ការបើកសវនាការនៅក្នុងសំណុំរឿងរបស់អ្នកស្រី ផាវ ញឿង ដែលប្រឈមនឹងការចោទប្រកាន់ពីបទបង្កការខូចខាតដោយចេតនាជុំវិញការសម្លាប់គោចំនួនពីរក្បាលរបស់អ្នកជំនួញម្នាក់ ដែលក្រុមហ៊ុនរបស់អ្នកជំនួញរូបនេះត្រូវបានចោទប្រកាន់ពីបទទន្ទ្រានយកដីដែលជាកម្មសិទ្ធិរបស់អ្នកភូមិមូលដ្ឋានជាច្រើនគ្រួសារនោះ បានចាប់ផ្ដើមនៅសាលាដំបូងខេត្តកោះកុងកាលពីម្សិលមិញ។
ដោយមានអ្នកភូមិប្រមាណ៧០នាក់មកប្រមូលផ្ដុំជាមួយខ្លួននៅខាងក្រៅតុលាការ អ្នកស្រី ផាវ ញឿង បានលើកឡើងថា អ្នកស្រីបានលើកឡើងម្ដងហើយម្ដងទៀតអំឡុងពេលបើកសវនាការថា អ្នកស្រីគ្មានជាប់ពាក់ព័ន្ធនៅក្នុងហេតុការណ៍ងាប់គោចំនួនពីរក្បាលរបស់លោក ហេង ហ៊ុយ ដែលក្រុមហ៊ុនផ្នែកកសិកម្មរបស់លោកទទួលបានដីសម្បទានទំហំ៧៧៩ហិកតានៅក្នុងឃុំជីខក្រោម ស្រុកស្រែអំបិលនោះឡើយ។
អ្នកស្រី ផាវ ញឿង អាយុ៣៩ឆ្នាំ ដែលបានរួមគ្នាជាមួយអ្នកជិតខាងតតាំង និងជួនកាលបានផ្ទុះអំពើហិង្សានៅក្នុងវិវាទដីធ្លីជាមួយលោក ហេង ហ៊ុយ កាលពីឆ្នាំ២០០៨នោះបានលើកឡើងថា តុលាការបានសួរអ្នកស្រីថាតើអ្នកស្រីនៅឯណាកាលពីថ្ងៃទី៣០ ខែឧសភា ឆ្នាំ២០១៣ ជាថ្ងៃដែលគោរបស់លោក ហេង ហ៊ុយ បានងាប់។
អ្នកស្រី ផាវ ញឿង បាននិយាយតាមទូរស័ព្ទថា “ថ្ងៃកើតហេតុនេះ ខ្ញុំមិនបាននៅផ្ទះរបស់ខ្ញុំអស់ប្រហែល១ខែមកហើយ។ ខ្ញុំបានចាកចេញពីផ្ទះទៅមើលថែទាំស្រែនៅក្នុងខេត្តព្រះសីហនុ”។
អ្នកស្រីបាននិយាយបន្ថែមថា “ខ្ញុំគិតថា លោក ហេង ហ៊ុយ គឺជាអ្នកមាន ហើយគាត់ចង់ប្រើប្រព័ន្ធតុលាការដើម្បីបំបាក់ស្មារតីរបស់ខ្ញុំ ព្រោះគាត់ខឹងនឹងខ្ញុំដែលហ៊ានតតាំងនឹងគាត់នៅក្នុងវិវាទដីធ្លី”។
ក្រុមហ៊ុន Heng Huy Agriculture Group ទទួលបានដីសម្បទានដើម្បីដាំអំពៅកាលពីឆ្នាំ២០០៨ ប៉ុន្តែវិវាទដីធ្លីបានកើតមានជាប់រហូតមកបន្ទាប់ពីក្រុមហ៊ុននេះត្រូវបានចោទប្រកាន់ពីបទទន្ទ្រានចូលដីដែលស្ថិតនៅខាងក្រៅព្រំប្រទល់របស់ខ្លួន។
អ្នកភូមិចំនួន២៤គ្រួសារបានឈានដល់ការព្រមព្រៀងគ្នាជាមួយក្រុមហ៊ុននេះ ដោយយល់ព្រមចាកចេញពីដីនេះនៅក្នុងឆ្នាំ២០១០ ប៉ុន្តែអ្នកភូមិចំនួនបួនគ្រួសារ រួមទាំងគ្រួសាររបស់អ្នកស្រី ផាវ ញឿង ផងដែរនោះបានដាក់ពាក្យបណ្ដឹងទៅកាន់សាលាដំបូងខេត្តកាលពីឆ្នាំ២០១៣ ដោយអះអាងថា ពួកគាត់ត្រូវគេបង្ខំឲ្យចុះហត្ថលេខា ហើយបានស្នើឲ្យមានការចាត់ទុកកិច្ចសន្យាទាំងនេះជាអាសាបង់។
លោក ហេង ហ៊ុយ បានលើកឡើងកាលពីម្សិលមិញថា លោករវល់ខ្លាំងណាស់នៅក្នុងជំនួញរបស់លោកមិនអាចមកចូលរួមនៅក្នុងការបើកសវនាការនេះបានឡើយ។
លោកបាននិយាយថា “ខ្ញុំមិនបានទន្ទ្រានចូលដីដែលនៅខាងក្រៅព្រំប្រទល់ដីសម្បទានរបស់ខ្ញុំឡើយ។ អ្នកភូមិទាំងនោះកំពុងរស់នៅលើដីរបស់ខ្ញុំដោយខុសច្បាប់។ សូមតុលាការជួយរកយុត្តិធម៌ផង ព្រោះនគរបាលបានរកឃើញភ័ស្តុតាងគឺថ្នាំសម្លាប់សត្វល្អិតនៅក្រោមផ្ទះរបស់អ្នកស្រី ញឿង”។
លោក ស្រី ម៉ាក់នី ព្រះរាជអាជ្ញារងអមសាលាដំបូងខេត្តបានលើកឡើងថា សាលក្រមនឹងត្រូវប្រកាសនៅថ្ងៃទី៣០ ខែកក្កដា៕ ស៊ុយឈាង