បីខែបន្ទាប់ពីភ្លុកដំរីក្នុងចំនួនយ៉ាងច្រើនបំផុតមិនដែលធ្លាប់មាននៅកម្ពុជាត្រូវបានរឹបអូសនៅកំពង់ផែស្វយ័តក្រុងព្រះសីហនុ មេគយនៃកំពង់ផែនេះបានបង្ហាញខ្លួនចំពោះមុខសាលាដំបូងខេត្តកាលពីថ្ងៃពុធ ដើម្បីឆ្លើយសំណួរអំពីករណីនេះជាលើកដំបូង។
លោក ហួត វិចិត្រ ព្រះរាជអាជ្ញារងអមសាលាដំបូងខេត្តនេះបានបញ្ជាក់កាលពីម្សិលមិញថា លោក គិន លី មេគយប្រចាំកំពង់ផែស្វយ័តក្រុងព្រះសីហនុ ត្រូវបានសាកសួរហើយបានផ្ដល់ឲ្យតុលាការនូវឯកសារមួយចំនួនពាក់ព័ន្ធនឹងការដឹកជញ្ជូនភ្លុកដំរី ប៉ុន្តែថា លោកត្រូវការត្រួតពិនិត្យបន្ថែមទៀតមុនពេលលោកកោះហៅក្រុមហ៊ុនដែលដឹកជញ្ជូនភ្លុកដំរីទាំងនេះ។
លោក វិចិត្រ បានមានប្រសាសន៍ថា “យើងបានស្នើឲ្យគយស្វែងរកឯកសារបន្ថែមទៀតដើម្បីវែកមុខថាតើក្រុមហ៊ុនមួយណាជាប់ពាក់ព័ន្ធនៅក្នុងករណីនេះ។ តុលាការនៅមិនទាន់កោះហៅក្រុមហ៊ុននៅឡើយទេ ព្រោះយើងកំពុងដោះស្រាយជាមួយគយជាមុនសិន”។
តែទោះជាយ៉ាងណា លោក គិន លី បានលើកឡើងថា លោកបានផ្ដល់ឲ្យតុលាការនូវឯកសារទាំងអស់ដែលពាក់ព័ន្ធនឹងការដឹកជញ្ជូន និងដែលពាក់ព័ន្ធនឹងក្រុមហ៊ុនដឹកជញ្ជូន Reho Both (Cambodia) Co.Ltd ជាក្រុមហ៊ុនអាហរ័ណនីហរ័ណ ដែលមានការិយាល័យនៅរាជធានីភ្នំពេញរួចហើយ។
លោក គិន លី បានមានប្រសាសន៍ដោយមិនរៀបរាប់ច្រើនថា “យើងបានបញ្ជូនឯកសារគ្រប់គ្រាន់ទៅតុលាការជាភ័ស្តុតាងរួចហើយ”។
មិនដែលមានព័ត៌មានលម្អិតជុំវិញករណីនេះឡើយ ចាប់តាំងពីមន្ត្រីគយបានរកឃើញភ្លុកដំរីទម្ងន់៣.០០៨គីឡូក្រាម ដែលគេបង្កប់នៅក្នុងកុងតឺន័រដឹកសណ្ដែកចំនួនពីរគ្រឿងមកពីប្រទេសកេនយ៉ា ឆ្លងកាត់តាមរយៈប្រទេសម៉ាឡេស៊ីកាលពីខែឧសភា ឆ្នាំ២០១៤មក។ ដំបូងឡើយ ក្រុមហ៊ុនដឹកជញ្ជូន Olair Worldwide Logistics ត្រូវបានគេប្រាប់ឈ្មោះមកថា ជាអ្នកដឹកជញ្ជូនទំនិញនេះ ប៉ុន្តែក្រុមហ៊ុននេះបានបដិសេធថា ខ្លួនមិនដឹងអំពីទំនិញនេះឡើយ។ភ្លុកដំរីទាំងនេះអាចមានតម្លៃរាប់លានដុល្លារ។
នៅពេលទាក់ទងកាលពីម្សិលមិញ លោក ខាន់ ស៊ីនិត ប្រធានក្រុមហ៊ុន Reho Both (Cambodia) Co.Ltd បានលើកឡើងថា មុនពេលកុងតឺន័របានមកដល់កាលពីថ្ងៃទី៩ ខែឧសភាឆ្នាំមុន លោកទទួលបានដំណឹងមកថា ក្រុមហ៊ុនរបស់លោកត្រូវទទួលដឹកជញ្ជូនកុងតឺន័រចំនួនពីរគ្រឿង ដែលលោកមិនបានដឹងពីមុនមក។
លោកបានមានប្រសាសន៍ថា “ខ្ញុំបានផ្ញើសារទៅឲ្យនាវាដឹកកុងតឺន័រទាំងពីរនេះដោយច្រានចោលមិនព្រមទទួលដឹកជញ្ជូនឡើយ មុនពេលមន្ត្រីគយរកឃើញភ្លុកដំរី។ តែទោះជាយ៉ាងណាវាគឺជាកំហុសរបស់ខ្្ញុំដែលមិនបានរាយការណ៍ជូនមន្ត្រីគយអំពីបញ្ហានេះ”។
លោក ស៊ីនិត បានលើកឡើងទៀតថា ក្រុមហ៊ុនដឹកជញ្ជូនមួយផ្សេងទៀតឈ្មោះ Road Logistics Express Co. មានប្រវត្តិប្រើឈ្មោះក្រុមហ៊ុនរបស់លោកដើម្បីនាំចូលទំនិញខុសច្បាប់។
បុរសម្នាក់ដែលបានលើកទូរស័ព្ទរបស់ក្រុមហ៊ុន Road Logistics Express Co. បានប្រាប់ថា ខ្លួនគឺជាបុគ្គលិក ហើយមានឈ្មោះ ណារ៉ា ប៉ុន្តែបានបដិសេធមិនធ្វើអត្ថាធិប្បាយពាក់ព័ន្ធនឹងការចោទប្រកាន់នេះឡើយ។
បុរសរូបនេះបាននិយាយថា “ខ្ញុំអត់ដឹងទេ។ ខ្ញុំជាប់រវល់”៕ ស៊ុយឈាង