39.8 C
Phnom Penh

សមាជិក​សភាគ​ណបក្ស​សង្គ្រោះជាតិ​​ដឹកនាំដំណើរ​ចុះទៅ​ពិនិត្យ​ព្រំដែន​​វៀត​ណាម​ ដែល​មាន​វិ​វាទមួយទៀត​

ដោយ ឌឹ ខេមបូឌា ដេលី

បទវិភាគ

លោក គង់ សភា សមាជិក​សភា​គណបក្ស​ប្រឆាំង​បាន​មាន​ប្រសាសន៍កាលពី​ម្សិលមិញ​ថា ដោយ​បន្ត​យុទ្ធនាការរបស់​ក្រុមសមាជិក​សភា​គណបក្ស​ប្រឆាំង​​ដើម្បី​ចុះទៅ​ពិនិត្យ​​ការ​អះ​អាង​ថា​មានការ​រំលោភទឹក​ដីខ្មែរ​​នៅតាម​ព្រំដែន​វៀត​ណាមនោះ​ លោក អ៊ូ ចាន់រិទ្ធ សមាជិក​សភា​គណបក្ស​សង្គ្រោះ​ជាតិ កាលពី​​ថ្ងៃ​សៅរ៍ បានដឹកនាំ​​ដំណើរ​ចុះ​ទៅ​​កាន់​កសិដ្ឋានដាំស្វាយ​ចន្ទីដែលមានវិវាទមួយ​ ក្នុង​ខេត្ត​ស្វាយរៀង។

គណបក្ស​សង្គ្រោះ​ជាតិ កាលពី​ខែមុន បាន​ចុះ​ទៅពិនិត្យ​​ការ​ះអះអាង​ថា មាន​ការ​រំលោភ​យក​ទឹកដី​នៅតាម​ព្រំដែន​ស្ថិតក្នុង​ខេត្ត​ត្បូង​ឃ្មុំ និង​ខេត្ត​រតនគិរី​ជា​ផ្នែកមួយ​នៃកិច្ច​ខិត​ខំប្រឹង​ប្រែង​​ដើម្បីឲ្យ​រដ្ឋសភា​ពិនិត្យ​មើល​សន្ធិសញ្ញា​ព្រំដែន​ឆ្នាំ​២០០៥​ដ៏ចម្រូង​ចម្រាស​ជាមួយ​វៀត​ណាម។

យុទ្ធនាការ​នេះបាន​បណ្តាល​​ឲ្យ​ក្រសួង​ការ​បរទេស​ កាលពីថ្ងៃសុក្រ​ សុំឲ្យ​វៀត​ណាម​​ផ្អាក​ការ​ជីក​ស្រះ​​នៅក្នុង​ “តំបន់ស”​ ដែលមាន​វិវាទ​ នៅក្នុង​ខេត្ត​​រតនគិរី។

លោក សភា បានមាន​ប្រសាសន៍​ថា “​យើង​បានចុះទៅ​កាន់​ខេត្ត​ស្វាយ​រៀង ហើយ​យើង​ឃើញ​ថា វៀត​ណាម​​បាន​បោះ​បង្គោល​ព្រំដែន​​ក្នុង​ដីរបស់កសិករយើង​ ដោយ​គ្រប​ដណ្តប់​លើ​ផ្ទៃដី​ទំហំ​ប្រហែល​៣០ហិកតា​។ វៀត​ណាម​ក៏បាន​រំលោភ​​​យកដីស្រែ​របស់​ប្រជាពលរដ្ឋ​យើង​​ជម្រៅ​ពីរ​បីរយ​ម៉ែត្រ​​ពី​ប្រឡាយ​​ ‘៨៥’ និង​កន្លែង​កប់សព​​ជា​ច្រើន​នៅ​លើ​ដីនោះផងដែរ​”។

ដោយប្រើ​ពាក្យ​សម្តីបែប​ប្រមាថទៅលើជនជាតិ​​វៀត​ណាម លោក​បាន​បន្ថែមថា “​កសិករ​របស់យើង​​​បាន​ដាំដើម​​ស្វាយ​ចន្ទី​នៅ​លើ​​ដីស្រែនេះ​ជាយូរ​មក​ហើយ​ ប៉ុន្តែ​​ពួកគាត់​មិន​អាច​​ប្រមូល​ផល​​បាន​ ពីព្រោះ​​​ យួន​​មិន​អនុញ្ញាត​​ឲ្យ​ពួកគាត់​ប្រមូល​ផលឡើយ”។

លោក សភា បាន​មាន​ប្រសាសន៍ថា បង្គោល​ព្រំដែន​ទាំង​នោះ​ត្រូវ​បាន​ផ្លាស់ប្តូរ​កាលពី​ឆ្នាំមុន ប៉ុន្តែថា វៀត​ណាម​​​មិន​បាន​អន្តរាគមន៍លើ​ដី​នេះទេរហូតដល់​ខែ​មុន នៅពេល​ក្រុម​អ្នក​ភូមិ​​បានទៅ​ប្រមូល​ផល​ស្វាយ​ចន្ទីរបស់​ពួកគាត់។

ដោយសំដៅ​ដល់​​ប្រធាន​គណៈកម្មាធិការ​ព្រំដែន​ចម្រុះ​និង​រដ្ឋមន្ត្រី​ក្រសួង​ការ​បរទេស​កម្ពុជា លោក​បានមាន​ប្រសាសន៍ថា​”​យើង​មាន​គម្រោង​សរសេរ​​លិខិត​ផ្ញើជូន​លោក វ៉ា គឹមហុង និង​លោក ហោ ណាំហុង នៅ​ថ្ងៃច័ន្ទ​ ស្នើសុំ​ឲ្យ​ឯក​ឧត្តម​ទាំង​ពីរ​​ពិនិត្យ​​លទ្ធភាព​ចេញ​កំណត់​ទូត​​ដើម្បី​ពិនិត្យ​ឡើង​វិញ​នូវ​បន្ទាត់​ព្រំដែន”។

លោក វ៉ា គឹមហុង បាន​មាន​ប្រសាសន៍​កាលពី​ម្សិលមិញ​ថា លោក​នឹង​មិន​ពិចារណា​ការ​ត្អូញ​​ត្អែរ​របស់​លោក សភា ទេ ដែលលោក​បាន​មាន​ប្រសាសន៍ថា គ្មាន​សុពល​ភាព។

លោក វ៉ា គឹមហុង បាន​មាន​ប្រសាសន៍ថា “​ខ្ញុំចង់​និយាយថា​ វៀត​ណាម​មិន​បានរំកិល​ព្រំដែន​ចូលក្នុង​ប្រទេសកម្ពុជា​ទេ ប៉ុន្តែ​ ប្រជា​ពល​រដ្ឋ​របស់យើង​ទេ បាន​រំលោភ​ទឹកដី​វៀត​ណាម​នោះ​។ គណបក្ស​ប្រឆាំង​​​មិនត្រូវ​បន្ទោស​​គណៈកម្មាធិការព្រំដែន​ឡើយ ពីព្រោះ​យើង​បាន​អនុវត្ត​​ [បញ្ហាព្រំដែន] តាម​ផែនទី​អាណានិគម​បារាំង”​។

បន្ទាប់ពី​ការ​ដាក់កំណត់ទូតទៅ​វៀត​ណាមកាលពី​ថ្ងៃសុក្រ ក្រសួង​ការ​បរទេស​ កាលពី​ម្សិល​មិញ​​ក៏បាន​ចេញ​កំណត់​ទូត​តាមដានដោយ​កំណត់​​ពី​ស្រះ​បីបន្ថែម​ទៀត​​នៅក្នុង​ “តំបន់ស” ​មាន​វិវាទផងដែរ​ ដែល​ចង់ឃើញ​​ការ​លុបចោល រង់ចាំ​ការ​ចរចា​បន្ថែម។

នៅក្នុង​សុន្ទរកថាក្នុង​ខេត្ត​ព្រះ​សីហនុ​​​កាលពីម្សិលមិញ លោក សម រង្ស៊ី ប្រធាន​គណបក្ស​ប្រឆាំង​ ជាអ្នករិះ​គន់​​នយោបាយ​ព្រំដែនរបស់លោក ហ៊ុន សែន​ យូរ​មក​ហើយ​បាន​មាន​ប្រសាសន៍ថា លោក​ចង់ឃើញ​រដ្ឋាភិបាល​ក្រោក​ឈរឡើង​​ប្រឆាំង​​ការ​រំលោភ​ទឹក​ដី។

លោក សម រង្ស៊ី បាន​មាន​ប្រសាសន៍ថា “​យើង​បាន​រួប​រួមគ្នាការ​ពារ​ទឹកដី​របស់យើង​​ ហើយ​យើង​ត្រូវ​មាន​សេចក្តីក្លាហាន​​ក្នុងការ​ប្រឈម​មុខ​ជាមួយ​យួន។ គណបក្ស​សង្គ្រោះ​ជាតិ​​សូមគាំទ្ររដ្ឋាភិបាល​របស់លោក ហ៊ុន សែន ​ប្រសិនបើ​គាត់​ហ៊ាន​​ប្រឈម​មុខ​​ជាមួយ​យួន​ដើម្បី​ការ​ពារ​ទឹក​ដី”៕សារុន​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស