35 C
Phnom Penh

នគរបាល​ចាប់ខ្លួន​ជនសង្ស័យ​​ចែក​ចាយ​ថ្នាំញៀន​នៅក្រុង​បាត់​ដំបង

ដោយ ឌឹ ខេមបូឌា ដេលី

បទវិភាគ

មន្ត្រីម្នាក់បាននិយាយថា នគរបាល​បានចាប់ខ្លួន​​អ្នកចែកចាយ​ថ្នាំញៀន​ជាប់សង្ស័យ​បីនាក់​នៅក្នុង​ក្រុង​បាត់​ដំបង​កាលពី​ថ្ងៃសៅរ៍ជាមួយ​នឹង​ម៉ាទឹកកក​ទម្ងន់​ជិត​១គីឡូក្រាម​ដែល​តាមចោទថា ពួកគេ​បានទិញ​ក្នុង​ប្រទេស​ឡាវ ហើយ​មានបំណង​យក​ទៅ​ចែកចាយ​ក្នុង​ខេត្ត​បាត់​ដំបង។

លោក ចិត្រ វណ្ណី ស្នងការ​រងនគរបាល​ខេត្ត​ទទួលបន្ទុក​​ប្រតិបត្តិការ​ប្រឆាំងគ្រឿងញៀន បាន​មានប្រសាសន៍ថា ជន​​ទាំង​បីនាក់​នេះ​ត្រូវ​បាន​នគរបាល​ខេត្ត​ចាប់ខ្លួន​នៅ​សួន​ ស ខេង នៅ​មាត់​ស្ទឹង​នៅ​ម៉ោង​ប្រហែល​​៦ល្ងាច។

ដោយ​បដិសេធ​មិនបកស្រាយ​លម្អិត​ពី​ការ​ចាប់ខ្លួន ឬ​ការ​ស៊ើប​អង្កេត​របស់​នគរបាល​នោះ​ លោក វណ្ណី បាន​មាន​ប្រសាសន៍ថា “​​បន្ទាប់ពីការ​ចាប់ខ្លួន​ពួកគេ​ដោយ​ប្រើ​បច្ចេក​ទេស​ពិសេស​មក ជន​សង្ស័យ​ទាំង​នេះ​បាន​ប្រាប់​យើង​ថា ពួកគេ​បានទិញ​ថ្នាំញៀន​ទាំង​នេះ​ពី​ប្រទេស​ឡាវ”។

លោក​បានមានប្រសាសន៍ថា “​ឥឡូវ​នេះ​ នគរបាល​កំពុង​រៀប​ចំឯកសារ​​ដើម្បី​បញ្ជូន​ពួកគេ​ទៅ​សាលាដំបូង​ខេត្ត​នៅពេល​ឆាប់ៗនេះ​តាមដែលអាច​ធ្វើទៅបាន គឺ​ថ្ងៃស្អែក [ថ្ងៃច័ន្ទ​] យូរ​បំផុត”។

លោក​បានបន្ថែមថា ជន​ទាំងនេះ​​កំពុង​ត្រូវ​បាន​ឃុំខ្លួន​នៅ​ស្នង​ការ​ដ្ឋាននគរបាល​ខេត្ត​។ លោក វណ្ណី បាន​បង្ហាញ​អត្ត​សញ្ញាណ​ជន​សង្ស័យ​ទាំងនេះ​ថាឈ្មោះ ឡាន តារា អាយុ​២៧ឆ្នាំ មកពី​ខេត្ត​ស្ទឹង​ត្រែង​ កែវ រតនៈ អាយុ​៤១ឆ្នាំ មកពី​ខេត្ត​បន្ទាយ​មានជ័យ និង​ សៀង សុខា អាយុ​៤៥ឆ្នាំ​មកពី​រាជធានី​ភ្នំពេញ។

លោក​បានមានប្រសាសន៍ថា សុខា ជា​ជាង​មេកានិក ចំណែក​ពីរនាក់ទៀត​លោក​មិន​ដឹង​ទេ៕ សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស