31 C
Phnom Penh

សេចក្តី​​​ព្រាង​​​ច្បាប់ថ​​​្មី​​​ស្តី​​​ពី​​​សហជីព​​​ធ្វើ​​​ឲ្យ​​​សហជីព​​​មាន​​​ការ​​​ព្រួយ​​​បារម្ភ​​​កាន់​​​តែ​​​ខ្លាំង​​​

ដោយ ឌឹ ខេមបូឌា ដេលី

បទវិភាគ

យោង​​​តាម​​​​​​ច្បាប់​​​ចម្លង​​​នៃ​​​សេចក្តី​​​ព្រាង​​​ច្បាប់​​​ដែល​​​ទទួល​​​បាន​​​នៅ​​​ក្នុង​​​សប្តាហ៍​​​នេះ​​​​​​បាន​​​ឲ្យ​​​ដឹង​​​ថា សេចក្តី​​​ព្រាង​​​ច្បាប់​​​ស្តី​​​ពី​​​​​​សហជីព​​​ដែល​​​ទើប​​​តែ​​តាក់​​​តែង​​​ចុង​​​ក្រោយ​​ផ្តល់​​​ឲ្យ​​​​​​ក្រសួង​​​ការ​​​ងារ​​​នូវ​​​អំណាច​​​ព្យួរ​​​​​​សហជីព​​​ដែល​​​សហការ​​​ ឬ​​​ធ្វើ​​​សកម្មភាព​​​រួម​​​គ្នា​​​​​​ជាមួយ​​​អង្គការ​​​ដែល​​​រដ្ឋាភិបាល​​​ចាត់​​​ទុក​​​ថា បាន​​​ធ្វើ​​​ឲ្យ​​​ប៉ះពាល់​​​ដល់​​​សេដ្ឋកិច្ច​​​ ឬ​​​ធ្វើ​​​ឲ្យ​​​​​​ខូច​​​​​​ប្រយោជន៍ជាតិ​​​។

សហជីព​​​ដែលគ្មាន​​​សម្ព័ន្ធ​​​ភាព​​​ជាមួយ​​​គណបក្ស​​​ប្រជា​​​ជន​​​កម្ពុជា​​​ធ្លាប់​​​​​​បាន​​​ព្រួយ​​​បារម្ភ​​​រួច​​​មក​​​ហើយ​​​ថា សេចក្តី​​​ព្រាង​​​ច្បាប់​​​​​​​​​មុន​​​នឹង​​​ធ្វើ​​​ឲ្យ​​​មាន​​​​​​​​ការ​​​ល​​​ំបាក​​​យ៉ាង​​​ខ្លាំង​​​​​​​​​ក្នុង​​​ការ​​​ចុះ​​​បញ្ជី​​​សហជីព​​​ថ្មី​​​ហើយ​​​នឹង​​​ផ្តល់​​​ឲ្យតុលាការ​​​នូវ​​​សិទ្ធិ​​​អំណាច​​​ដ៏​​​លើស​​​លប់​​​ក្នុង​​​ការ​​​ដក​​​អាជ្ញាប័ណ្ណ​​​សហជីព​​​។សូម្បី​​​តែ​​​អង្គការ​​​ពល​​​កម្ម​​​អន្តរជាតិ (ILO) ក៏​​​បាន​​​លើក​​​ឡើង​​​ផង​​​ដែរ​​​ថា សេចក្តី​​​ព្រាង​​​ច្បាប​​​់​​​មុន​​​មិន​​​បាន​​​​​​គោរព​​​តាម​​​អនុសញ្ញា​​​ការ​​​ងារ​​​ដែល​​​ប្រទេស​​​ក​​​ម្ពុជា​​​បាន​​​ចុះ​​​ហត្ថលេខា​​​នោះ​​​ឡើយ។

​​​អ្នក​​​រិះ​​​គន់​​​បាន​​​លើក​​​ឡើង​​​ថា បទប្បញ្ញត្តិ​​​ថ្មី​​​​​​ដែល​​​ពាក់​​​ព័ន្ធ​​​នឹង​​​អ្នក​​​ធ្វើ​​​ឲ្យ​​​ប៉ះពាល់​​​​​​ប្រយោជន៍​​​ជាតិ​​​ និង​​​ដែល​​​ស្ថិ​​​ត​​​នៅ​​​ក្នុង​​​សេចក្តី​​​ព្រាង​​​ច្បាប់​​​ចុះ​​​កាល​​​បរិច្ឆេទ​​​កាល​​​ពី​​​ខែ​​​តុលា ហើយ​​​ថ្មី​​​ៗ​​​នេះ​​​បាន​​​លេច​​​ធ្លាយ​​​ដល់​​​អង្គការ​​​ឃ្លាំ​​​មើល​​​សិទ្ធិ​​​មនុស្ស​​​នោះ ​​​គឺ​​​ផ្តល់​​​សិទ្ធិ​​​អំណាច​​​ដ៏​​​លើស​​​លប់​​​​​​ដល់​​​រដ្ឋាភិបាល​​​។ ​​​

អង្គការ​​​តស៊ូមតិ​​​ដែលមាន​​​មូល​​​ដ្ឋាន​​​នៅ​​​សហរដ្ឋអាមេរិក​​​​​​បាន​​​លើក​​​ឡើង​​​​​​នៅក្នុង​​​សេចក្តី​​​ថ្លែង​​​ការណ៍​​​មួយ​​​ថា សេចក្តី​​​ព្រាង​​​ច្បាប់​​​ថ្មី​​​នេះ “ផ្តល់​​​អំណាច​​​ដ៏​​​លើស​​​លប់​​​​​​ដល់​​​មន្ត្រី​​​​​​ក្រសួង​​​ការ​​​ងារ​​​ក្នុង​​​ការ​​​ព្យួរ​​​ការ​​​ចុះ​​​បញ្ជី​​​សហជីព​​​ដោយ​​​គ្មាន​​​មូល​​​ដ្ឋាន​​​ច្បាស់​​​លាស់​​​គ្រប់​​​គ្រាន់​​​ និង​​​ដោយ​​​គ្មាន​​​ដំណើរ​​​ការ​​​ត្រឹម​​​ត្រូវ​​​”។

បទ​​​ប្បញ្ញត្តិ​​​ថ្មី​​​នេះ​​​លើក​​​ឡើង​​​​​​ថា ​​​ក្រសួង​​​នឹង​​​ប្រាប់​​​សហជីព​​​ថា តើ​​​អង្គការ​​​​​​នៅ​​​ក្នុង​​​បញ្ជី​​​ខ្មៅ​​​ណា​​​ខ្លះ​​​ដែល​​​ខ្លួន​​​គួរ​​​តែ​​​នៅ​​​ឲ្យ​​​ឆ្ងាយ​​​។ បទប្បញ្ញត្តិ​​​ថ្មី​​​នេះ​​​មិន​​​បាន​​​ពន្យល់​​​ថា តើ​​​ក្រសួង​​​នឹង​​​កំណត់​​​អង្គការ​​​ទាំង​​​នោះ​​​ដោយ​​​របៀប​​​ណា​​​ឡើយ ហើយ​​​ក៏​​​មិន​​​បាន​​​ពន្យល់​​​ពី​​​អ្វី​​​​​​ដែល​​​ខ្លួន​​​មាន​​​ន័យ​​​ថា ធ្វើ​​​ឲ្យ​​​ខូច​​​ប្រយោជន៍​​​ជាតិ​​​ ឬ​​​អ្វី​​​ដែល​​​កំណត់​​​ចំពោះ​​​ការ​​​សហការគ្នា​​​រវាង​​​សហជីព​​​នោះ​​​ដែរ។

ទោះ​​​ជា​​​យ៉ាង​​​ណា​​​​​​ កា​​​ល​​​ពីខែ​​​មីនា​​​ឆ្នាំ​​​២០១៤​​​រដ្ឋាភិបាល​​​បាន​​​បន្ទោស​​​គណបក្ស​​​សង្គ្រោះ​​​ជាតិ​​​​​​ និង​​​សហជីព​​​​​​មួយ​​​ចំនួន​​​តូច​​​​​​​​ថា បាន​​​ធ្វើ​​​ឲ្យ​​​ខូច​​​ខាត​​​​​​​​​ទ្រព្យ​​​សម្បត្តិ​​​គិត​​​ជា​​​ទឹក​​​ប្រាក់​​​ប្រមាណ​​​២៥០.០០០ដុល្លារ អំឡុង​​​កម្ម​​​ករ​​​កាត់​​​ដេរ​​​ធ្វើ​​​ការ​​​តវ៉ា​​​កាល​​​ពី​​​ដើម​​​ឆ្នាំ​​​២០១៤​​​​​​​​​នៅ​​​ក្នុង​​​រាជធានី​​​ភ្នំពេញ​​​​​​ ដែល​​​ធ្វើ​​​ឲ្យ​​​កើត​​​មាន​​​អំពើ​​​ហិង្សា​​​ និង​​​ធ្វើ​​​ឲ្យ​​​ឧស្សាហកម្ម​​​កាត់​​​ដេរ​​​​​​​​​ដែល​​​ជា​​​ឧស្សាហកម្ម​​​ធំបំផុត​​​នៅ​​​កម្ពុជា​​​ជាប់​​​គាំង​​​មួយ​​​រយៈ​​​។ ទាំង​​​សហជីព និង​​​គណបក្ស​​​សង្គ្រោះ​​​ជាតិ​​​សុទ្ធ​​​តែ​​​បាន​​​ច្រានចោល​​​ចំពោះ​​​ការ​​​បន្ទោស​​​នេះ​​​។

គេ​​​មិន​​​អាច​​​ទាក​​​់ទង​​​អ្នក​​​នាំ​​​ពាក្យ​​​ក្រសួង​​​ការ​​​ងារ​​​បាន​​​ឡើយ​​​កាល​​​ពីម្សិលមិញ​​​។ លោក សាត​​​សមុទ្រ អនុរដ្ឋលេខាធិការ​​​​​​ក្រសួង​​​ការ​​​ងារ​​​ដែល​​​ជួយ​​​នៅ​​​ក្នុង​​​ការ​​​ធ្វើ​​​សេចក្តី​​​ព្រាង​​​ច្បាប់​​​ស្តី​​​ពី​​​សហជីព​​​នេះ​​​​​​បាន​​​​​​លើក​​​ឡើង​​​ថា លោក​​លែង​​​ជាប់​​​ពាក់​​​ព័ន្ធ​​​ទៀត​​​ហើយ​​​ ហើយ​​​បាន​​​បដិសេធ​​​មិន​​​ធ្វើ​​​អត្ថាធិប្បាយ​​​ឡើយ​​​។

រដ្ឋាភិបាល​​​បាន​​​លើក​​​ឡើង​​​ថា ខ្លួន​​​ចង់​​​ឲ្យ​​​ច្បាប់​​​នេះ​​​​​​ត្រូវ​​​បាន​​​អនុម័ត​​​នៅ​​​ក្នុង​​​ឆ្នាំ​​​នេះ​​​ ប៉ុន្តែ​​​មិន​​​បាន​​​បង្ហាញ​​​សេចក្តី​​​ព្រាង​​​ច្បាប់​​​េនះ​​​ជា​​​សាធារណៈ​​​ឡើយ ចាប់​​​តាំង​​​ពី​​​ខែ​​​ឧសភា​​​ឆ្នាំ​​​មុន​​​មក​​​​​​ម្លេ៉ះ​​​។

លោក មឿន​​​ តុលា ប្រធាន​​​កម្មវិធី​​​ការ​​​ងារ​​​នៅ​​​មជ្ឈមណ្ឌល​​​អប់​​​រំ​​​​​​ច្បាប់​​​សម្រាប់​​​សហគមន៍​​​​​​បាន​​​​​​លើក​​​ឡើង​​​ថា ​​​ច្បាប់​​​សហជីព​​​ដែល​​​ផ្តល់​​​ឲ្យ​​​តុលាការ​​​នូវ​​​​​អំណាច​​​​​​ក្នុង​​​ការ​​​ព្យួរ​​​សហជីព​​​ដោយ​​​គ្មាន​​​ហេតុផល​​​ណា​​​មួយ​​​ទាល់​​​តែ​​​សោះ​​​នោះ​​​ នឹង​​​រំលោភ​​​បំពាន​​​កាតព្វ​​​កិច្ច​​​អនុសញ្ញាការ​​​ងារ​​​របស់​​​កម្ពុជា​​​។

លោក​​​បាន​​​លើកឡើង​​​ទៀត​​​ថា ការ​​​បណ្តោយឲ្យ​​​ក្រសួង​​​ការ​​​ងារ​​​កត់​​​ត្រា​​​អ្នក​​​ដែល​​​ធ្វើ​​​ឲ្យ​​​ប៉ះ​​​ពាល់ ឬ​​​ខូច​​​ប្រយោជន៍​​​ជាតិ​​​នៅ​​​ក្នុង​​​​​​បញ្ជី​​​ខ្មៅ​​​ដោយ​​​ខ្លួន​​​ឯង​​​ និង​​​កំណត់​​​ប្រយោជន៍​​​​​​​​​ជាត​​​​​ិ​​​ដោយ​​​ឯកតោភាគី​​​នោះ​​​ នឹង​​​ធ្វើ​​​ឲ្យ​​​ច្បាប់​​​នេះ​​​មាន​​​ការ​​​គ្រោះថ្នាក់​​​បន្ថែម​​​​ទៀត​​​ដល់​​​សហជីព​​​។

លោក​​​បាន​​​មាន​​​ប្រសាសន៍​​​ថា “វា​​​មិន​​​សម​​​ហេតុ​​​សម​​​ផល​​​តែ​​​សោះ​​​ក្នុង​​​ការ​​​កំណត់​​​ដូច្នេះ​​​ ព្រោះ​​​ក្នុង​​​នាម​​​ជា​​​សហជីព​​​​​​យើង​​​មាន​​​សិទ្ធិ​​​មូល​​​ដ្ឋាន​​​ក្នុង​​​ការ​​​​​​រៀប​​​ចំ​​​ និង​​​ចង​​​ក្រង​​​​​​មនុស្ស​​​ជា​​​សហជីព​​​។ វា​​​នឹង​​​ផ្តល់​​​ឲ្យ​​​រដ្ឋាភិបាល​​​នូវ​​​អំណាច​​​បន្ថែម​​​ទៀត​​​ក្នុង​​​ការ​​​រំលោភ​​​បំពាន​​​សិទ្ធិ​​​មូល​​​ដ្ឋាន​​​របស់​​​កម្មករ​​​”។

លោក ទុន សុភ័ណ្ឌ​​​​​​ អ្នក​​​សម្រប​​​សម្រួល​​​ថ្នាក់​​​ជាតិ​​​​​​នៅ​​​អង្គការ​​​ពល​​​កម្ម​​​អន្តរជាតិ​​​បាន​​​​​​លើក​​​ឡើង​​​ថា លោក​​​បាន​​​ឃើញ​​​​​​សំណៅ​​​នៃ​​​សេចក្តី​​​ព្រាង​​​ច្បាប់​​​ចុះ​​​កាលបរិច្ឆេទ​​​កាល​​​ពី​​​​​​តុលា​​​ ហើយ​​​បាន​​​ស្នើ​​​ឲ្យ​​​រដ្ឋាភិបាល​​​ពន្យល់​​​ថា តើ​​​ខ្លួន​​​កំណត់​​​អ្នក​​​ដែល​​​ធ្វើ​​​ឲ្យ​​​ប៉ះពាល់​​​ដល់​​​សេដ្ឋកិច្ច​​​ដោយ​​​របៀបណា​​​​​​។

លោក​​​បាន​​​មាន​​​ប្រសាសន៍​​​ថា “តើ​​​អ្នក​​​​​​កំណត់​​​ដោយ​​​របៀប​​​ណា​​​? យើង​​​បាន​​​ស្នើ​​​ឲ្យ​​​មាន​​​ការពន្យល់​​​ដូច្នេះ​​​ ព្រោះ​​​វា​​​មាន​​​ភាព​​​មិន​​​ច្បាស​​​់​​​លាស់​​​”។

លោក​​​ សុភ័ណ្ឌ បាន​​​លើក​​​ឡើង​​​បន្ថែម​​​ទៀត​​​ថា ចាប់​​​តាំង​​​ពីខែ​​​តុលា​​​មក ​​​លោក​​​បាន​​​ឃើញ​​​សេចក្តី​​​ព្រាង​​​ច្បាប់​​​ចំនួន​​​ពីរ​​​បន្ថែម​​​ទៀត​​​ដែល​​​រក្សា​​​បទ​​ប្បញ្ញត្តិ​​​​នេះ​​​​​។ ប៉ុន្តែ លោក​​​បាន​​​លើក​​​ឡើង​​​ថា លោក​​​មិន​​​ដឹង​​​ឡើយ​​​ថា តើ​​​រដ្ឋាភិបាល​​​បាន​​​ដក​​​បទប្បញ្ញត្តិ​​​នេះ​​​ចេញ​​​ ឬ​​​ក៏​​​អត់​​​នោះ​​​ឡើយ​​​ចាប់​​​តាំង​​​ពី​​​ពេល​​​នោះ​​​មក​​​ ហើយ​​​លោក​​​មិន​​​ចង់​​​ធ្វើ​​​អត្ថាធិប្បាយ​​​លើ​​​អ្វី​​​ដែល​​​​​​និយាយ​​​ពាក់​​​ព័ន្ធ​​​កាតព្វកិច្ច​​​កអនុសញ្ញា​​​ការងារ​​​របស់​​​កម្ពុជា​​​ឡើយ​​​។

កាល​​​ពី​​​ខែ​​​ឧសភា​​​ឆ្នាំ​​​មុន​​ ​អង្គការ​​​ពល​​​កម្ម​​​អន្តរជាតិ​​​​​​​​​​​​បាន​​​លើក​​​ឡើង​​​ថា សំណៅ​​​នៃ​​​សេចក្តីព្រាង​​​ច្បាប់​​ដែល​​​ក្រសួង​​​​​​ការ​​​ងារ​​​បាន​​​ចេញ​​​នៅ​​​ពេល​​​នោះ​​​គឺ​​​ជា​​​ “ការ​​​ដើរ​​​ថយ​​​ក្រោយ​​​” បើ​​​ធៀប​​​នឹង​​​ង​​​​​​ច្បាប់​​​មុន​​​ៗ​​​។

ក្នុង​​​ចំណោម​​​ផ្នែក​​​ដ៏​​​ចម្រូង​​​ចម្រាស​​​បំផុត​​​នៃ​​​សេចក្តី​​​ព្រាង​​​ច្បាប់​​​េនះ​​​ គឺ​​​បទ​​​បទប្បញ្ញត្តិ​​​មួយដែល​​​តម្រូវ​​​ឲ្យ​​​មាន​​​ការ​​​គាំទ្រ​​​យ៉ាង​​​តិច​​​​​​២០​​​ភាគ​​​រយ​​​ពី​​​កម្មករ​​​នៅ​​​កន្លែង​​​​​​ធ្វើ​​​ការ​​​ណា​​​មួយ​​​ដែល​​​គេផ្តល់​​​ការ​​​អនុញ្ញាត​​​​​​ ប្រសិន​​​បើ​​​ចង់​​​​​​បង្កើត​​​សហជីព​​​នោះ​​​​​​។ សហជីព​​​បាន​​​រអូ៊រទាំ​​​ថា ការ​​​តម្រូវ​​​​​​ដូច្នេះ​​​ គឺ​​​ជ្រុល​​​ហួស​​​ហេតុ​​​​​ ជា​​​ពិសេស​​​​​​ចំពេល​​​ដែល​​​រោង​​​ចក្រ​​​​​​ចង់​​​លុប​​​បំបាត់​​​មិន​​​ឲ្យ​​​មាន​​​សហជីព​​​នៅ​​​ក្នុង​​​រោង​​​ចក្រ​​​របស់​​​ខ្លួន​​​។ អង្គការ​​​ពល​​​កម្ម​​​អន្តរជាតិ​​​​​​ក៏​​​បាន​​​យល់​​​ស្រប​​​ផង​​​ដែរ​​​ថា ​​​ការ​​​តម្រូវ​​​​​បែប​​​នេះ​​​​​​​​​គឺ​​​មិន​​​សម​​​ហេតុផល​​​ទាល់​​​តែ​​​សោះ។

ការ​​​តម្រូវ​​​ដូច​​​គ្នា​​​នេះ​​​​​​​​​នៅ​​​តែ​​​រក្សា​​​ទុក​​​ក្នុង​​​បទ​​​ប្បញ្ញត្តិ​​​នៃ​​​សេចក្តី​​​ព្រាង​​​ច្បាប់​​​ដែល​​​ចុះ​​​កាល​​​បរិច្ឆេទ​​​កាល​​​ពី​​​ខែ​​​តុលា៕ស៊ុយឈាង​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស