31.5 C
Phnom Penh

មន្ត្រី​សុខាភិបាល​ស្នើ​ឲ្យ​អ្នក​ធ្វើ​ដំណើរ​​​ប្រុង​ប្រយ័ត្ន ដើម្បី​ទប់​ស្កាត់​ការ​ឆ្លង​រាល​ដាល​នៃ​ជំងឺ​ផ្លូវ​ដង្ហើម MERS

ដោយ ឌឹ ខេមបូឌា ដេលី

បទវិភាគ

បន្ទាប់ពី​​ផ្ទុះ​ករណី​ជំងឺ​ផ្លូវ​ដង្ហើម​ដ៏កាច​សាហាវ​មួយ​នៅ​ក្នុង​ប្រទេស​កូរ៉េ​ខាង​ត្បូង​ ដែល​បានផ្ដាច់​ជីវិត​មនុស្ស​​បី​នាក់​ និង​ឆ្លង​ទៅ​មនុស្ស​៣៦​នាក់​ផ្សេង​ទៀត​នៅ​ក្នុង​ប្រទេស​នេះ​ចាប់​តាំង​ពី​ចុង​ខែ​​មុន​មកនោះ​ កាលពី​ថ្ងៃ​សុក្រ​មន្ត្រី​សុខាភិបាល​កម្ពុជា​ បាន​ស្នើ​ឲ្យ​អ្នក​​ធ្វើ​ដំណើរ​ចេញ​ពី​តំបន់​ឆ្លង​ជំងឺ​នេះ​មាន​ការ​ប្រុង​ប្រយ័ត្ន​ ដើម្បី​បញ្ចៀស​ការ​ឆ្លង​រាល​ដាល​ជំងឺ​នេះ​​នៅ​ក្នុង​ប្រទេស​កម្ពុជា​។

យោង​តាម​អង្គការ​សុខភាព​​ពិភព​លោក (WHO) បាន​ឲ្យ​ដឹង​ថា ជំងឺ​ផ្លូវ​ដង្ហើម​មជ្ឈិមបូពា៌​ដែល​ហៅ​កាត់​ថា MERS នេះ​ គឺ​ជា​ជំងឺ​ផ្លូវ​ដង្ហើម​មួយ​ប្រភេទ​ដែល​ត្រូវ​បាន​រក​ឃើញលើក​ដំបូង​នៅ​ក្នុង​ប្រទេស​អារ៉ាប៊ីសាអូឌីត​ក្នុង​ឆ្នាំ​២០១២ ហើយ​ចាប់​តាំង​ពី​ពេល​នោះ​មក ជំងឺ​នេះ​បាន​ឆក់​យក​អាយុជីវិត​មនុស្ស​៤៤២​នាក់ និង​ឆ្លង​ទៅ​មនុស្ស​ចំនួន​១.១៧៩​នាក់​ផ្សេង​ទៀត។

សេចក្ដី​ថ្លែង​ការណ៍​មួយ​ចេញ​ដោយ​ក្រសួង​សុខាភិបាល ​និង​អង្គការ​សុខភាព​ពិភព​លោក​កាលពី​ថ្ងៃ​សុក្រ​មាន​ខ្លឹមសារ​យ៉ាង​ដូច្នេះ​ថា “​ប្រសិន​បើ​អ្នក​មាន​អាការៈ​ដូច​ខាង​ក្រោម​ ដូចជា គ្រុន​ក្ដៅ ក្អក និង​ថប់ៗ​ដង្ហើម​អំឡុងពេល​ធ្វើ​ដំណើរ​​ ឬ​ក្រោយ​ការ​វិល​ត្រឡប់​របស់​អ្នក​ពី​បណ្ដា​ប្រទេស​នៅ​មជ្ឈិម​បូពា៌ ឬ​សាធារណរដ្ឋកូរ៉េ សូម​ទៅ​ជួប​គ្រូពេទ្យជា​បន្ទាន់​”។

លោក លី សុវណ្ណ ប្រធាន​នាយកដ្ឋាន​ប្រយុទ្ធនឹង​ជំងឺ​ឆ្លង​នៃ​ក្រសួង​សុខាភិបាល បាន​មាន​ប្រសាសន៍​ថា អ្នក​ផ្ដល់​សេវា​សុខភាព​ និង​និយោជិក​នៅ​អាកាសយានដ្ឋាន​​ក្នុង​រាជធានី​ភ្នំពេញ និង​អាកាសយានដ្ឋាន​​​ក្នុង​ខេត្ត​សៀមរាប ​បាន​ទទួល​ការ​បណ្ដុះ​បណ្ដាល​​ដើម្បី​សម្គាល់​ និង​​​ដាក់​ដោយ​ឡែក​នូវករណី​ជំងឺ​ MERS ដែល​អាច​កើត​មាន​។

លោក​បានមាន​ប្រសាសន៍​ទៀត​ថា “​ដោយសារ​តែ​យើង​មាន​ជើង​ហោះ​ហើរ​ផ្ទាល់​ពីកូរ៉េ [ខាងត្បូង] នោះ​​ហើយ​ជាមូលហេតុ​ដែល​យើង​ព្រួយបារម្ភ​។ យើង​ព្រួយ​បារម្ភ​ណាស់​ចំពោះ​បញ្ហា​នេះ​ យើង​ត្រូវ​មាន​ការ​ប្រុង​ប្រយ័ត្ន​ខ្ពស់”។

យោង​តាម​​វេជ្ជបណ្ឌិត​ លី សុវណ្ណ បាន​ឲ្យ​ដឹង​ទៀត​ថា មាន​មន្ទីរ​ពេទ្យចំនួន​ប្រាំមួយ​ដែល​ត្រៀម​ព្យាបាល​​ជំងឺ​​ដូច​ជា​​ជំងឺ​ MERS ជា​ដើម​ ក្នុង​នោះ​រួម​មាន​មន្ទីរ​​ពេទ្យ​កាល់ម៉ែត​ និង​មន្ទីរ​ពេទ្យ​មិត្តភាព​ខ្មែរ​-សូវៀត​ក្នុង​រាជធានី​ភ្នំពេញ​ ព្រមទាំង​មន្ទីរ​ពេទ្យ​បង្អែក​ខេត្ត​កំពង់​ចាម សៀមរាប កំពត និង​ស្ទឹង​ត្រែង​ផង​ដែរ​។

លោក​បាន​បញ្ជាក់​ថា “​ដូច​អស់​លោក​​បាន​ដឹង​ហើយ​ថា ​កន្លង​មក​​​យើងធ្លាប់​​បាន​ពន្យារ​ពេល​ការ​ផ្ទុះ​ករណី​ជំងឺ​ផ្សេងៗ​ទៀត​នៅ​ក្នុង​ប្រទេស​កម្ពុជា​ យើង​មាន​បទពិសោធន៍​​ទប់​ស្កាត់​ការ​ឆ្លង​រាល​ដាល​នៃ​ជំងឺ​”។

លោកស្រី វីកឃី ហូសៀ (Vicky Houssiere) មន្ត្រី​ទំនាក់​ទំនង​របស់​អង្គការ​សុខភាព​ពិភព​លោក​បានមាន​​ប្រសាសន៍​ថា ហានិភ័យ​​នៃ​ការ​ឆ្លង​រាល​ដាល​នៃ​ជំងឺ​ MERS មក​ដល់​កម្ពុជា​គឺ​មិន​ខ្ពស់​ទេ។ លោកស្រី​បន្ត​ថា “​វា​ជា​ហានិភ័យ​ដូច​​​នៅ​ក្នុង​ប្រទេស​ផ្សេងៗ​ទៀត​ដែរ [ប៉ុន្តែ​] នៅ​ក្នុង​ប្រទេស​កម្ពុជា​​គ្មាន​ហានិភ័យ​ខ្ពស់​​នៅ​ក្នុង​ប្រទេស​ផ្សេងៗ​ឡើយ។ ពេល​អ្នក​ធ្វើ​ដំណើរ​កាន់​តែ​ច្រើន ហានិភ័យ​ដែល​អ្នក​ឆ្លង​ជំងឺ​នេះ​ក៏​មាន​កាន់​តែ​ច្រើន​ដែរ។ ជំងឺ​គ្មាន​ព្រំដែន​ទេ”។

លោក​ស្រី​​បានមាន​ប្រសាសន៍បន្ថែម​ទៀត​ថា រហូត​មក​ទល់​ពេ​ល​នេះ ​ជំងឺ​នេះ​បាន​ឆ្លង​រាល​ដាល​ទៅ​ដល់​ប្រទេស​ចំនួន​២៥​ហើយ ក្នុង​នោះ​រួម​មាន​ទាំង​ប្រទេស​កូរ៉េខាងត្បូង ប្រទេស​ចិន ប្រទេស​ម៉ាឡេស៊ី និង​ប្រទេស​ហ្វីលីពីន​ផង ដោយ​អត្រា​ស្លាប់​មាន​ប្រមាណ​៣៦​ភាគរយ៕ សុខុម​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស