35 C
Phnom Penh

កុមារ​ប្រាំនាក់​លង់ទឹក​ស្លាប់នៅ​ក្នុង​ខេត្ត​កណ្តាល​

ដោយ ឌឹ ខេមបូឌា ដេលី

បទវិភាគ

នគរ​បាល​បាន​លើកឡើង​កាលពី​ម្សិលមិញ​ថា កុមារ​​ប្រាំ​នាក់​បាន​លង់​ទឹក​ស្លាប់​​​​កាលពី​ថ្ងៃ​ច័ន្ទ នៅ​ក្នុងហេតុការណ៍​ដាច់​ដោយ​ឡែក​ពី​គ្នាពីរ​ក្នុង​ខេត្ត​កណ្ដាល​។

លោក ជា ថុល ​អធិការ​នគរ​បាល​ស្រុក​​បាន​មាន​ប្រសាសន៍​ថា នៅ​ក្នុង​ស្រុក​ល្វាឯម ក្មេង​ស្រី​បី​នាក់​បាន​ទៅ​​ទន្លេមេគង្គ​​ក្នុង​ឃុំ​សំបួរជាមួយ​ឪពុក​របស់​ពួកគេ​​ទៅ​លាង​គោ​នៅ​ពេល​រសៀល​។

លោក​ ជា ថុល បាន​មាន​ប្រសាសន៍​ថា បុរសទាំង​​ពីរនាក់​បាន​យក​គោ​​ទៅ​ឃ្វាល​ ហើយ​បាន​ប្រាប់​ក្មេងស្រី​ទាំង​នោះ​ឲ្យ​ទៅ​ផ្ទះ​វិញ ប៉ុន្តែ​ផ្ទុយទៅវិញ​ពួកគេ​បានទៅ​ហែល​ទឹក​លេង​។

លោក​បាន​មាន​ប្រសាសន៍​ថា “បុរស​ជា​ឪពុក​​បាន​និយាយ​ថា នៅ​ពេល​ពួកគាត់​ទៅ​ដល់​ផ្ទះ​​វិញ ពួកគាត់​មិនឃើញ​កូនស្រី​របស់​ខ្លួន​ឡើយ ហើយ​បាន​ហៅ​អ្នក​ភូមិ​ឲ្យ​ជួយ​ដើរ​រក​ពួកគេ​ រួច​​បាន​រាយ​ការ​ណ៍ទៅ​នគរ​បាល​”។

លោក​បាន​បន្ថែម​ថា “​បន្ទាប់ពី​នគរ​បាល​​ទទួល​បាន​ព័ត៌មាន​នោះ យើង​បាន​ទៅចុះ​​ពិនិត្យ​នៅ​ទីនោះ ប៉ុន្តែ​យើង​មិន​បាន​ឃើញ​ក្មេងស្រី​ទាំង​នោះ​ឡើយ។ យើង​ឃើញ​តែ​សម្លៀក​បំពាក់ និង​ស្បែក​ជើង​ផ្ទាត់​របស់​ពួកគេ​នៅ​មាត់​ទន្លេ​តែ​ប៉ុណ្ណោះ​”។

លោក ជា ថុល បាន​មាន​ប្រសាសន៍​ថា អ្នក​ភូមិ​ និង​អ្នក​នេសាទ​ក្នុង​មូលដ្ឋាន​បាន​រក​ឃើញ​សាក​សព​ក្មេង​ស្រី​​ពីរ​នាក់ក្នុង​ចំណោម​ក្មេងស្រី​ទាំងនោះ​​នៅ​ល្ងាច​ថ្ងៃ​ដដែល​នោះ។

​លោកបានមាន​ប្រសាសន៍ថា សាកសព​ក្មេងស្រី​​ឈ្មោះ តី ធីតា អាយុ​៥ឆ្នាំ និង​ ម៉ុន យីតា អាយុ​៩ឆ្នាំ​ត្រូវ​បាន​រកឃើញ​​បន្ទាប់ពី​លង់ទឹក។

លោក​ ជា ថុល ដែល​បាន​បន្ថែម​ថា កំពុង​ស្វែង​រក​សាកសព​ក្មេងស្រី​ម្នាក់​ទៀតនោះ​​បាន​មាន​ប្រសាសន៍​ថា ក្មេងស្រី តី ស្រីនាង អាយុ​៨​ឆ្នាំ នៅ​បាត់​ខ្លួន​នៅឡើយ​ ហើយ​យើង​សន្និដ្ឋាន​ថា នាង​ក៏​បាន​លង់​ទឹក​ស្លាប់​ដែរ។

លោក​បាន​មាន​ប្រសាសន៍​ថា “​យើង​បាន​ធ្វើ​កោសល្យ​វិច័យ​សាកសព ហើយ​លទ្ធផល​បង្ហាញ​ថា ពួកគេ​​បាន​ស្លាប់​ដោយ​សារ​លង់​ទឹក​។ យើង​មានការ​ព្រួយ​បារម្ភ​​អំពី​កុមារ​លង់​ទឹក​ស្លាប់​ ហើយ​ជា​ធម្មតា​យើង​តែ​ងតែ​ជូន​ដំណឹង​ដល់​អ្នកភូមិ​មូលដ្ឋាន​ឲ្យ​មាន​ការ​ប្រុង​ប្រយ័ត្ន​ជា​ពិសេស​គ្រួសារ​​ដែល​រស់​នៅ​ជិត​ទន្លេ”។

​លោក ព្រំ សំណាង អធិការ​រង​នគរ​បាល​ស្រុក​​បាន​មាន​ប្រសាសន៍​ថា នៅ​ក្នុង​ករណី​ដាច់​ដោយ​ឡែក​មួយ​ទៀត​នៅ​ក្នុង​ឃុំលើក​ដែក ស្រុក​កៀនស្វាយ កុមារ​ជា​មិត្ត​ភក្ដិនឹង​គ្នា​​ពីរ​នាក់​បាន​លង់​ទឹក​ស្លាប់​​ ពេល​​ពួកគេហែល​ទឹក​លេង​ក្នុង​ស្រះ​មួយ​ ខណៈ​ដែល​ឪពុក​ម្ដាយ​របស់​ពួក​គេ​ទៅ​ធ្វើ​ការ​។

លោក​បាន​មាន​ប្រសាសន៍​ថា “​កុមារ​ទាំង​នេះ​​បាន​លង់ទឹក​ស្លាប់​នៅ​ម៉ោង​ប្រហែល​៤​រសៀល នៅ​ពេល​ពួកគេ​ហែល​ទឹកលេង​​ក្នុង​ស្រះ​ក្បែរ​ភូមិ​របស់​ខ្លួន​។ ពួកគេ​បាន​លង់​ទឹក​ស្លាប់​​ ដោយសារ​ពួក​គេ​មិន​ចេះ​ហែល​ទឹក​”។

​សាកសព​កុមារ​ ប្រាក់ ចាន់រតនា អាយុ​៧ឆ្នាំ និង​ ផៃ ស្រីណាន់ អាយុ​៨​ឆ្នាំ ត្រូវ​បាន​រក​ឃើញ​បន្ទាប់ពី​អ្នកភូមិ​ម្នាក់​បាន​ប្រទះ​ឃើញ​​ស្បែក​ជើង​ផ្ទាត់​នៅ​ក្បែរ​មាត់​ស្រះ​ ប៉ុន្តែ​មិន​ឃើញ​មាន​មនុស្ស​ហែល​ទឹក​។

លោក សំណាង បាន​មាន​ប្រសាសន៍​ថា “​យើង​បាន​​ព្យាយាម​រលាក់​ទឹក​ចេញពី​មាត់​របស់​ពួកគេ ហើយ​​សង្កត់ទ្រូង​ ប៉ុន្តែ​ពួកគេ​បាន​ស្លាប់​បាត់​ទៅ​ហើយ​៕ សារុន​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស