មន្ត្រីរៀបចំពិធីបុណ្យម្នាក់បានឲ្យដឹងកាលពីម្សិលមិញថា មនុស្សជាង៣០.០០០នាក់រំពឹងថា នឹងចូលរួមពិធីដង្ហែសពលោក ជា ស៊ីម ប្រធានគណបក្សប្រជាជនកម្ពុជាក្នុងរាជធានីភ្នំពេញនៅថ្ងៃសុក្រ ដោយមានការពង្រឹងសន្តិសុខតឹងរ៉ឹងនៅក្នុងរាជធានី។
លោក ជា ស៊ីម ដែលជាអនុប្រធានរណសិរ្សគាំទ្រដោយវៀតណាម ដែលបានផ្ដួលរំលំរបប ប៉ុល ពត ក្នុងឆ្នាំ១៩៧៩ និងជាឥស្សរជនដ៏សំខាន់ម្នាក់ក្នុងនយោបាយកម្ពុជាក្នុងទសវត្សរ៍ឆ្នាំ១៩៨០ និង១៩៩០ បានស្លាប់កាលពីថ្ងៃទី៨ ខែមិថុនា ក្នុងអាយុ៨២ឆ្នាំ។
រដ្ឋាភិបាលបានសម្រេចយកថ្ងៃសុក្រជាថ្ងៃកាន់ទុក្ខផ្លូវការដល់សពប្រធានគណបក្សរូបនេះ ដោយមានការបង្ហូតទង់ជាតិមួយភាគបីចាប់ពីខាងលើចុះមក ហើយគ្រប់ស្ថានីយទូរទស្សន៍ទាំងអស់ត្រូវផ្អាកការផ្សាយកម្មវិធីកម្សាន្ត ដើម្បីគោរពដល់ពិធីដង្ហែសពតាមការគ្រោងទុក។
លោក ឈិន កេតនា ប្រធានគណៈកម្មាធិការរៀបចំបុណ្យជាតិ និងអន្តរជាតិ បានមានប្រសាសន៍ថា ក្រុមមនុស្សជាច្រើនរួមមានព្រះសង្ឃ ក្រុមកាយឫទ្ធិ ដូនជី និងមន្ត្រីរាជការ នឹងចូលរួមក្នុងពិធីនោះដើម្បីគោរពវិញ្ញាណក្ខន្ធសពលោក ជា ស៊ីម។
លោក កេតនា បានមានប្រសាសន៍ថា “យើងរំពឹងថា នឹងមានមនុស្សចូលរួម៣០.០០០នាក់ រួមមានសិស្សានុសិស្ស និងមន្ត្រីរាជការ ដែលនឹងឈរនៅតាមដងផ្លូវ។ អាចមានអ្នកចូលរួមច្រើនជាងនេះ ពីព្រោះនឹងមានមនុស្ស៣៧ក្រុមផ្សេងទៀតចូលរួមក្នុងពិធីដង្ហែសពនោះដែរ”។
លោក ឡុង ឌីម៉ង់ អ្នកនាំពាក្យសាលារាជធានីបានមានប្រសាសន៍ថា មេដឹកនាំរដ្ឋាភិបាលជាន់ខ្ពស់ជាច្រើនរូបក៏នឹងចូលរួមពិធីនោះដែរ។
លោក ឡុង ឌីម៉ង់ បានមានប្រសាសន៍ថា “នឹងមានពិធីដង្ហែ និងពិធីបូជាសពនៅមុខវត្តបទុម ដោយមានការយាងចូលរួមពីសំណាក់ព្រះមហាក្សត្រ មេដឹកនាំរដ្ឋាភិបាលជាន់ខ្ពស់ គណៈប្រតិភូបរទេស និងប្រជាជនចំនួន៣០.០០០នាក់”។
លោកបានបន្ថែមថា សន្តិសុខនៅតាមដងផ្លូវនានាក្នុងរាជធានីភ្នំពេញអំឡុងពិធីដង្ហែ និងបូជាសពនឹងត្រូវបានរឹតបន្តឹង ដោយសារមានវត្តមានមន្ត្រីរដ្ឋាភិបាល និងអ្នកការទូតជាច្រើន ហើយថា ក្រុមទាហានក៏នឹងចូលរួមក្នុងពិធីដង្ហែសពនោះដែរ។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានមានប្រសាសន៍ថា មន្ត្រីមកពីកងកម្លាំងរបស់លោកនឹងត្រូវដាក់ពង្រាយនៅជុំវិញសួនមុខវត្តបទុមនៅថ្ងៃនេះ ដើម្បីត្រៀមសម្រាប់ពិធីដង្ហែ និងបូជាសពនៅថ្ងៃសុក្រ។
លោកបានមានប្រសាសន៍ថា “យើងបានរៀបចំកម្លាំងសម្រាប់ពិធីនោះពីថ្ងៃទី១៨ ដល់ថ្ងៃទី២០។ យើងបានដាក់កម្លាំងឈរជើងនៅតាមគោលដៅ និងត្រៀមអន្តរាគមន៍ផ្ទាល់ក្នុងករណីមានបញ្ហាណាមួយកើតឡើង”។
យោងតាមសាលារាជធានីបានឲ្យដឹងថា ពិធីដង្ហែសពនៅថ្ងៃសុក្រនឹងចាប់ផ្ដើមនៅម៉ោង៦ព្រឹកតាមផ្លូវលេខ៤៦២ និងធ្វើដំណើរតាមបណ្ដោយផ្លូវមួយចំនួន រួមមានមហាវិថីព្រះនរោត្តម និងវិថីសុធារស មុនពេលមកដល់ខាងមុខវត្តបទុម ដើម្បីរៀបចំពិធីបូជានៅវេលាថ្ងៃត្រង់។
សារាចរណែនាំដែលចេញដោយលោកនាយករដ្ឋមន្ត្រី ហ៊ុន សែន កាលពីថ្ងៃអង្គារអនុញ្ញាតឲ្យមន្ត្រីរាជការ និងសមាជិកកងកម្លាំងប្រដាប់អាវុធទាំងអស់ឈប់សម្រាកមួយថ្ងៃដើម្បីឲ្យពួកគេមានឱកាសចូលរួមគោរពវិញ្ញាណក្ខន្ធសពលោក ជា ស៊ីម៕ សារុន