លោក អ៊ុំ សំអាន សមាជិកសភាគណបក្សប្រឆាំងកាលពីថ្ងៃសៅរ៍ បានដឹកនាំសកម្មជនអ្នកជាតិនិយមប្រហែល២០០នាក់ចុះទៅពិនិត្យមើលដីដែលមិនទាន់បោះបង្គោលព្រំដែនស្ថិតនៅតាមបណ្ដោយព្រំដែនខេត្តកណ្ដាលដែលមានវិវាទជាមួយប្រទេសវៀតណាម ដែលរដ្ឋាភិបាលវៀតណាមកំពុងសាងសង់ប៉ុស្តិ៍យោធា។
កាលពីថ្ងៃព្រហស្បតិ៍ ក្រសួងការបរទេសបានផ្ញើកំណត់ទូតទៅរដ្ឋាភិបាលវៀតណាម ដោយរំឭកអំពីកំណត់ទូតដែលខ្លួនបានផ្ញើកាលពីខែមេសា ដែលបានចោទប្រកាន់ប្រទេសវៀតណាមពីបទសាងសង់ប៉ុស្តិ៍យោធាដោយខុសច្បាប់នៅលើដីស្ថិតក្នុងស្រុកកោះធំ ជា “តំបន់ស” ដែលគេមិនអាចប្រើប្រាស់បានដែលអះអាងសិទ្ធិកាន់កាប់ដោយរដ្ឋាភិបាលនៃប្រទេសទាំងពីរ។
លោក អ៊ុំ សំអាន ដែលបានដឹកនាំយុទ្ធនាការកាលពីពេលថ្មីៗរបស់គណបក្សសង្គ្រោះជាតិដើម្បីបង្ហាញពីការរំលោភបំពានទឹកដីកម្ពុជាពីសំណាក់វៀតណាមនោះបានមានប្រសាសន៍ថា ដំបូងឡើយកាលពីថ្ងៃសៅរ៍អាជ្ញាធរបានរារាំងក្រុមរបស់លោកមិនឲ្យចូលទៅតំបន់នោះចំពេលដែលមានវិវាទឡើយ។
ដោយប្រើពាក្យសម្ដីបែបប្រមាថដល់ជនជាតិវៀតណាមនោះ លោក អ៊ុំ សំអាន បានមានប្រសាសន៍ថា “អាជ្ញាធរមូលដ្ឋានបានរារាំងយើងមិនឲ្យចុះទៅឃើញប៉ុស្តិ៍យោធាយួនទេ ប៉ុន្តែមនុស្សម្នាបានជម្នះឆ្លងកាត់របាំងបិទផ្លូវចំនួនបីមុនពេលទៅដល់របាំងបិទផ្លូវទី៤”។
លោកបានមានប្រសាសន៍ថា “យើងបានឃើញទាហាននិងនគរបាលព្រំដែនកម្ពុជាប្រហែល៥០នាក់ប្រដាប់ដោយខែល និងដំបងឆក់ ត្រូវបានដាក់ពង្រាយនៅតាមកន្លែងនីមួយៗ ហើយចំនួននេះបានកើនឡើងដល់ប្រហែល១០០នាក់ ដោយបិទផ្លូវនៅពេលពួកគាត់ព្យាយាមឆ្លងកាត់របាំងបិទផ្លូវទី៤ ដើម្បីទៅមើលប៉ុស្ដិ៍យោធាយួននោះ”។
ប៉ុន្តែលោកបានមានប្រសាសន៍ថា ទីបំផុតមនុស្សមួយក្រុមតូចត្រូវបានអនុញ្ញាតឲ្យចូល ហើយបានឃើញនូវអ្វីដែលលោកលើកឡើងថា ជាការរំលោភបំពានទឹកដីមែន។
លោក អ៊ុំ សំអាន បានមានប្រសាសន៍ថា “អាជ្ញាធរបានអនុញ្ញាតឲ្យពួកយើងជាង១០នាក់ចូលទៅដល់ប៉ុស្តិ៍យោធាយួននោះ ហើយយើងបានឃើញអគារនេះស្ថិតក្នុងទឹកដីកម្ពុជាចម្ងាយប្រហែល៣០០ម៉ែត្រពីព្រំដែន”។
លោក ម៉ៅ ភិរុណ អភិបាលខេត្តកណ្ដាលបានមានប្រសាសន៍ថា អាជ្ញាធរបានធ្វើការងាររបស់ខ្លួនក្នុងការគ្រប់គ្រងក្នុងការចុះទៅពិនិត្យមើលតំបន់សនោះ។
លោកបានមានប្រសាសន៍ថា “យើងមិនបានអនុញ្ញាតឲ្យអ្នកទាំងអស់នេះទៅដល់តំបន់សទេ ពីព្រោះពួកគេចង់បង្កបញ្ហាជាមួយភាគីវៀតណាម ដូច្នេះនេះជាមូលហេតុដែលយើងបានអនុញ្ញាតឲ្យតំណាងមួយចំនួនចូលទៅទីនោះតែប៉ុណ្ណោះ”។
លោកបានបន្ថែមថា “យើងបារម្ភថា វានឹងមានគ្រោះថ្នាក់ដល់ពួកគាត់ ពីព្រោះពួកគាត់និយាយដោយកំហឹងនៅក្នុងតំបន់ហាមឃាត់នោះ”។
លោក ភិរុណ ក៏បានបដិសេធការអះអាងរបស់លោក សំអាន ដែលថា ប៉ុស្តិ៍យោធាវៀតណាមកំពុងត្រូវបានសាងសង់ក្នុងទឹកដីកម្ពុជា ដោយលើកឡើងថា ច្បាស់ណាស់វាស្ថិតក្នុង “តំបន់ស” ដែលទុកដោយឡែកសម្រាប់ការចរចាដើម្បីកំណត់ព្រំដែននៅពេលអនាគត”។
លោកបានមានប្រសាសន៍ឡើងវិញថា ប្រទេសវៀតណាមត្រូវបានស្នើសុំឲ្យផ្អាកការសាងសង់ ប៉ុន្តែលោកបានទទួលស្គាល់ថា ការអំពាវនាវនេះត្រូវបានគេមិនអើពើឡើយ។ លោកបានមានប្រសាសន៍ថា “យើងស្នើឲ្យវៀតណាមផ្អាកការសាងសង់បណ្ដោះអាសន្ន ហើយរង់ចាំការពិភាក្សាថ្នាក់ជាតិរវាងប្រទេសទាំងពីរសិន ប៉ុន្តែពួកគេមិនស្ដាប់ឡើយ”។
រឿងដាច់ដោយឡែកមួយទៀត លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីកាលពីម្សិលមិញបានអំពាវនាវឲ្យអ្នកយកព័ត៌មានក្នុងស្រុកទៅកាន់ភោជនីយដ្ឋានមួយក្នុងរាជធានីភ្នំពេញ ដើម្បីការពារសកម្មភាពរបស់អាជ្ញាធរខេត្តកណ្ដាល ដោយលើកឡើងថា វាជាការចាំបាច់ណាស់ក្នុងការបញ្ចៀសភាពជាសត្រូវជុំវិញបញ្ហារសើបនេះ រហូតដល់ការកំណត់ព្រំដែនត្រូវបានធ្វើចប់សព្វគ្រប់សិន។
លោក ផៃ ស៊ីផាន បានមានប្រសាសន៍ថា “ខ្ញុំសូមថ្លែងអំណរគុណនគរបាលខ្មែររបស់យើងចំពោះការមិនអនុញ្ញាតឲ្យពលរដ្ឋខ្មែរទាំងនោះចូលក្នុងទឹកដីវៀតណាម ពីព្រោះវៀតណាមនឹងចាប់ខ្លួនពួកគាត់ ហើយពួកគេនឹងចោទប្រកាន់ពួកគាត់ពីបទឆ្លងព្រំដែនដោយខុសច្បាប់”។
អ្នកនាំពាក្យរូបនេះបានបន្ថែមថា ”យើងមិនអាចប្រើប្រាស់កម្លាំងយោធាទៅធ្វើសង្គ្រាមជាមួយវៀតណាមជុំវិញបញ្ហាព្រំដែនបានទេ ពីព្រោះប្រទេសរបស់យើងបានបរាជ័យពីរលើករួចមកហើយ[ក្នុងការធ្វើបែបនេះ] អំឡុងរបប លន់ នល់ និងរបប ប៉ុល ពត”៕ សារុន