29 C
Phnom Penh

ទារិកាម្នាក់​ក្នុង​ខណ្ឌជ្រោយ​ចង្វា​ខក់​ស្លាប់ ដោយត្រូវ​​ត្រី​ចូលក្នុង​មាត់​

ដោយ ឌឹ ខេមបូឌា ដេលី

បទវិភាគ

នគរ​បាល​ និង​សាច់​ញាតិ​បាន​និយាយ​កាលពី​ម្សិលមិញ​ថា បន្ទាប់ពី​ត្រូវគ្លីនិក​បី​មិន​ទទួល​ព្យាបាល​កាលពី​ថ្ងៃ​ព្រហស្បតិ៍​ ទារិកា​ម្នាក់​ក្នុង​ខណ្ឌ​ជ្រោយចង្វា​ រាជធានី​ភ្នំពេញ​បាន​ខក់​រហូត​ដល់​ស្លាប់​ដោយ​ត្រី​តូច​មួយក្បាល​​លោត​​ចូល​​​ក្នុង​មាត់​របស់​នាង​​ដោយ​ចៃដន្យ​។

លោក​ ឃួន ឈាង នាយប៉ុស្តិ៍​សង្កាត់​បានមាន​ប្រសាសន៍​ថា ហេតុការណ៍​នេះ​បាន​កើត​ឡើង​នៅ​ក្នុង​សង្កាត់​ព្រែកតាសេក ខណ្ឌជ្រោយចង្វា ខណៈ​ម្ដាយ​មីង​របស់​ទារិកា ខន ស្រីកា អាយុ​៧ខែ បានយកត្រី​ទៅ​​​លេង​ជាមួយ​​នាង​​ ដោយ​បាន​ព្យាយាម​ឲ្យ​នាង​លៀន​អណ្ដាត​មក​ក្រៅ​។

លោក ឃួន ឈាង បាន​មាន​ប្រសាសន៍​ថា “​ទារិកា​តូច​នេះ​គួរ​ឲ្យ​ស្រឡាញ់ ហើយ​មនុស្ស​ម្នា​ចូល​ចិត្ត​លេង​ជាមួយ​នាង​ណាស់ ហើយ​នាង​ចូល​ចិត្ត​លៀន​អណ្ដាត​មក​ក្រៅ​។ នៅ​ថ្ងៃ​ដែល​មាន​គ្រោះ​ថ្នាក់​នោះ ម្ដាយ​មីង​របស់​នាង​បាន​យក​ត្រី​អណ្ដាត​​ឆ្កែ​​ទៅ​លេង​ជាមួយ​នាង”។

លោក​បាន​មាន​ប្រសាសន៍​ថា ពេល​នោះ​ត្រី​បាន​លោត​ចេញ​ពី​ដៃ​របស់​ម្ដាយ​មីង ហើយ​ចូល​ក្នុង​មាត់​របស់​ទារិកា​នោះ​មុន​ពេល​​រុល​ចូល​ក្នុង​បំពង់ក​។

លោក​ ឃួន ឈាង បាន​បន្ថែម​ថា មុន​ពេល​ទារិកា​​នេះ​ស្លាប់​នៅ​មន្ទីរ​ពេទ្យ​គន្ធបុប្ផា​ ក្រុម​គ្រួសារ​នាង​បាន​យក​នាង​ទៅ​គ្លីនិកចំនួន​​បី​ក្នុង​មូលដ្ឋាន ប៉ុន្តែ​គ្លីនិកទាំងនោះ​​និយាយ​ថា ពួកគេ​​មិន​មាន​​ឧបករណ៍​គ្រប់គ្រាន់​ដើម្បី​ព្យាបាល​នាង​ទេ។

លោក​បាន​មាន​ប្រសាសន៍​ថា “​នាង​មិនត្រូវ​បាន​ទទួលព្យាបាលទេ ពីព្រោះ​ពួកគេ​និយាយ​ថា ពួកគេ​មិ​ន​មាន​សមត្ថភាព​ជួយ​ទារិកា​រូប​នេះ​ទេ ពីព្រោះ​គេ​មិន​មាន​ឯកទេស​ឡើយ​ និង​មិន​មាន​ឧបករណ៍​គ្រប់​គ្រាន់ ហើយ​​ស្ថានភាព​របស់​នាង​ធ្ងន់​ធ្ងរ​ណាស់​”។

​អ្នកស្រី ជា សុផេន ជា​ម្ដាយ​មីង​ដែល​បាន​លេង​ជាមួយ​ទារិកា​ ខន ស្រីកា បាន​និយាយ​ថា គាត់​បាន​សម្រេច​យក​ត្រី​នេះ​​ទៅ​​លេង​ ពីព្រោះ​​វា​នៅ​ក្បែរ​នោះ​។

អ្នកស្រី សុផេន បាន​និយាយ​ថា “​ក្មេងស្រីម្នាក់​បាន​យក​ត្រី​ដែល​គាត់​បាន​ឃើញនោះទៅ​ដាក់​​នៅ​លើ​គ្រែ​ ហើយ​បន្ទាប់​មក​ខ្ញុំ​បាន​យក​ត្រី​នោះ​ទៅ​លេង​ជាមួយ​ក្មួយ​ស្រី​របស់​ខ្ញុំ​។ ជា​អកុសល​ ត្រី​នោះ​បាន​លោត​ពី​ដៃ​របស់​ខ្ញុំ​ ហើយ​ចូល​ក្នុង​មាត់​របស់នាងតែម្តង​”។

អ្នកស្រី​បាន​បន្ថែម​ថា “​ភ្លាមៗ​នោះ​នាង​បាន​ស្រែក​យំ​យ៉ាង​ខ្លាំង​ ហើយ​បន្ទាប់​មក​ឪពុក​ម្ដាយ​របស់​នាង និង​អ្នក​ជិត​ខាង​បាន​មក​ជួយ​ ហើយព្យាយាម​យក​ត្រី​ចេញពី​មាត់របស់​នាង ប៉ុន្តែ​ត្រី​បាន​បន្ត​រុល​ចូល​ខាង​ក្នុង​”។

មុន​ពេលត្រូវ​បាន​សាក​សួរ​បន្ថែម អ្នកស្រី សុផេន ​បាន​ហុច​ទូរស័ព្ទ​ទៅ​បងប្អូនស្រី​របស់​គា​ត់​​ឈ្មោះ ជា សាអែម។ អ្នកស្រី សាអែម បាន​និយាយ​ថា ម្ដាយ​របស់​ទារិកា​រងគ្រោះ​ និង​បងប្អូន​ស្រី​ផ្សេងទៀត​មិន​មាន​​គម្រោង​ធ្វើ​ការ​ចោទ​ប្រកាន់​ឡើយ​។ អ្នកស្រី​បាន​និយាយ​ថា “​វាបាន​​កើត​ឡើង​ដោយ​ចៃ​ដន្យ​”៕ សារុន​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស