សមាជិកសភា និងសកម្មជនការពារសិទ្ធិមនុស្សបានលើកឡើងថា កាលពីម្សិលមិញ ទាហានវៀតណាមប្រដាប់ដោយអាវុធបានព្យាយាមរារាំងមនុស្សជាង៣០០នាក់ដែលដឹកនាំដោយសមាជិកសភាមកពីគណបក្សសង្គ្រោះជាតិមិនឲ្យចុះទៅកាន់តំបន់ព្រំដែនមានជម្លោះនៅក្នុងស្រុកអូរយ៉ាដាវ ខេត្តរតនគិរី។
ក្រុមនេះដែលរួមមានសមាជិកសភាចំនួនប្រាំរូបមកពីគណបក្សសង្គ្រោះជាតិ និងនិស្សិតព្រមទាំងព្រះសង្ឃបានចុះទៅតំបន់ព្រំដែនបន្ទាប់ពីមានសេចក្តីរាយការណ៍ព័ត៌មានថា ជនជាតិវៀតណាមបានដាំដំឡូងមី និងជីកស្រះនៅលើទឹកដីកម្ពុជា នេះបើយោងតាមលោក ម៉ៅ មុន្នីវណ្ណ សមាជិកសភាមកពីគណបក្សសង្គ្រោះជាតិដែលដឹកនាំក្រុមនេះ។
លោក មុន្នីវណ្ណ បានមានប្រសាសន៍ថា “យើងបានទៅដល់ភូមិនេះនៅម៉ោងប្រហែល៩[ព្រឹក] បន្ទាប់មកគណៈប្រតិភូរបស់យើងបានជួបជាមួយទាហានវៀតណាមមួយក្រុមមានគ្នាប្រហែល៣០នាក់ដែលប្រដាប់ដោយអាវុធ ដំបងឆក់ និងមានសុខននៅជាមួយពួកគេផងដែរ”។
លោកបានបន្ថែមថា សមាជិករបស់ក្រុមលោកបានប៉ះទង្គិចគ្នាមួយប្រាវជាមួយទាហាន ហើយលោកបានអះអាងថា លោកត្រូវទាហានវៀតណាមយកដំបងមកឆក់ ប៉ុន្តែ គ្មាននរណាផ្សេងទៀតរងរបួសឡើយ។
លោកបានមានប្រសាសន៍បន្តដោយសំដៅដល់តំបន់មានជម្លោះដែលត្រូវបានវាស់វែងដោយមិនត្រឹមត្រូវថា “ពួកគេបានរារាំងយើងម្តងហើយម្តងទៀតមិនឲ្យចូលទៅមើលស្រះដែលគេរាយការណ៍ថា ត្រូវបានគេជីកដោយអាជ្ញាធរវៀតណាមនៅក្នុងតំបន់[ស]ឡើយ”។
ដំបូងឡើយ អង្គការសិទ្ធិមនុស្សក្នុងស្រុកអាដហុកបានរកឃើញស្រះទឹកចំនួនប្រាំនិងចម្ការដំឡូងមី ប៉ុន្តែ លោក មុន្នីវណ្ណ បានអះអាងថា នៅពេលទាហានអនុញ្ញាតឲ្យក្រុមរបស់លោកចូលទៅតំបន់នោះកាលពីម្សិលមិញ ពួកគេបានរកឃើញចម្ការ និងស្រះទឹកបន្ថែមទៀតដែលលោកបានលើកឡើងថា ត្រូវបានប្រើប្រាស់ដើម្បីស្រោចស្រពដំណាំ។
លោកបានមានប្រសាសន៍ថា “យើងបានរកឃើញថា គេបានជីកស្រះទឹកចំនួនប្រាំពីរ ហើយមានចម្ការរាប់សិបហិកតាទៀតជាទីដែលដំណាំកាហ្វេ ស្វាយចន្ទី និងកៅស៊ូត្រូវបានគេដាំនៅលើដីមានជម្លោះ”។
លោក ឆាយ ធី អ្នកសមសម្រួលនៅអង្គការសិទ្ធិមនុស្សអាដហុកប្រចាំខេត្តនេះបានលើកឡើងថា ការប៉ះទង្គិចគ្នាចំនួនពីរលើកបានផ្ទុះឡើង នៅពេលទាហានវៀតណាមរារាំងក្រុមនេះ ខណៈពួកគេចូលទៅដល់ស្រះទឹកដែលគេជីក។
ទោះជាយ៉ាងណា លោក ហេង រតនា ស្នងការរងនគរបាលខេត្តនេះបានជំទាស់នឹងតួលេខដែលផ្តល់ដោយលោក មុន្នីវណ្ណ និងលោក ឆាយ ធី ហើយថា គ្មានការរំលោភបំពានលើរាងកាយទេ ប៉ុន្តែ លោកបានលើកឡើងថា មានការប្រើពាក្យធ្ងន់ៗដាក់គ្នារវាងទាហាន និងក្រុមនេះ។
លោកបានមានប្រសាសន៍ថា “មានការជេរប្រមាថគ្នាទៅវិញទៅមករវាងពលរដ្ឋខ្មែរ និងទាហានវៀតណាម ប៉ុន្តែ ស្ថានភាពេនះបានធូរស្រាលទៅវិញនៅពេលមេបញ្ជាការការពារព្រំដែនមួយរូបរបស់វៀតណាមបានប្រាប់ទាហានរបស់ខ្លួនឲ្យអត់ធ្មត់ ខណៈនគរបាល និងទាហានការព្រំដែនរបស់យើងកំពុងព្យាយាមការពារគណៈប្រតិភូទាំងនេះ”។
នៅពេលត្រូវបានសួរថា តើមន្ត្រីថ្នាក់ខេត្តនឹងដោះស្រាយជម្លោះនេះយ៉ាងដូចម្ដេចនោះ លោក រតនា បានលើកឡើងថា លោកកំពុងរង់ចាំបទបញ្ជាពីក្រសួងមហាផ្ទៃនៅឡើយ។
លោកបានមានប្រសាសន៍ថា “យើងកំពុងតែរង់ចាំមេដឹកនាំថ្នាក់លើ ដើម្បីជួបពិភាក្សាដោះស្រាយបញ្ហានេះ បន្ទាប់មកខ្ញុំនឹងធ្វើតាមការបញ្ជារបស់ពួកគាត់។ ប៉ុន្តែ ចំពោះការរារាំងវិញ យើងពិតជាអាចរារាំងមិនឲ្យមានការជីកស្រះបន្ថែមទៀតបាន ក៏ដូចជាសកម្មភាពផ្សេងៗនៅលើដីក្បែរព្រំដែនមាន [ជម្លោះ] ផងដែរ”។
លោក មុន្នីវណ្ណ បានមានប្រសាសន៍បន្ថែមទៀតថា លោកមានផែនការជម្រាបជូនក្រសួងការបរទេសអំពីអ្វីដែលលោកបានឃើញកាលពីម្សិលមិញ ប៉ុន្តែ មិនរំពឹងថា រដ្ឋាភិបាលដោះស្រាយបញ្ហានេះឡើយ។
លោកបានមានប្រសាសន៍ថា “រដ្ឋាភិបាលរបស់យើងខ្សោយ។ វាខ្សោយព្រោះពួកគេ [វៀតណាម] អាចដាំដុះលើដីដែលមានជម្លោះ ហើយយើងមិនអាចធ្វើអ្វីៗបាននៅលើដីនេះ”៕ ស៊ុយឈាង