28 C
Phnom Penh

ការ​រំលោភ​ផ្លូវ​ភេទ​កុមារ​ថយ​ចុះ តែ​ភ្នាក់ងារ​ការពារ​កុមារ​យល់​ឃើញ​ផ្សេង

ដោយ ឌឹ ខេមបូឌា ដេលី

បទវិភាគ

យោង​តាម​លទ្ធផល​នៃ​ការ​សិក្សា​ថ្មី​ដែល​ចេញ​ដោយ​អង្គការ​បេសកកម្ម​យុត្តិធម៌​អន្តរជាតិ (IJM) នៅ​សប្តាហ៍​នេះ​បាន​ឲ្យ​ដឹង​ថា អាជីវកម្ម​ផ្លូវ​ភេទ​កុមារ​បាន​ថយ​ចុះ​យ៉ាង​ច្រើន​ចាប់​តាំង​ពី​ឆ្នាំ​២០១២​មក ប៉ុន្តែ​ទីភ្នាក់ងារ​ការពារ​កុមារ​ផ្សេង​ទៀត​បាន​ព្រមាន​ថា លទ្ធផល​រក​ឃើញ​នេះ​អាច​នាំ​ឲ្យ​យល់​ខុស។

ភ្នាក់ងារ​សម្ងាត់ IJM បាន​ទៅ​ដល់​ទីតាំង​អាជីវកម្ម​ផ្លូវ​ភេទ​២៨៧​កន្លែង​ក្នុង​ក្រុង​ភ្នំពេញ ក្រុង​សៀមរាប និង​ក្រុង​ព្រះសីហនុ សម្រាប់​ការ​សិក្សា​ស្រាវជ្រាវ​នេះ និង​បាន​កំណត់​អត្តសញ្ញាណ​បុគ្គល​២០១៤​នាក់​ដែល​អាច​បម្រើ​ផ្លូវ​ភេទ។ ចំនួន​៣៨​នាក់​ក្នុង​ចំណោម​នោះ​ជា​អនីតិ​ជន ស្មើ​នឹង​ការ​ថយ​ចុះ​៧៣​ភាគរយ​ពី​ចំនួន១៤៧ ដែល​រក​ឃើញ​ក្នុង​ការ​សិក្សា​ស្រដៀង​គ្នា​នេះ​កាលពី​ឆ្នាំ​២០១២។

ក្នុង​អ្វី​ដែល​អង្គការ IJM ចាត់​ទុក​ថា​ទីផ្សារ​អាជីវកម្ម​ផ្លូវ​ភេទ​ធំ​បំផុត​ចំនួន​បី​របស់​ប្រទេស​កម្ពុជា អង្គការ​បាន​រក​ឃើញ​ក្មេង​ស្រី​តែ​ពីរ​នាក់​ដែល​មាន​អាយុ​១៥​ឆ្នាំ ឬ​តិច​ជាង​នេះ ធៀប​ទៅ​នឹង​តិច​ជាង​២០​នាក់​កាលពី​បី​ឆ្នាំ​មុន។

លោក​ស្រី សារ៉ន ខូន វូ (Sharon Cohn Wu) អនុ​ប្រធាន​ជាន់​ខ្ពស់​នៃ​ការ​ផ្លាស់​ប្តូរ​ប្រព័ន្ធ​យុត្តិធម៌​សម្រាប់ IJM បាន​និយាយ​ក្នុង​សេចក្តី​ប្រកាស​អម​ទិន្នន័យ​នេះ​ថា “​រូបភាព​របស់​ក្មេង​ស្រី​ក្មេងៗ​ដែល​ត្រូវ​បាន​យក​ចេញ​ពី​ផ្ទះ​បន​ដ៏​គួរ​ឲ្យ​ខ្លាច​នៅ​ភូមិ​ស្វាយ​ប៉ាក​ក្នុង​ប្រទេស​កម្ពុជា​នោះ ធ្វើ​ឲ្យ​ស្រពាប់​ស្រពោន​ផ្លូវ​ចិត្ត​ដល់​សហគមន៍​ពិភព​លោក ព្រោះ​ជា​ឧទាហរណ៍​នៃ​ភាព​រន្ធត់​ពី​ការ​ជួញដូរ​ផ្លូវ​ភេទ​នៅ​ទូទាំង​ពិភព​លោក ប៉ុន្តែ​រូបភាព​នេះ​លែង​មាន​ទៀត​ហើយ”។

លោក​ស្រី បាន​និយាយ​ថា “ប្រទេស​កម្ពុជា​មាន​ការ​រីក​ចម្រើន ហើយ​យើង​ចាំបាច់​ត្រូវ​ប្រាប់​រឿង​បច្ចុប្បន្ន​ភាព​អំពី​កុមារ​ត្រូវ​​សង្គ្រោះ​និង​ស្តារ​នីតិ​សម្បទា ឧក្រិដ្ឋជន​ត្រូវ​ចាប់​ខ្លួន​និង​ដាក់​ទោស ប៉ូលិស​ប្រឆាំង​ការ​ជួញដូរ​ទទួល​បាន​ការ​បណ្តុះ​បណ្តាល​បំពាក់​ឧបករណ៍ និង​ការ​ទប់​ស្កាត់​មាន​ប្រសិទ្ធភាព”។

ប៉ុន្តែ​នៅ​ពេល​ដែល​របាយការណ៍ IJM បាន​បង្ហាញ​ឲ្យ​ឃើញ​អនីតិជន​តិចតួច​ជាង​មុន​ត្រូវ​គេ​លក់​ដូរ​សម្រាប់​ការ​បម្រើ​ផ្លូវ​ភេទ​នោះ លោក ដុន ប៊្រូស្ទឺ (Don Brewster) ស្ថាបនិក​និង​ជា​នាយក​ប្រតិបត្តិ​អង្គការ​បេសកកម្ម​អន្តរជាតិ Agape ដែល​ស្ថិត​នៅ​ក្នុង​ភូមិ​ស្វាយប៉ាក​មាន​ឈ្មោះ​មិន​ល្អ​នៅ​ជាយ​ក្រុង​ភ្នំពេញ​ភាគ​ខាង​ជើង បាន​ប្រាប់​រឿង​ផ្សេង​ទៅ​វិញ។

លោក​បាន​និយាយ​ថា “IJM បាន​ធ្វើ​ឲ្យ​មាន​ការ​រីក​ចម្រើន​ច្រើន ប៉ុន្តែ​នៅ​ពេល​យើង​មិន​បាន​ធ្វើ​ការ​ស្រាវជ្រាវ​ដែល​ពួកគេ​បាន​ធ្វើ តួលេខ​ដែល​ពួកគេ​រក​ឃើញ​គឺ​គួរ​ឲ្យ​ភ្ញាក់​ផ្អើល​ណាស់”។

ដូច​អង្គការ IJM អ៊ីចឹង លោក ប៊្រូស្ទឺ ធ្វើការ​ជាមួយ​ប៉ូលិស​ក្នុង​ស្រុក​ដើម្បី​បំបែក​ក្រុម​ជួញ​ដូរ និង​រំដោះ​ស្ត្រី​ដែល​ពួកគេ​ឃាត់​ទុក។ ប៉ុន្តែ​លោក​និយាយ​ថា លោក​នៅ​តែ​មើល​ឃើញ​អនីតិជន​ច្រើន​ដដែល​ក្នុង​អាជីវកម្ម​បម្រើ​ផ្លូវ​ភេទ​នេះ។

ក្នុង​អត្ថបទ​បញ្ចេញ​មតិ​ចេញ​ផ្សាយ​កាលពី​ខែ​មុន​ក្នុង​កាសែត​វ៉ាស៊ីងតោន​ប៉ុស្តិ៍ លោក ប៊្រូស្ទឺ បាន​សរសេរ​ថា នៅ​ឆ្នាំ​មុន​នេះ ការ​ឆ្មក់​ចូល​ឆែកឆេរ​មាន​ជោគជ័យ​១២​លើក​ដោយ​អង្គការ Agape បាន​រំដោះ​ស្ត្រី​៨១​នាក់​ពី​អាជីវកម្ម​ផ្លូវ​ភេទ ដោយ​៣៩​ភាគរយ​ក្នុង​ចំណោម​ពួកគេ​មិន​គ្រប់​អាយុ។

លោក​បាន​និយាយ​កាលពី​ថ្ងៃ​អង្គារ​ថា “ឥឡូវ​នេះ ក្រុម​ស៊ើប​អង្កេត​របស់​យើង​បាន​រក​ឃើញ​១៥​កន្លែង​ដែល​លក់​ដូរ​ផ្លូវ​ភេទ​ដោយ​មាន​ក្មេង​ស្រី​មិន​គ្រប់​អាយុ។ យើង​កំពុង​រង់ចាំ​ការ​អនុញ្ញាត​ដើម្បី​ធ្វើ​ការ​ឆ្មក់​ចូល​ឆែកឆេរ”។

លោក​បាន​និយាយ​ថា “ពិតមែន ភាគ​ច្រើន​ស្ថិត​ក្នុង​តំបន់​ក្រុង ក្នុង​នោះ​មាន​កន្លែង​មួយ​ចំនួន​ដូចជា ប៉ោយប៉ែត​និង​បន្ទាយ​មាន​ជ័យ​ជាដើម។ ទើបតែ​យប់មិញ​នេះ ក្រុម​អ្នក​ស៊ើប​អង្កេត​របស់​ខ្ញុំ​បាន​ប្រាប់​ខ្ញុំ​ជា​សង្ខេប​អំពី​បួន​កន្លែង​ក្នុង​ក្រុង​ភ្នំពេញ​មាន​ក្មេង​ស្រី​ដែល​គេ​បញ្ជាក់​ថា​មិន​គ្រប់​អាយុ”។

ក្នុង​ការ​សិក្សា​ចុង​ក្រោយ​របស់​ខ្លួន អង្គការ IJM បាន​រក​ឃើញ​ថា កន្លែង​ខារ៉ាអូខេ កន្លែង​លក់​ស្រា​បៀរ បា កន្លែង​ម៉ាស្សា និង​ផ្ទះ​បន ជ្រក​ក្រោម​ស្លាក​ហាង​កាហ្វេ តែ​ជា​កន្លែង​អាជីវកម្ម​បម្រើ​ផ្លូវ​ភេទ។

លោក ប៊្រូស្ទឺ បាន​និយាយ​ថា ដោយ​មាន​ការ​រឹត​បន្តឹង​កាន់តែ​ខ្លាំង​ពី​ប៉ូលិស បណ្តាញ​ឧក្រិដ្ឋជន​ដែល​ផ្តល់​ស្រី​ឲ្យ​ជន​ល្មើស​ផ្លូវ​ភេទ ឥឡូវ​នេះ​កាន់តែ​ធ្វើ​លួចលាក់ និង​បែប​មាន​ការ​ចាត់តាំង ជា​ការ​ពិត​មួយ​ដែល​ទទួល​ស្គាល់​ដោយ​អង្គការ IJM។

លោក​បាន​និយាយ​ថា “អ្នក​ផ្តល់​ស្រី​មាន​មធ្យោបាយ​ទាក់ទង​ក្រុម​ក្មេង​ស្រី​នៅ​កន្លែង​ជាក់លាក់។ ជន​រួម​រ័ក​ជាមួយ​កុមារ​ទាក់​ទង​អ្នក​ផ្តល់​ស្រី ហើយ​គេ​យក​ក្មេង​ស្រី​មក​ឲ្យ។ មិន​ធ្វើ​ជា​ចំហ​ដូច​មុន​ទៀត​ទេ ប៉ុន្តែ​នៅ​តែ​មាន​ដដែល”។

លោក សំលៀង សិលា នាយក​ប្រចាំ​ប្រទេស​នៃ​អង្គការ​សកម្មភាព​ដើម្បី​កុមារ​ (APLE) ជា​អង្គការ​មិន​មែន​រដ្ឋាភិបាល​មាន​ជោគជ័យ​ច្រើន​បំផុត​ក្នុង​ការ​ស៊ើប​អង្កេត​ជន​បរទេស​ដែល​ជាប់​ចោទ​រំលោភ​បៀតបៀន​កុមារ បាន​ឲ្យ​តម្លៃ​លើ​ការ​រក​ឃើញ​របស់ IJM ថា​ត្រឹម​ត្រូវ ប៉ុន្តែ​បាន​និយាយ​ថា ការ​រំលោភ​ផ្លូវ​ភេទ​កុមារ​កើត​ឡើង​ញឹក​ញាប់​បំផុត​នៅ​តាម​កន្លែង​ដែល​មិន​រាប់​បញ្ចូល​ដោយ​ការ​សិក្សា​នេះ។

លោក​បាន​និយាយ​ថា “យើង​ត្រូវ​តែ​ប្តូរ​វិធីសាស្ត្រ​របស់​យើង​ពីព្រោះ នៅ​ពេល​នៅ​តែ​មាន​ផ្ទះ​បន​និង​កន្លែង​ផ្សេងទៀត​បើក ភាគច្រើន​[នៃ​ការ​រកស៊ី​នេះ]​បាន​ចេញ​មក​តាម​ផ្លូវ​នានា”។

លោក សិលា ដែល​អង្គការ​របស់​លោក​នា​ពេល​ថ្មីៗ​នេះ​បាន​ចូលរួម​ក្នុង​ការ​ស៊ើប​អង្កេត ដែល​អតីត​នាយក​របស់​ខ្លួន​ផ្ទាល់​បាន​ជាប់​ពន្ធនាគារ​ពី​បទ​ចោទ​រួម​ភេទ​ជាមួយ​កុមារ បាន​និយាយ​ថា ការ​រំលោភ​បំពាន​នៅ​តាម​អង្គការ សាលារៀន និង​សហគមន៍ និង​ក្មេង​តាម​ដង​ផ្លូវ គឺ​ជា​ការ​ផ្តោត​យក​ចិត្ត​ទុក​ដាក់​នៅ​ពេល​បច្ចុប្បន្ន​របស់​លោក។

លោក​បាន​និយាយ​ថា ៉សារ​នេះ​ប្រាកដ​ជា​បង្ហាញ​ឲ្យ​ឃើញ​ថា បាន​សម្រេច​ការងារ​ដ៏​ច្រើន​ហើយ ប៉ុន្តែ​សារ​នេះ​ក៏​អាច​ត្រូវ​គេ​បកស្រាយ​ខុស​ដែរ។ បញ្ហា​នៅ​មាន​នៅ​ឡើយ គ្រាន់តែ​ប្តូរ​រូបភាព​ប៉ុណ្ណោះ”។

យោង​តាម​ការ​សិក្សា​របស់ IJM បាន​ឲ្យ​ដឹង​ថា ចំនួន​អនីតិជន​រកស៊ី​ផ្លូវ​ភេទ​នៅ​ក្រុង​ព្រះ​សីហនុ​បាន​ថយ​ចុះ​៨៦​ភាគ​រយ​ពី​ឆ្នាំ​២០១២​ដល់​ឆ្នាំ​២០១៥។ ប៉ុន្តែ​លោក​ស្រី ម៉េកហ្គី អីុណូ (Maggie Eno) ស្ថាបនិក​និង​ជា​នាយក​អង្គការ​ម្លប់​តាប៉ាង ដែល​ធ្វើការ​ជាមួយ​កុមារ​តាម​ថ្នល់​នៅ​ក្រុង​មាត់​សមុទ្រ​នេះ បាន​និយាយ​ថា តួ​លេខ​នេះ​មិន​មាន​ន័យ​ថា មាន​ការ​រួម​ភេទ​ជាមួយ​អនីតិជន​តិច​ជាង​មុន​នោះ​ទេ។

លោក​ស្រី​បាន​និយាយ​ថា “មាន​ការ​ផ្លាស់​ប្តូរ​ច្រើន​ចេញ​ពី​ទី​កន្លែង​ជា​ទម្លាប់​ទាំង​នោះ។ ប៉ុន្តែ​អ្នក​ទាំង​ឡាយ​ណា​ដែល​ចង់​រួម​ភេទ​ជាមួយ​កុមារ ពួកគេ​នឹង​រក​ឃើញ​ផ្លូវ។ ពួកគេ​ពូកែ​រក​ណាស់”។

“ខ្ញុំ​មិន​អាច​អត្ថាធិប្បាយ​អំពី​តួ​លេខ​ទាំង​នោះ​[របស់​IJM]​បាន​ទេ ប៉ុន្តែ​អ្វី​ដែល​ខ្ញុំ​អាច​និយាយ​បាន គឺ​ថា ការ​រំលោភ​បំពាន​ផ្លូវ​ភេទ​កុមារ​ក្នុង​គ្រួសារ​ខ្មែរ​មិន​បាន​ថយ​ចុះ​សោះ។ តាម​ពិត វា​បន្ត​កើន​ឡើង”។

ទាក់ទង​កាលពី​ថ្ងៃ​អង្គារ លោក​ស្រី គ្រីស្តា ហេដិន សាព(Christa Hayden Sharpe) នាយក​ការិយាល័យ​ស្រាវជ្រាវ​ដល់​ទីកន្លែង​របស់​អង្គការ IJM បាន​សង្កត់​បញ្ជាក់​ថា នៅ​ពេល​ការ​រក​ឃើញ​របស់​ក្រុម​នេះ​ប្រកាស​ថា​ជោគជ័យ ការ​រក​ឃើញ​នេះ នៅ​ទី​បញ្ចប់ តំណាង​ឲ្យ “ការ​ថយ​ចុះ​ហើយ​មិន​មែន​ការ​លុប​បំបាត់​នៃ​”​ក្មេង​ដែល​ត្រូវ​គេ​លក់​ឲ្យ​ពួក​កេង​ប្រវ័ញ្ច​ផ្លូវ​ភេទ​ទេ។

លោក​ស្រី​បាន​និយាយ​ថា “យើង​មិន​និយាយ​ថា ការ​ជួញ​ដូរ​លែង​មាន ឬ​ថា គ្មាន​ករណី​ដែល​នៅ​តែ​មាន​នោះ​ទេ។ នេះ​ជា​របៀប​របស់​យើង​ក្នុង​ការ​បង្ហាញ​ឲ្យ​ឃើញ​ថា ប្រសិនបើ​អ្នក​ធ្វើ​តាម​ប្រព័ន្ធ​យុត្តិធម៌​សាធារណៈ វា​អាច​ជា​ដំណោះ​ស្រាយ​មាន​ប្រសិទ្ធភាព”។

“នេះ​ជា​ឱកាស​មួយ​ត្រូវ​ឈប់ ពិនិត្យ​មើល​និង​អបអរ​អ្វី​ដែល​កំពុង​ដំណើរ​ការ”៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស