26 C
Phnom Penh

ប៉ូលិស​ជួយ​ដោះលែង​កម្មករ​កាត់ដេរ​ដែល​ជាប់​សោ​ពេល​យប់​នៅ​រោងចក្រ

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយ​កាលពី​ថ្ងៃ​អាទិត្យ​ថា ប៉ូលិស​ក្រុង​ភ្នំពេញ​ត្រូវ​បាន​គេ​ទូរស័ព្ទ​ហៅ​កាលពី​យប់​ថ្ងៃ​សុក្រ​ដើម្បី​បញ្ជា​ឲ្យ​រោងចក្រ​កាត់ដេរ​ថៅកែ​ចិន​ដោះលែង​កម្មករ​មួយ​ក្រុម ដែល​រោងចក្រ​នេះ​ចាក់​សោ​បង្ខាំង​ទុក​នៅ​ខាង​ក្នុង ក្នុង​ការ​ប៉ុនប៉ង​មិន​បាន​សម្រេច ដែល​បង្ខំ​កម្មករ​ឲ្យ​ធ្វើ​ការ​ពេល​យប់។

លោក នង សុធា មេ​បញ្ជាការ​រង​កម្លាំង​រាជ​អាវុធហត្ថ​ខណ្ឌ​មាន​ជ័យ បាន​និយាយ​ថា កម្មករ​៣០​នាក់​ក្នុង​ចំណោម​កម្មករ​៤០០​នាក់​របស់​រោងចក្រ​កាត់ដេរ​កាំង ដា (Kang Da) បាន​យល់​ព្រម​ធ្វើការ​បី​ម៉ោង​បន្ថែម​បន្ទាប់ពី​វេន​ធម្មតា​របស់​ខ្លួន​ដែល​ចប់​នៅ​ម៉ោង​៥​ល្ងាច​កាលពី​ថ្ងៃ​សុក្រ។ ប៉ុន្តែ​នៅ​ពេល​ដែល​កម្មករ​ចាកចេញ​នៅ​ម៉ោង​៨​យប់ ពួកគេ​ឃើញ​ទ្វារ​របង​ចាក់​សោ ធ្វើ​ឲ្យ​ពួកគេ​ជាប់​នៅ​ខាង​ក្នុង​រោងចក្រ។

លោក សុធា បាន​និយាយ​ថា លោក​បាន​ទទួល​ការ​ហៅ​ទូរស័ព្ទ​ពី​សាច់​ញាតិ​កម្មករ​ដែល​ជ្រួល​ច្រាល​ក្នុង​ចិត្ត ដែល​បាន​តវ៉ា​នៅ​ខាង​ក្រៅ​ខ្លោង​ទ្វារ​រោងចក្រ​ឲ្យ​ដោះ​លែង​កម្មករ​នៅ​ម៉ោង​ប្រហែល​១០​យប់។

លោក​បាន​និយាយ​ថា “បន្ទាប់ពី​ខ្ញុំ​ទទួល​បាន​ព័ត៌មាន​នេះ​ភ្លាម ខ្ញុំ​បាន​បញ្ជា​កម្លាំង​រាជ​អាវុធហត្ថ​ឲ្យ​ធ្វើ​អន្តរាគមន៍។ សាច់​ញាតិ​របស់​កម្មករ​ព្យាយាម​បង្ខំ​ឲ្យ​បើក​ទ្វារ ដូច្នេះ​យើង​បាន​បញ្ជា​សន្តិសុខ​រោងចក្រ​ឲ្យ​បើក​ទ្វារ​ជា​បន្ទាន់។ ពួកគេ​បាន​ចាក់​សោ​ទ្វារ និង​មិន​អនុញ្ញាត​ឲ្យ​កម្មករ​ទៅ​ផ្ទះ​រហូត​ដល់​ម៉ោង​១១​យប់”។

ទោះជា​ការ​ឃាត់​ខ្លួន​ខុស​ច្បាប់​ជា​បទ​ល្មើស​មួយ​ក៏​ដោយ ក៏​លោក សុធា បាន​និយាយ​ថា មិន​មាន​ការ​ចាប់​ខ្លួន​ទេ ពីព្រោះ​គ្មាន​ការ​ប្រើ​អំពើ​ហិង្សា​លើ​កម្មករ។ លោក​បាន​និយាយ​ថា ក្រុម​មន្ត្រី​មកពី​ក្រសួង​ការងារ​បាន​ទាក់ទង​ការិយាល័យ​របស់​លោក​កាលពី​ថ្ងៃ​សៅរ៍​ដើម្បី​ស៊ើប​អង្កេត​អំពី​ឧប្បត្តិហេតុ​នេះ ហើយ​នឹង​ចុះ​ពិនិត្យ​រោងចក្រ​នេះ​នៅ​ថ្ងៃ​នេះ។

អ្នក​នាំ​ពាក្យ​ក្រសួង​ការងារ​មិន​អាច​ទាក់ទង​សុំ​ការ​អត្ថាធិប្បាយ​បាន​ទេ។

លោក ម៉ៅ សារឿន មេ​ប៉ុស្តិ៍​សង្កាត់​ស្ទឹង​មាន​ជ័យ បាន​និយាយ​ថា រោងចក្រ​នេះ​ចង់​ឲ្យ​កម្មករ​របស់​ខ្លួន​ធ្វើការ​លើស​ម៉ោង​ដើម្បី​បញ្ចប់​តាម​ការ​បញ្ជា​ទិញ។

លោក​បាន​និយាយ​ថា “រោងចក្រ​បាន​សុំ​កម្មករ​ឲ្យ​ធ្វើការ​លើស​ម៉ោង ពីព្រោះ​ពួកគេ​មាន​ការ​បញ្ជា​យក​ខោអាវ​ជាបន្ទាន់​ពី​អ្នក​ទិញ”។

គីម លីហូ ជា​បុគ្គលិក​រោងចក្រ​ដែល​មិន​ព្រម​ប្រាប់​តួនាទី ឬ​តំណែង បាន​និយាយ​ថា បញ្ហា​នេះ​ត្រូវ​បាន “ដោះស្រាយ​ហើយ” ហើយ​លោក​មិន​អធិប្បាយ​បន្ថែម​ទេ។

លោក​បាន​និយាយ​ថា “ប្រសិនបើ​លោក​ចង់​បាន​ការ​ពន្យល់​និង​ព័ត៌មាន​បន្ថែម លោក​ត្រូវ​និយាយ​ទៅ​ផ្នែក​ធនធាន​មនុស្ស។ ខ្ញុំ​ស្តាយ​ដែល​ខ្ញុំ​មិន​អាច​រក​លេខ​ទាក់ទង​របស់​គាត់​ឲ្យ​លោក​បាន”។ (រាយការណ៍​បន្ថែម​ដោយ Tszkwan Ho)

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស