38 C
Phnom Penh

សហរដ្ឋអាមេរិក​អះអាងថា​ ខ្លួន​ “បំពេញ​ការ​ទូត​បាន​ល្អ​បំផុត”​ ​នៅ​កម្ពុជា​ក្រោយ​ការ​បោះ​ឆ្នោត​​

ដោយ ឌឹ ខេមបូឌា ដេលី

បទវិភាគ

ក្រសួង​ការ​បរទេស​សហរដ្ឋអាមេរិក​​បាន​លើក​ឡើង​នៅ​ក្នុង​សក្ខីកម្ម​សភា​កាលពី​ថ្ងៃ​ព្រហស្បតិ៍​ថា ការ​ចូល​រួម​ពាក់​ព័ន្ធ​របស់​ខ្លួន​នៅ​ក្នុង​ការ​បញ្ចប់​ការ​ជាប់​គាំង​ផ្នែក​នយោបាយ​​​ក្រោយ​ការ​បោះ​ឆ្នោត​ជ្រើស​តាំង​តំណាង​រាស្ត្រ​ឆ្នាំ​២០១៣​នៅ​កម្ពុជា​ គឺ​ជា “​ការ​ទូត​ល្អ​បំផុត” ហើយ​ក៏​ទទួល​បាន​ការ​សរសើរ​មួយ​ផ្នែក​ដែរ​ចំពោះ​ការ​ដំឡើង​ប្រាក់​ខែ​គោល​របស់​កម្មករ​កាត់​ដេរ​ និង​ការ​ដោះលែង​សកម្មជន​ពីពន្ធនាគារ​នៅ​ឆ្នាំ​នេះ​។

នៅ​ក្នុង​សក្ខីកម្ម​ដែល​ត្រូវ​បាន​​បង្ហោះ​​តាម​គេហទំព័រ​របស់​ក្រសួង​ការ​បរទេស​សហរដ្ឋអាមេរិក​ និង​ដែល​មាន​ចំណង​ជើង​ថា “​ដើរ​ថយ​ក្រោយ​ ឬ​ប្រសើរ​ឡើង​-របាយ​ការណ៍​ស្ថានភាព​ស្ដីពី​លទ្ធិប្រជាធិបតេយ្យ​នៅ​អាស៊ី​” ក្រុម​មន្ត្រី​ការ​ទូត​សហរដ្ឋអាមេរិក​បាន​លើ​កឡើង​ថា ខ្លួន​បាន​បន្ត​ផ្ដោត​ជា​​អាទិភាព​លើ​លទ្ធិប្រជា​ធិបតេយ្យ និង​សិទ្ធិ​មនុស្ស​នៅ​កម្ពុជា។

របាយការណ៍​សក្ខីកម្ម​នេះ​មាន​ខ្លឹមសារ​យ៉ាង​ដូច្នេះ​ថា “​អំឡុង​ពេល​ជាប់​គាំង​ផ្នែក​នយោបាយ [ដែល​បាន​កើត​ឡើង​ក្រោយ​ការ​បោះ​ឆ្នោត​ជ្រើស​តាំង​តំណាង​រាស្ត្រ​នៅខែ​កក្កដា ឆ្នាំ​២០១៣] រដ្ឋាភិបាល​សហរដ្ឋអាមេរិក​ ជា​ពិសេស​តាម​រយៈ​ស្ថានទូត​របស់​​យើង​នៅ​ក្នុង​រាជធានី​ភ្នំពេញ បាន​តស៊ូមតិ​ដោយ​មិន​នឿយហត់​ និង​ប្រកប​ដោយ​ប្រសិទ្ធភាព​​ដើម្បី​អហិង្សា​ និង​ការ​ចរចា​​ផ្ទាល់​រវាង​រដ្ឋាភិបាល​កម្ពុជា​ និង​គណបក្ស​ប្រឆាំង​។ កិច្ច​ប្រឹង​ប្រែង​ទាំង​នេះ​គឺ​ជា​ការ​ទូត​ល្អ​បំផុត​ ដោយ​រដ្ឋាភិបាល​សហរដ្ឋ​អាមេរិក​ដើរ​​តួ​ជា​គូសន្ទនា និង​ជា​ស្ពាន​​ដ៏​សំខាន់​​ ខណៈ​បន្ត​គាំទ្រ​គោល​ការណ៍​ប្រជាធិបតេយ្យ​ទាំង​ជា​លក្ខណៈ​​ឯកជន ទាំង​ជា​សាធារណៈ​នៅ​ក្នុង​រាជធានី​ភ្នំពេញ និង​​ពី​រដ្ឋធានី​វ៉ាស៊ីនតោន​”។

របាយការណ៍​​ចេញ​ដោយ​ក្រុម​មន្ត្រី​ការទូត​កំពូល​ៗ​សហរដ្ឋអាមេរិក​នៅ​ក្នុង​​តំបន់​នេះ​បញ្ជាក់​ថា សហរដ្ឋអាមេរិក​បាន​ដើរ​តួនាទី​យ៉ាង​សំខាន់​នៅ​​ក​្្នុង​ការ​ដំឡើង​ប្រាក់​ខែ​គោល​សម្រាប់​​កម្មករ​កាត់ដេរ និង​ការ​ធានា​ឲ្យ​មាន​ការ​ដោះលែង​សកម្មជន​ពី​ពន្ធនាគារ។

របាយការណ៍​នេះ​បាន​លើក​ឡើង​ថា “​មួយ​ផ្នែក​ដោយសារ​ការ​តស៊ូមតិ​ដោយ​ស្ថានទូត​សហរដ្ឋ​អាមេរិក​នៅកម្ពុជា សហជីព​កម្មករ​កាត់​ដេរ​​បាន​ចរចា​​សុំ​ដំឡើង​​២៨​ភាគរយ​លើ​ប្រាក់ខែ​គោល​ដែល​ត្រូវ​បាន​អនុម័ត​នៅ​ខែ​វិច្ឆិកា ឆ្នាំ​២០១៤ ហើយ​ចូល​ជាធរមាន​នៅ​ខែ​មករា។ USAID បាន​ផ្ដល់​ការ​តំណាង​ផ្លូវ​ច្បាប់​ ការ​ឃ្លាំមើល​សវនាការ​ និង​ការ​គាំទ្រ​ផ្នែក​តស៊ូមតិ​ដល់​សកម្មជន​ជាប់​ពន្ធនាគារ​ចំនួន​១.១៥៤​នាក់​ ហើយ​ការ​ជួយ​របស់​រដ្ឋាភិបាល​សហរដ្ឋអាមេរិក​មាន​សារៈសំខាន់​ណាស់​ក្នុង​ការ​ធានា​​ឲ្យ​មាន​ការ​ដោះលែង​សកម្មជន​រាប់​សិប​នាក់​”។

លោក ចេ រ៉េមែន (Jay Raman)​ អ្នក​នាំពាក្យ​ស្ថានទូត​សហរដ្ឋអាមេរិក​បាន​បដិសេធ​មិន​​ធ្វើ​អត្ថាធិប្បាយ​​ទេ​ជុំវិញ​សក្ខីកម្ម​នេះ​។

លោក អ៊ូ វីរៈ ​អ្នក​វិភាគ​នយោបាយ​ និង​ជា​អ្នក​តស៊ូមតិ​​ការពារ​សិទ្ធិ​មនុស្ស​ដ៏​សំខាន់​មួយ​រូប បាន​មាន​ប្រសាសន៍​ថា របាយការណ៍​នេះ​គឺ​ត្រឹម​ត្រូវ​ដោយ​ហេតុ​ថា សហរដ្ឋអាមេរិក​កំពុង​បន្តផ្ដល់​មូលនិធិ​ដល់​អង្គការ​ជាច្រើន​ដែល​បំពេញ​ការ​ងារ​ដើម្បី​​លើក​កម្ពស់​លទ្ធិប្រជាធិបតេយ្យ និង​​​ការ​ពារ​សិទ្ធិ​មនុស្ស​។

លោក​បាន​មាន​ប្រសាសន៍​ទៀត​ថា “​អង្គការ​មួយ​ចំនួន​ក្នុង​ចំណោម​អង្គការ​សំខាន់ៗ​បំផុត​ទទួល​បាន​មូលនិធិ​ពី​សហរដ្ឋអាមេរិក​។​ តើ​ពួកគេ​ជា​អ្នក​​​ផ្ដល់​មូលនិធិ​តែ​មួយ​គត់​ ហើយ​​ពិត​​ជា​អ្នក​ដែល​ធ្វើ​ឲ្យ​រឿង​ទាំង​នោះ​កើត​ឡើងឬ? ទេ។ ប៉ុន្តែតើ​ពួកគេ​កំពុង​តែ​ជួយ​ឬ? បាទ​”។

លោក​បាន​លើក​ឡើង​សំដៅ​ដល់​កិច្ច​ប្រឹង​ប្រែង​ការ​ទូត​របស់​សហរដ្ឋអាមេរិក​ក្រោយ​ការ​បោះ​ឆ្នោត​ក្នុង​ឆ្នាំ​២០១៣​ថា “​ខ្ញុំ​មិន​ដឹង​ថា​តើ​ការ​បញ្ចប់​​ការ​ជាប់​គាំង​ផ្នែក​នយោបាយ​ជា​រឿង​ល្អ​ដែល​​ត្រូវ​ទទួល​បាន​ការ​កោត​សរសើរ​ឬយ៉ាង​ណា​នោះ​ទេ។ ប៉ុន្តែ​តើ​ពួកគេ​បាន​ចូល​រួម​ពាក់​ព័ន្ធ​នៅ​ក្នុង​ដំណើរ​ការ​នេះ​នៅ​ថ្នាក់​ខ្ពស់​បំផុតឬ?បាទ​”។

ទោះ​ជាយ៉ាងណា លោក សុខ ឦសាន អ្នក​នាំពាក្យ​គណបក្ស​ប្រជាជន​កម្ពុជា​​កំពុង​កាន់​អំណាច​ បាន​មាន​ប្រសាសន៍​ថា សហរដ្ឋអាមេរិក​មាន​តួនាទី​តូច​មួយ​ប៉ុណ្ណោះ​នៅ​ក្នុង​នយោ​បាយ​ក្រោយ​ការ​បោះ​ឆ្នោត​ក្នុង​ប្រទេស​កម្ពុជា។ លោក​បាន​លើក​ឡើង​ថា “​ខ្ញុំ​ពិត​ជា​មិន​ដឹង​ថា ពួកគេ​បាន​រួម​ចំណែក​អ្វី​ខ្លះ​នោះ​ទេ។ ប្រហែល​ជា​ពួកគេ​បាន​រួម​ចំណែក​​ផ្ដល់​យោបល់​ឲ្យ​គណបក្ស​ប្រឆាំង​​ចូល​សភា​ដើម្បី​ដោះ​ស្រាយបញ្ហា​នយោបាយ​ហើយ​មើល​ទៅ​”។

លោក​បាន​​មាន​ប្រសាសន៍​សំដៅ​ដល់​ដំណើរ​ទស្សនកិច្ច​របស់​លោក កឹម សុខា ទៅ​កាន់​មន្ទីរ​បញ្ចកោណ​​ក្នុង​សហរដ្ឋអាមេរិក​កាលពី​ខែ​មេសា ឆ្នាំ​២០១៤​ថា “ការ​រួម​ចំណែក​របស់​សហរដ្ឋអាមេរិក​គឺ​មិន​ត្រឹម​តែ​គាំទ្រ​គណបក្ស​ប្រឆាំង​ប៉ុណ្ណោះ​ទេ​។ ដូច​ជា​ករណី​លោក កឹម សុខា ​ទៅ​ជួប​មេបញ្ជាការ​មួយ​រូប​នៅ​មន្ទីរ​បញ្ចកោណ​របស់​សហរដ្ឋអាមេរិក​ ដើម្បី​ប្រកាស​ព័ត៌មាន​គួរ​ឲ្យ​ភ្ញាក់​ផ្អើល​ [នៅ​កម្ពុជា​] ដើម្បី​ដាក់​​សម្ពាធ​លើ​រដ្ឋាភិបាល​ជា​ដើម​​។ ទីបំផុត​គ្មាន​អ្នក​ណា​ចាប់​អារម្មណ៍​ឡើយ​។ ដូច្នេះ​វា​គឺ​ជា​ការ​រួម​ចំណែក​ដោយ​ប្រយោល​របស់​​សហរដ្ឋ​អាមេរិក”។

លោក ហេង សួរ អ្នកនាំពាក្យ​ក្រសួង​ការ​ងារ​ក៏​បាន​មាន​ប្រសាសន៍​ដែរ​ថា សហរដ្ឋ​អាមេរិក​និយាយ​បំផ្លើស​ពី​តួនាទី​របស់​ខ្លួន​នៅ​ក្នុង​ការ​ធ្វើ​សេចក្ដី​សម្រេច​របស់​រដ្ឋាភិបាល​កាលពី​ឆ្នាំ​មុន ដើម្បី​ដំឡើង​ប្រាក់​ខែ​គោល​សម្រាប់​កម្មករ​កាត់​ដេរ​ពី១០០​ដុល្លារ​ដល់​១២៨​ដុល្លារ​។

លោក​បាន​លើក​ឡើង​ថា “​កម្ពុជា​មិន​មែន​ដំឡើង​​ [ប្រាក់​ខែ​] ដោយ​សារ​តែ​សហរដ្ឋ​អាមេរិក​នោះ​ទេ ប៉ុន្តែ​កម្ពុជា​​ដំឡើង​​ដោយ​ផ្អែក​លើ​គោល​នយោបាយ​មានស្រាប់​​យោង​ទៅ​លើ​ស្ថានភាព ជា​ពិសេស​ដើម្បី​បម្រើ​ផល​ប្រយោជន៍​​របស់​បង​ប្អូន​ដែល​ជា​កម្មករ​កាត់​ដេរ”។

ប៉ុន្តែ​លោក អ៊ូ វីរៈ បាន​មាន​ប្រសាសន៍​ថា មិន​ថា​មន្ត្រី​រដ្ឋាភិបាល​និយាយ​អ្វី​ជា​សាធារណៈ​នោះឡើយ គឺ​សហរដ្ឋអាមេរិក​​ពិត​ជា​​បាន​បន្ត​​បញ្ចេញ​ឥទ្ធិពល​ខ្លាំង​នៅ​កម្ពុជា​ប្រាកដ​មែន​​។ លោក​បាន​ថ្លែង​បន្ត​ថា “​សហរដ្ឋអាមេរិក​ពិត​ជា​នៅ​បន្ត​មាន​ឥទ្ធិពល​​ខ្លាំង​។ មន្ត្រី​កម្ពុជា​ចង់​បាន​ភាព​ស្រប​ច្បាប់​ ហើយ​ភាព​ស្រប​ច្បាប់​នោះ​អាច​ទទួល​បានលុះ​ត្រា​តែ​​សហរដ្ឋអាមេរិក​គាំទ្រ​រាល់​ចំណាត់​ការ​របស់​​រដ្ឋាភិបាល​”៕ សុខុម​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស