន​រដ្ឋាភិបាល​​បារម្ភ​ថា រដ្ឋាភិបាល​អាច​ប្រើ​ច្បាប់​មួយ​ចំនួន​ដើម្បី​បិទ​ក្រុម​អង្គការ​​ ឬ​សមាគម​​ដែល​ខ្លួន​មិន​ពេញ​ចិត្ត​ដោយ​គ្មាន​ការ​ពន្យល់​ ឬ​ការ​ទទួលខុសត្រូវ​អ្វី​ឡើយ។ទីស្តី​ការ​គណៈរដ្ឋមន្ត្រី​​អាច​បញ្ជូន​សេចក្តី​ព្រាង​ច្បាប់​នេះ​ទៅ​រដ្ឋសភា​នៅ​ពេល​ឆាប់ៗ​នេះ​គឺ​ថ្ងៃសុក្រ​ ហើយ​ធ្វើ​មិន​ដឹង​មិន​ឮ​នឹង​ការ​អំពាវ​នាវ​​ឲ្យ​ចេញផ្សាយ​​សេចក្តី​ព្រាង​ច្បាប់​បច្ចុប្បន្ន​ និង​បើក​ទូលាយ​សម្រាប់​ធ្វើការ​ពិភាក្សា​ដេញ​ដោល​ជា​សាធារណៈ។

កាលពី​សប្តាហ៍​មុន លោក ឈាង​ វុន ដែល​ជា​ប្រធាន​​គណៈកម្មការ​កិច្ច​ការ​បរទេស​​នៃ​រដ្ឋ​សភា បាន​មាន​ប្រសាសន៍​ថា លោក ជឿថា ​រដ្ឋសភា​អាច​ទទួល​បាន​ការ​ចូលរួម​បន្ថែម​​ស្តីពី​សេចក្តី​ព្រាង​ច្បាប់​នេះ​ពី​អង្គការ​មិនមែន​រដ្ឋា​ភិបាល​នានា​ ប្រសិន​បើ​​និង​នៅ​ពេល​ច្បាប់​នេះ​បញ្ជូន​ទៅ​ខុទ្ទកាល័យ​លោក​នាយក​រដ្ឋមន្ត្រី។ កាលពី​ម្សិលមិញ លោក​បាន​មាន​ប្រសាសន៍​ថា លោក​នឹង​រៀបចំ​កិច្ច​ប្រជុំ​​ដើម្បី​ឲ្យ​មានការចូលរួម​ប្រសិន​​លោក​មាន​​ឱកាស​។

លោក​បាន​មាន​ប្រសាសន៍​ថា “​ប្រសិន​បើ​​ខ្ញុំ​ទទួល​បាន​ច្បាប់​នេះ​ពី​គណៈកម្មាធិការ​អចិន្ត្រៃ​យ៍​​រដ្ឋសភា​ ខ្ញុំ​នឹង​ធ្វើ​ការ​ពិភាក្សា​ និង​ធ្វើការ​ស្រាវ​ជ្រាវ។ ខ្ញុំ​នឹង​ធ្វើ​ការ​ពិគ្រោះ​យោបល់​នៅ​រដ្ឋសភាដូច​ក្នុង​ពេល​កន្លង​មក ដូច​​​សិក្ខាសាលា​ជាដើម​​”។

ជាមួយ​ក្រសួង​មហាផ្ទៃ​ ក្រសួង​ការ​បរទេស​បាន​ដឹក​នាំ​ក្នុង​ការ​ព្រាង​ច្បាប់​នេះ។ ប៉ុន្តែ​វា​អាស្រ័យ​លើ​​​គណៈកម្មាធិការ​អចិន្ត្រៃ​​យ៍​ក្នុង​ការ​សម្រេច​ថា តើ​គណៈ​កម្មការណាមួយ​ក្នុង​ចំណោម​គណៈកម្មការ​​ទាំង​៩នៅ​រដ្ឋសភា ប្រហែល​ច្រើន​ជាង​មួយ​ ដើម្បី​សុំ​មតិ​រិះគន់​ត្រឡប់​​មុន​ពេល​ធ្វើការ​បោះ​ឆ្នោត។

​​​​​ ប៉ុន្តែ​ អង្គការ​មិនមែន​រដ្ឋាភិបាល​​លើកឡើង​ថា នឹង​ជា​ការ​យឺត​ពេល​ ដែល​រដ្ឋាភិបាល​ជួប​ប្រជុំ​ជាមួយ​ពួកគេ​ស្តីពី​សេចក្តី​ព្រាង​ច្បាប់​ថ្មី​បំផុត​​មុន​ពេល​បញ្ជូន​ទៅ​រដ្ឋសភា​ដើម្បី​​ឲ្យ​ផ្សព្វ​ផ្សាយ​ច្បាប់​នេះ​ជា​សាធារ​ណៈ។ កាលពី​ម្សិលមិញ គណបក្ស​សង្គ្រោះ​ជាតិ​​បាន​គាំទ្រ។

នៅ​ក្នុង​សេចក្តី​ថ្លែង​ការ​ណ៍​មួយ​ គណបក្ស​​បាន​ជំរុញ​ឲ្យ​រដ្ឋាភិបាល​​”ធានា​នីតិ​វិធី​បើក​ទូលាយ និង​តម្លាភាព​ស​ម្រាប់​សេចក្តី​ព្រាង​ច្បាប់​ស្តីពី​ការ​ជួប​ជុំ​ និង​អង្គការ​មិនមែន​រដ្ឋាភិបាល​ដើម្បី​បង្កការ​ងាយ​ស្រួល​ដល់​ភាគី​ពាក់ព័ន្ធ​ និង​ប្រជា​ជន​ខ្មែរ​ក្នុង​ការ​បញ្ចេញ​យោបល់​… នៅ​ការ​ពិគ្រោះ​យោបល់​ជា​សាធារណៈ​ មុន​ពេល​សេចក្តី​ព្រាងច្បាប់​នេះ​ត្រូវ​បាន​បញ្ជូនទៅ​រដ្ឋសភា​ដើម្បី​អនុម័ត​”។

ច្បាប់​នេះ​នឹង​តម្រូវ​ឲ្យ​សមាគម និង​អង្គការ​មិនមែន​រដ្ឋាភិបាល​​ចុះ​បញ្ជី​​ជាមួយ​រដ្ឋាភិបាល និង​ដាក់​របាយការណ៍​ប្រចាំ​ឆ្នាំ​ស្តីពី​ហិរញ្ញ​វត្ថុ និង​​សកម្មភាព​របស់​ខ្លួន​។ ទោះ​យ៉ាង​ណា​សំណៅ​ចុងក្រោយ​ដែល​បាន​ផ្សព្វផ្សាយ​ជា​សាធារណៈ ក្នុង​ឆ្នាំ​២០១១ គ្មាន​មូលហេតុ​​ច្បាស់​លាស់​ ដែល​រដ្ឋាភិបាល​អាច​ប្រើ​ដើម្បី​បដិសេធ​ការ​ចុះ​បញ្ជី ហើយ​នឹង​អនុញ្ញាត​ឲ្យ​បិទ​​អង្គការ​មិនមែន​រដ្ឋាភិបាល​បរទេស​ដែល​ “​ធ្វើ​ឲ្យ​ប៉ះពាល់​ដល់” “ប្រពៃណី និង​ទំនៀម​ទម្លាប់​របស់​សង្គម​ជាតិ​ខ្មែរ”៕សារុន​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស