យោងតាមអង្គការសហប្រជាជាតិបានឲ្យដឹងថា ឥឡូវនេះមានអ្នកស្វែងរកសិទ្ធិជ្រកកោនជនជាតិភាគតិចម៉ុងតាញ៉ា១០៩នាក់នៅក្នុងរាជធានីភ្នំពេញរង់ចាំចុះឈ្មោះ ប៉ុន្តែ អ្នកនាំពាក្យក្រសួងមហាផ្ទៃម្នាក់បានលើកឡើងកាលពី ម្សិលមិញថា រដ្ឋាភិបាលមិនទទួលស្គាល់ពួកគេថា ជាអ្នកស្វែងរកសិទ្ធិជ្រកកោនស្របច្បាប់ឡើយ។
នៅពេលត្រូវបានសួរថា តើជនជាតិភាគតិចម៉ុងតាញ៉ាទាំងនោះនឹងត្រូវអនុញ្ញាតឲ្យចុះឈ្មោះជាមួយនាយកដ្ឋានជនភៀសខ្លួនក្រសួងមហាផ្ទៃ ឬយ៉ាងណានោះ លោក ខៀវ សុភ័គ អ្នកនាំពាក្យបានមានប្រសាសន៍ថា ពីព្រោះពួកគេមិនបានប្រកាសប្រាប់អាជ្ញាធរភ្លាមៗពេលចូលមកប្រទេសកម្ពុជា ហើយក្រុមនេះមិនមែនជាអ្នកស្វែងរកសិទ្ធិជ្រកកោនផ្លូវការឡើយ។
លោកបានមានប្រសាសន៍ថា “យើងមិនទទួលស្គាល់ពួកគេជាអ្នកស្វែងរកសិទ្ធិជ្រកកោនជនជាតិម៉ុងតាញ៉ាទេ ពីព្រោះពួកគេគួរតែបានរាយការណ៍ប្រាប់អាជ្ញាធរ តាំងពីដំបូងមកម៉្លេះ”។
នៅពេលក្រុមជនជាតិភាគតិចម៉ុងតាញ៉ាក្រុមដំបូង ជាក្រុមជនជាតិដើមភាគតិចដែលរស់នៅតំបន់ខ្ពង់រាបកណ្តាលប្រទេសវៀតណាមដែលអះអាងថា បានគេចខ្លួនពីការធ្វើទុក្ខបុកម្នេញ បានចាប់ផ្តើមមកដល់ខេត្តរតនគិរីកាលពីខែតុលារនោះ នគរបាលបានគំរាមកំហែងពួកគេដោយការចាប់ខ្លួន និងនិរទេស ប្រសិនបើត្រូវបានរកឃើញ។ ទីបំផុត យ៉ាងហោចណាស់មនុស្ស៤៧នាក់ត្រូវបានឃុំខ្លួន និងបញ្ជូនទៅប្រទេសវៀតណាមវិញ។
កាលពីម្សិលមិញ ឧត្តមសេនីយ៍ ខៀវ សុភ័គ បានអះអាងថា ជនជាតិភាគតិចម៉ុងតាញ៉ាបានបន្តមកដល់ទៀត ជាផ្នែកមួយនៃគម្រោងដែលក្នុងនោះ ជនជាតិភាគតិចម៉ុងតាញ៉ានៅអាមេរិកបានផ្តល់ប្រាក់ដល់អ្នកជួញដូរមនុស្សឲ្យនាំពួកគេមកប្រទេសកម្ពុជា ទីដែលពួកគេសង្ឃឹមថា នឹងទទួលបានឋានៈជាជនភៀសខ្លួន និងបានតាំងទីលំនៅថ្មីនៅអាមេរិក។
ឧត្តមសេនីយ៍ ខៀវ សុភ័គ បានមានប្រសាសន៍ថា “អ្នកដែលជាប់ពាក់ព័ន្ធក្នុងការជួញដូរមនុស្សទាក់ទាញជនជាតិភាគតិចម៉ុងតាញ៉ាទាំងនោះពីស្រុកកំណើតពួកគេ ដើម្បីឲ្យពួកគេអាចរស់នៅសហរដ្ឋអាមេរិក ហើយអ្នកទាំងនោះដែលកំពុងនាំជនជាតិភាគតិចម៉ុងតាញ៉ានោះ បានប្រាប់ពួកគេពីទីកន្លែងជាក់លាក់របស់អង្គការសហប្រជាជាតិ។ តើពួកគេស្គាល់ទីកន្លែងរបស់អង្គការមិនមែនរដ្ឋាភិបាល ឬការិយាល័យអង្គការសហប្រជាជាតិនៅក្នុងរាជធានីភ្នំពេញដោយរបៀបណាទៅ?”។
លោកស្រី វ៉ាន ហៀលី តំណាងប្រចាំប្រទេសនៃការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សបានមានប្រសាសន៍ថា កាលពីសប្តាហ៍មុន មានអ្នកស្វែងរកសិទ្ធិជ្រកកោនជនជាតិភាគតិចម៉ុងតាញ៉ា៨៥នាក់ប៉ុណ្ណោះក្នុងរាជធានី ប៉ុន្តែថា ចំនួននេះបានបន្តកើនឡើង។
លោកស្រី លី បានលើកឡើងក្នុងអុីម៉េលថា “ថ្ងៃនេះគឺថ្ងៃទី៨ខែមិថុនា មានអ្នកស្វែងរកសិទ្ធិជ្រកកោនជនជាតិភាគតិចម៉ុងតាញ៉ា១០៩នាក់នៅក្នុងរាជធានីភ្នំពេញ។ ដូចក្រុមមុនៗដែរ អ្នកមកដល់ថ្មីបំផុតនេះមិនត្រូវបានផ្តល់សិទ្ធិចំពោះនីតិវិធីស្វែងរកសិទ្ធិជ្រកកោនទេ”។
ចាប់ពីឆ្នាំ២០០១ ដល់ឆ្នាំ២០១១ អ្នកស្វែងរកសិទ្ធិជ្រកកោនជនជាតិភាគតិចម៉ុងតាញ៉ារាប់ពាន់នាក់់បានភៀសខ្លួនមកប្រទេសកម្ពុជា ដោយទីបំផុតពួកគេជាង២.០០០នាក់កំពុងតាំងទីលំនៅថ្មីជាជនភៀសខ្លួននៅសហរដ្ឋអាមេរិក។
ប៉ុន្តែនៅពេលអង្គការសហប្រជាជាតិបានបិទមណ្ឌលជនភៀសខ្លួនរបស់ខ្លួននៅក្នុងរាជធានីភ្នំពេញកាលពីឆ្នាំ២០១១ ឧត្តមសេនីយ៍ ខៀវ សុភ័គ បានព្រមានថា ដំណើរចំពោះការតាំងទីលំនៅថ្មីត្រូវបានបិទហើយ។
លោកបានមានប្រសាសន៍កាលពីខែកុម្ភៈ ឆ្នាំ២០១១ថា “ជនជាតិភាគតិចម៉ុងតាញ៉ាមិនគួរមកទីនេះទៀតទេ។ ប្រសិនបើពួកគេមក យើងនឹងអនុវត្តច្បាប់អន្តោប្រវេសន៍របស់យើងហើយ”៕សារុន