នគរបាលបានលើកឡើងថា និស្សិតសាកលវិទ្យាល័យអាយុ២១ឆ្នាំម្នាក់ត្រូវបានសាកសួរនៅសាលាដំបូងរាជធានីភ្នំពេញកាលពីម្សិលមិញបន្ទាប់ពីបើកបររថយន្តទាំងស្រវឹងបង្កគ្រោះថ្នាក់ចរាចរណ៍ ដោយបុកហើយរត់កាលពីល្ងាចថ្ងៃព្រហស្បតិ៍ដែលបានកើតឡើងនៅក្បែរផ្សារបឹងកេងកង ហើយបានបញ្ចប់ជាមួយនឹងការបុករបងនិវេសនដ្ឋានឯកអគ្គរដ្ឋទូតអាមេរិក។
យោងតាមលោក ទិន វ៉ាន់ស៊ី នាយរងការិយាល័យនគរបាលចរាចររាជធានី បានឲ្យដឹងថា តាន់ សុវណ្ណារ៉ា ជានិស្សិតឆ្នាំទី៤នៅសាកលវិទ្យាល័យបញ្ញាសាស្ត្រ ត្រូវបានចាប់ខ្លួននៅខាងក្រៅនិវេសនដ្ឋានរបស់លោក វីលៀម ថូដ ស្ថិតនៅតាមមហាវិថីព្រះនរោត្តមក្រោយម៉ោង ៨និង៣០នាទីយប់បន្តិច បន្ទាប់ពីការបង្កគ្រោះថ្នាក់ចរាចរណ៍ជាបន្តបន្ទាប់ដែលបានកើតឡើងនៅពេលនិស្សិតរូបនេះបានបើករថយន្តឡិចស៊ីសទៅបុករថយន្តមួយគ្រឿងទៀតតាមផ្លូវខាងត្បូងផ្សារបឹងកេងកង។
លោក វ៉ាន់ស៊ី បានមានប្រសាសន៍ថា សុវណ្ណារ៉ា បានបើករថយន្តឆ្ពោះទៅទិសខាងកើតទៅមហាវិថីព្រះនរោត្តម ហើយបត់ទៅមហាវិថីសុធារស រួចទៅបុកម៉ូតូមួយគ្រឿងទៀតនៅក្បែរផ្សារអីុអន។
លោក វ៉ាន់ស៊ី បានមានប្រសាសន៍ថា “អ្នកបើកបររូបនេះបើកបរនៅជិតស្តុបចំការមន [ចំណុចប្រសព្វមហាវិថីព្រះនរោត្តម និង សុធារស] ហើយបន្ទាប់មកបានបុកម៉ូតូមួយគ្រឿងខណៈដែលបុរសរូបនេះព្យាយាមបើកគេចខ្លួន…ហើយមានមនុស្សពីរនាក់រងរបួស”។
លោក វ៉ាន់ស៊ី បានមានប្រសាសន៍ថា បន្ទាប់ពីការបុករួចមក សុវណ្ណារ៉ា មិនព្រមឈប់រថយន្តទេ ដោយបន្តបើកទៅទិសខាងជើងតាមមហាវិថីសុធារសឆ្ពោះទៅព្រះបរមរាជវាំង។
លោក ជួន វិចិត្រ នាយប៉ុស្តិ៍សង្កាត់ចតុមុខបានមានប្រសាសន៍ថា លោកកំពុងល្បាតតាមមហាវិថីសុធារសនៅពេលនោះ។
លោកបានមានប្រសាសន៍ថា “នៅពេលនោះ នគរបាលរបស់យើងកំពុងល្បាតនៅជិតវត្តបទុម ហើយពេលនោះយើងបានឃើញមនុស្សមួយក្រុមនៅតាមផ្លូវ ហើយរថយន្តកំពុងព្យាយាមបើកគេចពីពួកគេ ដូច្នេះហើយ យើងដឹងថា វាជាគ្រោះថ្នាក់ចរាចរណ៍…ហើយព្យាយាមរត់គេចខ្លួន”។
លោក វិចិត្រ បានមានប្រសាសន៍ថា សុវណ្ណារ៉ា ត្រូវបានអ្នករត់ម៉ូតូឌុបយ៉ាងតិច១៥នាក់ដេញតាមខណៈដែលជននេះបន្តបើករថយន្តទាំងស្រវឹងទៅបុកយានយន្តជាច្រើនគ្រឿងទៀត រួចបត់ឆ្វេងតាមផ្លូវលេខ២៤០ ទៅមហាវិថីព្រះនរោត្តម ទីដែលជននេះបានបត់ឆ្វេងម្តងទៀត ហើយទៅបុករបងខាងក្រៅនិវេសនដ្ឋានរបស់ឯកអគ្គរដ្ឋទូតអាមេរិកតែម្តង។
លោកបានមានប្រសាសន៍ថា “នៅពេលជនសង្ស័យរូបនេះបើករថយន្តតាមមហាវិថីព្រះនរោត្តម ខ្ញុំបានឃើញជននេះបើករថយន្តទៅបុករបងតែម្តង។ ខ្ញុំគិតថា ប្រហែលជាមុនពេលបុក ជននេះងងុយដេក”។
លោក វ៉ាន់ស៊ី នាយរងការិយាល័យនគរបាលចរាចរបានមានប្រសាសន៍ថា សុវណ្ណារ៉ា ត្រូវបានសាកសួរនៅសាលាដំបូងរាជធានីភ្នំពេពេញមួយថ្ងៃកាលពីម្សិលមិញ មុនពេលត្រូវបានបញ្ជូនទៅកន្លែងឃុំខ្លួនរបស់នគរបាលកាលពីយប់មិញដើម្បីរង់ចាំការសាកសួរបន្ថែមនៅតុលាការនៅថ្ងៃនេះ។
លោក ចាយ រ៉ាម៉ាន (Jay Raman) អ្នកនាំពាក្យស្ថានទូតអាមេរិកបានមានប្រសាសន៍ថា លោក វីលៀម ថូដ និងមន្ត្រីទូតផ្សេងទៀតមិនបានរងរបួសក្នុងគ្រោះថ្នាក់នោះទេ ប៉ុន្តែបានបដិសេធមិនធ្វើអត្ថាធិប្បាយថា តើគ្រោះថ្នាក់នេះធ្វើឲ្យប៉ះពាល់ដល់សន្តិសុខនៃបេសកកម្មការទូតរបស់អាមេរិកឬយ៉ាងណានោះឡើយ។
លោក រ៉ាម៉ាន បានលើកឡើងតាមអុីម៉េលថា “បើទោះជាមានការខូចខាតខ្លះដល់របងខាងក្រៅក៏ដោយ ក៏លោក វីលៀម ថូដ និងបុគ្គលិកបេសកកម្មផ្សេងទៀតមិនបានរងរបួសដែរ។ពាក់ព័ន្ធគោលនយោបាយ យើងមិនធ្វើអត្ថាធិប្បាយពីបញ្ហាសន្តិសុខទេ”៕សារុន