32.1 C
Phnom Penh

ក្រសួង​​​មហាផ្ទៃ​​​កំពុងបង្កើត​​​សាលា​​​អភិបាល​​​កិច្ច​​​ល្អ​​​

ដោយ ឌឹ ខេមបូឌា ដេលី

បទវិភាគ

មន្ត្រី​​​ក្រសួង​​​​ និង​​​ដៃ​​​គូ​​​​​​មិន​​​មែន​​​រដ្ឋាភិបាល​​​​​​​​​បាន​​​លើក​​​ឡើង​​​កាល​​​ពី​​​ម្សិល​​​មិញ​​​ថា ក្រសួង​​​មហាផ្ទៃ​​​​​​កំពុង​​​បង្កើត​​​​​​កម្ម​​​វិធី​​​សម្រាប់​​​ “សាលា​​អភិបាល​​​កិច្ច​​​ល្អ​​​​​​​​​” ដែល​​​ចាប់​​​ពី​​​​​​ឆ្នាំ​​​២០០៦​​​ទៅ​​​នឹង​​​នាំ​​​មន្ត្រី​​​មក​​​ពី​​​បណ្តា​​​ខេត្ត​​​នានា​​​ទៅ​​​កាន់​​​រាជ​​​ធានី​​​ភ្នំពេញ​​​ សម្រាប់​​​វគ្គ​​​សិក្សា​​​ខ្លី​​​មួយ​​​​​​ស្តី​​​អំពី​​​​​​ការ​​​បំពេញ​​​ការ​​​ងារ​​​ប្រកប​​​ដោយ​​​​​​ភាព​​​សុចរិត។

ពួក​​​គេ​​​​​​បាន​​​លើ​​​ក​​​ឡើង​​​ថា បន្ទាប់​​​ពី​​​បញ្ចប់​​​វគ្គ​​​សិក្សាដែល​​​មាន​​​​​​រយៈ​​​ពេល​​​បី​​​​​​​​​ខែ​​​ មន្ត្រី​​​នឹង​​​វិល​​​ត្រឡប់​​​ទៅ​​​កាន់​​​បណ្តា​​​ខេត្ត​​​​​របស់​​​ខ្លួន​​​​​​រៀង​​​ៗ​​​ខ្លួន​​​វិញ​​​ ជា​​​ទី​​​ដែល​​​រដ្ឋាភិបាល​​​មាន​​​បំណង​​​បង្កើត​​​ “មជ្ឈមណ្ឌល​​​អភិវឌ្ឍន៍​​​ធន​​​ធាន​​​មនុស្ស​​​” ដើម្បី​​​ផ្តល់​​​​​​វគ្គ​​​បណ្តុះ​​​បណ្តាល​​​ដល់​​​មន្ត្រី​​​រាជ​​​ការ​​​នូវ​​​អ្វី​​​ដែល​​​បាន​​​សិក្សា​​​នៅ​​​រាជ​​​ធានី​​​ភ្នំពេញ​​​។​​​

លោក ងី​​​ ចាន់​​​ផល រដ្ឋលេខាធិការ​​​ក្រសួង​​​មហាផ្ទៃ​​​ដែល​​​កំពុង​​​ធ្វើ​​​ការ​​​​​​លើ​​​គម្រោង​​​នេះ​​​​​​បាន​​​មាន​​​ប្រសាសន៍​​​ថា “​​​ផ្នែក​​​នៃ​​​របៀប​​​វារៈ​​​កំណែ​​​ទម្រង់​​​របស់​​​រដ្ឋាភិបាល​​​ គឺ​​​ដើម្បី​​​កសាង​​​ និង​​​ពង្រឹង​​​សមត្ថភាព​​​របស់​​​មន្ត្រី​​​រាជ​​​ការ​​​នៅ​​​ថ្នាក់​​​ជាតិ​​​ និង​​​ថ្នាក់​​​ក្រោម​​​ជាតិ​​​”។

លោក​​​បាន​​​មាន​​​ប្រសាសន៍​​​បន្ថែម​​​ថា “មាន​​​បញ្ហា​​​ដែល​​​កើត​​​ឡើង​​​ស្រាប់​​​ និង​​​បញ្ហា​​​ដែល​​​ទើប​​​នឹង​​​កើត​​​ឡើង​​​ថ្មី​​​ៗ ប៉ុន្តែ​​​រឿង​​​សំខាន់​​​បំផុត​​​នោះ​​​គឺ​​​​​​ពង្រឹង​​​ប្រសិទ្ធភាព​​​​​​នៃ​​​សេវា​​​សាធារណៈ​​​របស់​​​យើង​​​។ ប្រសិទ្ធភាព​​​នេះ​​​គឺ​​​ជា​​​ផ្នែក​​​ដ៏​​​សំខាន់​​​នៃ​​​ហេដ្ឋារចនាសម្ព័ន្ធ​​​ប្រជា​​​ធិបតេយ្យ”។

កាល​​​ពី​​​ខែ​​​កញ្ញា ឆ្នាំ​​​២០១៣​​​ ជា​​​ពេល​​​ដែល​​​ជម្លោះ​​​ផ្នែក​​​នយោបាយ​​​មាន​​​ការ​​​កើន​​​ឡើង​​​ខ្លាំង​​​រវាង​​​គណបក្ស​​​ប្រជា​​​ជន​​​កម្ពុជា និង​​​គណបក្ស​​​សង្គ្រោះ​​​ជាតិ​​​នោះ​​​ លោក​​​នាយក​​​រដ្ឋ​​​មន្ត្រី​​​ ហ៊ុន សែន បាន​​​​​​ថ្លែង​​​សុន្ទរកថា​​រហូត​​​ដល់​​​ទៅ​​​៦​​​ម៉ោង​​​​​​ដោយ​​​ព្រមាន​​​គណៈ​​​រដ្ឋ​​​មន្ត្រី​​​ថ្មី​​​របស់​​​លោក​​​​​​ឲ្យ​​​រៀប​​​ចំ​​​ខ្លួន​​​​​​​បង្កើន​​ការ​​​​​​​​​​​​ពិនិត្យ​​​ពិច័យ​​​​​​ជា​​​សាធារណៈ​​​នៅ​​​ក្នុង​​​អាណត្តិ​​​ទី​​​៥។

លោក​​​ ហ៊ុន សែន បាន​​​ណែនាំ​​​គណៈរដ្ឋ​​​មន្ត្រី​​​ថ្មី​​​ដោយ​​​សំដៅ​​​​​​ទៅ​​​លើ​​​អំពើ​​​ពុក​​​រលួយ​​​តាម​​​តំបន់​​​​​​​​​ដែល​​​កើត​​​មាន​​​តាម​​​រយៈ​​​សេវា​​​សាធារណៈ​​​ដូច្នេះ​​​ថា “សូម​​​ឆ្លុះ​​​កញ្ចក់​​​ដុះ​​​ក្អែល​​​​​​ខ្លួន​​​ឯង​​​ពេល​​​ងូត​​​ទឹក​​​ ប្រសិន​​​បើ​​​ខ្លួន​​​ឯង​​​មាន​​​ជាប់​​​ក្អែល​​​នោះ​​​”។

លោក ចាន់​​​ផល​​​ បាន​​​​​លើ​​ក​​​ឡើង​​​កាល​​​ពីម្ស្ិលមិញ​​​ថា សាលា​​​អភិបាល​​​កិច្ច​​​ល្អ​​​របស់​​​ក្រសួង​​​ “មិន​​​មែន​​​ផ្តោត​​​តែ​​​ទៅ​​​លើ​​​អំពើ​​​ពុក​​​រលួយ​​​ទេ​​​” ហើយ​​​ថា សាលានេះ​​​នឹង​​​ពង្រឹង​​​កម្មវិធី​​​ផ្តល់​​​វគ្គ​​​បណ្តុះ​​​បណ្តាល​​​​​​ដែល​​​មាន​​​ស្រាប់​​​ក្នុង​​​គោល​​​បំណង​​​ “បង្កើត​​​ និង​​​រក្សាភាព​​​សុចរិត​​​”។

