34 C
Phnom Penh

រដ្ឋាភិបាល​​​កម្ពុជា ​ទាមទារ​​ឲ្យ​​ប្រទេស​វៀតណាម​​គោរពខ្សែ​បន្ទាត់​​​ព្រំដែន​

ដោយ ឌឹ ខេមបូឌា ដេលី

បទវិភាគ

ក្រសួង​ការ​បរទេស​កម្ពុជា​​បាន​​បញ្ជូន​កំណត់ទូត​មួយ​ដែល​ប្រើ​ពាក្យ​សម្ដី​ធ្ងន់ៗ​ទៅ​ប្រទេស​វៀតណាម​កាលពី​ថ្ងៃ​សុក្រ ដោយ​ស្នើ​ឲ្យ​ប្រទេស​ជិត​ខាង​ប៉ែក​ខាង​កើត​របស់​ខ្លួន​មួយនេះ “គោរព​ខ្សែ​បន្ទាត់​ព្រំដែន” បន្ទាប់ពី​ការ​ចុះ​ធ្វើ​អធិការកិច្ច​​​ដោយ​​មន្ត្រី​រដ្ឋាភិបាល​បាន​បញ្ជាក់​ថា អាជ្ញាធរ​​វៀតណាម​បានជីក​ស្រះ​​ចំនួន​ប្រាំ​នៅ​ក្នុង​ទឹកដី​របស់​កម្ពុជា​ក្នុង​ខេត្ត​រតនគិរី។

កំណត់ទូត​ចុះ​ថ្ងៃ​ទី​១២ ខែ​មិថុនា ​ដែល​ផ្ញើ​ជូន​​សមាជិក​រដ្ឋសភា​ ព្រមទាំង​បញ្ជូន​ទៅ​ស្ថានទូត​វៀតណាម​ក្នុង​រាជធានី​ភ្នំពេញ​នេះ ​បញ្ជាក់​ថា ការ​ចុះ​ធ្វើ​អធិការកិច្ច​ដោយ​ក្រសួង​មហាផ្ទៃ​ និង​គណៈកម្មការ​ចម្រុះ​ខណ្ឌសីមា​ និង​បោះ​បង្គោល​​ព្រំដែន​គោក​កម្ពុជា​-វៀតណាម​ បាន​រក​ឃើញ​ថា ស្រះ​ទាំង​នោះ​ត្រូវ​បាន​ “ជីក​ចូល​ក្នុងទឹក​ដី​របស់​កម្ពុជា​យ៉ាង​ជ្រៅ”។

អង្គការ​សិទ្ធិ​មនុស្ស​ក្នុង​ស្រុក​អាដហុក​ គឺ​ជា​អ្នកដំបូង​គេ​ដែល​​ធ្វើ​ឲ្យ​សាធារណជន​ផ្ដោត​ការ​ចាប់​អារម្មណ៍​មក​លើ​ស្រះ​ទាំង​ប្រាំ​នេះ​​ និង​ចម្ការ​ដំឡូង​មី​ក្បែរៗ​នោះ​នៅ​ក្នុង​ស្រុក​អូរយ៉ាដាវ​កាលពី​ខែ​មុន បណ្ដាល​ឲ្យ​ក្រុម​តំណាង​រាស្ត្រ​គណបក្ស​សង្គ្រោះ​ជាតិ​ធ្វើ​ដំណើរ​ចុះ​ទៅ​ពិនិត្យ​មើល​ការ​ចូល​លុកលុយ​នៅ​ទីនោះ​។ កាលពី​ថ្ងៃ​ច័ន្ទ ទាហាន​ប្រដាប់អាវុធ​វៀតណាម​បាន​ព្យាយាម​រារាំង​មនុស្ស​មួយ​ក្រុម​​​មានគ្នា​ជាង​៣០០​នាក់ រួម​មាន​និស្សិត​ ព្រះសង្ឃ​ និង​សកម្មជន​គណបក្ស​ប្រឆាំង​ មិន​ឲ្យ​ចូល​ទៅ​កាន់​តំបន់​មាន​វិវាទ​។

កំណត់​ទូត​របស់​ក្រសួង​ការ​បរទេស​​នេះ​​បញ្ជាក់​ថា មន្ត្រី​រដ្ឋាភិបាល​បាន​ប្រទះឃើញ​ស្រះ​ចំនួន​ប្រាំ​ដែល​មាន​ទំហំ​៥គុណនឹង​១៣​ម៉ែត្រ​​ស្ថិត​នៅ​ចន្លោះ​បង្គោល​ព្រំដែន​លេខ​៣០ និង​លេខ​៤០​ក្នុង​ឃុំប៉ក់ញ៉ៃ​ នៅ​ក្នុង​ផ្នែក​មួយ​តាម​បណ្ដោយ​ខ្សែ​បន្ទាត់​ព្រំដែន​ដែល​មិន​ទាន់​​បាន​កំណត់​​នៅ​ឡើយ។​ យោង​តាម​កំណត់​ទូត​នេះ​បង្ហាញ​ថា ស្រះ​ទាំង​នោះ​ស្ថិត​នៅក្នុង​ទឹក​ដី​កម្ពុជា​ចម្ងាយ​ចន្លោះ​ពី​៣៨០​ម៉ែត្រ​ទៅ​៥៤៥​ម៉ែត្រ​។ កំណត់​ទូត​ដដែល​​បាន​បញ្ជាក់​ថា “​ផ្អែក​តាម​ផែនទី​ ស្រះ​​ទាំង​នោះ​ត្រូវបាន​ជីក​នៅ​ក្នុង​ទឹក​ដី​កម្ពុជា​”។

នៅ​ក្នុង​កំណត់​ទូត​នេះ​រដ្ឋាភិបាល​ “​ទាម​ទារ​” ឲ្យ​វៀតណាម​គោរព​ផែន​ទី​​ដែល​ផ្អែក​លើ​ការ​ចរចា​​កន្លង​មក​រវាង​ប្រទេស​ទាំង​ពីរ​ ព្រមទាំង​សេចក្ដី​ប្រកាស​ព័ត៌មាន​រួម​​មួយ​នៅ​ខែ​មករា ឆ្នាំ​១៩៩៥​ ដោយ​​ក្នុង​នោះ​​រដ្ឋាភិបាល​បាន​ប្ដេជ្ញា​ “​អប់រំ​ទប់ស្កាត់​ពលរដ្ឋ​ទាំងសងខាង មិន​ត្រូវធ្វើ​ការដាំដុះ ឬ​តាំង​ទីលំនៅ​ឆ្លងដែន និង​សហការ​រក្សា​សណ្តាប់ធ្នាប់ និង​សន្តិសុខ​ព្រំដែន”។

កំណត់ទូត​នេះ​គូស​បញ្ជាក់​ថា នៅ​ក្នុង​ជំនួប​របស់​លោក​​នៅ​សប្ដាហ៍​នេះ​ជាមួយ​លោក ឡេ ហុងអាញ់ សមាជិក​ការិយាល័យ​នយោបាយ​បក្ស​កុ​ម្មុយ​នី​ស្ត​វៀតណាម លោក​នាយក​រដ្ឋមន្ត្រី​ ហ៊ុន សែន “ក៏​បាន​លើក​ឡើង​ពី​បញ្ហា​នេះ​ដែរ​ ហើយ​បាន​​ទាម​ទារ​​ថា ‘ដោយ​រង់ចាំ​ការ​កំណត់​ព្រំដែន​​ តំបន់​ដែល​មិន​ទាន់​បាន​កំណត់ ​មិន​គួរ​កែប្រែទេ’”។

ពេល​ទាក់​ទង​តាម​ទូរស័ព្ទ​កាលពី​ថ្ងៃ​សុក្រ លោក ម៉ៅ មុនីវណ្ណ តំណាង​រាស្ត្រ​គណបក្ស​សង្គ្រោះ​ជាតិ​ដែល​បាន​ដឹកនាំ​គណៈប្រតិភូ​របស់​គណបក្ស​ប្រឆាំង​ ដើម្បី​ធ្វើ​ដំណើរ​ចុះ​​ទៅ​ពិនិត្យ​មើល​ព្រំដែន បាន​​សម្ដែង​​ការ​ពេញ​ចិត្ត​ចំពោះ​អន្តរាគមន៍​របស់​ក្រសួង​ការ​បរទេស ប៉ុន្តែ​លោក​បាន​លើក​ឡើង​បន្ថែម​ថា គួរ​តែ​ចាត់វិធានការ​បន្ថែម​ទៀត​ដើម្បី​ដោះ​ស្រាយ​បញ្ហា​នេះ។

លោក​បាន​មាន​ប្រសាសន៍​យ៉ាង​ដូច្នេះ​ថា “​តាម​រយៈ​​កំណត់​ទូត​នេះ វា​បង្ហាញ​ថា ស្រះ​ទាំង​នោះ​ត្រូវ​បាន​ជីក​នៅ​ក្នុង​ទឹក​ដី​របស់​កម្ពុជា​ ដូច្នេះ​គ្រាន់​តែ​ចេញ​កំណត់​ទូត ​វា​មិន​គ្រប់គ្រាន់​ទេ​ ប៉ុន្តែ​រដ្ឋាភិបាល​គួរ​តែ​រៀបចំ​ការ​ចរចា​អហិង្សា​ជាមួយ​វៀតណាម​ ដើម្បី​ទាមទារ​ឲ្យ​លុប​ស្រះ​ទាំង​នោះ​វិញ ហើយ​បង្ហាញ​ថា ពួកគេ​ជា​អ្នក​ទទួល​ខុស​ត្រូវ​ចំពោះ​​​ទង្វើ​ឧក្រិដ្ឋ​នៃ​ការ​បំពាន​ទឹកដី​របស់​កម្ពុជា”។

ដោយ​ឡែក​ពី​នេះ​ ស្ថានភាព​តាន​តឹង​ក៏​បាន​និង​កំពុង​កើត​ឡើង​ដែរ​តាម​បណ្ដោយ​ព្រំដែន​ក្នុង​ស្រុក​មេមត់ ខេត្ត​ត្បូងឃ្មុំ កន្លែង​ដែល​អ្នកភូមិ​​កំពុង​តែ​ក្ដៅ​ក្រហាយ​ចំពោះ​វៀតណាម​ដែល​អះអាង​សិទ្ធិ​កាន់​កាប់​ដី​ទំហំ​១៦,៦​ហិកតា​ ដែល​ពួកគាត់​​បាន​បង្ក​បង្កើន​ផល​កសិកម្ម​ជាយូរ​មក​ហើយ​​។ ជា​ការ​ឆ្លើយ​តប​ទៅ​នឹង​លិខិត​មួយ​ច្បាប់​​របស់​តំណាង​រាស្ត្រ​គណបក្ស​សង្គ្រោះ​ជាតិ​​ ដែល​ជួស​មុខ​ឲ្យ​កសិករ​ទាំង​នោះ លោក ហោ ណាំហុង បាន​បញ្ជាក់​កាលពី​​ខែ​មុន​​ថា ​​​​​​​​​ដី​នោះ​ស្ថិត​នៅ​ក្នុង​ប្រទេស​វៀតណាម​។

កាលពី​ថ្ងៃ​សុក្រ ក្រុម​​​ប្រឹក្សា​ឃ្លាំ​មើល​កម្ពុជា​ហៅ​កាត់​ថា CWC បាន​​ថ្វាយ​ញត្តិ​ទៅ​ព្រះមហាក្សត្រ​ នរោត្តម សីហមុនី និង​បាន​ដាក់​ញត្តិ​ជូន​លោក​នាយករដ្ឋមន្ត្រី ហ៊ុន សែន លោក ហេង សំរិន ប្រធាន​រដ្ឋសភា ព្រម​ទាំង​​លោក សម រង្ស៊ី ប្រធាន​គណបក្ស​សង្គ្រោះ​ជាតិ​ ​ដើម្បី​សុំ​ឲ្យ​ដក​លោក​ ហោ ណាំហុង រដ្ឋមន្ត្រី​ក្រសួង​ការ​បរទេស​ និង​លោក វ៉ា គឹមហុង ប្រធានគណៈកម្មាធិការ​កិច្ច​ការ​ព្រំដែន​ ចេញ​ពី​តំណែង​ចំពោះ​ការ​មិន​ការ​ពារ​ទឹក​ដី​របស់​កម្ពុជា​។

លោក ម៉ៅ ពិសេស ប្រធាន​សហព័ន្ធ​និស្សិត​បញ្ញវន្ត​កម្ពុជា ជា​សមាជិក​​មួយ​របស់​​ក្រុម​ប្រឹក្សា​ឃ្លាំមើល​កម្ពុជាដែល​ជា​សម្ព័ន្ធ​អង្គការ​ជាតិ​និយម​ដ៏ធំ បាន​មាន​​ប្រសាសន៍​ថា “​យើង​ដាក់​ញត្តិ​អម​ជាមួយ​លទ្ធផល​របស់​យើង​ ដើម្បី​ស្នើ​សុំ​ឲ្យ​ថ្នាក់​ដឹកនាំ​កំពូល​ៗ​ដក​ពួកគាត់​ទាំង​ពីរ​ចេញពី​តំណែង ពីព្រោះ​ពួកគាត់​អសមត្ថភាព​​ក្នុង​ការបំពេញ​ការ​ងារ​ និងដោយសារ​​ពួកគាត់និយាយ​ម្ដង​ហើយ​ម្ដង​ទៀត​ថា ដី​មាន​វិវាទ​នោះ​គឺ​ជា​ដី​របស់​វៀតណាម​ ទោះ​បី​ជា​វា​ស្ថិត​នៅ​ក្នុង​ទឹក​ដី​របស់​កម្ពុជា​ក៏ដោយ​”។

ក្រុម​ប្រឹក្សា​ឃ្លាំ​មើល​កម្ពុជា​ក៏​បាន​គាំទ្រ​ដែរ​ចំពោះ​ការ​អំពាវ​នាវ​របស់​គណបក្ស​សង្គ្រោះ​ជាតិ​នៅ​សប្ដាហ៍​នេះ ដែលស្នើ​​ឲ្យ​រដ្ឋាភិបាល​អនុវត្ត​ឲ្យ​បាន​ល្អ​ ឬ​ចរចា​​ជាមួយ​វៀតណាម​ឡើង​វិញ​ជុំវិញ​សន្ធិសញ្ញា​ព្រំដែន​បំពេញ​បន្ថែម​ឆ្នាំ​២០០៥ ដែល​ត្រូវ​បាន​ក្រុម​អ្នក​នយោបាយ និង​សកម្មជន​ប្រឆាំង​ជំទាស់​យ៉ាង​ខ្លាំង​ក្លា​នៅពេល​នោះ​៕ សុខុម​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស