30.1 C
Phnom Penh

សកម្មជន​គណបក្ស​សង្គ្រោះ​ជាតិអះ​អាង​ថា ពួកគេ​គ្រាន់តែ​ជាអ្នក​ឈរ​មើល​ការ​តវ៉ា​

ដោយ ឌឹ ខេមបូឌា ដេលី

បទវិភាគ

នាង សុឃុន ក្រុម​យុវជន​សង្គ្រោះ​ជាតិ​មកពី​ខណ្ឌ​ច្បារអំពៅ​ ចាកចេញ​ពីតុលាការ​ក្រុង​ភ្នំពេញ​ កាលពី​ម្សិលមិញ។ រូបថតៈ ស៊ីវ ចាន់ណា​/The Cambodia Daily

នៅ​ក្នុង​សវនាការលើក​​ទី៤​លើ​សកម្មជន​គណបក្ស​សង្គ្រោះ​ជាតិ​​​១១នាក់ ដែល​ត្រូវ​បាន​ចោទ​ប្រកាន់​​ពីបទ​ “​ចូល​រួម​​កុបកម្ម​” ​នៅ​ក្នុង​ការ​តវ៉ា​កាលពី​ខែ​កក្កដា ដែល​បាន​ប្រែ​ក្លាយ​ជា​ហិង្សា​នោះ ចុង​ចោទ​បី​នាក់​​ដែល​ត្រូវ​បាន​សាលា​ដំបូង​រាជធានី​ភ្នំពេញ​ធ្វើ​​ការ​សាកសួរ​កាល​ពី​ម្សិល​មិញ​ ដោយ​និយាយ​ថា ពួកគេ​មាន​វត្តមាន​នៅ​ការ​តវ៉ា​នោះមែន​ ប៉ុន្តែ​គ្រាន់​តែ​ជា​អ្នក​ឈរ​មើល​តែ​ប៉ុណ្ណោះ​។

កាលពី​ថ្ងៃ​ទី​១៥ ខែ​កក្កដា អ្នក​គាំទ្រ​គណបក្ស​សង្គ្រោះ​ជាតិ​បាន​ប្រមូល​ផ្ដុំគ្នា​នៅ​ទីលាន​ប្រជា​ធិបតេយ្យ ដែល​ត្រូវ​បាន​ហ៊ុមព័ទ្ធ​កាលពី​លើក​មុនៗ​ ដើម្បីទាមទារ​ឲ្យ​បើក​ឡើង​វិញ​។

ការ​ប៉ះទង្គិច​គ្នា​​​បាន​កើត​ឡើង​រវាង​ក្រុមអ្នក​តវ៉ា​​ និង​សន្តិសុខ​ខណ្ឌ​ដូន​ពេញ​ដ៏ហិង្សា។

សកម្មជន​ទាំង​១១​នាក់ ត្រូវ​បាន​ចាប់​ខ្លួន​បន្តិច​ក្រោយ​មក។ នៅ​ក្នុង​តុលាការ​កាលពី​ម្សិល​មិញ លោក ស៊ុំ ពុទ្ធី សមាជិក​ក្រុម​ប្រឹក្សា​​ខណ្ឌ​ច្បារ​អំពៅ​របស់​គណបក្ស​សង្គ្រោះ​ជាតិ​បានមាន​ប្រសា​សន៍​ថា លោក​ស្ថិត​​នៅ​កន្លែង​តវ៉ា​នោះ​ទាម​ទារ​ “​ឲ្យ​ដោះលែង​ទីលាន​ប្រជាធិបតេយ្យ​” មែន ប៉ុន្តែ​បានឈរ​នៅ​ចម្ងាយ​១៥០​ម៉ែត្រ​ពី​ស្ពាន​នាគ​នៅ​ប៉ែក​ខាង​កើត​ទីលាន​​នេះ​តែ​ប៉ុណ្ណោះ។

ដោយ​សារ​នៅ​ឆ្ងាយ​ លោក​មិន​អាច​មើល​ឃើញ​ហេតុការណ៍នោះ​​ច្បាស់​ឡើយ​។ លោក​បាន​មាន​ប្រសាសន៍​ថា “​ខ្ញុំ​គ្រាន់​តែ​បាន​ឃើញ​សន្តិសុខ​វាយ​អ្នក​ចូល​រួម​ដោយ​ប្រើ​ដំបង​ប៉ុណ្ណោះ​​​ ហើយ​បន្ទាប់​មក​អ្នក​ចូល​រួម​បាន​តប​ត​វិញ។ បន្ទាប់​មក​ខ្ញុំ​បាន​ឃើញ​ទាំង​សន្តិសុខ និង​អ្នក​ចូល​រួម​រង​របួស​”។

រដ្ឋាភិបាល​លើក​ឡើង​ថា សន្តិសុខ​ប្រហែល​៣៩​នាក់​បាន​រង​របួស​នៅ​ក្នុង​ការ​តវ៉ា​នោះ។

លោក នាង សុគន្ធ មេដឹកនាំ​យុវជន​គណបក្ស​សង្គ្រោះ​ជាតិ​​ខណ្ឌ​ទួលគោក​បាន​ប្រាប់​តុលា​ការ​ថា លោក​ក៏​បាន​ទៅ​ចូល​រួម​ការ​តវ៉ា​ដែរ ប៉ុន្តែ​​ទៅ​ថត​រូប​តែ​ប៉ុណ្ណោះ​។

លោក​បានមាន​ប្រសាសន៍​ថា “​ខ្ញុំ​គ្រាន់​តែ​ទៅ​ថត​រូប​នៅ​ទីនោះ​ដើម្បី​បង្ហោះ​​ក្នុង​គណនី​ហ្វេសប៊ុក​របស់​ខ្ញុំ​តែ​ប៉ុណ្ណោះ”។ លោក​បាន​បន្ថែម​ថា លោក​មិន​បានឃើញ​ការ​ប៉ះទង្គិច​គ្នា​ច្បាស់​ទេ។

លោក​បាន​មាន​​ប្រសាសន៍​ថា “​ខ្ញុំ​មិន​បាន​ឃើញ​អំពើ​ហិង្សា​កើត​ឡើង​ច្បាស់​ទេ ពីព្រោះ​នៅ​ពេល​នោះ​ខ្ញុំ​បាន​ទៅ​លាក់​ខ្លួន​នៅ​ស្ពាន​នាគ”។

សកម្មជន​ទី៣​ដែល​ត្រូវ​បាន​សាកសួរ​កាលពី​ម្សិលមិញ ឈ្មោះ អាន បឋម សមាជិក​យុវជន​គណបក្ស​សង្គ្រោះ​ជាតិ​ក្នុង​រាជធានី​ភ្នំពេញ​បាន​មាន​ប្រសាសន៍​ថា លោក​ក៏​បាន​ទៅ​ចូល​រួម​ការ​តវ៉ា​ដែរ ដើម្បី​​ថតរូប​ដាក់​ហ្វេសប៊ុក។

ទោះ​ជាយ៉ាង​ណា មិន​ដូច​សហចុង​ចោទ​របស់​ខ្លួន​ឡើយ អាន​ បឋម បាន​និយាយ​ថា លោក​បាន​ឃើញ​ការ​ប៉ះទង្គិច​គ្នារវាង​អ្នក​តវ៉ា​ និង​សន្តិសុខ​ ​បើទោះជឫ​លោក​អះអាង​ថា លោក​​បាន​រង​ឧស្ម័ន​បង្ហូរ​ទឹក​ភ្នែកក៏ដោយ។

លោក​បានមាន​ប្រសាសន៍ថា “​ខ្ញុំបាន​ឃើញ​សន្តិសុខ​និង​អ្នកចូលរួម​ប៉ះទង្គិច​គ្នា​ទៅវិញ​ទោ​មក​ ប៉ុន្តែ​ខ្ញុំមិន​ដឹង​ថា នរណា​វាយ​មុន​ឡើយ​”។

លោក​បានមាន​ប្រសាសន៍​ថា “​ខ្ញុំ​បាន​ឃើញ​ដំបង​ឈើ និង​ដង​ទង់ជាតិ​ជ្រុះ​នៅ​លើ​ដី​។ ខ្ញុំ​បាន​ឃើញ​​បុគ្គលិក​អង្គការ​មិន​មែន​រដ្ឋាភិបាល​សម្អាត​ឈាម​ឲ្យ​អ្នក​រង​របួស។ ខ្ញុំបាន​ឃើញ​ទាំង​សន្តិសុខ​ និង​មនុស្ស​ផ្សេង​ទៀត​រងរបួស​”។

និយាយ​ទៅ​កាន់​អ្នក​យក​​ព័ត៌មាន​បន្ទាប់ពី​សវនាការ​លោក សំ សុគង់ មេធាវី​ការ​ពារ​សកម្មជន​៦​នាក់​​ក្នុង​ចំណោម​សកម្មជន​ទាំង​១១​នាក់​បាន​មាន​ប្រសាសន៍​ថា លោក​បាន​សួរ​អំពី​ភាព​មិន​លម្អៀង​របស់​ចៅក្រម​។

លោក​បាន​មាន​ប្រសាសន៍​ថា “​ការ​សាកសួរ​របស់​ចៅក្រម​មាន​ភាព​លម្អៀង។ ពួកគេ​សួរ​តែ​សំណួរ​បែប​ចោទ​ប្រកាន់​តែ​ប៉ុណ្ណោះ។ ខ្ញុំ​គិត​ថា សេចក្ដី​សម្រេច​របស់​ពួកគេ​មិន​ផ្ដល់​
យុត្តិធម៌​សម្រាប់​ចុង​ចោទ​ទាំង​អស់​ ឬ​កូនក្ដី​របស់​ខ្ញុំ​ឡើយ”។

លោក លឹម មរកន្ទ ចៅក្រម​ប្រធាន​ក្រុម​ប្រឹក្សា​ជំនុំជម្រះ​បាន​មាន​ប្រសាសន៍​ថា សវនា​ការ​នឹង​បន្ត​នៅ​ថ្ងៃ​ទី១០ ខែមិថុនា៕ សារុន​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស