រដ្ឋមន្ត្រីក្រសួងការងារបានមានប្រសាសន៍កាលពីម្សិលមិញថា មានករណីកម្មករអនីតិជនតិចតួចណាស់នៅក្នុងឧស្សាហកម្មកាត់ដេរ ដែល “យើងអាចរាប់ពួកគេដោយម្រាមដៃបាន” ប៉ុន្តែមន្ត្រីសហជីពមួយរូប និងអង្គការមិនមែនរដ្ឋាភិបាលមួយបានតបទៅវិញថា ពលកម្មកុមារនៅតែមានច្រើននៅតាមរោងចក្រកាត់ដេរតូចៗក្នុងប្រទេស។
ថ្លែងទៅកាន់ក្រុមអ្នកយកព័ត៌មានបន្ទាប់ពីសន្និសីទស្ដីពីទំនាក់ទំនងវិជ្ជាជីវៈដែលរៀបចំឡើងនៅសណ្ឋាគារអាំងទែកុងទីណង់តាល់ក្នុងរាជធានីភ្នំពេញ លោក អុិត សំហេង រដ្ឋមន្ត្រីក្រសួងការងារបានទទួលស្គាល់ថា ពលកម្មកុមារគឺជាបញ្ហានៅក្នុងវិស័យកសិកម្ម និងឧស្សាហកម្មនេសាទ ប៉ុន្តែបានអះអាងថា រដ្ឋាភិបាលជិតលុបបំបាត់ការអនុវត្តខុសច្បាប់នៅតាមរោងចក្រកាត់ដេរបានហើយ។
លោកបានបញ្ជាក់ថា “តាមការរកឃើញថា មានករណីតិចតួចប៉ុណ្ណោះ ហើយយើងអាចរាប់ពួកគេដោយម្រាមដៃបាន។ មានត្រឹមតែ៤ទៅ១០ករណីប៉ុណ្ណោះ”។ លោកបានមានប្រសាសន៍បន្ថែមទៀតថា ភាគច្រើននៃករណីទាំងនេះគឺកម្មករអនីតិជននិយាយកុហកអំពីអាយុរបស់ខ្លួនដើម្បីទទួលបានការងារធ្វើ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ដែលជាសហជីពកម្មករកាត់ដេរឯករាជ្យដ៏ធំបំផុតនៅក្នុងប្រទេស បានមានប្រសាសន៍ថា ដោយសារតែរោងចក្រធំៗត្រូវបានត្រួតពិនិត្យយ៉ាងយកចិត្តទុកដាក់ពីសំណាក់រដ្ឋាភិបាល និងអង្គការពលកម្មអន្តរជាតិ ILO ធ្វើឲ្យរោងចក្រទាំងនោះពិបាកនឹងទទួលយកកម្មករអនីតិជនឲ្យចូលធ្វើការ។
ទោះជាយ៉ាងណា លោកបានមានប្រសាសន៍ថា រោងចក្រធំៗជាច្រើនបានម៉ៅការបន្តឲ្យទៅរោងចក្រតូចៗដែលគ្មានការត្រួតពិនិត្យត្រឹមត្រូវ។ លោកបានគូសបញ្ជាក់ថា “រោងចក្រតូចៗមានករណីរាប់រយ [នៃពលកម្មកុមារ] ដោយសារតែអធិការកិច្ចរបស់រដ្ឋាភិបាលខ្សោយ។ មានការអនុវត្តច្បាប់ខ្សោយ ដូច្នេះហើយនៅពេលពួកគេចុះទៅធ្វើអធិការកិច្ចតាមរោងចក្រ រោងចក្របានដឹងមុនបាត់ទៅហើយ”។ លោកបានប៉ាន់ប្រមាណថា មានរោងចក្រចន្លោះពី៣០ទៅ៤០ដែលមានពលកម្មកុមារ។
លោក មឿន តុលា ប្រធានកម្មវិធីការងារនៃមជ្ឈមណ្ឌលអប់រំច្បាប់សម្រាប់សហគមន៍ បានមានប្រសាសន៍ថា គ្មានការចាត់វិធានការឲ្យបានគ្រប់គ្រាន់ដើម្បីទប់ស្កាត់រោងចក្រមិនឲ្យទទួលយកកម្មករអនីតិជនដែលប្រើឯកសារក្លែងក្លាយចូលធ្វើការនោះទេ។
លោកបានមានប្រសាសន៍ទៀតថា “កម្មករក្លែងឯកសាររបស់ខ្លួនដើម្បីបានការងារធ្វើ។ រោងចក្រដឹងថា កម្មករទាំងនោះជាអនីតិជន ប៉ុន្តែរោងចក្រធ្វើពុតជាមិនដឹង ពីព្រោះពួកគេមិនចង់ទទួលខុសត្រូវ។ ចាំបាច់ត្រូវមានការស៊ើបអង្កេតស៊ីជម្រៅ និងមានតម្លាភាពលើបញ្ហានេះ”៕ សុខុម (រាយការណ៍បន្ថែមដោយ Chris Mueller)