ក្រុមមន្ត្រី និងអ្នកផ្គត់ផ្គង់ជ័រកៅស៊ូបានឲ្យដឹងកាលពីម្សិលមិញថា តម្លៃជ័រកៅស៊ូធម្មជាតិកម្ពុជាបានកើនឡើងប្រហែល២០ភាគរយកាលពីខែមុន បើធៀបទៅនឹងរយៈពេលដូចគ្នាកាលពីឆ្នាំមុន ដោយសារអ្នកផ្គត់ផ្គង់ធំៗលើពិភពលោកកាត់បន្ថយការផ្គត់ផ្គង់របស់ខ្លួនទៅកាន់ទីផ្សារអន្តរជាតិ។
លោក ប៉ុល សុខា ប្រធាននាយកដ្ឋានកៅស៊ូនៅក្រសួងកសិកម្មបានមានប្រសាសន៍ថា “តម្លៃបានឡើងថ្លៃដោយសារអ្នកផ្គត់ផ្គង់ធំៗនៅទូទាំងពិភពលោកបានចាត់វិធានការទប់ទល់នឹងការធ្លាក់ថ្លៃនៅក្នុងទីផ្សារពិភពលោកជាពិសេសប្រទេសថៃ ឥណ្ឌូណេស៊ី និងម៉ាឡេស៊ី”។
លោក សុខា បានលើកឡើងទៀតថា ប្រទេសទាំងនោះបានផ្តល់ឧបត្ថម្ភធនដល់កសិករដាំកៅស៊ូរបស់ខ្លួនជាផ្នែកនៃកម្មវិធីមួយដើម្បីកាត់បន្ថយការដាំកៅស៊ូ ក្នុងគោលបំណងកាត់បន្ថយការផ្គត់ផ្គង់ និងដើម្បីធ្វើឲ្យតម្លៃជ័រកៅស៊ូឡើងថ្លៃឡើងវិញ។
លោក ហេង ស្រេង នាយកគ្រប់គ្រងក្រុមហ៊ុននាំចេញកៅស៊ូក្នុងស្រុក Long Sreng International Co.Ltd., បានលើកឡើងថា តម្លៃនាំចេញបានកើនឡើងពី១.៣៥០ដុល្លារក្នុង១តោនកាលពីខែឧសភាឆ្នាំ២០១៤ ដល់១.៦៥០ដុល្លារក្នុង១តោនកាលពីខែមុន។
លោក ជា សាយីម ប្រធានសមាគមអភិវឌ្ឍន៍ជ័រកៅស៊ូគ្រួសារមេម៉ត់នៅក្នុងខេត្តត្បូងឃ្មុំបានលើកឡើងថា តម្លៃជ័រកៅស៊ូក្រាស់ក៏កើនឡើងចាប់ពី៦០០រៀលក្នុងមួយគីឡូក្រាម កាលពីខែឧសភាឆ្នាំ២០១៤ដល់២.៥០០រៀលក្នុងមួយគីឡូក្រាម កាលពីខែមុនផងដែរ។
លោកបានមានប្រសាសន៍ថា “ឥឡូវនេះពួកគាត់ [កសិករដាំកៅស៊ូ] អាចជួលកម្មករខ្លះៗឲ្យត្រឡប់មកធ្វើការនៅចម្ការរបស់ពួកគេវិញបានហើយ ព្រោះតម្លៃបានឡើងថ្លៃវិញហើយ”៕ស៊ុយឈាង