មុនការបោះឆ្នោតផ្ទៃក្នុងនៅក្នុងគណបក្សប្រជាជនកម្ពុជានៅចុងសប្តាហ៍េនះ ដើម្បីជំនួសតំណែងជាប្រធានគណបក្សប្រជាជនកម្ពុជារបស់លោក ជា សីុម ដែលទើបតែទទួលមរណភាពនោះ លោក ស ខេង រដ្ឋមន្ត្រីក្រសួងមហាផ្ទៃ និងលោក សាយ ឈុំ ប្រធានព្រឹទ្ធសភា[ដែលបុគ្គលទាំងពីរជាមន្ត្រីជាន់ខ្ពស់បំផុតនៅក្នុងបក្សនោះ] ត្រូវបានផ្តល់គោរមងារជា “សម្តេច” កាលពីម្សិលមិញដោយចូលរួមនៅក្នុងបញ្ជីឥស្សរជនដែលមានគោរមងារជាសម្តេច។
គណបក្សប្រជាជនកម្ពុជា នឹងធ្វើសមាជមួយនៅថ្ងៃទី២០ខែមិថុនា ដើម្បីតែងតាំងលោក នាយករដ្ឋមន្ត្រី ហ៊ុន សែន ជាប្រធានថ្មីរបស់ខ្លួន ហើយអ្នកដែលត្រូវជំនួសតំណែងអនុប្រធានរបស់លោកនោះ គឺគេនៅមិនទាន់ច្បាស់ឡើយថា តើលោក ស ខេង ឬលោក សាយ ឈុំ។
លោក ជា សីុម បានធ្វើជាប្រធានគណបក្សប្រជាជនកម្ពុជាតាំងពីឆ្នាំ១៩៩១មក ហើយគឺជាមេដឹកនាំបក្សមួយរូបដែលមានគោរមងារជា “សម្តេច” ដូចមេដឹកនាំបក្សចំនួនពីររូបផ្សេងទៀតដែរ គឺ[លោក ហ៊ុន សែន និងលោក ហេង សំរិន ប្រធានកិត្តិយលរបស់គណបក្សប្រជាជនកម្ពុជា] ។ ឥឡូវនេះ ព្រះមហាក្សត្រ នរោត្តម សីហមុនី បានប្រោសព្រះរាជទានគោរមងារជាសម្តេចបន្ថែមទៀតដល់លោក ស ខេង និងលោក សាយ ឈុំ ។
នៅក្នុងព្រះរាជក្រឹត្យដាច់ដោយឡែកពីគ្នា ព្រះមហាក្សត្របានថ្លែងព្រះរាជអំណរគុណដល់មេដឹកនាំជាន់ខ្ពស់នៃគណបក្សប្រជាជនកម្ពុជាទាំងពីររូបេនះសម្រាប់ការបម្រើដល់រាជវង្សានុវង្ស និងប្រទេសជាតិ។
ព្រះរាជក្រឹត្យទី១មានខ្លឹមសារដូច្នេះថា “[ព្រះមហាក្សត្រ] បានទ្រង់យល់ឯកឧត្តម ស ខេង ជាអ្នកដឹកនាំដ៏ឆ្នើម ជាទីគោរពស្រឡាញ់របស់ប្រជារាស្ត្រ មានស្វាមីភក្តិចំពោះរាជបល្ល័ង្ក ការពារ និងគោរពព្រះពុទ្ធសាសនា ការពារយុត្តិធម៌សង្គម ដើម្បីនិរន្តរភាពរាជានិយមនៃព្រះរាជណាចក្រកម្ពុជា។ ហើយទ្រង់បានប្រោសព្រះរាជទានគោរមងារ ឯកឧត្តម ស ខេង ជាសម្តេចក្រឡាហោម”។
នៅក្នុងព្រះរាជក្រឹត្យមួយផ្សេងទៀត ព្រះមហាក្សត្រទ្រង់បានប្រោសព្រះរាជទានគោរមងារដល់លោក សាយ ឈុំ ជា”សម្តេចវិបុលសេនាភក្តី” ។
ក្រៅពីលោក ស ខេង និងលោក សាយ ឈុំ ជាជនសាមញ្ញដែលទទួលបានគោរមងារជាសម្តេចនោះ គឺមានតែជនសាមញ្ញបួនរូបផ្សេងទៀតប៉ុណ្ណោះដែលទទួលបានគោរមងារជាសម្តេចនេះ និងដែលសុទ្ធតែមកពីគណបក្សប្រជាជនកម្ពុជាមានដូចជា លោក ហ៊ុន សែន លោក ហេង សំរិន លោក គង់ សំអុល រដ្ឋមន្ត្រីព្រះបរមរាជវាំង និងលោកស្រី ប៊ុន រ៉ានី ដែលជាភរិយារបស់លោក ហ៊ុន សែន ។
ចំណែកឯអ្នកដែលមិនមែនជាជនសាមញ្ញ ហើយមានងារជាស្តេចមានដូចជាព្រះមហាក្សត្រ នរោត្តម សីហមុនី សម្តេចម៉ែ នរោត្តម មុនីនាថ ព្រះអង្គម្ចាស់ នរោត្តម រណឫទ្ធិ ព្រះអង្គម្ចាស់ នរោត្តម ចក្រពង្ស ព្រះអង្គម្ចាស់ នរោត្តម អរុណរស្មី និងសម្តេចព្រះសង្ឃរាជ ទេព វង្ស និងសម្តេចព្រះសង្ឃរាជ ប៊ូ គ្រី ដែលក៏មានគោរមងារជាសម្តេចដែរនោះ។
លោក អ៊ូ វីរៈ ដែលជាអ្នកវិភាគនយោបាយមួួយរូប បានលើកឡើងថា លោកជឿជាក់ថា ការផ្តល់គោរមងារនេះគឺមានគោលបំណងលើកកម្ពស់ការរួបរួមគ្នានៅក្នុងគណបក្សប្រជាជនកម្ពុជាក្រោយការទទួលមរណភាពរបស់លោក ជា ស៊ីម ដែលគេជឿជាក់ជាយូរមកហើយថា បានដឹកនាំក្រុមមួយនៅក្នុងគណបក្សប្រកួតប្រជែងជាមួយលោក ហ៊ុន សែន នោះ។
លោកបានមានប្រសាសន៍ថា “លោក ហ៊ុន សែន ប្រហែលគិតថា ការធ្វើដូច្នេះអាចជួយបំបាត់នូវអារម្មណ៍ដែលខ្លាចក្រែងលោកនឹងក្តោបក្តាប់អំណាចហួសហេតុនៅក្នុងគណបក្សប្រជាជនកម្ពុជា”។ លោកបានមានប្រសាសន៍បន្ថែមថា “មនុស្សគ្រប់គ្នាដឹងហើយថា លោកគឺជាអ្នកមានអំណាចតែមួយគត់នៅក្នុងគណបក្សប្រជាជនកម្ពុជាឥឡូវនេះ គឺគ្មាននរណាម្នាក់អាចប្រកួតប្រជែងបានឡើយ ហើយចំពេលដែលលោក ជា ស៊ីម ទទួលមរណភាពនោះ ខ្ញុំគិតថា លោកកំពុងតែធ្វើដូច្នេះដើម្បីកុំឲ្យគេគិតថា លោកក្តោបក្តាប់អំណាចតែម្នាក់ឯង”។
លោក អ៊ូ វីរៈ បានមានប្រសាសន៍បន្ថែមទៀតថា “នេះគឺជាអ្វីដែលអ្នកនយោបាយជើងចាស់រូបនេះព្រួយបារម្ភ ហើយនេះគឺជាវិធីតែមួយគត់ដើម្បីបំបាត់ក្តីព្រួយបារម្ភទាំងនោះ។ ដោយដំឡើងលោក ស ខេង និងលោក សាយ ឈុំ ឲ្យទទួលបានគោរមងារនេះ គឺលោកចង់ផ្តល់សារថា អ្វីៗវានឹងនៅតែដដែលដូចធម្មតា”។
លោកបានមានប្រសាសន៍បន្ថែមទៀតថា “វាបង្ហាញឲ្យឃើញនូវអ្វីដែលកើតមាននៅក្នុងគណបក្សប្រជាជនកម្ពុជា។ ប្រសិនបើយើងក្រឡេកមើលតួនាទីរបស់លោក សាយ ឈុំ គាត់គឺជាអគ្គលេខាធិការបក្ស ប៉ុន្តែ គាត់មិនសូវជាឃើញចេញមុខចេញមាត់ទេ។ នេះអាចជាការបង្ហាញមួួយឲ្យឃើញថា គាត់នឹងបង្ហាញមុខជាសាធារណៈច្រើនជាងមុន”។
ប៉ុន្តែ លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជាបានលើកឡើងថា គោរមងារថ្មីសម្រាប់លោក ស ខេង និង លោក សាយ ឈុំ មិនជាប់ពាក់ព័ន្ធនឹងយន្តការផ្ទៃក្នុងរបស់គណបក្សប្រជាជនកម្ពុជា ឬការបោះឆ្នោតជ្រើសរើសអនុប្រធានបក្សឡើយ។
លោកបានមានប្រសាសន៍ថា “វាមិនជាប់ពាក់ព័ន្ធទេ។ នៅពេលយើងក្រឡេកមើលព្រះរាជក្រឹត្យដែលប្រោសព្រះរាជទានគោរមងារដល់លោក ស ខេង ជាសម្តេចក្រឡាហោម និងលោក សាយ ឈុំ ជាសម្តេចវិបុលសេនាភក្តីនោះ គឺដោយសារពួកគាត់បានបម្រើជាតិ និងប្រជាពលរដ្ឋដោយស្មោះត្រង់” ។ លោកបានមានប្រសាសន៍បន្ថែមទៀតថា “ហេតុដូច្នេះវាមិនជាប់ពាក់ព័ន្ធនឹងតំណែងដែលត្រូវជ្រើសរើសនៅពេលអនាគតឡើយ ហើយហេតុដូច្នេះទើបយើងញែកបញ្ហានេះដាច់ដោយឡែកពីគ្នា”។
លោក សឺន ស៊ូបែ៊រ្តិ៍ អតីតសមាជិកក្រុមប្រឹក្សាធម្មនុញ្ញកម្ពុជា ដែលឪពុករបស់លោក គឺលោក សឺន សាន ជាជនសាមញ្ញមួយរូបក្នុងចំណោមជនសាមញ្ញបីរូបដែលទទួលបានគោរមងារជា”សម្តេច”ក្រោមការប្រោសព្រះរាជទានរបស់សម្តេចឪ នរោត្តម សីហនុ នោះបានលើកឡើងថា លោក ជឿជាក់ថា ការផ្តល់គោរមងារជូនលោក ស ខេង និងលោក សាយ ឈុំ គឺជាការឆ្លុះបញ្ចាំងឲ្យឃើញពីនយោបាយផ្ទៃក្នុងនៅក្នុងបក្សមិនមែនជាប់ពាក់ព័ន្ធក្នុងការបម្រើជាតិនោះឡើយ។
លោកបានលើកឡើងបន្តថា ឪពុករបស់លោកដែលក៏ជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាអតីតនាយករដ្ឋមន្ត្រីមួយរូបដែរនោះ ក៏ដូចជា លោក ប៉ែន នុត អតីតនាយករដ្ឋមន្ត្រី និងលោក ញឹក ជូឡុង អតីតមន្ត្រីរដ្ឋាភិបាលដ៏លេចធ្លោមួយរូបត្រូវបានផ្តល់គោរមងារជា “សម្តេច” បន្ទាប់ពីពួកគាត់បានបម្រើផលប្រយោជន៍សំខាន់ៗដល់រាជបល្ល័ង្ក។
លោក សឺន ស៊ូប៊ែរ្តិ៍ បានមានប្រសាសន៍ថា “វាត្រូវតែមានការទទួលស្គាល់ចំពោះការបម្រើផលប្រយោជន៍ដ៏ឧត្តុងឧត្តមដែលបុគ្គលទាំងបីនាក់នេះបានផ្តល់ចំពោះជាតិ ហើយនៅក្នុងករណីដែលបុគ្គលទាំងបីនាក់េនះស្ថិតនៅក្រោមការគ្រប់គ្រងរបស់សម្តេចឪ នរោត្តម សីហនុ នោះ វាគឺជាការពិតដែលថា ពួកគាត់បានធ្វើរឿងសំខាន់ៗជូនសម្តេចឪ និងជាតិ។ ប៉ុន្តែ នៅពេលនេះមានសម្តេចច្រើនពេកហើយ”។
លោកបានមានប្រសាសន៍បន្ថែមទៀតថា “ពីមុនវាជារឿងកម្រណាស់ដែលពលរដ្ឋស៊ីវិលទទួលបានគោរមងារនេះ។ ប៉ុន្តែ ប្រសិនបើយើងក្រឡេកមើលពេលចប្ចុប្បន្ន នៅក្នុងគណបក្សប្រជាជនកម្ពុជាមាននិន្នាការពីរគឺមួយមានទំនោរទៅរកលោក ជា ស៊ីម និងមួយទៀតមានទំនោរទៅលោក ហ៊ុន សែន ហើយឥឡូវនេះអ្នកដែលមានទំនោរទៅលោក ជា ស៊ីម ទទួលបានគោរមងារជាសម្តេចពីររូបហើយ ហើយលោក ហ៊ុន សែន មានភរិយារបស់លោកដែលមានគោរមងារជាសម្តេច ហេតុដូច្នេះឥឡូវនេះវាគឺពីរទល់នឹងពីរ”៕ស៊ុយឈាង