អាជ្ញាធរបានរារាំងកម្មកររោងចក្រកាត់ដេរជាង៥០០នាក់ដែលធ្វើកូដកម្មមិនឲ្យហែក្បួនទៅកាន់ភូមិគ្រឹះលោកនាយករដ្ឋមន្ត្រី ហ៊ុន សែន ក្នុងរាជធានីភ្នំពេញកាលពីម្សិលមិញជាផ្នែកមួយនៃការតវ៉ាទាមទារដំឡើងប្រាក់ខែ និងលក្ខខណ្ឌការងារល្អប្រសើរ។
មន្ត្រីនគរបាល និងសន្តិសុខខណ្ឌមានជ័យប្រហែល៥០នាក់ បានរារាំងកម្មករមកពីរោងចក្រ M&V International Manufacturing មិនឲ្យហែក្បួនកាត់ស្ពានអាកាសក្បាលថ្នល់ឆ្ពោះទៅកណ្ដាលរាជធានីនៅម៉ោងប្រហែល៩ព្រឹក។
បន្ទាប់ពីការប្រឈមមុខដាក់គ្នាមក ពេលនោះ កម្មករបានឡើងជិះរ៉ឺម៉កម៉ូតូកង់បីនៅម៉ោងប្រហែល១១ព្រឹក ហើយធ្វើដំណើរទៅក្រសួងការងារស្ថិតក្នុងខណ្ឌទួលគោក ទីដែលតំណាងកម្មករត្រូវបានបដិសេធមិនឲ្យជួបប្រជុំជាមួយមន្ត្រីទាំងនោះ។
លោក ឌី រ័ត្នខេនរុំ អភិបាលរងខណ្ឌមានជ័យបានមានប្រសាសន៍ថា លោកបានដឹកនាំកម្លាំងទៅរារាំងកម្មករដែលធ្វើការតវ៉ាទាំងនោះ ពីព្រោះពួកគេមិនបានសុំការអនុញ្ញាតពីអាជ្ញាធររាជធានីសម្រាប់ការហែក្បួនរបស់ខ្លួនឡើយ។
លោកបានមានប្រសាសន៍ថា “វាមិនមែនមានន័យថា យើងមិនចង់ឲ្យពួកគេហែក្បួនទេ ប៉ុន្តែវាមិនមែនជាការល្អឡើយ ពីព្រោះវាប៉ះពាល់ដល់សណ្ដាប់ធ្នាប់សាធារណៈ”។
កម្មករប្រហែល២.០០០នាក់បានធ្វើការតវ៉ាទ្រង់ទ្រាយធំនៅរោងចក្រនេះ ដែលផ្គត់ផ្គង់សម្លៀកបំពាក់ដល់ក្រុមហ៊ុន H&M កាលពីថ្ងៃទី១៩ ខែឧសភា ស្នើសុំឲ្យអ្នកគ្រប់គ្រងដោះស្រាយការទាមទារ១៧ចំណុច រួមមាន ការដំឡើងប្រាក់ឧបត្ថម្ភថ្លៃធ្វើដំណើរប្រចាំខែដល់១៥ដុល្លារ និងប្រាក់ឧបត្ថម្ភថ្លៃបាយថ្ងៃត្រង់ប្រចាំថ្ងៃ១ដុល្លារ។
ពួកគេបានត្រឡប់ចូលធ្វើការវិញកាលពីថ្ងៃទី២ ខែមិថុនា តាមសេចក្ដីបង្គាប់របស់សាលាដំបូងរាជធានីភ្នំពេញ ប៉ុន្តែបានចេញពីរោងចក្រជាថ្មីម្ដងទៀតកាលពីថ្ងៃទី៤ ខែមិថុនា ដោយសារការចរចាបានជាប់គាំង។
កាលពីថ្ងៃសុក្រ តំណាងកម្មករជាង២.០០០នាក់ដែលបានធ្វើកូដកម្មបានហែក្បួនទៅសាលាដំបូងរាជធានីភ្នំពេញសុំឲ្យដកបទបញ្ជាដែលបង្គាប់ឲ្យពួកគេត្រឡប់ទៅធ្វើការវិញនោះ។
លោក រ័ត្នខេនរុំ បានមានប្រសាសន៍ថា ការចរចារវាងតំណាងសហជីព និងតំណាងរោងចក្រនឹងបន្តនៅរោងចក្រនៅថ្ងៃនេះ។
លោក ឃិន ណាំហោ អនុប្រធានសហព័ន្ធសហជីពសំឡេងកម្មករកម្ពុជា បានព្រមានថា កម្មករនឹងព្យាយាមហែក្បួនទៅភូមិគ្រឹះលោកនាយករដ្ឋមន្ត្រីជាថ្មីម្ដងទៀត ប្រសិនបើមិនមានការឆ្លើយតបចំពោះការទាមទាររបស់ពួកគេទេនោះ។
លោក ណាំហោ បានមានប្រសាសន៍ថា “ខ្ញុំចង់ឲ្យសម្ដេចតេជោ ហ៊ុន សែន អន្តរាគមន៍ជួយរកដំណោះស្រាយជូនកម្មកររបស់យើង ពីព្រោះអស់រយៈពេល២សប្ដាហ៍កន្លងមកហើយ យើងមិនទាន់ទទួលបានលទ្ធផលនៅឡើយទេ”។
លោកបានបន្ថែមថា “យើងនឹងបន្តហែក្បួនម្ដងទៀត ប្រសិនបើមិនមានដំណោះស្រាយល្អប្រសើរទេនោះ”៕ សារុន