ក្រុមមន្ត្រីបានឲ្យដឹងកាលពីម្សិលមិញថា កាលពីថ្ងៃច័ន្ទកងទ័ពជើងទឹកកម្ពុជាបានគ្រប់គ្រងជាផ្លូវការលើកោះដំឡូងជាកោះដាច់ស្រយាលមួយដែលគេគ្រោងធ្វើឲ្យក្លាយជាតំបន់ទេសចរណ៍ដ៏ទំនើបនៅក្នុងគម្រោងរបស់លោក សេរហ្គេ ប៉ូលុនស្គី មុនពេលអ្នកអភិវឌ្ឍជនជាតិរុស្សីរូបនេះត្រូវបាននិរទេសទៅកាន់ទីក្រុងមូស្គូ ដើម្បីប្រឈមនឹងការបើកសវនាការក្រោមការចោទប្រកាន់ពីបទឆរបោកធ្ងន់ធ្ងរ។
ដោយមានទីតាំងចម្ងាយជាង៥០គីឡូម៉ែត្រពីក្រុងព្រះសីហនុ កោះនេះបានក្លាយជាកន្លែងស្នាក់នៅទី២របស់លោក ប៉ូលុនស្គី ក្នុងរយៈពេលប៉ុន្មានខែ មុនពេលលោកត្រូវបាននិរទេសកាលពីថ្ងៃទី១៧ ខែឧសភា ដែលទំនងជាដោយសារលោកគ្មានលិខិតឆ្លងដែន ហើយវាជាកន្លែងដែលអតីតមហាសេដ្ឋីរូបនេះត្រូវបានចាប់ខ្លួនពីរថ្ងៃមុនការនិរទេស។
លោក ឈិន សេង ងួន អភិបាលរងខេត្តព្រះសីហនុ បានលើកឡើងថា លោកបានដឹកនាំនគរបាលកងរាជអាវុធហត្ថ មន្ត្រីកងទ័ពជើងទឹក និងអាជ្ញាធរមូលដ្ឋានមួយក្រុមទៅកាន់កោះនេះកាលពីថ្ងៃច័ន្ទ ដើម្បីត្រួតពិនិត្យ និងកត់ត្រាចុះបញ្ជីអចលនទ្រព្យនៅទីនោះ ដែលរួមមាន បាំងហ្គាឡូឈើប្រហែល២០ និងអគារផ្សេងៗព្រមទាំងគ្រឿងសង្ហារិម រូបចម្លាក់នានា និងទូរដែកសុវត្ថិភាពចំនួនពីរផងដែរ។
លោក សេងងួន បានលើកឡើងថា គេមិនបានយកអ្វីចេញពីកោះនោះ ទេ ហើយគេមិនឃើញមានអតីតបុគ្គលិករបស់លោក ប៉ូលុន ស្គី នៅទីនោះឡើយនៅពេលក្រុមការងារចុះទៅដល់។ ទ្រព្យសម្បត្តិផ្សេងៗរបស់លោក ប៉ូលុនស្គី ដែលរួមមានដូចជាលំនៅដ្ឋានឯកជនរបស់លោកនៅលើកោះដែកគោល និងនាវាប្រវែង៣០ម៉ែត្រ១គ្រឿង គឺស្ថិតក្រោមការគ្រប់គ្រងបន្តរបស់នគរបាលក្រុងព្រះសីហនុរួចហើយ។
អភិបាលរងរូបនេះបានអះអាងថា បន្ទាប់ពីបញ្ចប់ការ ត្រួតពិនិត្យកោះដំឡូងរួចរាល់ កោះនេះត្រូវបានដាក់ឲ្យមានការមើលថែទាំដោយមន្ត្រីមួយក្រុមមកពីមូលដ្ឋានកងទ័ពជើងទឹកនៅលើកោះតាងដែលស្ថិតក្បែរកោះដំឡូងនេះ។
លោកបានមានប្រសាសន៍ថា “យើងបានប្រគល់វាទៅឲ្យកងទ័ពជើងទឹកដើម្បីមើលថែទាំបណ្តោះអាសន្ន មុនពេលមានការសម្រេចពីថ្នាក់លើរបស់ខ្ញុំ”។
លោក យស ស៊ីវុត្ថា មេបញ្ជាការកងទ័ពជើងទឹកនៅលើកោះតាង បានបញ្ជាក់ថា មន្ត្រីរបស់លោកនឹងឈរជើងនៅលើកោះនេះចាប់ពីពេលនេះទៅ ប៉ុន្តែ លោកបានបដិសេធមិនធ្វើអត្ថាធិប្បាយបន្ថែមឡើយ។
លោក ប៉ូលុនស្គី អាយុ៤២ឆ្នាំ ដែលធ្លាប់ជាបុគ្គលម្នាក់ក្នុងចំណោមអ្នកមានទ្រព្យច្រើនបំផុតនៅរុស្ស៊ី ត្រូវបានចោទប្រកាន់កាលពីឆ្នាំ២០១៣ ពីបទកិបកេងប្រាក់រាប់លានដុល្លារពីវិនិយោគិននៅក្នុងគម្រោងអចលនទ្រព្យចំនួន២ក្នុងទីក្រុងមូស្គូ ហើយក្រោយមកត្រូវបានគេកត់ត្រាចូលក្នុងបញ្ជី អ្នកដែលនគរបាលអន្តរជាតិអាំងទែប៉ូលតាមចាប់ខ្លួនបំផុត។ ដោយខ្លាចក្រែងថា ខ្លួនមិនទទួលបានការកាត់ក្តីដ៏ត្រឹមត្រូវនៅក្នុងប្រទេសរុស្សី លោក ប៉ូលុនស្គី បានធ្វើដំណើរមកប្រទេសកម្ពុជា ហើយបានចាប់ផ្តើមកំណត់វាសនារបស់ខ្លួនដោយបោះ ទុនវិនិយោគលើកោះមួយចំនួន ដែលលោកសង្ឃឹមថា នឹងប្រែក្លាយទៅជាតំបន់ទេសចរណ៍ដ៏ទំនើប។
តុលាការកម្ពុជាបានច្រានចោលសំណើសុំធ្វើបត្យាប័នច្រើន លើកច្រើនសាពីរដ្ឋាភិបាលក្រុងមូស្គូ កាលពីពីរ ឆ្នាំកន្លងមកនេះ ប៉ុន្តែ កាលពីខែមុន វាសនារបស់លោក ប៉ូលុនស្គី បានផ្លាស់ប្តូរភ្លាមៗ។
កាលពីថ្ងៃទី១៥ ខែឧសភា លោកត្រូវបានគេចាប់ខ្លួនជាមួយបក្ខពួកចំនួនប្រាំនាក់ផ្សេងទៀតនៅ លើកោះដំឡូង ហើយត្រូវបានគេដឹកតាមឧទ្ធម្ភាគចក្រមកកាន់រាជធានីភ្នំពេញ។ ពីរថ្ងៃក្រោយមកលោកត្រូវបានគេដឹកតាមយន្តហោះទៅកាន់ទីក្រុងមូស្គូ។ អំឡុងពេលនោះ ក្រុមមន្ត្រីបានលើកឡើងថា លោកត្រូវបាននិរទេសដោយសារគ្មានលិខិតឆ្លងដែន ប៉ុន្តែ ត្រូវបានចាប់ខ្លួនពីបទបង្កើតក្រុម អង្គរក្សខុសច្បាប់។ មេធាវីរបស់លោក ប៉ូលុនស្គី បានលើកឡើងថា ការនិរទេសលោកភ្លាមៗនេះ គឺដោយសារ តែ “កិច្ចព្រមព្រៀងសម្ងាត់មួយ” រវាងកម្ពុជា និងរុស្សី។
ពេលទាក់ទងកាលពីម្សិលមិញ លោក សេរហ្គេ វ្លាឌី (Sergei Vladi) មេធាវីរបស់លោក ប៉ូលុនស្គី ដែលមានមូលដ្ឋាននៅក្នុងទីក្រុង ឡុងដ៍បានលើកឡើងឡើងថា នៅពេលទៅដល់ទីក្រុងមូស្គូ ភ្លាម កូនក្តីរបស់លោកត្រូវបានគេបញ្ជូន ភ្លាមៗទៅកាន់ពន្ធនាគារ Matrosskaya Tishina ក្នុងទីក្រុងមូស្គូដើម្បីរង់ចាំការបើកសវនាការ។
លោក វ្លាឌី បានលើកឡើងទៀតថា លោកបានទាក់ទងជាប់ជានិច្ចជាមួយ លោក ប៉ូលុនស្គី ដែលគេនឹងផ្តន្ទាទោសពីបទល្មើស ដែលលោកមិនដែលបានប្រព្រឹត្តិ ហើយបើនិយាយពីទ្រព្យសម្បត្តិនៅក្នុងប្រទេសកម្ពុជារបស់ លោក ប៉ូលុនស្គី វិញ លោកមិនសូវជាសង្ឃឹមទេថា នឹងទទួលបានមកវិញនោះ។ មេធាវីរូបនេះបានប៉ាន់ប្រមាណថា លោក ប៉ូលុនស្គី បានវិនិយោគអស់ទឹកប្រាក់ជាង១៣លានដុល្លារនៅកម្ពុជា។ លោកបានមានប្រសាសន៍ថា “អ្វីៗគ្រប់យ៉ាងរបស់លោក ប៉ូលុនស្គី ត្រូវបានគេលួចអស់ហើយ។ រថយន្តម៉ាក Rolls Royce រថយន្តផ្សេងៗទៀត សូម្បីតែកាតឥណទានក៏ត្រូវបានរឹបអូសដែរ”។ លោក បានបន្ថែមថា ឧបករណ៍ដែលផ្ទុកទិន្នន័យផ្ទាល់ខ្លួនរបស់កូនក្តីលោកត្រូវបានបញ្ជូនភ្លាមៗទៅកាន់រដ្ឋអាជ្ញាទទួលបន្ទុកសំណុំរឿងនេះ គឺលោក អូលេក សីុលឈិនកូ (Oleg Silchenko) ជាអ្នកសើុបអង្កេតដ៏ល្បីឈ្មោះនៅរុស្សី។
លោកបានមានប្រសាសន៍ថា “អ្វីៗទាំងអស់របស់គាត់ដូចជាកុំព្យូទ័រ អាយផេត និងអាយហ្វូនសុទ្ធតែត្រូវបានគេលួចទាំងអស់។ ទិន្នន័យផ្ទាល់ខ្លួនរបស់លោកត្រូវបានគេបញ្ជូនទៅកាន់រដ្ឋអាជ្ញា”។
លោក វ្លាឌី បានបន្ថែមទៀតថា ទង្វើរបស់អាជ្ញាធរកម្ពុជាលើលោក ប៉ូលុនស្គី ទំនងជាធ្វើឲ្យកូនក្តីរបស់លោកមិនហ៊ានវិលត្រឡប់មកប្រទេសកម្ពុជាវិញ តែឯកឯងឡើយ។
លោកបានមានប្រសាសន៍ថា “គាត់ត្រូវបានគេចាប់ពីផ្ទះរបស់ខ្លួននៅក្នុងប្រទេសកម្ពុជាដូចជាសត្វឆ្មាអ៊ីចឹង ហើយត្រូវបានបញ្ជូនទៅដល់ដៃអ្នកដែលមានជំនាញ [លោក សីុលឈិនកូ]។ តើអ្នកគិតថា បុរសរូបេនះនឹងត្រឡប់មកវិញដែរឬទេ?”៕ស៊ុយឈាង