នៅពេលដែលលោក អាស្តុន ខាថឺ (Ashton Carter) ធ្វើដំណើរបំពេញទស្សនកិច្ចទ្វីបអាស៊ីនៅសប្តាហ៍នេះ ក្នុងពេលមានភាពតានតឹងខ្លាំងទាក់ទិននឹងសមុទ្រចិនខាងត្បូង ប្រទេសកម្ពុជា ជាថ្មីម្តងទៀត បានគាំទ្រជំហររបស់ប្រទេសចិនក្នុងជម្លោះនេះ ដោយបានព្រមានថា ការលើកឡើងនាពេលថ្មីៗដោយរដ្ឋមន្ត្រីក្រសួងការពារប្រទេសអាមេរិក គឺជាការ “បង្កហេតុ” និងបានគំរាមសន្តិភាពពិតប្រាកដ ដែលអាមេរិកអះអាងថាកំពុងការពារនោះ។
លោក ផៃ ស៊ីផាន អ្នកនាំពាក្យរដ្ឋាភិបាល បាននិយាយថា ការរីកធំនៃភាពតានតឹងសព្វថ្ងៃទាក់ទិននឹងសមុទ្រនេះ គឺភាគច្រើនដោយសារការគំរាមកំហែងរបស់លោក ខាថឺ ដែលថានឹងបញ្ជូននាវាចម្បាំងនិងយន្តហោះស៊ើបការណ៍ក្នុងចម្ងាយ២២គីឡូម៉ែត្រនៃបណ្តាកោះដែលទាមទារកាន់កាប់ដោយប្រទេសចិននៅក្នុងផ្លូវទឹកដ៏សំខាន់ខាងយុទ្ធសាស្ត្រនេះ។
លោក ផៃ ស៊ីផាន រដ្ឋលេខាធិការនៅទីស្តីការគណៈរដ្ឋមន្ត្រីបាននិយាយថា “វាជាការបង្កហេតុ។ ខ្ញុំគិតថា វាជាការថ្លែងបង្កហេតុដែលប្រឆាំងនឹងគោលបំណងរបស់យើងក្នុងការថែរក្សាសន្តិភាពក្នុងតំបន់”។
ប៉ុន្តែក្រុមអ្នកជំនាញនិយាយថា ប្រទេសកម្ពុជា ដូចប្រទេសផ្សេងទៀតក្នុងតំបន់នេះដែរ កំពុងព្យាយាមរក្សាជំហរប្រយោជន៍សួនតួក្នុងជម្លោះនេះ ហើយថា អាស៊ានទាំងអស់នឹងនៅខាងអាមេរិកនិងសម្ពន្ធមិត្តរបស់ខ្លួន ប្រសិនបើអាមេរិកនិងចិនចាប់ផ្តើមមានជម្លោះក្នុងតំបន់នេះ។
នាពេលថ្មីៗនេះ អាមេរិកបានបង្កើនវោហារសាស្ត្រទាក់ទិននឹងកង្វល់របស់ខ្លួនអំពីភាពគឃ្លើនរបស់ចិននៅសមុទ្រចិនខាងត្បូង ដែលឃើញមានពាណិជ្ជកម្មស្មើពាក់កណ្តាលនៃពិភពលោកឆ្លងកាត់សមុទ្រនេះរាល់ឆ្នាំ ហើយវាមានសារៈសំខាន់បំផុតសម្រាប់ឧត្តមភាពផ្នែកយោធាអាមេរិកក្នុងតំបន់អាស៊ីប៉ាស៊ីហ្វិក។
បណ្តុំនៃជម្លោះទឹកដីក្នុងសមុទ្រនេះ ភាគច្រើនកើតឡើងដោយសារកំណប់រ៉ែប្រេងនិងឧស្ម័ន ដែលគេជឿថាមានកប់នៅក្រោមសមុទ្រ។ ប្រទេសចំនួនប្រាំ មានប្រទេសប្រុ៊យណេ ម៉ាឡេស៊ី ហ្វីលីពីន កោះតៃវ៉ាន់ និងប្រទេសវៀតណាម មានការអះអាងសិទ្ធិកាន់កាប់ ដែលត្រួតស៊ីគ្នា៩០ភាគរយនៃសមុទ្រនេះ ដែលប្រទេសចិនទាមទារកាន់កាប់ជាម្ចាស់ជាប្រវត្តិសាស្ត្រ។
ប៉ុន្តែរបាយការណ៍មន្ទីរបញ្ចកោណដែលលេចធ្លាយនៅខែឧសភា ដែលបង្ហាញឲ្យឃើញកោះសិប្បនិម្មិតរាប់ពាន់សង់យ៉ាងលឿនដោយប្រទេសចិន បានធ្វើឲ្យបណ្តាប្រទេសអាស៊ីអាគ្នេយ៍មានភាពជ្រួលច្រាល ចំណែកឯអាមេរិកបារម្ភថា ផ្លូវទឹកពាណិជ្ជកម្មដ៏មមាញឹកបំផុតលើពិភពលោក និងឧត្តមភាពផ្នែកយោធារបស់ខ្លួនក្នុងតំបន់នេះ អាចធ្វើឲ្យមានគ្រោះថ្នាក់ដោយសារការចូលកាន់កាប់ដ៏រហ័សរបស់ប្រទេសចិន។
ប្រទេសកម្ពុជាមិនមានការទាមទារសិទ្ធិកាន់កាប់ក្នុងសមុទ្រចិនខាងត្បូងទេ ប៉ុន្តែសំឡេងរបស់ខ្លួនក្នុងជម្លោះនេះបានទទួលការចាប់អារម្មណ៍ច្រើនជាងធម្មតា។ ចាប់តាំងពីខ្លួនបានរៀបចំជំនួបកំពូលអាស៊ានឆ្នាំ២០១២ក្នុងក្រុងភ្នំពេញ និងមិនព្រមលើកយកបញ្ហាសមុទ្រចិនខាងត្បូងមកនិយាយ ប្រទេសកម្ពុជាបានទទួលរងការចោទ ថាបានទម្លាក់ចោលផលប្រយោជន៍រួមអាស៊ានដើម្បីគាំទ្រចិន ដែលជាអ្នកវិនិយោគក្រៅប្រទេសដ៏ធំបំផុតតែមួយគត់របស់ខ្លួន។
ប៉ុន្តែ លោក ស៊ីផាន បានបដិសេធថាប្រទេសកម្ពុជាមិនបានសម្របខ្លួនតាមប្រទេសចិនទេ បើទោះជាមានការព្រមានពីប្រទេសចិនម្តងហើយម្តងទៀតចំពោះអាមេរិកឲ្យឈប់គំរាមកំហែង បើមិនដូច្នោះទេត្រូវទទួលខុសត្រូវចំពោះអ្វីដែលកើតឡើង។
លោកបាននិយាយថា “ប្រទេសទាំងអស់ រួមបញ្ចូលប្រទេសចិននិងអាមេរិកផងដែរ ចាំបាច់ត្រូវប្រឆាំងនឹងចំណង់បង្កើនវត្តមានផ្នែកយោធា។ ជំហររបស់រដ្ឋាភិបាលកម្ពុជាគឺចង់បានសន្តិភាពនិងស្ថិរភាព ហើយថាសមុទ្រចិនខាងត្បូងមិនមែនជាកម្មសិទ្ធិរបស់ប្រទេសណាមួយទេ”។
លោកបានបន្ថែមថា “រដ្ឋាភិបាលកម្ពុជាមិនចង់ឃើញនាវាចម្បាំងឬអំពើឈ្លានពានណាមួយនៅសមុទ្រចិនខាងត្បូងទេ។ ប្រទេសណាមួយដែលបង្កហេតុបែបនេះ ត្រូវទទួលខុសត្រូវ ប្រសិនបើវាកើតមានជម្លោះ”។
លោក ស៊ីផាន បានទទួលស្គាល់ថា ប្រទេសកម្ពុជាជាអ្នកទទួលបានអំណោយហិរញ្ញវត្ថុរបស់ចិន ប៉ុន្តែបាននិយាយថា បញ្ហាពីរនេះមិនទាក់ទងគ្នាទេ។
លោកបាននិយាយថា “សមុទ្រចិនខាងត្បូងមិនទាក់ទងនឹងជំនួយដែលប្រទេសកម្ពុជាទទួលបានពីប្រទេសចិន ឬប្រទេសណាមួយ នោះគឺសម្រាប់កំណើនសេដ្ឋកិច្ចរបស់យើងប៉ុណ្ណោះ។ ហើយក្នុងប្រការនេះ ប្រទេសកម្ពុជាជាមិត្តភក្តិនឹងគ្រប់ប្រទេស” លោកបានបន្ថែមថា ប្រទេសកម្ពុជាអនុវត្តស្របតាមគោលការណ៍អាស៊ាន និងចង់បានក្រមប្រតិបត្តិដើម្បីបង្កើតការចរចាដោយសន្តិភាព។
កាលពីខែមេសា ក្រសួងការបរទេសនិងសហប្រតិបត្តិការអន្តរជាតិនៃព្រះរាជាណាចក្រកម្ពុជា បាននិយាយថា អាស៊ានគួរស្ថិតនៅក្រៅជម្លោះទឹកដី ហើយអនុញ្ញាតឲ្យប្រទេសសមាជិករបស់ខ្លួនដោះស្រាយជម្លោះដោយខ្លួនឯង ជាជំហរមួយផ្សេងទៀតដែលប្រកាន់យកដោយប្រទេសចិន និងជាជំហរមួយដែលបញ្ជាក់ថាជាឧបសគ្គចំពោះការចរចា។
លោកស្រី សឿង រដ្ឋចាវី រដ្ឋលេខាធិការក្រសួងការបរទេសនិងសហប្រតិបត្តិការអន្តរជាតិកម្ពុជា បានប្រាប់អ្នកយកព័ត៌មានបន្ទាប់ពីការប្រជុំបិទទ្វារជាមួយក្រុមអ្នកការទូតបរទេសនៅខែមុនថា “អាស៊ានមិនអាចដោះស្រាយជម្លោះនេះបានទេ។ ជម្លោះទឹកដីនៅ សមុទ្រចិនខាងត្បូងត្រូវដោះស្រាយជាមួយប្រទេសដែលពាក់ព័ន្ធ”។
យោងតាមលោក ខាល ថាយឺរ អ្នកជំនាញអាស៊ីអាគ្នេយ៍នៅបណ្ឌិត្យសភាការពារប្រទេសអូស្ត្រាលីបានឲ្យដឹងថា ជាការគោរពជាក់ស្តែងរបស់ប្រទេសកម្ពុជាចំពោះប្រទេសចិនទំនងជាមិនផ្លាស់ប្តូរទេដរាបណាសន្តិភាពនៅតែមាន។ លោកបាននិយាយថា ការប្តូរជំហរនឹងប្រថុយធ្វើឲ្យមានគ្រោះថ្នាក់ដល់ទំនាក់ទំនងប្រកបដោយប្រយោជន៍ខ្លាំងនេះ។
លោក ថាយឺរ បាននិយាយថា “ប្រទេសកម្ពុជាផ្គាប់ផ្គុនប្រទេសចិន [និង]ជៀសវាងការប្រឆាំងនឹងអាមេរិក” ដោយលោកលើកឡើងថា ប្រទេសកម្ពុជាបានបង្កើនវោហារសាស្ត្ររបស់ខ្លួនគាំទ្រចិននាពេលថ្មីៗនេះ។
លោកបាននិយាយថា “ប្រទេសកម្ពុជានឹងមិនផ្តាច់សម្ព័ន្ធភាព[នេះ] ឬប្រកាន់យកជំហរដែលនឹងធ្វើឲ្យគ្រោះថ្នាក់ដល់សិទ្ធិរបស់ប្រទេសកម្ពុជាក្នុងការទទួលបានប្រាក់ស្រួលៗពីប្រទេសចិន”។
ប្រទេសកម្ពុជា ជាសមាជិកតូចមួយនៃអាស៊ានដែលគ្មានការទាមទារសិទ្ធិក្នុងសមុទ្រនោះ អាចបញ្ចេញសំឡេងគាំទ្រប្រទេសចិន ពីព្រោះប្រទេសនេះមានការទាក់ទងតិចតួចទៅនឹងលទ្ធផលនៃជម្លោះនេះ។
លោក ថាយឺរ បាននិយាយថា ប៉ុន្តែប្រសិនបើការពាក់ព័ន្ធនេះរីកធំហួសពីវោហារសាស្ត្រនោះ ប្រទេសកម្ពុជានឹងលើកការជំទាស់របស់ខ្លួនជាមួយថ្នាក់ដឹកនាំអាស៊ាន បន្ទាប់មកស្របតាមមតិទូទៅ ដូចដែលខ្លួនបានធ្វើនៅឯជំនួបកំពូលអាស៊ានក្នុងឆ្នាំនេះ នៅប្រទេសម៉ាឡេស៊ីដែរ។
លោកបាននិយាយថា “ប្រទេសកម្ពុជាអាចធ្វើសេចក្តីថ្លែងការណ៍អំពីឥរិយាបថធ្វើឲ្យអស្ថិភាពរបស់អាមេរិក ហើយថាអាស៊ានមិនគួរដើរតួនាទីដោយផ្ទាល់ក្នុងការដោះស្រាយជម្លោះទឹកដី…ហើយថាអាស៊ាននឹងតម្រូវចិត្តប្រទេសកម្ពុជា បើកម្ពុជាមិនធ្វើឲ្យខូចដល់មតិរួមបច្ចុប្បន្ននេះ”។
យោងតាមលោក ថាយឺរ ឲ្យដឹងថា ការគំរាមកំហែងកាន់តែខ្លាំងរបស់ចិននិងអាមេរិកដែលចាប់ផ្តើមមានជម្លោះ បានធ្វើឲ្យបណ្តាប្រទេសអាស៊ានកាន់តែចង់ទុកចិត្តលើការប្តេជ្ញារបស់ប្រទេសចិនចំពោះសន្តិភាព និងនាំមកនូវការផ្តោតការយកចិត្តទុកដាក់លើការចរចាវិញ។
ដោយសំដៅលើសេចក្តីប្រកាសអំពីការប្រតិបត្តិនៃភាគីនៅសមុទ្រចិនខាងត្បូង លោកបាននិយាយថា “មានភាពបន្ទាន់ថ្មីនៅអាស៊ានដើម្បីបញ្ជាក់ឲ្យច្បាស់នូវខសំខាន់ៗនៃឯកសារ២០០២DOC ជាពិសេសកថាខណ្ឌដែលនិយាយថាចំពោះ ‘សេចក្តីអត់ធ្មត់’ និង ‘មិនប្រើកម្លាំង ឬការគំរាមកំហែងប្រើកម្លាំង’ ”។
លោក ថាយឺរ បានកត់សម្គាល់ឃើញថា ប្រទេសកម្ពុជាមិនមែនជាប្រទេសតែមួយគត់ដែលទទួលប្រយោជន៍ពីឥទ្ធិពលរបស់ចិន ប៉ុន្តែដោយមានភាពជាដៃគូយុទ្ធសាស្ត្រអាស៊ាន-ចិនដែលមានសារៈសំខាន់ក្នុងតំបន់នោះដែរ។ ហើយកម្ពុជា ដោយគ្មានការទាមទារសិទ្ធិនៅសមុទ្រនេះ ដឹងខ្លួនឯងថាត្រូវស្ថិតក្នុងជំហរមួយដើរកណ្តាល។
ប្រទេសចិនចង់ធ្វើការបញ្ជាក់ត្រង់ចំណុចនេះជាខ្លាំង នៅពេលដែលលោក លុយ យ៉ានដុង (Liu Yandong) ជាឧបនាយករដ្ឋមន្ត្រី បាននិយាយទៅកាន់ប្រតិភូជាច្រើនរូបនៅជំនួបកំពូលស្តីពីសន្តិសុខអាស៊ីលើកទី១៤អំពីប្រយោជន៍នេះចំពោះអាស៊ានក្នុងការរក្សាទំនាក់ទំនងប្រកបដោយផ្លែផ្កាជាមួយប្រទេសចិន។ លោកបានថ្លែងថា នៅរយៈពេលប្រាំឆ្នាំបន្ទាប់ ប្រទេសចិនរំពឹងថានឹងនាំចូលទំនិញមានតម្លៃមួយទ្រីលានដុល្លារពីបណ្តាប្រទេសអាស៊ាន និងវិនិយោគ៥០០ពាន់លានដុល្លារក្នុងតំបន់នេះ។
នៅពេលដែលប្រទេសកម្ពុជារងការរិះគន់ត្បិតការចេញមុខអះអាងថា អាស៊ានមិនគួរពាក់ព័ន្ធជាប្លុកក្នុងការចរចាទាក់ទិននឹងជម្លោះទឹកដីនោះ ប្រទេសផ្សេងទៀតក្នុងសមាគមនេះបានចាប់ផ្តើមជាបណ្តើរៗធ្វើការអះអាងជំហរស្រដៀងគ្នានេះ។
កាលពីចុងសប្តាហ៍ ប្រធានាធិបតីឥណ្ឌូនេស៊ី លោក ចូកូ វីដូដូ (Joko Widodo) បានសំដែងនូវចេតនារបស់លោកថ្លឹងថ្លែងអំពីការពាក់ព័ន្ធណាមួយក្នុងជម្លោះនេះធៀបទៅនឹងប្រយោជន៍នៃប្រទេសធំបំផុតនេះរបស់អាស៊ាន។
លោក វីដូដូ ត្រូវបានដកស្រង់សម្តីចុះផ្សាយក្នុងកាសែតហ្សាការតាប៉ុស្តិ៍ថា “ប្រសិនបើយើងដើរតួនាទីមួយ នោះក៏ល្អដែរ។ ប៉ុន្តែប្រសិនបើយើងមិនមានដំណោះស្រាយត្រឹមត្រូវទេ កិច្ចប្រឹងប្រែងការទូតរបស់យើងមិនឲ្យផលអ្វីឡើយ អ៊ីចឹងហើយ តើយើងគួរធ្វើទេ?”។
លោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្មកម្ពុជា បាននិយាយក្នុងបទសម្ភាសមួយកាលពីសប្តាហ៍មុនជាមួយទស្សនាវដ្តី Knowledge នៃសាកលវិទ្យាល័យផិននីស៊ិលវ៉ានា ថា ការចាត់ទុកចិនថាមនុស្សអាក្រក់និងអាមេរិកថាមនុស្សល្អនៅអាស៊ីប៉ាស៊ីហ្វិក លែងគួរឲ្យជឿតទៅទៀតហើយ។
លោក ចាន់ថុល បាននិយាយថា អាមេរិកទំនងជាមិនអាចប្រកាន់ខ្ជាប់នូវការផ្លាស់ប្តូរមូលដ្ឋានគ្រឹះក្នុងអាទិភាពថ្នាក់តំបន់ ដែលបង្ហាញឲ្យឃើញជាក់ស្តែងដោយការបដិសេធរបស់ខ្លួនមិនចូលរួមជាមួយធនាគារវិនិយោគហេដ្ឋារចនាសម្ព័ន្ធអាស៊ី (AIIB) ដែលជាផែនការផ្ទាល់របស់ប្រទេសចិន។
លោកត្រូវបានគេស្រង់សម្តីថា “ខ្ញុំមិនអាចនិយាយជំនួសអាមេរិកបានទេ ប៉ុន្តែសព្វថ្ងៃនេះ ពួកគេនៅឯកោទាំងស្រុង។ សម្ព័ន្ធមិត្រអាមេរិកទាំងអស់ គឺមានប្រទេសកូរ៉េខាងត្បូង បារាំង អាឡឺម៉ង់ សូម្បីប្រទេសអូស្ត្រាលី ក៏បានរួសរាន់ចូលជាសមាជិក [មានតែ] ប្រទេសជប៉ុន និងអាមេរិកប៉ុណ្ណោះ មិនចូលរួម”។ រដ្ឋមន្ត្រីក្រសួងពាណិជ្ជកម្មរូបនេះបានបន្ថែមថា “ខ្ញុំគិតថា ពិភពលោកនេះប្រែប្រួលហើយ។ នៅពេលប្រទេសចិនចម្រើនលូតលាស់ ប្រទេសជិតខាងទាំងឡាយ ពិភពលោក ក៏រីកចម្រើនដែរ”។
លោក ភោគ គង់ សហស្ថាបនិកនិងជាប្រធានវិទ្យាស្ថានកម្ពុជាសម្រាប់ការសិក្សាយុទ្ធសាស្ត្រ ជាស្ថាប័នប្រឹក្សាយោបល់ទើបបង្កើតថ្មីបាននិយាយថា ភាពអាចកើតមានជម្លោះប្រដាប់អាវុធនៅសមុទ្រចិនខាងត្បូង ជាព័ត៌មានសំខាន់នៅពេលនេះ ប៉ុន្តែបណ្តាប្រទេសអាស៊ាននៅទីបញ្ចប់នឹងផ្តល់អាទិភាពលើផលប្រយោជន៍សេដ្ឋកិច្ចរបស់ខ្លួន ដែលផ្អែកលើស្ថិរភាពថ្នាក់តំបន់។
លោកបាននិយាយថា ៉អ្វីគួរឲ្យចាប់អារម្មណ៍នោះគឺថា មនុស្សជាច្រើនហាក់ដូចជាគិតថា ប្រទេសកម្ពុជាតែឯងកំពុងព្យាយាមមានទំនាក់ទំនងល្អជាមួយប្រទេសចិន។ តាមពិត ប្រទេសសមាជិកអាស៊ានភាគច្រើនកំពុងអនុវត្តដូចគ្នា ឬជំហរស្រដៀងគ្នា។ ប្រទេសទាមទារសិទ្ធិកាន់កាប់មួយចំនួន ដូចជាប្រទេសប៊្រុយណេ និងប្រទេសម៉ាឡេស៊ីជាដើម កំពុងព្យាយាមបញ្ចៀសបញ្ហា[ទឹកដី]ទាំងអស់គ្នា”។
“ការបង្កើតទំនាក់ទំនងរឹងមាំជាមួយប្រទេសចិនមិនដាក់ផលប្រយោជន៍សេដ្ឋកិច្ចរបស់ខ្លួនឲ្យប្រឈមនឹងហានិភ័យទេ ប៉ុន្តែផ្ទុយទៅវិញ ផ្តល់ដំណោះស្រាយសមហេតុផលនិងយូរអង្វែងដល់ភាពចម្រើនលូតលាស់របស់ខ្លួនទៅវិញទេ។
ប៉ុន្តែបណ្តាប្រទេសអាស៊ាននៅតែមានការចាប់អារម្មណ៍សំខាន់ក្នុងការរក្សាទំនាក់ទំនងល្អជាមួយសហរដ្ឋអាមេរិក និងបស្ចិមប្រទេសផ្សេងទៀត ជាមួយនឹងទំនាក់ទំនងផ្នែកពាណិជ្ជកម្មចាំបាច់ប្រចាំតំបន់។ អាមេរិកនិងសហភាពអឺរ៉ុបនាំចូលភាគច្រើននៃទំនិញដែលប្រទេសកម្ពុជាផលិត ក្នុងនោះមានខោអាវ ដែលសេដ្ឋកិច្ចរបស់ប្រទេសកម្ពុជាត្រូវការចាំបាច់។
លោក គង់ បាននិយាយថា “ប្រទេសកម្ពុជាមិនអាចធ្វើឲ្យទំនាក់ទំនងល្អក់កករ” ជាមួយបស្ចិមប្រទេសបានទេ ក៏ប៉ុន្តែលោកបន្ថែមថា ទោះជាយ៉ាងណាក៏ដោយ វានឹងត្រូវការលើសពីការបង្ហាញគោលជំហរផ្នែកការទូតទៅទៀតក្នុងការធ្វើឲ្យប៉ះពាល់ដល់ទំនាក់ទំនងសេដ្ឋកិច្ចនោះ។ “អាមេរិកនិងសហភាពអឺរ៉ុបជាសមាជិករបស់អង្គការពាណិជ្ជកម្មពិភពលោក ដូច្នេះបើបស្ចិមប្រទេសមិនសប្បាយចិត្តជាមួយពួកគេ ពួកគេនៅតែនាំផលិតផលរបស់ខ្លួនចេញទៅទីផ្សារទាំងនោះដដែល។
តុល្យភាពដែលប្រទេសអាស៊ានទាំងអស់ស្វះស្វែងចង់បាន នឹងពង្រឹងទំនាក់ទំនងផ្នែកសេដ្ឋកិច្ចជាមួយប្រទេសចិន ទន្ទឹមនឹងបន្តបង្កើនការវិនិយោគនិងទីផ្សារនាំចេញនៅបស្ចិមប្រទេស ដោយឲ្យភាគីទាំងពីរទទួលបានប្រយោជន៍ពីការពង្រីកសេដ្ឋកិច្ចដ៏រហ័សក្នុងតំបន់នេះ៕ និត