លោក​​​បាន​​​មាន​​​ប្រសាសន៍​​​ថា “ក្រៅ​​​ពី​​​អំពើ​​​ពុក​​​រលួយ​​​​​​ សាលា​​​នេះ​​​ក៏​​​ផ្តោត​​​លើ​​​ការ​​​ផ្តល់​​​សេវា​​ធារណៈ​​​ ការ​​​ដោះ​​​ស្រាយ​​​ជម្លោះ​​​ និង​​​ការ​​​ទទួល​​​ខុស​​​ត្រូវ​​​ផង​​​ដែរ។​​​ យើង​​​មាន​​​មន្ត្រី​​​រដ្ឋាភិបាល​​​ចំនួន​​​១៥.០០០នាក់​​​ ហេតុ​​​ដូច្នេះ​​​យើង​​​គ្មាន​​​បញ្ហា​​​ក្នុង​​​ការ​​​កំណត់​​​ថា តើ​​​នរណា​​​ដែល​​​ត្រូវ​​​ការ​​​វគ្គ​​​បណ្តុះ​​​បណ្តាល​​​​​​នេះ​​​ឡើយ​​​”។

លោក​​​ ចាន់​​​ផល បាន​​​​​​លើក​​​ឡើង​​​ទៀត​​​ថា ក្រសួង​​​នៅ​​​មិន​​​ទាន់​​​ចុះ​​​ហត្ថលេខា​​​លើ​​​កិច្ច​​​ព្រម​​​ព្រៀង​​​ផ្លូវ​​​ការ​​​ជាមួយ​​​អង្គការ​​​តម្លា​​​ភាព​​​កម្ពុជា​​​​​​នៅ​​​ឡើយ​​​ទេ​​ ហើយ​​​បើ​​​យោង​​​តាម​​​លោក ព្រាប កុល នាយក​​​ប្រតិបត្តិ​​​អង្គការ​​​នេះ​​​បាន​​​​​​ឲ្យ​​​ដឹង​​​ថា អង្គការ​​​របស់​​​លោក​​​នឹង​​​ផ្តល់​​​អ្នក​​​ជំនាញ​​​​​​ឲ្យ​​​មកជួយ​​​​​​បង្កើត​​​កម្ម​​​វិធី​​​សិក្សា​​​ [វគ្គបណ្តុះ​​​បណ្តាល​​​វិជ្ជាជីវៈ និង​​​កម្មវិធី​​​សិក្សា​​​រយៈ​​​ពេល​​​បី​​​ខែ​​​] ដែល​​​នឹង​​​​​​មាន​​​មន្ត្រី​​​សរុប​​​ចំនួន​​​១៥០​​​នាក់​​​មក​​​ពី​​​ថ្នាក់​​​ក្រោម​​​ជាតិ​​​ចូល​​​រួម​​​សិក្សា​​​។

លោក ព្រាប​​​ កុល​​​ បាន​​​មាន​​​ប្រសាសន៍​​​ថា “អង្គការ​​​តម្លាភាព​​​កម្ពុជា​​​នឹង​​​បញ្ជូន​​​​​​ធន​​​ធាន​​​មនុស្ស​​​ទាំ​​​ង​​​ក្នុង​​​​​ប្រទេស និង​​​ក្រៅ​​​ប្រទេស​​​ដើម្បី​​​ផ្តល់​​​វគ្គ​​​បណ្តុះ​​​បណ្តាល​​​​​​ដល់​​​គ្រូ​​​បង្គោល​​​ [របស់​​​ក្រសួង​​​មហាផ្ទៃ​​​] ​​​ទាំង​​​ជំនាញ​​​បច្ចេកទេស និង​​​​​​វិធី​​​សាស្ត្រ​​​នៃ​​​ការ​​​បង្រៀន​​​”។ លោក​​​បាន​​​បន្ថែម​​​ថា អ្នក​​​ជំនាញ​​​មក​​​ពី​​​មជ្ឈមណ្ឌល​​​ធនធាន​​​ប្រឆាំង​​​អំពើ​​​ពុក​​​រលួយ​​​U4 (U4 Anti-Corruption Resource Center) ដែល​​​មាន​​​មូល​​​ដ្ឋាន​​​នៅ​​​​​​ក្នុង​​​ប្រទេស​​​ន័រវែស និង​​​បណ្ឌិត​​​សភា​​​ប្រឆាំង​​​អំពើ​​​ពុក​​​រលួ​​​យ​​​ម៉ាឡេស៊ី​​​ (Malaysia Anti Corruption Academy) ក៏​​​នឹង​​​ចូល​​​រួ​​​ម​​​ពាក់​​​ព័ន្ធ​​ក្នុង​​​ការ​​​បង្កើត​​​​ និង​​​ផ្តល់​​​វគ្គ​​​​​​បណ្តុះ​​​​​បណ្តាល​​​ផង​​​ដែរ​​​​​​។

លោក​​​បាន​​​មាន​​​ប្រសាសន៍​​​បន្ថែម​​​ទៀត​​​ថា “យើង​​​មិន​​​ហៅ​​​វា​​​ថា ជា​​​​​​សាលា​​​ប្រឆាំង​​​អំពើ​​​ពុក​​​រលួយទេ​​​ យើង​​​ហៅ​​​វា​​​ថា ជា​​​សាលា​​​អភិបាល​​​កិច្ច​​​ល្អ ហើយ​​​វា​​​ស្ថិត​​​ក្នុង​​​គោល​​​ការណ៍​​​តម្លាភាព ​​​ការ​​​បោះ​​​ឆ្នោត​​​ប្រកប​​​ដោយ​​ភាព​​​​​យុត្តិធម៌ ​​​ដោះ​​​ស្រាយ​​​អំពើ​​​ពុក​​​រលួយ​​​ បក្ខពួក​​​និយម និង​​​បញ្ហា​​​ផ្សេង​​​ៗ​​​ទៀត​​​”។​​​​​​

នៅ​​​ក្នុង​​​សន្ទស្សន៍​​​ស្តី​​​​​អំពី​​​អំពើ​​​​​​ពុក​​​រលួយ​​​ចុង​​​ក្រោយ​​​​​​របស់​​​ខ្លួន​​​ អង្គការ​​​តម្លាភាព​​​កម្ពុជា​​​​​​បាន​​​ដាក់​​​ចំណាត់​​​ថ្នាក់​​​ប្រទេស​​​កម្ពុជា​​​​​ជាប់​​​លំដាប់​​​លេខ​​​ទី​​​១៥៦​​​ក្នុង​​​ចំណោម​​​ប្រទេស​​​ចំនួន​​​​​​១៧៥​​​ទូទាំង​​​ពិភព​​​លោក​​​។

លោក​​​ ព្រាប​​​ កុល បាន​​​លើក​​​ឡើង​​​កាល​​​ពី​​​ម្សិលមិញ​​​ថា បច្ចុប្បន្ន​​​អង្គការ​​​តម្លាភាព​​​កម្ពុជា​​​​​​កំពុង​​​ធ្វើ​​​ការ​​​ដើម្បី​​​​​​បង្កើត​​​កម្មវិធី​​​សិក្សា​​​សម្រាប់​​​ការ​​​ផ្តល់​​​វគ្គ​​​បណ្តុះ​​​បណ្តាល​​​ចំនួ​​​ន​​​​​​១០​​​លើក​​​ដែល​​​នឹង​​​​​​ដោះស្រាយ​​​បញ្ហា​​​ដូច​​​ជា​​​ការ​​​រំលោភ​​​បំពាន​​​អំណាច​​​ បក្ខពួក​​​និយម​​​ ការ​​​សូក​​​ប៉ាន់​​​ ​​​ ហើយ​​​អ្វី​​​ៗ​​​ទាំង​​​អស់​​​នេះ​​​​​​នឹង​​​ត្រូវ​​​បញ្ជ្រាប​​​ដល់​​​មន្ត្រី​​​ជា​​​ច្រើន​​​នាក់។

​​​លោក​​​បាន​​​មាន​​​ប្រសាសន៍​​​ថា “វា​​​អាច​​​ជា​​​អភិបាល​​​ អភិបាល​​​រង​​​ និង​​​មន្ត្រី​ណា​​​មួយ​​​ក៏​​​ដោយ​​​​​ដែល​​​គេ​​​​​​ចាត់​​​តាំង​​​ឲ្យ​​​​​​មក​​​ចូល​​​រួម​​​…យើង​​​សង្ឃឹម​​​ថា អ្នក​​​ដែល​​​គេ​​​ចាត់​​​ទាំង​​​ទាំង​​​នោះ​​​នឹង​​​ក្លាយ​​​ជា​​​អ្នក​​​​​​ជួយ​​​ធ្វើ​​​កំណែ​​​ទម្រង់​​​”។ លោក​​​បាន​​​មាន​​​ប្រសាសន៍​​​បន្ថែម​​​ថា “នៅ​​​ពេល​​​យើង​​​បាន​​​បញ្ជូន​​​អ្នក​​​ជំនាញ​​​ និង​​​ផ្តល់​​​ជំនាញ​​​ដល់​​​មន្ត្រី​​​នៅ​​​ក្នុង​​​ស្ថាប័ន​​​រដ្ឋាភិបាល​​​ វា​​​នឹង​​​លេង​​​មាន​​​លេស​​​ទៀត​​​ហើយ​​​”។

ដោយ​​​រៀប​​​រាប់​​​ប្រាប់​​​អំពី​​​គម្រោង​​​នេះ​​​ លោក អ៊ូ សំអួន អភិបាល​​​ខេត្ត​​​កំពង់​​​ស្ពឺ​​​ដែល​​​មក​​​ពី​​​គណបក្ស​​​ប្រជា​​​ជន​​​កម្ពុជា​​​​​​បាន​​​​​​លើក​​​ឡើង​​​ថា សាលា​​​អភិបាល​​​កិច្ច​​​ល្អ​​​នេះ​​​នឹង​​​មាន​​​អត្ថប្រយោជន៍​​​សម្រាប់​​​មន្ត្រី​​​ទាំង​​​អស់​​​ ហើយ​​​ថា ខ្លួន​​​លោក​​​ផ្ទាល់​​​ក៏​​​នឹង​​​ឆ្លៀត​​​ឱកាស​​​ទៅ​​​ចូល​​​រួម​​​ដែរ​​​។

លោក​​​បានមាន​​​ប្រសាសន៍​​​ថា  “ខ្ញុំ​​​ចាំ​​​បាច់​​​ត្រូវ​​​តែ​​​​​​សិក្សា​​​ដើម្បី​​​ធ្វើ​​​ការ​​​ងារ​​​របស់​​​ខ្ញុំ​​​ឲ្យកាន់​​​តែ​​​ល្អ​​​ប្រសើរ​​​​​​ ដើម្បី​​​កាត់​​​បន្ថយ​​​ការរិះ​​​គន់​​​ពី​​​ប្រជា​​​ពល​​​រដ្ឋ​​​” លោក​​​បាន​​​បន្ថែម​​​ថា ការិយាល័យ​​​របស់​​​លោក​​​គ្មាន​​​អំពើ​​​ពុក​​​រលួយ​​​ទេ​​​ ប៉ុន្តែ លោក​​​មិន​​​​ប្រាកដ​​​ទេ​​​​​​​​​ពី​​​បក្ខ​​​ពួក​​​និយម​​​​​​។

លោក​​​បាន​​​មាន​​​ប្រសាសន៍​​​បន្ថែម​​​ថា “និយាយ​​​អំពី​​​ពុក​​​រលួយ​​​ គឺ​​​គ្មាន​​​នោះ​​​​​​ឡើយ​​​​​​​​​ ប៉ុន្តែ បើ​​​និយាយ​​​អំពី​​​បក្ខ​​​ពួក​​​និយម​​​ដែល​​​នាំ​​​សាច់​​​ញាតិ​​​មក​​​ធ្វើ​​​ការ​​​នៅ​​​ការិយាល័យ​​​វិញ​​​ ខ្ញុំ​​​មិន​​​ច្បាស់​​​នោះ​​​​​​ទេ​​​”។

នៅ​​​ក្នុង​​​ខេត្ត​​​ស្ទឹង​​​ត្រែង​​​ លោក សៀក​​​ មេគង្គ មេឃុំ​​​ស្រែគ​​​ ស្រុក​​​សេសាន​​​ដែល​​​មក​​​ពី​​​គណបក្ស​​​សង្គ្រោះ​​​ជាតិ​​​បាន​​​លើក​​​ឡើង​​​ថា បក្ខ​​​ពួក​​​និយម​​​កើត​​​មាន​​​យ៉ាង​​​ច្រើន​​​នៅ​​​ថ្នាក់​​​ស្រុក​​​ ហើយ​​​លោក​​​ក៏​​​ស្វាគមន៍​​​ចំពោះ​​​ឱកាស​​​ចុះ​​​ឈ្មោះ​​​ចូល​​​សិក្សា​​​នៅ​​​ក្នុង​​​សាលា​​​អភិបាល​​​កិច្ច​​​ល្អ​​​នេះ​​​​​​ដែរ​​​។

លោក​​​បាន​​​មាន​​​ប្រសាសន៍​​​ថា “តាម​​​ពិត​​​ទៅ ​​​​​​​​​នៅ​​​ក្នុង​​​ស្រុក​​​សេសាន​​​ អភិបាល​​​ស្រុក​​​[លោក​​​ស្រី យាង​​​ ស្រី​​​ភារី​​​]  គឺ​​​ជា​​​ប្រពន្ធ​​​របស់​​​ប្រធាន​​​រដ្ឋបាល​​​ [លោក ធៀន គឹម​​​ហ៊ាន​​​] ។ នេះ​​​គឺ​​​ជា​​​បក្ខ​​​ពួក​​​និយម​​​ វា​​​គឺជា​​​ជំងឺ​​​ដែល​​​រារាំង​​​​​និស្សិត​​​​​មិន​​​ឲ្យ​​​មាន​​​លទ្ធភាព​​​ធ្វើ​​​ការ​​​ជូន​​​រដ្ឋ”។

ខណៈ​​​កម្មវិធី​​​របស់​​​ក្រសួង​​​មហាផ្ទៃ​​​ប្រហែល​​​ជា​​​អាច​​​ជួយ​​​ធ្វើ​​​ឲ្យ​​​អ្នក​​​មាន​​​អំណាច​​​យល់​​​ដឹង​​​អំពី​​​ផល​​​ប៉ះពាល់​​​នៃ​​​ការ​​​ប្រព្រឹត្តិ​​​អំពើ​​​ពុក​​​រលួយ ​​​​​​លោក​​​ សៀក​​​ មេគង្គ បាន​​​​​​លើក​​​ឡើង​​​ថា វា​​​ទំនង​​​ជា​​​មិន​​​អាច​​​លុប​​​បំបាត់​​​ទាំង​​​ស្រុង​​​បាន​​​ឡើយ​​​។

លោក​​​បានមាន​​​ប្រសាសន៍​​​ថា “វា​​​មិន​​​អាច​​​កាត់​​​បន្ថយ​​​បាន​​​១០០ភាគរយ​​​នោះ​​​ទេ​​​។ ទោះ​​​បី​​​ជា​​​មន្ត្រី​​​រដ្ឋាភិបាល​​​ទទួល​​​បាន​​​ប្រាក់​​​ខែ​​​ខ្ពស់​​​​​​ក៏​​​ដោយ​​​ ពួក​​​គេ​​​នឹង​​​នៅ​​​តែ​​​បន្ត​​​ប្រព្រឹត្តិ​​​អំពើ​​​ពុករលួយ​​​ដដែល​​​​​​”៕ ស៊ុយឈាង​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស