38 C
Phnom Penh

​អ្នក​តវ៉ា​មកពី​សហគមន៍​បឹង​កក់ធ្វើ​ពិធី​​​​​ដាក់​បណ្ដាសា​​លោក កែប ជុតិមា​ នៅ​ខាង​ក្រៅ​រដ្ឋសភា​

ដោយ ឌឹ ខេមបូឌា ដេលី

បទវិភាគ

ប្រជា​ពលរដ្ឋ​​ជាង​៣០​នាក់​​ដែល​​ជា​អតីត​អ្នកភូមិ​សហគមន៍​បឹងកក់ ក្នុង​រាជធានី​ភ្នំពេញ​ បាន​ធ្វើ​ការ​តវ៉ា​នៅ​ខាង​ក្រៅ​រដ្ឋសភា​កាលពី​ម្សិលមិញ ដើម្បី​​​ទាម​ទារ​ឲ្យ​ដក​លោក កែប ជុតិមា តំណាង​រាស្ត្រ​មក​គណបក្ស​ប្រជាជន​កម្ពុជា​ ចេញ​ពី​មុខ​តំណែង​​​ដោយ​សារ​តែ​​លោកធ្វើ​ឲ្យ​ប្រជាពល​រដ្ឋ​រាប់​ពាន់​​គ្រួសារ​​រង​ទុក្ខ​​វេទ​នា​ អំឡុង​ពេល​លោក​កាន់​តំណែង​ជា​អភិបាល​រាជធានី​ភ្នំពេញ​រយៈ​ពេល​១ទសវត្សរ៍។

លោក​ កែប ជុតិមា បាន​ចុះ​ចេញ​ពី​តំណែង​ជា​អភិបាល​រាជធានី​ភ្នំពេញ​នៅ​ខែ​ឧសភា ឆ្នាំ​២០១៣ ​ពោល​គឺ​មិន​យូរ​ប៉ុន្មានមុន​ពេល​លោក​ជាប់​ឆ្នោត​ជា​តំណាង​រាស្ត្រ​គណបក្ស​ប្រជាជននៅ​ក្នុង​ការ​បោះ​ឆ្នោត​ជ្រើស​តាំង​តំណាង​រាស្ត្រ​នា​ខែ​កក្កដា​ឆ្នាំ​នោះ។

កាលពី​ឆ្នាំ​២០០៧ លោក​​គឺជា​អ្នក​មើល​ខុស​ត្រូវ​​ការ​បណ្ដេញ​ប្រជាពលរដ្ឋ​រាប់​ពាន់​គ្រួសាររស់​នៅ​ជុំវិញ​បឹងកក់ ដែល​ត្រូវ​បាន​បូម​ខ្សាច់​លុបដើម្បី​​ត្រួស​ត្រាយ​ផ្លូវ​​សម្រាប់​គម្រោង​អភិវឌ្ឍន៍​មួយ​ដែល​មាន​ទំហំ​ទឹក​ប្រាក់​៨០​លាន​ដុល្លារ​របស់​ក្រុមហ៊ុន​​ស៊ូកាគូអុីន របស់​លោក ឡាវ ម៉េងឃីន សមាជិក​​ព្រឹទ្ធសភា​មកពី​គណបក្ស​ប្រជា​ជន​កម្ពុជា។

កាលពី​ម្សិលមិញ អតីត​អ្នកភូមិ​បឹង​កក់​ បានប្រដូច​ការ​រំលោភ​បំពាន​ដែល​លោក កែប ជុតិមា បាន​អនុញ្ញាតឲ្យ​​កើតមាន​​​​ក្នុង​​ឋានៈ​​លោក​ជា​អភិបាល​រាជធានី​ ទៅ​នឹង​​​​ការ​​​រំលោភ​បំពាន​​ដោយ​ កាំង ហ្គេចអា៊វ ហៅ​ ឌុច អតីត​ប្រធាន​មន្ទីរ​​ ស-២១ ក្រោម​របប​​ខ្មែរក្រហម ។

អ្នកស្រី ស៊ា ណារ៉េត ​អាយុ​៥៧ឆ្នាំ ដែល​ជា​អ្នក​តវ៉ា បាន​និយាយ​ថា “​កែប ជុតិមា សម្លាប់​មនុស្ស​ក្រោម​របប​ ហ៊ុន សែន ដូច​ ឌុច សម្លាប់​​មនុស្ស​ក្រោម​របប​ ប៉ុល ពត អ៊៊ីចឹង​ដែរ​​។ គាត់​បាន​បំផ្លាញ​​សុភមង្គល​របស់​ប្រជាពល​រដ្ឋ​ គាត់ធ្វើ​ឲ្យ​ប្រជាពលរដ្ឋ​ឈឺចាប់ ហើយ​គាត់​​បាន​​បណ្ដេញ​​​ប្រជា​​ពល​រដ្ឋ​​ចេញពី​ដីធ្លី​របស់​ខ្លួន​ ​ហើយ​បន្ទាប់​មក​​ប្រគល់​​វា​ទៅ​ឲ្យ​អ្នក​មាន

​អំណាច​”។

នៅ​ខាង​ក្រៅ​​រដ្ឋសភា ក្រុម​អ្នក​តវ៉ា​​បាន​ធ្វើ​ពិធី​សាសនា​ដើម្បី​ដាក់​បណ្ដាសា​លោក កែប ជុតិមា។ អ្នកស្រី ស៊ឹម សុភាព អាយុ​៥១​ឆ្នាំ ​បាននិយាយ​ថា “​​យើង​ដាក់​បណ្ដាសា​​គាត់​ជា​មួយ​​​នឹង​អំបិល​ម្ទេស​ ពីព្រោះ​គាត់​ធ្វើ​ឲ្យ​ប្រជាពល​រដ្ឋ​រង​ទុក្ខ​ច្រើន​​ណាស់​​”។

ទោះ​ជាយ៉ាង​ណា លោក កែប ជុតិមា មិនអាច​ទាក់​ទង​បានទេ​កាលពី​ម្សិល​មិញ។

ចំណែក​ឯលោក ឈាង វុន ​តំណាង​រាស្ត្រ​មកពី​គណបក្ស​ប្រជាជន​កម្ពុជា និង​ជា​អ្នក​នាំពាក្យ​រដ្ឋសភា​បាន​មាន​ប្រសាសន៍​ថា ​រដ្ឋ​សភា​គ្មាន​សិទ្ធិ​​ដក​តំណាង​រាស្ត្រ​ចេញ​ពី​តំណែង​

ឡើយ​។ លោក​​បាន​បញ្ជាក់​ថា “​ [សភា​] ​គ្មាន​សិទ្ធិ​​ដក​មន្ត្រី​ជាប់​ឆ្នោត​ដែល​ប្រជាពល​​រដ្ឋ​​ជាច្រើន​​​បោះ​ឆ្នោត​គាំទ្រ​ដោយ​សារតែ​​​ប្រជាពល​រដ្ឋ​​មួយ​ក្តាប់​​​តូច​​​ស្នើ​សុំ​ឡើយ​​”។ លោក​បាន​លើកឡើង​​បន្ថែមទៀត​ថា លោក​ កែប ជុតិមា គោរព​ព្រះពុទ្្ធ​សាសនា​​ណាស់​ដូច្នេះ​លោក​ជឿ​ថា ​ការ​ដាក់​បណ្ដាសា​លើ​លោក កែប ជុតិមា​ ​គឺ​ជា​រឿង​​មិន​អាច​ទៅ​រួច​ឡើយ​៕ សុខុម​​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស