30 C
Phnom Penh

កម្មករ​​វៀតណាម​ខុស​ច្បាប់​​​រាប់​រយ​នាក់​ត្រូវ​បាន​ឃាត់​ខ្លួន​​ អំឡុង​ប្រតិបត្តិ​ការ​​ឆែកឆេរ​នៅ​ការដ្ឋាន​កោះ​ពេជ្រ​​​

ដោយ ឌឹ ខេមបូឌា ដេលី

បទវិភាគ

ប៉ូលិស​ឲ្យ​កម្មករ​ចំណាកស្រុក​ខុសច្បាប់​តម្រង់​ជួរ​ កាលពីថ្ងៃ​អង្គារ​ នៅ​កោះ​ពេជ្រក្រុង​ភ្នំពេញ។​ រូបថតៈ ស៊ីវ ចាន់ណា​/The Cambodia Daily

កាលពី​ម្សិលមិញ​កម្មករ​វៀតណាម​ជិត​១០០​នាក់​​ត្រូវ​បាន​ឃាត់​ខ្លួន​​ដើម្បី​បណ្ដេញ​ទៅ​ប្រទេស​របស់ពួកគេ​វិញ បន្ទាប់ពី​រកឃើញ​ថា​​ពួកគេ​​កំពុង​ធ្វើ​ការ​​នៅ​​ក្នុង​ប្រទេស​កម្ពុជា​ដោយ​ខុស​ច្បាប់​ អំឡុង​អំឡុង​ប្រតិបត្តិការ​​ចុះ​ឆែកឆេរ​​ការដ្ឋាន​សំណង់​​នានា​នៅ​លើ​កោះពេជ្រ​ ក្នុង​រាជធានី​ភ្នំពេញ ដែល​ជា​ផ្នែក​មួយ​នៃ​ការ​អនុវត្ត​ច្បាប់​អន្តោប្រវេសន៍​តាម​អំពើ​ចិត្ត​​​ពី​សំណាក់​ក្រសួង​មហាផ្ទៃ។

ដឹកនាំ​ដោយ​ឧត្ដម​សេនីយ៍​​ទោ អ៊ុក ហៃសិលា ប្រធាន​ផ្នែក​ស៊ើបអង្កេត​ និង​​អនុវត្ត​​ន៍​នីតិវិធី​នៃ​អគ្គនាយកដ្ឋាន​អន្តោប្រវេសន៍​​​នៃ​ក្រសួង​មហាផ្ទៃ​ នគរ​បាល​ជាង​៤០​នាក់​​បាន​​ចុះ​ឆែក​ឆេរ​ការដ្ឋាន​នានា​នៅ​លើ​កោះពេជ្រ​ ដោយ​ធ្វើ​ការ​ឃាត់​ខ្លួន​​​កម្មករ​វៀតណាម​រហូត​ដល់​ទៅ​១៣១​នាក់ និងកម្មករ​ចិន​ចំនួន​៨៥​នាក់ មុន​ពេល​ត្រួត​ពិនិត្យ​​​ឯកសារ​របស់​ពួកគេ។

ការ​ពិនិត្យ​​ឯកសារ​បង្ហាញ​ថា កម្មករ​ចិន​ទាំង​៨៥​នាក់​សុទ្ធតែ​មាន​លិខិត​ឆ្លង​ដែន​ស្រប​ច្បាប់​ និង​មាន​ទិដ្ឋាការ​អាជីវកម្ម​ ដែល​​ជួយ​ឲ្យ​ពួកគេ​រួច​ខ្លួន​ពី​ការ​បណ្ដេញ​ទៅ​ប្រទេស​របស់​ពួកគេ​វិញ ប៉ុន្តែ​ពួកគេ​គ្មាន​ប័ណ្ណ​ការ​ងារ​នោះ​ទេ ហេតុ​ដូច្នេះ​ហើយ​​​ពួកគេ​ត្រូវ​បង់​ថ្លៃ​ប័ណ្ណ​ការ​ងារ​ក្នុង​ម្នាក់​ៗ​ប្រហែល​១២៥​ដុល្លារ។

ក្នុង​ចំណោម​ជនជាតិ​វៀតណាម​ទាំង​នេះ​​​​ មាន​តែ​បី​នាក់​ប៉ុណ្ណោះ​ដែលមានលិខិត​ឆ្លង​ដែន និង​មាន​ទិដ្ឋាការ​មាន​សុពលភាព​ ចំណែក​ឯ​៣៣​នាក់​ទៀត​ធ្វើ​ការ​ដោយ​ប្រើ​ទិដ្ឋាការ​ទេសចរណ៍ ហើយ​អ្នក​ដែល​នៅ​សេសសល់​​ចំនួន​៩៥​នាក់​​​គឺ​គ្មាន​លិខិត​ឆ្លង​ដែន​ទាល់​តែ​សោះ។

ប៉ូលិស​រុញ​កម្មករ​ចំណាក​ស្រុក​ខុសច្បាប់​ឲ្យឡើង​រថយន្ត​កាលពីថ្ងៃ​អង្គារ នៅ​កោះ​ពេជ្រ​ក្រុង​ភ្នំពេញ​។ រូបថតៈ ស៊ីវ ចាន់ណា​/The Cambodia Daily

លោក អ៊ុក ហៃ​សិលា បាន​មាន​ប្រសាសន៍​ថា “​សម្រាប់​អ្នក​ដែល​​គ្មានលិខិត​ឆ្លង​ដែន​ ពួកគេ​កំពុង​​​តែ​ធ្វើ​ការ​នៅ​ក្នុង​ប្រទេស​កម្ពុជា​ដោយ​ខុស​ច្បាប់​ហើយ​ ហើយ​យើង​​នឹង​ធ្វើ​សំណើ​បណ្ដេញ​​ពួកគេ​​ត្រឡប់​ទៅ​ប្រទេស​របស់​ពួកគេ​វិញ​”។ លោក​បាន​លើក​ឡើង​ទៀត​ថា ជន​​ជាតិ​វៀតណាម​ទាំង​៣៣​នាក់​ដែល​ប្រើ​ទិដ្ឋាការ​ទេសចរណ៍​ នឹង​ត្រូវ​​ទទួល​ “​ការ​អប់រំ” និង​ស្នើ​ឲ្យ​ត្រឡប់ទៅ​ប្រទេស​វៀតណាម​​វិញ​ដោយ​ស្ម័គ្រ​ចិត្ត។

កាលពី​ខែ​សីហា​ឆ្នាំ​មុន នាយកដ្ឋានអន្តោប្រវេសន៍​បាន​ចាប់​ផ្ដើម​ធ្វើ​ជំរឿន​ជន​បរទេស​ដែល​រស់​នៅ​ក្នុង​ប្រទេស​កម្ពុជា ហើយ​ចាប់​តាំងពី​ពេល​នោះ​មក​​ បាន​​ឆ្មក់​​ចូល​ឆែក​ឆេរ​ទូទាំង​ប្រទេស​ និង​បណ្ដេញ​អ្នក​ដែល​ខ្វះ​លិខិត​ស្នាម​ចាំបាច់​​ឲ្យ​ត្រឡប់​ទៅ​វិញ​។

​នៅ​ពេល​នគរ​បាល​ចុះទៅ​ឆែក​ឆេរ​​នៅ​កោះ​ពេជ្រ​កាលពី​ម្សិលមិញ ដែល​ខ្លះ​ប្រដាប់​ដោយ​កាំភ្លើង​វែង​អាកា៤៧ មាន​នគរ​បាល​ម្នាក់​​បាន​ឃាត់​ខ្លួន​អ្នក​​យក​ព័ត៌មាន​​ជា​ជន​បរទេស​ម្នាក់​ ហើយ​បាន​​ប្រាប់​ឲ្យ​អ្នក​យក​ព័ត៌មាន​រូប​នោះ​បង្ហាញ​លិខិត​ឆ្លង​ដែន​ ដោយនិយាយ​ថា តាម​ច្បាប់​ជន​បរទេស​ទាំង​អស់​ត្រូវ​តែ​ដាក់​លិខិត​ឆ្លង​ដែន​ ឬ​​ច្បាប់​ចម្លង​នៃ​លិខិត​ឆ្លង​ដែន​តាម​ខ្លួន​។

នៅ​ឯ​ការដ្ឋាន​សាងសង់​​មួយ​ កម្មករ​​ត្រូវ​បាន​​នគរ​បាល​ប្រមូលផ្ដុំ​​ជាជួរ​ និង​សាកសួរ​ថា​តើ​ពួកគេ​ជា​ប្រជាពលរដ្ឋ​កម្ពុជា​​ឬយ៉ាង​ណា។ ផ្អែក​​តាម​សំនៀង​របស់​ពួកគេ ពួកគេ​នឹង​ត្រូវ​ដោះលែង​ ឬ​រុញ​បញ្ចូល​រថយន្ត​ដឹក​ទៅ​កាន់​ការដ្ឋាន​មួយ​ផ្សេងទៀត​ ដើម្បី​​ធ្វើ​ការ​ពិនិត្យ​បន្ថែម​។

​នៅ​​ពេល​កម្មករ​ចិន និង​កម្មករ​វៀតណាម​ដើរ​រេរា​​ៗ​​ខណៈ​នគរ​បាល​ប្រមូល​ឯកសារ​ លោក អ៊ុក ហៃសិលា បាន​មាន​ប្រសាសន៍​ថា គ្រាន់​តែ​ក្នុង​រយៈ​ពេល​​៦ខែ​ដើម​ឆ្នាំ​២០១៥ មាន​ជន​​អន្តោប្រវេសន៍​ខុស​ច្បាប់​ជាង​១.១០០​នាក់​​​ដែល​​មក​ពី​ប្រទេស​ចំនួន​៣៣​ ត្រូវ​បាន​បណ្ដេញ​ចេញពី​ប្រទេស​កម្ពុជា​។

ទោះ​ជាយ៉ាង​ណា លោក​បាន​មាន​ប្រសាសន៍​ថា លោក​មិន​អាច​បា៉ន់​ប្រមាណ​ដឹង​​ថា​ជន​បរទេស​ដែល​ធ្វើ​ការ​នៅ​ក្នុង​ប្រទេស​កម្ពុជា​​ដោយ​ខុស​ច្បាប់​មាន​ចំនួន​សរុប​ប៉ុន្មាន​នោះ​ទេ ហើយ​បាន​បញ្ចេញ​ទស្សន​យល់​ឃើញ​តិច​តួច​​ប៉ុណ្ណោះ​​ជុំវិញ​ការ​សម្រេច​​ឆ្មក់​​ចូល​ឆែក​ឆេរ​​ក្រុមហ៊ុន​សហគ្រាស​ ឬ​សហគមន៍​មួយ​ចំនួន​។

លោក​បាន​លើកឡើង​បន្ថែម​​ទៀត​ថា “​យើង​មាន​ប្រភព​ខ្លះ​។ យើង​មាន​មន្ត្រី​ដែល​ចុះ​ទៅ​​ពិនិត្យ​មើល​ថា តើ​កន្លែង​ណា​ខ្លះ​មានជន​បរទេស​ធ្វើ​ការ​ដោយ​ខុស​ច្បាប់​។ យើង​ធ្វើ​ជា​រៀង​​រាល់​ថ្ងៃ ជារៀងរាល់​ថ្ងៃ។ ហើយ​យើង​នឹង​ធ្វើ​​នៅ​ទូទាំង​ប្រទេស​ ប៉ុន្តែ​ពេល​នេះ​យើង​ផ្ដោត​លើ​រាជធានី​ភ្នំពេញ​”៕ សុខុម​​​​​​​​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស