30 C
Phnom Penh

ទីស្តីការ​គណៈ​រដ្ឋមន្ត្រី​ការពារ​សេចក្តី​បង្គាប់​ស៊ើប​អង្កេត​អំពើ​ពុក​រលួយ​របស់​រដ្ឋាភិបាល

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃ​ច័ន្ទ ទីស្តីការ​គណៈ​រដ្ឋមន្ត្រី​បាន​ធ្វើ​សន្និសីទ​កាសែត​ការពារ​សេចក្តី​ជូន​ដំណឹង​មួយ​ដែល​ផ្សព្វផ្សាយ​នៅ​ខែ​នេះ ប្រាប់​មន្ត្រី​រដ្ឋាភិបាល​ឲ្យ​សុំ​ការ​អនុញ្ញាត​ពី​ថ្នាក់​លើ​របស់​ខ្លួន មុន​ពេល​ផ្តល់​ព័ត៌មាន​ទៅ​សមាជិក​សភា​ដែល​ស៊ើប​អង្កេត​រឿង​ពុក​រលួយ។

សេចក្តី​បង្គាប់​នេះ​រង​ការ​រិះគន់​ពី​សំណាក់​តំណាង​រាស្ត្រ​បក្ស​ប្រឆាំង ក្នុង​នោះ​មាន​លោក សុន ឆ័យ ប្រធាន​ក្រុម​អ្នក​តំណាង​រាស្ត្រ​គណបក្ស​សង្គ្រោះ​ជាតិ ដែល​កាសែត​ក្នុង​ស្រុក​បាន​ដក​ស្រង់​សម្តី​ដែល​និយាយ​ថា វា​រំលោភ​មាត្រា​៩៦​នៃ​រដ្ឋធម្មនុញ្ញ ដែល​និយាយ​ពី​សិទ្ធិ​របស់​តំណាង​រាស្ត្រ​ក្នុង​ការ​ស្នើ​សុំ​ព័ត៌មាន​ពី​ស្ថាប័ន​រដ្ឋាភិបាល។

ប៉ុន្តែ លោក តឹក រ៉េតសំរេច រដ្ឋលេខាធិការ​ទីស្តីការ​គណៈ​រដ្ឋមន្ត្រី ដែល​បាន​ចេញ​សេចក្តី​ជូន​ដំណឹង​នេះ​កាលពី​ថ្ងៃ​ទី​៥​ខែ​មិថុនា និង​បាន​ធ្វើ​សន្និសីទ​កាសែត​កាលពី​ថ្ងៃ​ច័ន្ទ បាន​មាន​ប្រសាសន៍​ថា សេចក្តី​ណែនាំ​ដែល​លោក​បាន​ដាក់​ចេញ គឺ​ស្រប​តាម​ទាំង​ច្បាប់​រដ្ឋធម្មនុញ្ញ ទាំង​ច្បាប់​ប្រឆាំង​អំពើ​ពុក​រលួយ។

លោក រ៉េតសំរេច បាន​មាន​ប្រសាសន៍​ថា សេចក្តី​ជូន​ដំណឹង​នេះ​មាន​បំណង​ជូន​ដំណឹង​ដល់​មន្ត្រី​រាជការ​នូវ​របៀប​ឆ្លើយតប​ទៅ​នឹង​ការ​សាកសួរ​ព័ត៌មាន​សភា ដែល​កាន់តែ​ក្លាយ​ជា​រឿង​ធម្មតា​ទៅ​ហើយ ចាប់តាំង​ពី​គណបក្ស​សង្គ្រោះ​ជាតិ​បាន​បញ្ចប់​ការ​ធ្វើ​ពហិការ​មិន​ចូល​សភា​កាលពី​ឆ្នាំ​មុន មួយ​ផ្នែក​ជា​ថ្នូរ​នឹង​ការ​គ្រប់គ្រង​គណៈកម្មការ​សភា​ចំនួន​ប្រាំ ក្នុង​នោះ​មាន​គណៈ​កម្មការ​ប្រឆាំង​អំពើ​ពុក​រលួយ​ដែល​ទើប​បង្កើត​ថ្មី​ផង​ដែរ។

លោក​បាន​និយាយ​ថា “យើង​គួរ​មាន​គោលការណ៍​ណែនាំ​ច្បាប់​សម្រាប់​មន្ត្រី​ថ្នាក់​ក្រោម ពីព្រោះ​ពីមុន​យើង​មិន​ដែល​មាន​តំណាង​រាស្ត្រ​មក​មើល​ស្ថាប័ន​មួយ​ចំនួន​អំពី​សកម្មភាព​មន្ត្រី​ថ្នាក់​ក្រោម​ទេ។ នេះ​ជា​លើក​ដំបូង​ហើយ”។

លោក​បាន​បន្ថែម​ថា “គោលការណ៍​ណែនាំ​នេះ​ទើប​បង្កើត​ឡើង​ដើម្បី​ណែនាំ​មន្ត្រី​រដ្ឋាភិបាល ធានា​ថា មន្ត្រី​ថ្នាក់​ក្រោម​យល់​និង​មាន​ព័ត៌មាន​គ្រប់គ្រាន់​មុន​ពេល​ឆ្លើយ ឬ​ពួកគេ​អាច​សុំ​យោបល់​ពី​ថ្នាក់​លើ ដើម្បី​ប្រមូល​ព័ត៌មាន​គ្រប់គ្រាន់​ឆ្លើយ​តប​ទៅ​តំណាង​រាស្ត្រ”។

“ខ្ញុំ​សូម​បញ្ជាក់​ថា ឯក​ឧត្តម សុន ឆ័យ ជា​តំណាង​រាស្ត្រ​ម្នាក់ ប៉ុន្តែ​គាត់​មិន​យល់​ន័យ​ក្នុង​មាត្រា​៩៦​នៃ​រដ្ឋធម្មនុញ្ញ”។

ការ​ណែនាំ​នៅ​ថ្ងៃ​ទី​៥​ខែ​មិថុនា​ប្រាប់​មន្ត្រី​រាជការ​ឲ្យ​សុំ​ការ​អនុញ្ញាត​ពី​ថ្នាក់​លើ​របស់​ខ្លួន មុន​ពេល​ឆ្លើយតប​ទៅ​នឹង​តំណាង​រាស្ត្រ​ដែល​ស៊ើប​អង្កេត​ការ​ចោទ​ប្រកាន់​រឿង​ពុក​រលួយ និង​ប្រាប់​មន្ត្រី​រាជការ​ស៊ីវិល​ឲ្យ​ប្រកាន់​ខ្ជាប់​មាត្រា​២២​នៃ​ច្បាប់​ប្រឆាំង​អំពើ​ពុក​រលួយ ដែល​ផ្តល់​អំណាច​ឲ្យ​អង្គភាព​ប្រឆាំង​អំពើ​ពុក​រលួយ​ទាក់ទិន​នឹង​ការ​ស៊ើប​អង្កេត​អំពើ​ពុក​រលួយ។

ទាក់ទង​កាលពី​ថ្ងៃ​ច័ន្ទ លោក ឆ័យ បាន​មាន​ប្រសាសន៍​ថា ទីស្តីការ​គណៈ​រដ្ឋមន្ត្រី ដែល​ដឹកនាំ​ដោយ​ឧប​នាយក​រដ្ឋមន្ត្រី សុខ អាន មិន​បាន​គោរព​សភា​ ដោយ​ចេញ​សេចក្តី​ជូន​ដំណឹង​របស់​ខ្លួន ហើយ​បន្ទាប់​មក​ធ្វើ​សន្និសីទ​កាសែត​ទៀត។

លោក​បាន​មាន​ប្រសាសន៍​ថា “យើង​ទាមទារ​ឲ្យ​ទីស្តីការ​គណៈ​រដ្ឋមន្ត្រី​សុំ​ទោស ពីព្រោះ​ពួកគេ​បាន​ប្រើ​ពាក្យ​ដែល​មើល​ងាយ​សភា”។

“ប្រសិនបើ​ទីស្តីការ​គណៈ​រដ្ឋមន្ត្រី​មិន​ព្រម​សុំ​អភ័យ​ទោស យើង​នឹង​កោះ​ហៅ​លោក សុខ អាន មក​ផ្តល់​ការ​ពន្យល់​នៅ​សភា​ជាតិ”៕ និត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស