មន្ត្រីម្នាក់បាននិយាយកាលពីម្សិលមិញថា នគរបាលរាជធានីភ្នំពេញ កាលពីថ្ងៃសៅរ៍បានចាប់ខ្លួនអ្នករកស៊ីបញ្ចាំរបស់ម្នាក់ និងបានដកហូតម៉ូតូដែលលួចប្លន់បានជាង១០០គ្រឿងដែលគាត់បានលក់នៅក្នុងហាងរបស់គាត់ស្ថិតក្នុងខណ្ឌពោធិ៍សែនជ័យ។
យោងតាមលោក ជឹម ស៊ីថា អធិការនគរបាលខណ្ឌដង្កោបានឲ្យដឹងថា កាលពីថ្ងៃសុក្រ បុរសម្នាក់បានរាយការណ៍មកនាយកដ្ឋានរបស់លោកថា គាត់បានឃើញម៉ូតូរបស់គាត់ដែលបាត់នៅហាងបញ្ចាំនោះ ស្ថិតនៅតាមផ្លូវជាតិលេខ៣ ក្នុងសង្កាត់ភ្លើងឆេះរទេះ ខណ្ឌពោធិ៍សែនជ័យ។
លោក ស៊ីថា បានមានប្រសាសន៍ថា មន្ត្រីរបស់លោកបានសហការជាមួយនគរបាលខណ្ឌពោធិ៍សែនជ័យឆ្មក់ចូលហាងនោះកាលពីរសៀលថ្ងៃសៅរ៍ ដោយដកហូតបានម៉ូតូ១០៣គ្រឿង ហើយបានចាប់ខ្លួន លោក ម៉េង សៀ អាយុ៤៤ឆ្នាំ ជាម្ចាស់ហាងបញ្ចាំនោះ។
ដោយបានពន្យល់ថា អ្នកដែលសង្ស័យថា ម៉ូតូរបស់ខ្លួនស្ថិតក្នុងចំណោមម៉ូតូដែលត្រូវបានដកហូតនេះ អាចយកប័ណ្ណសម្គាល់យានយន្តរបស់ខ្លួនមកកាន់អធិការនគរបាលខណ្ឌដើម្បីពិនិត្យនោះ លោកបានមានប្រសាសន៍ថា “យើងបានដកហូតម៉ូតូទាំងអស់នោះយកទៅរក្សាទុកនៅអធិការនគរបាលខណ្ឌដង្កោ ដើម្បីឲ្យអ្នកដែលបានបាត់ម៉ូតូរបស់ខ្លួនដោយត្រូវចោរលួច ឬប្លន់ មកពិនិត្យមើលម៉ូតូទាំងនោះ”។
លោក ស៊ីថា បានមានប្រសាសន៍ថា ដោយសារភាគច្រើននៃម៉ូតូទាំងនោះគឺជាម៉ូតូស៊េរីចាស់ និងមានគុណភាពមិនសូវល្អនោះ លោកសង្ស័យថា ម៉ូូតូទាំងនោះត្រូវបានគេយកមកពីខាងក្រៅរាជធានីភ្នំពេញ។លោកបានមានប្រសាសន៍ថា “ម៉ូតូទាំងនោះប្រហែលជាត្រូវបានលួចឬប្លន់ពីតំបន់ជនបទ”។
អធិការនគរបាលខណ្ឌរូបនេះបានមានប្រសាសន៍ថា លោក ម៉េង សៀ ដែលជាម្ចាស់ហាងបញ្ចាំ មិនទាន់ត្រូវបានចោទប្រកាន់នៅឡើយទេ ហើយកំពុងត្រូវបានសាកសួរដោយនគរបាលខណ្ឌដង្កោ ខណៈដែលពួកគេឆែកឆេររកឯកសារអាជីវកម្មរបស់គាត់ដើម្បីតាមរកអ្នកដែលបានលក់ម៉ូតូទាំងនេះមកឲ្យគាត់៕សារុន