កាលពីថ្ងៃសុក្រ ក្រសួងការងារនិងបណ្តុះបណ្តាលវិជ្ជាជីវៈបានប្រកាសថា ការចរចាជាផ្លូវការដើម្បីកំណត់ប្រាក់ឈ្នួលអប្បបរមាថ្មីសម្រាប់វិស័យកាត់ដេរ ដែលឥឡូវទទួលបាន១២៨ដុល្លារក្នុងមួយខែ នឹងចាប់ផ្តើមនៅខែកក្កដា ដោយធ្វើឲ្យមានឡើងវិញនូវគម្រោងសម្រាប់ការពិភាក្សាដូចគ្នានេះ ដែលខ្លួនបានប្រើជាមួយសហជីពនិងនិយោជកជាលើកដំបូងកាលពីឆ្នាំមុន។
ក្រសួងនេះបានចាប់ប្រើដំណើរការថ្មីមានជាច្រើនជំហាននៅពាក់កណ្តាលឆ្នាំ២០១៤ ក្រោយពីមានកូដកម្មផ្ទុះឡើងជាបន្តបន្ទាប់ទាក់ទិននឹងប្រាក់ឈ្នួលវិស័យកាត់ដេរ មុនខែធ្នូនិងខែមករា ដែលបានធ្វើឲ្យឧស្សាហកម្មនេះជាប់គាំង និងចប់ទៅវិញដោយមានការបាញ់ស្លាប់កម្មករយ៉ាងហោចណាស់ប្រាំនាក់ ពីសំណាក់កម្លាំងរាជអាវុធហត្ថក្នុងក្រុងភ្នំពេញ។
ក្រសួងសង្ឃឹមថា ដំណោះស្រាយនេះនឹងធ្វើឲ្យប្រាកដថា សហជីពឯករាជ្យដែលនៅពីក្រោយកូដកម្មមិនចេញដើរតាមដងផ្លូវ ហើយធ្វើតាមការចរចា។
សហជីពបានទទួលយកដោយស្ទាក់ស្ទើរ ដែលនៅទីបញ្ចប់ដំណើរការ បានកើតចេញជារូបរាង បើទោះជាពួកគេមួយចំនួនបានចាត់ទុកការថយចុះនៃការតវ៉ា ដោយសារតែការភ័យខ្លាចមានការបាញ់ប្រហារថែមទៀតប៉ុណ្ណោះ។
ក្នុងសេចក្តីប្រកាសព័ត៌មានរបស់ខ្លួនកាលពីថ្ងៃសុក្រ ក្រសួងការងារបាននិយាយថា ដំណើរការនេះនឹងចាប់ផ្តើមនៅខែក្រោយ ជាមួយរដ្ឋាភិបាល រោងចក្រ និង សហជីព ដែលនឹងធ្វើការកំណត់ប្រាក់ឈ្នួលថ្មីក្នុងចំណោមពួកគេ។ ពួកគេនឹងធ្វើការចរចាទ្វេភាគីនៅខែសីហា និងត្រីភាគីនៅខែកញ្ញា។ គណៈកម្មការក្រុមប្រឹក្សាការងារត្រីភាគីបន្ទាប់មកនឹងបើកកិច្ចប្រជុំនៅខែតុលា ក្នុងការសម្រេចប្រាក់ឈ្នួលដើម្បីផ្តល់អនុសាសន៍ទៅក្រសួងការងារ ដោយមតិរួមប្រសិនបើធ្វើទៅបាន បើពុំនោះទេបោះឆ្នោតជាសម្ងាត់។
ប្រាក់ឈ្នួលអប្បបរមាថ្មីដែលក្រសួងសម្រេច នឹងចូលជាធរមាននៅខែមករា។
អំឡុងការចរចាឆ្នាំមុន សមាគមរោងចក្រកាត់ដេរនៅកម្ពុជា ហៅកាត់ថា GMAC បានជំរុញឲ្យមានការដំឡើងប្រាក់ឈ្នួល១០ភាគរយ។
ទោះជាការដំឡើងដែលក្រសួងបានកំណត់ ខ្ពស់ជាងច្រើនក៏ដោយ ក៏លោក កេន លូ អគ្គលេខាធិការ GMAC បាននិយាយថា និយោជកពេញចិត្តនឹងដំណើរការនេះ។
លោកបានមានប្រសាសន៍កាលពីថ្ងៃអាទិត្យថា “យើងគ្មានបញ្ហាជាមួយនឹងដំណើរការនេះទេ។ កាលបរិច្ឆេទល្អ”។
លោកបានមានប្រសាសន៍ថា វាឆាប់ពេកមិនអាចនិយាយថា រោងចក្រអាចស្នើដំឡើងប៉ុន្មាននៅឆ្នាំនេះ ត្បិតអី ការចរចាផ្លូវការមិនទាន់បានចាប់ផ្តើមនៅឡើយ ហើយរោងចក្រនៅកំពុងដោះស្រាយរឿងឡើងប្រាក់ខែចុងក្រោយនេះនៅឡើយ។
GMAC បានព្រមានកាលពីឆ្នាំមុនថា ការដំឡើងប្រាក់ឈ្នួលច្រើននឹងធ្វើប៉ះពាល់ដល់ការនាំចេញខោអាវរបស់ប្រទេសនេះ ដែលមានប្រហែលមួយភាគបីនៃផលិតផលសរុបក្នុងស្រុករបស់ប្រទេសកម្ពុជា។
ប៉ុន្តែការនាំចេញមានសន្ទុះខ្លាំងរហូតដល់ពេលនេះ គឺកើន១១ភាគរយពីមួយឆ្នាំទៅមួយឆ្នាំ ក្នុងត្រីមាសទី១។
ដើម្បីធ្វើការចរចាប្រាក់ឈ្នួលថ្មីឲ្យបានទូលំទូលាយថែមទៀតនោះ ក្រសួងការងារកាលពីឆ្នាំមុនបានបង្កើតក្រុមការងារត្រីភាគីដើម្បីផ្តល់យោបល់ដល់គណៈកម្មការប្រឹក្សាការងារ ដែលរួមមានសហជីពមួយចំនួន ដែលធម្មតាបានដើរចេញពីដំណើរការនេះ។
ប៉ុន្តែសហជីពដែលក្រុមការងារចង់ធ្វើឲ្យស្ងប់ចិត្ត បានតវ៉ាថា សំឡេងរបស់ពួកគេត្រូវបានបំផ្លាញដោយសហជីពមានសម្ពន្ធនឹងរដ្ឋាភិបាលដែលគេដាក់ចូលក្រុមការងារជាមួយពួកគេ។
ក្នុងសេចក្តីប្រកាសព័ត៌មានកាលពីថ្ងៃសុក្រ ក្រសួងការងារបាននិយាយថា ខ្លួនក៏នឹងធ្វើឲ្យក្រុមការងារមានដូចដើមវិញដែរ។
យ៉ាងនេះក្តី លោក ប៉ាវ ស៊ីណា ប្រធានសហព័ន្ធសហជីពចលនាកម្មករ បានមានប្រសាសន៍ថា លោកនឹងមិនចូលរួមជាមួយក្រុមនេះវិញទេ លុះត្រាតែក្រសួងអញ្ជើញសុទ្ធតែសហជីពឯករាជ្យ។
លោកបានមានប្រសាសន៍ថា “យើងនឹងឃើញ ថាតើក្រសួងប្តូរដំណើរការនេះឬទេ។ បើដំណើរការនេះនៅដដែល យើងនឹងមិនចូលរួមទេ”។
អ្នកនាំពាក្យក្រសួងការងារមិនអាចទាក់ទងសុំការអត្ថាធិប្បាយបានទេ៕ និត (រាយការណ៍បន្ថែមដោយ Zsombor Peter)