កាលពីម្សិលមិញ លោក ម៉ៅ មុនីវណ្ណ សមាជិកសភាគណបក្សសង្គ្រោះជាតិនិងគណៈប្រតិភូសមាជិកសភាគណបក្សប្រឆាំងមួយក្រុម និងអ្នកគាំទ្រគណបក្សមួយចំនួនទៀតជាថ្មីម្ដងទៀត ពេលនេះត្រូវបាននគរបាលកម្ពុជារារាំងមិនឲ្យទៅពិនិត្យមើលបង្គោលព្រំដែនដែលមានវិវាទនៅតាមព្រំដែនដ៏ចម្រូងចម្រាសរបស់ប្រទេសកម្ពុជាជាមួយវៀតណាម។
លោក មុនីវណ្ណ ដែលបានធ្វើដំណើរទៅកាន់តំបន់មានវិវាទនៅតាមព្រំដែនក្នុងខេត្តរតនគិរីរយៈពេលពីរបីថ្ងៃមុនបានមានប្រសាសន៍ថា កាលពីម្សិលមិញគណៈប្រតិភូរបស់លោកបានព្យាយាមទៅឲ្យដល់បង្គោលព្រំដែនលេខ២៣ ស្ថិតក្នុងស្រុកអណ្ដូងមាស ដែលអ្នកភូមិបានត្អូញត្អែរជាច្រើនឆ្នាំមកហើយថា បានបាត់បង់ដីទៅប្រទេសវៀតណាម។
ប៉ុន្តែលោកបានមានប្រសាសន៍ថា ពួកគាត់ត្រូវបានរារាំងដោយនគរបាលមូលដ្ឋានដែលមិនអនុញ្ញាតឲ្យពួកគាត់ចូលភូមិដែលពួកគាត់ត្រូវឆ្លងកាត់ទៅដល់បង្គោលព្រំដែនឡើយ។
លោកបានមានប្រសាសន៍ថា “យើងត្រូវបានរារាំងម្ដងហើយម្ដងទៀតពីសំណាក់នគរបាលមូលដ្ឋានដែលបានអះអាងថា ពួកគេមិនអនុញ្ញាតឲ្យយើងឆ្លងកាត់ភូមិទេ ពីព្រោះអ្នកភូមិជនជាតិដើមភាគតិចកំពុងប្រារព្ធពិធីបែបប្រពៃណី ដែលអំឡុងពេលនោះអ្នកក្រៅត្រូវបានហាមដាច់ខាតមិនឲ្យចូលឡើយ”។
លោក មុនីវណ្ណ បានមានប្រសាសន៍ថា ទោះយ៉ាងណា លោកបាននិយាយទៅកាន់ក្រុមអ្នកភូមិដែលបានប្រាប់លោកថា ពួកគាត់មិនមានបញ្ហាក្នុងការអនុញ្ញាតឲ្យក្រុមរបស់លោកឆ្លងកាត់ឡើយ។
យោងតាមអង្គការសិទ្ធិមនុស្សអាដហុកបានឲ្យដឹងថា បង្គោលព្រំដែនលេខ២៣ធ្វើឲ្យព្រំដែនវៀតណាម៣៥គីឡូម៉ែត្រចូលក្នុងអ្វីដែលអ្នកភូមិចាត់ថាជាទឹកដីកម្ពុជាហើយត្រូវបានបង្កើតឡើងដោយសន្ធិសញ្ញាព្រំដែនបំពេញបន្ថែមរវាងប្រទេសទាំងពីរ។
លោក មុនីវណ្ណ បានមានប្រសាសន៍ថា កាលពីថ្ងៃអង្គារ លោកនិងគណៈប្រតិភូរបស់លោកបានព្យាយាមទៅដល់បង្គោលព្រំដែនលេខ១២ស្ថិតក្នុងតំបន់ “កន្ទុយនាគ” ដាច់ស្រយាលនៃឧទ្យានជាតិវីរជ័យ ដែលគេរាយការណ៍ថា មានការកាប់ឈើខុសច្បាប់។
លោកបានមានប្រសាសន៍ថា ដោយសារបង្គោលព្រំដែននេះមិនមានផ្លូវទៅពីប្រទេសកម្ពុជា ពួកគាត់មានគម្រោងប្រើប្រាស់ផ្លូវដែលឆ្លងកាត់ប្រទេសវៀតណាម។ ប៉ុន្តែលោកបានមានប្រសាសន៍ថា ទាហានវៀតណាមដែលឈរជើងនៅច្រកព្រំដែនបានបដិសេធមិនឲ្យពួកគាត់ចូលឡើយ។
និយាយពីការព្យាយាមរបស់ពួកគាត់ទៅឲ្យដល់បង្គោលព្រំដែនលេខ២៣កាលពីម្សិលមិញ លោក ងួន គឿន ស្នងការនគរបាលខេត្តបានបដិសេធថា មន្ត្រីរបស់លោកមិនបានព្យាយាមរារាំងការធ្វើដំណើរនោះឡើយ។
លោកបានមានប្រសាសន៍ថា “នគរបាលមិនបានរារាំងពួកគេទេ។ អ្វីដែលខ្ញុំដឹងគឺថា អ្នកភូមិកំពុងប្រារព្ធពិធី ដូច្នេះអ្នកភូមិជនជាតិដើមភាគតិចមិនអនុញ្ញាតឲ្យអ្នកក្រៅឆ្លងកាត់ឡើយ”។
កាលពីថ្ងៃច័ន្ទ លោក មុនីវណ្ណ បានមានប្រសាសន៍ថា ទាហានវៀតណាមបានរារាំងគណៈប្រតិភូរបស់លោកបណ្ដោះអាសន្នមិនឲ្យទៅដល់តំបន់ដែលមានវិវាទផ្សេងទៀតស្ថិតនៅតាមព្រំដែន ដែលតាមចោទថា ជនជាតិវៀតណាមបានដាំដំឡូងមី និងជីកស្រះនៅលើទឹកដីកម្ពុជា។
សមាជិកសភារូបនេះបានមានប្រសាសន៍ថា ដីស្រែនិងស្រះទឹកស្ថិតក្នុង “តំបន់ស” មិនទាន់កំណត់ព្រំដែន ដែលគ្មានប្រទេសណាមួយអាចធ្វើការអភិវឌ្ឍបានឡើយ៕ សារុន