ក្នុងលិខិតមួយនៅពេលថ្មីៗនេះផ្ញើជូនសាខាបក្សនៅក្រៅប្រទេស គណបក្សប្រជាជនកម្ពុជាកំពុងកាន់អំណាចដាក់ចេញផែនការដើម្បីតបតនឹងព័ត៌មានអាក្រក់ ដែលខ្លួនទទួលបាននៅក្រៅប្រទេស និងពង្រឹងការគាំទ្របក្សក្នុងចំណោមពលរដ្ឋកម្ពុជានៅក្រៅប្រទេស ដែលសព្វថ្ងៃនេះជាប្រភពថវិកាដ៏សំខាន់សម្រាប់គណបក្សប្រឆាំង។
ផែនការនោះរួមមានការជ្រើសរើសសមាជិកបន្ថែមប្រចាំសាខាក្រៅប្រទេសរបស់ខ្លួន និងតែងតាំងលោក ហ៊ុន ម៉ាណែត កូនប្រុសច្បងរបស់លោកនាយករដ្ឋមន្ត្រី ហ៊ុន សែន ឲ្យទទួលខុសត្រូវចំពោះការខិតខំថ្មីនេះ ដើម្បីពង្រឹងការគាំទ្របក្សក្នុងចំណោមយុវជននៅឯក្រៅប្រទេស។
អនុវត្តតាមអនុសាសន៍របស់លោកនាយករដ្ឋមន្ត្រី លិខិតចុះកាលបរិច្ឆេទកាលពីថ្ងៃព្រហស្បតិ៍មានខ្លឹមសារថា គណបក្សប្រជាជនកម្ពុជា “សម្រេចបង្កើតក្រុមការងារចំនួនបួននៅក្រៅប្រទេសដើម្បីមើលខុសត្រូវការរៀបចំយុវជនរបស់គណបក្សប្រជាជនកម្ពុជានៅក្រៅប្រទេស នៅសហរដ្ឋអាមេរិក ទ្វីបអឺរ៉ុប អូស្ត្រាលី ណូវ៉ែលហ្សេឡង់ និងប្រទេសកាណាដា” ហើយដាក់លោក ម៉ាណែត ឲ្យដឹកនាំ។
លិខិតនោះក៏បានជំរុញសាខាបក្សនៅក្រៅប្រទេសដែលមានស្រាប់ ឲ្យជ្រើសរើសសមាជិកបន្ថែម និងធ្វើការទាក់ទងល្អប្រសើរជាមួយទីស្នាក់ការធំគណបក្សប្រជាជនកម្ពុជានៅក្រុងភ្នំពេញ និងដាក់ឲ្យគណៈអចិន្ត្រៃយ៍គណៈកម្មាធិការកណ្តាលរបស់បក្សទទួលខុសត្រូវក្នុងការតែងតាំងមន្ត្រីជាន់ខ្ពស់ប្រចាំសាខានីមួយៗ។
លោក សុខ ឥសាន អ្នកនាំពាក្យគណបក្សប្រជាជន បាននិយាយទាក់ទិននឹងគំនិតផ្តួចផ្តើមយុវជននេះថា “គោលនយោបាយរបស់បក្សគឺពង្រឹងទំពាំងស្នងឫស្សី។ អ្នកដែលមានសមត្ថភាព អាចធ្វើការឲ្យរដ្ឋាភិបាល ឬ ធ្វើការឲ្យបក្ស”។
លោកបានមានប្រសាសន៍ថា “ប្រទេសផ្សេងទៀតមានសាខាគណបក្សប្រជាជនកម្ពុជាហើយ។ ហើយលិខិតនោះ “រំឭកពួកគេឲ្យរឹតតែរឹងមាំឡើង”។
លោក ឥសាន មានប្រសាសន៍ថា គោលដៅមួយផ្នែកគឺធ្វើឲ្យ “មុខមាត់របស់បក្សកាន់តែល្អឡើងក្នុងចំណោមពលរដ្ឋខ្មែរនៅក្រៅប្រទេស ដែលក្នុងចំណោមនោះគណបក្សសង្គ្រោះជាតិទទួលបានបង្អែករឹងមាំស្រាប់។
លោកមានប្រសាសន៍ថា “សំខាន់ត្រូវប្រតិកម្មពេលណាមានការឃោសនាអវិជ្ជមាន មិនមែនមកតែពីគណបក្សសង្គ្រោះជាតិប៉ុណ្ណោះទេ ក៏ប៉ុន្តែចេញមកពីគណបក្សផ្សេងទៀត ដែលនិយាយអ្វីដែលមិនពិត។ ដូច្នេះ សាខាបក្សនៅក្រៅប្រទេសមានភារកិច្ចប្រាប់ការពិត និងឲ្យប្រជាពលរដ្ឋយល់”។
ចំពោះការឲ្យលោក ម៉ាណែត ទទួលខុសត្រូវកម្មវិធីផ្តួចផ្តើមយុវជន លោក ឥសាន បានមានប្រសាសន៍ថា គ្រាន់តែជាឱកាសចៃដន្យប៉ុណ្ណោះ។
លោកមានប្រសាសន៍ថា “មិនមែនដោយសារគាត់ជាកូនរបស់សម្តេច [ហ៊ុន សែន] នោះទេ អ្នកផ្សេងទៀតក៏អាចត្រូវជ្រើសរើសដែរ។ ប៉ុន្តែដោយចៃដន្យ គាត់ត្រូវគេជ្រើសរើស។ គាត់មានលក្ខណៈសម្បត្តិ ពីព្រោះគាត់បានសិក្សាអស់រយៈពេលជាច្រើនឆ្នាំនៅសហរដ្ឋអាមេរិក”។
លោក ម៉ាណែត ដែលកាន់តំណែងជាន់ខ្ពស់មួយចំនួនក្នុងជួរកងកម្លាំងខេមរភូមិន្ទ បានបញ្ចប់ការសិក្សានៅបណ្ឌិត្យសភាយោធាអាមេរិកក្នុងឆ្នាំ១៩៩៩។
លោក សុខ ទូច អ្នកវិភាគនយោបាយ បានមានប្រសាសន៍កាលពីថ្ងៃច័ន្ទថា ការបោះឆ្នោតជាតិឆ្នាំ២០១៣ ដែលក្នុងការបោះឆ្នោតនេះ គណបក្សប្រជាជនកម្ពុជាបានរក្សាអំណាចជាផ្លូវការ ប៉ុន្តែបានទទួលរងបរាជ័យយ៉ាងធ្ងន់ ដោយសារគណបក្សសង្គ្រោះជាតិ ក្នុងពេល២០ឆ្នាំ បានផ្តល់មេរៀនដល់គណបក្សកាន់អំណាចថា ប្រជាពលរដ្ឋខ្មែរនៅក្រៅស្រុកមិនអាចព្រងើយកន្តើយបានទេ។
ទោះជាពលរដ្ឋខ្មែររស់នៅបរទេសមិនអាចបោះឆ្នោតបានក្តី ក៏ពួកគេពិតជាប្រភពដ៏សំខាន់នៃយុទ្ធនាការស្វែងរកហិរញ្ញវត្ថុសម្រាប់បក្សប្រឆាំង ដែលខំប្រឹងប្រែងយ៉ាងខ្លាំងរកប្រាក់ដុល្លារ។
លោក ទូច បានមានប្រសាសន៍ថា “គណបក្សប្រជាជនកម្ពុជាមិនបានធ្វើកិច្ចការនេះទេ ហើយថាបានបណ្តោយឲ្យគណបក្សផ្សេងទៀតស្វែងរកការផ្តល់ប្រាក់នៅក្រៅប្រទេស ពីព្រោះនយោបាយត្រូវការហិរញ្ញវត្ថុ”។
លោកស្រី មូរ សុខហួរ សមាជិកសភានិងជាប្រធានកិច្ចការសាធារណៈគណបក្សសង្គ្រោះជាតិ បានមានប្រសាសន៍ថា លោកស្រីមិនបារម្ភថា ផែនការរបស់គណបក្សប្រជាជនកម្ពុជាអាចធ្វើឲ្យចុះថយដល់ការគាំទ្រលើគណបក្សប្រឆាំងក្នុងចំណោមពលរដ្ឋខ្មែរនៅក្រៅប្រទេស ដែលបានជួយប្រហែលមួយភាគបីនៃការចំណាយក្នុងយុទ្ធនាការរបស់គណបក្សនៅឆ្នាំ២០១៣នោះទេ។
លោកស្រីបានមានប្រសាសន៍ថា “យើងបាននិងកំពុងធ្វើកិច្ចការនេះជាច្រើនឆ្នាំមកហើយ។ យើងប្រាកដក្នុងចិត្តថា បណ្តាញរបស់យើង[នៅក្រៅប្រទេស]គឺខ្លាំងណាស់”។
លោកស្រី សុខហួ បានមានប្រសាសន៍ថា ព័ត៌មានតាមអីុនធឺណិតអំពីព្រឹត្តិការណ៍នានានៅក្នុងប្រទេសកម្ពុជាមិនស៊ីគ្នានឹងផែនការរបស់គណបក្សប្រជាជនកម្ពុជាដើម្បីតបតនឹងព័ត៌មានអាក្រក់ដែលខ្លួនទទួលនៅក្រៅប្រទេស។
លោកស្រីមានប្រសាសន៍ថា “ដោយមានបណ្តាញព័ត៌មានសង្គម ពិភពលោកចំហ អ្នកមិនអាចលាក់បាំងការរំលោភបំពានបានទេ។ អ្នកមិនអាចលាក់បាំងការគ្មានសេរីភាព ដែលយុវជននៅទីនេះកំពុងប្រឈមនោះទេ…ដូច្នេះខ្ញុំមិនគិតថា មានរឿងច្រើនដែលលោក ម៉ាណែត អាចឲ្យពួកគេជឿតាមនោះទេ”៕ និត (រាយការណ៍បន្ថែមដោយ Zsombor Peter)