នគរបាលខេត្តសៀមរាបបានពន្យារពេលបញ្ជូនជនសង្ស័យប្រាំពីរនាក់ ដែលជាប់ចោទពីបទប្រតិបត្តិគម្រោងបោកប្រាស់ទៅតុលាការកាលពីម្សិលមិញតាមសេចក្ដីបង្គាប់របស់ព្រះរាជអាជ្ញាដែលបានលើកឡើងថា ប្រធានក្រុមហ៊ុននៅពីក្រោយគម្រោងនេះ នឹងបង្ហាញខ្លួននៅថ្ងៃនេះ ដើម្បី”ធានាពួកគេ”។
នគរបាលបានចាប់ខ្លួនជនសង្ស័យប្រាំពីរនាក់កាលពីថ្ងៃសៅរ៍ បន្ទាប់ពីមានការព្រមានកាលពីខែមុនពីគណៈកម្មការមូលបត្រកម្ពុជា (SECC)ថា “ក្រុមហ៊ុន Empire Big Capital (EBC) និងក្រុមហ៊ុនពីរទៀតបានបើកដំណើរការដោយខុសច្បាប់។
លោក ថោង សុឃុន ស្នងការរងនគរបាលខេត្តបានមានប្រសាសន៍ថា “ពិតមែនហើយ នៅរសៀលថ្ងៃនេះ យើងគួរតែបានបញ្ជូនជនសង្ស័យទាំងប្រាំពីរនាក់នេះទៅសាលាដំបូងខេត្ត ប៉ុន្តែព្រះរាជអាជ្ញារងទើបតែបានជូនដំណឹងដល់ពួកយើងកុំឲ្យបញ្ជូនពួកគេទៅអី ពីព្រោះថៅកែរបស់ក្រុមហ៊ុននេះនឹងបង្ហាញខ្លួនដើម្បីធានាពួកគេទាំងអស់”។
លោក សុឃុន បានបង្វែរសំណួរបន្ថែមទៅលោក សុខ កែវបណ្ឌិត ព្រះរាជអាជ្ញារងអមសាលាដំបូងខេត្ត។ លោក កែវបណ្ឌិត បានមានប្រសាសន៍ថា “នគរបាលកំពុងស៊ើបអង្កេតករណីនេះនៅឡើយ ហើយលោកបដិសេធមិនឆ្លើយសំណួរបន្ថែមឡើយ”។
កាលពីខែមុន SECC បានចេញសេចក្ដីថ្លែងការណ៍មួយព្រមានសាធារណជនកុំឲ្យធ្វើការវិនិយោគជាមួយក្រុមហ៊ុន EBC និងក្រុមហ៊ុនមានទំនាក់ទំនងពីរទៀត គឺមូលនិធិអភិវឌ្ឍន៍អាស៊ីអាគ្នេយ៍ និងសមាគមអ្នកប្រឹក្សាយោបល់វិនិយោគ។
បន្ទាប់ពីការចាប់ខ្លួនកាលពីថ្ងៃសៅរ៍ លោក ឃឹម ប៊ុនសុង អភិបាលខេត្តសៀមរាបបានចេញសេចក្ដីថ្លែងការណ៍មួយដែលមានខ្លឹមសារថា ក្រុមហ៊ុន EBC មិនត្រូវបានផ្តល់អាជ្ញាប័ណ្ណពីធនាគារជាតិ ក្រសួងសេដ្ឋកិច្ច និងហិរញ្ញវត្ថុ ឬស្ថាប័នពាក់ព័ន្ធផ្សេងឡើយ។
លោក ម៉េង ហ៊ាង វិនិយោគិន និងជាអ្នកជ្រើសរើសបុគ្គលិកនៅក្រុមហ៊ុន EBC បានមានប្រសាសន៍កាលពីម្សិលមិញថា ប្រតិបត្តិការរបស់ក្រុមហ៊ុនត្រូវបានផ្អាក ប៉ុន្តែមិនមែនទាំងស្រុងទេ។
លោកបានមានប្រសាសន៍ថា “ប្រតិបត្តិការរបស់យើងត្រូវបានផ្អាកចាប់តាំងពីក្រសួងសេដ្ឋកិច្ច និងហិរញ្ញវត្ថុ និងគណៈកម្មការមូលបត្របានចេញសេចក្ដីជូនដំណឹងកាលពីខែមុន។ ប៉ុន្តែការិយាល័យរបស់យើងនៅបើកសម្រាប់ការទំនាក់ទំនងជាមួយសមាជិកដែលមានស្រាប់ដដែល ដូចការបង់ការប្រាក់ទៅឲ្យពួកគេនៅធម្មតា”៕ សារុន