កាលពីម្សិលមិញ លោកនាយករដ្ឋមន្ត្រី ហ៊ុន សែន បានបបួលលោក សម រង្ស៊ី មេដឹកនាំគណបក្សប្រឆាំងឲ្យស្បថជាមួយលោកនៅទីសក្ការបូជាដ៏ល្បីល្បាញមួយ (ព្រះអង្គដងកើ) ក្នុងរាជធានីភ្នំពេញថា លោក សម រង្ស៊ី នឹងត្រូវស្លាប់ដោយរន្ទះបាញ់ និងគ្រាប់កាំភ្លើង ប្រសិនបើការចោទប្រកាន់របស់លោកថាការបោះឆ្នោតជ្រើសតាំងតំណាងរាស្ត្រឆ្នាំ២០១៣ត្រូវបានលួចបន្លំ មិនមែនជាការពិត។
អំឡុងសម័យប្រជុំសភាដើម្បីអនុម័តច្បាប់គ្រប់គ្រងគ្រោះមហន្តរាយថ្មី លោក ហ៊ុន សែន បានវាយបកទៅនឹងអ្វីដែលលោកលើកឡើងថា ជានិន្នាការរបស់ក្រុមតំណាងរាស្ត្រគណបក្សប្រឆាំងដែលចូលចិត្តធ្វើការអះអាងចម្លែកៗដើម្បីកេងចំណេញសន្លឹកឆ្នោត។
ដោយផ្ទុះកំហឹងដោយសារសុន្ទរកថារបស់លោក លិម គិមយ៉ា ដែលបានលើកឡើងថា កាកបាតក្រហមកម្ពុជាផ្ដល់អាទិភាពទៅលើអ្នកគាំទ្រគណបក្សប្រជាជនកម្ពុជានៅក្នុងការផ្ដល់ជំនួយមនុស្សធម៌ក្រោយគ្រោះមហន្តរាយ លោក ហ៊ុន សែន បានមានប្រសាសន៍ថា ដល់ពេលដែលត្រូវធ្វើខ្លាំងដាក់គណបក្សប្រឆាំងហើយ។
លោក ហ៊ុន សែន បានលើកឡើងថា “វិធីតែមួយគត់ដែលយើងអាចដោះស្រាយបញ្ហាទាំងនេះបានគឺស្បថឲ្យរន្ទះបាញ់។ ខ្ញុំថាចាំឯកឧត្តម សម រង្ស៊ី មក ខ្ញុំបបួលធ្វើពិធីស្បថនៅព្រះអង្គដងកើ។ ទី១អារឿងលួចសន្លឹកឆ្នោតនេះ ត្រូវតែបបួលគ្នាស្បថ បើអ្នកណាមិនហ៊ានស្បថគឺបោកប្រាស់ប្រជាពលរដ្ឋប្រជាជាតិតែម្តង។ ឥឡូវរឿងកាកបាទក្រហមចែកជំនួយរើសមុខមាត់។ នេះតើហ៊ានស្បថឲ្យរន្ទះបាញ់ទេ?”។
លោក ហ៊ុន សែន បានបន្ថែមថា ប្រសិនបើលោក សម រង្ស៊ី ត្រៀមខ្លួនរួច លោកនឹងទៅស្បថដាក់ជីវិតជាមួយគ្នាថា ជ័យជម្នះរបស់គណបក្សប្រជាជនកម្ពុជានៅក្នុងការបោះឆ្នោតជ្រើសតាំងតំណាងរាស្ត្រឆ្នាំ២០១៣ គឺឈ្នះដោយយុត្តិធម៌។
លោក ហ៊ុន សែន បានសួរថា “តើគណបក្សនានាហ៊ានស្បថទេជាមួយគណបក្សប្រជាជនមុខព្រះអង្គដងកើ អ្នកណាថាគណបក្សប្រជាជន ។ បើគណបក្សប្រជាជនលួចសន្លឹកឆ្នោត ឲ្យគណបក្សប្រជាជនងាប់ទាំងអស់ ត្រូវគ្រាប់ រន្ទះបាញ់ ស្អីទាំងអស់ ។ ប៉ុន្តែអ្នកណាភូត ចោទគេខុស អ្នកហ្នឹងក៏ត្រូវដូចគ្នាវិញដែរ រន្ទះបាញ់ទាំងអស់”។
លោក សម រង្ស៊ី ដែលពេលនេះកំពុងធ្វើដំណើររៃអង្គាសមូលនិធិនៅអឺរ៉ុប កាណាដា និងអូស្ត្រាលី មិនបានឆ្លើយតបនឹងសំណើសុំការអត្ថាធិប្បាយជុំវិញការបបួលរបស់លោក ហ៊ុន សែន ទេ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានមានប្រសាសន៍ថា លោកមិនអាចធ្វើអត្ថាធិប្បាយថា តើលោក សម រង្ស៊ី នឹងចូលរួមស្បថជាមួយលោក ហ៊ុន សែន ឬយ៉ាងណាបានឡើយ ប៉ុន្តែបានលើកឡើងថា គណបក្សប្រឆាំងយល់ឃើញថា លទ្ធផលនៃការបោះឆ្នោតជ្រើសតាំងតំណាងរាស្ត្រនៅខែកក្កដា ឆ្នាំ២០១៣ ត្រូវបានកែប្រែ។
លោកបានមានប្រសាសន៍យ៉ាងដូច្នេះថា “មានភាពមិនប្រក្រតីជាច្រើន នោះជាមូលហេតុដែលយើងត្រូវការកំណែទម្រង់បោះឆ្នោត ហើយពេលនេះយើងកំពុងស្ថិតក្នុងដំណើរការធ្វើកំណែទម្រង់បោះឆ្នោត។ យើងត្រូវផ្ដោតលើអនាគត ហើយពេលនេះយើងកំពុងធ្វើកំណែទម្រង់បោះឆ្នោត យើងចង់ឲ្យការបោះឆ្នោតនាពេលអនាគតមានភាពប្រសើរឡើង”។
គួររំឭកថា គណបក្សប្រជាជនកម្ពុជាទទួលបានសំឡេងឆ្នោត៦៨អាសនៈ ចំណែកឯគណបក្សសង្គ្រោះជាតិទទួលបាន៥៥អាសនៈនៅក្នុងការបោះឆ្នោតឆ្នាំ២០១៣ ដែលស្ទើរតែច្រើនជាងទ្វេដងធៀបនឹងសំឡេងរបស់គណបក្សប្រឆាំងនៅក្នុងរដ្ឋសភា ប៉ុន្តែវាបានបណ្ដាលឲ្យមានការតវ៉ារយៈពេលជិត១ឆ្នាំ ដោយចោទប្រកាន់ថាមានការលួចបន្លំសន្លឹកឆ្នោត។
លោក សម រង្ស៊ី និងលោក កឹម សុខា ដែលជាប្រធាន និងអនុប្រធានគណបក្សប្រឆាំងបានដឹកនាំការធ្វើពហិការមិនទទួលយកអាសនៈរបស់ខ្លួននៅក្នុងសភា ហើយបានធ្វើការតវ៉ាតាមដងផ្លូវកាន់តែធំទៅៗអស់រយៈពេលជិត៦ខែ មុនពេលមានការបង្ក្រាបយ៉ាងសាហាវឃោរឃៅពីសំណាក់រដ្ឋាភិបាលរបស់គណបក្សប្រជាជនកម្ពុជា។
៦ខែក្រោយមក លោក សម រង្ស៊ី និងលោក ហ៊ុន សែន បានចុះកិច្ចព្រមព្រៀងចូលសភាជាថ្នូរនឹងការធ្វើកំណែទម្រង់ស៊ីជម្រៅលើគណៈកម្មាធិការជាតិរៀបចំការបោះឆ្នោត (គ.ជ.ប.) ដែលមានសមាសភាពសមាជិកគណបក្សប្រជាជនកម្ពុជាច្រើនលើសលប់។
ចាប់តាំងពីពេលនោះមក គណបក្សទាំងពីរបានចៀសវាងការប្រឈមមុខដាក់គ្នា ហើយកាលពីពេលថ្មីៗនេះបានលើកកម្ពស់អ្វីដែលគណបក្សទាំងពីរហៅថា “វប្បធម៌សន្ទនា” ដែលខ្លួននិយាយថា ជាវិធីធ្វើការជាមួយគ្នាប្រកបដោយប្រសិទ្ធភាព ខណៈចៀសវាងការប្រមាថគ្នា និងការប្រើអំពើហិង្សាដូចបានកើតឡើងប៉ុន្មានឆ្នាំកន្លងមកនេះ។
នៅពេលសាកសួរកាលពីម្សិលមិញថា តើការបបួលរបស់លោក ហ៊ុន សែន ឲ្យលោក សម រង្ស៊ី ស្បថ ជាបំពានវប្បធម៌សន្ទនាឬយ៉ាងណានោះ លោក យឹម សុវណ្ណ បានមានប្រសាសន៍ថា គួរតែប្រជាពលរដ្ឋជាអ្នកសម្រេចទៅចុះ។ លោកបានមានប្រសាសន៍ទៀតថា “វប្បធម៌សន្ទនា គឺជាវប្បធម៌សន្ទនា ហើយយើងនៅតែគាំទ្រវប្បធម៌សន្ទនា។ សុន្ទកថាធ្វើឡើងដោយបុគ្គលណាមួយ យើងទុកឲ្យប្រជាពលរដ្ឋជាអ្នកវិនិច្ឆ័យទៅចុះ។ [លោក ហ៊ុន សែន] មានសិទ្ធិនិយាយនៅក្នុងសភា ហើយខ្ញុំមិនចង់ធ្វើការវិនិច្ឆ័យជួសមុខឲ្យប្រជាពលរដ្ឋទេ”៕ សុខុម