ក្រុមមន្ត្រីបាននិយាយថា ជនជាតិរុស្ស៊ីម្នាក់ដែលត្រូវបានចោទប្រកាន់ពីបទបាញ់បុរសម្នាក់អំឡុងជម្លោះមួយរវាងជនបរទេសពីរក្រុមនៅកាស៊ីណូមួយក្នុងក្រុងព្រះសីហនុកាលពីខែកុម្ភៈនោះ ត្រូវបានចោទប្រកាន់ពីបទប្រើអំពើហិង្សាដោយចេតនាកាលពីម្សិលមិញ ហើយត្រូវបានបញ្ជូនទៅពន្ធនាគារដើម្បីរង់ចាំការជំនុំជម្រះ។
ដោយបដិសេធមិនពិភាក្សាអំពីករណីនេះបន្ថែម លោក លី សុផាណែត ចៅក្រមប្រធានក្រុមប្រឹក្សាជំនុំជម្រះបានមានប្រសាសន៍ថា “យើងបានចេញដីកាឃុំខ្លួនជននេះ ហើយគាត់ត្រូវបានចោទប្រកាន់ពីបទប្រើអំពើហិង្សាដោយចេតនាមានស្ថានទម្ងន់ទោស ដោយបានប្រើកាំភ្លើងបាញ់អ្នកដទៃទៀត”។
បន្ទាប់ពីរត់គេចខ្លួនជាច្រើនខែ Roman Dragomir អាយុ៣៩ឆ្នាំត្រូវបានចាប់ខ្លួនកាលពីល្ងាចថ្ងៃច័ន្ទ ខណៈដែលជននេះបានអង្គុយហូបអាហារនៅភោជនីយដ្ឋាន Five Men Fresh Beer Restaurant ក្នុងសង្កាត់លេខ៣ ក្រុងព្រះសីហនុ។ យោងតាមនគរបាលបានឲ្យដឹងថា បុរសរូបនេះត្រូវបានឃុំខ្លួននៅប៉ុស្តិ៍នគរបាលមួយយប់មុនពេលបញ្ជូនទៅតុលាការកាលពីព្រឹកម្សិលមិញ។
យ៉ាងហោចណាស់ Dragomir គឺជាបុរសទី៤ដែលត្រូវបានចាប់ខ្លួនជុំវិញជម្លោះកាលពីថ្ងៃទី១៣ ខែកុម្ភៈ នៅកាស៊ីណូ Queenco Hotel & Casino ដែលនគរបាលនិយាយថា បានកើតឡើងនៅពេលបុរសមកពីអឺរ៉ុបខាងកើតមួយក្រុមបានប៉ុនប៉ងគំរាមទារប្រាក់ម្ចាស់ក្រុមហ៊ុនជនជាតិម៉ុលដាវីដែលលក់សំបុត្រសម្រាប់ការប្រគំតន្ត្រី Kazantip ដែលទីបំផុតត្រូវបានអាជ្ញាធរលុបចោល។ជនជាតិម៉ុលដាវីទី២ម្នាក់ទៀតត្រូវបានចាក់ចំដងខ្លួន និងបុរសម្នាក់ទៀតត្រូវបានបាញ់ចំជង្គង់។
ការចាប់ខ្លួន Dragomir កាលពីថ្ងៃច័ន្ទកើតឡើងបន្ទាប់ពី Andrei Tcekhanskii អាយុ៣៦ឆ្នាំ ជាជនរួមជាតិរបស់ខ្លួនកាលពីចុងខែមីនា ដែលត្រូវបានចាប់ខ្លួនបន្ទាប់ពីការដឹកនាំកម្លាំងនគរបាលជាង២០នាក់ជិះម៉ូតូប្រដេញរយៈពេល១ម៉ោងកាត់ក្រុងព្រះសីហនុ។
ជនជាតិរុស្ស៊ីពីរនាក់ទៀតត្រូវបានចាប់ខ្លួននៅវេលាព្រឹកបន្ទាប់ពីការប៉ះទង្គិចគ្នានៅកាស៊ីណូ Queenco នៅក្រុងឆ្នេរសមុទ្រនេះ ដែលនគរបាលបានដកហូតកាំភ្លើងឆក់ កាំបិត ដែកបំពង់ទីប និងកាំភ្លើងខ្យល់។
នគរបាល និងសាក្សីបានភ្ជាប់ Tcekhanskii និង Dragomir ទៅ Oleg Tikhanov ជនជាតិរុស្ស៊ីដែលគេចង់ចាប់ខ្លួនក្នុងប្រទេសកំណើតរបស់គាត់ពីបទមានអាវុធ និងជាតិផ្ទុះ។
អាជ្ញាធរកម្ពុជាឲ្យដឹងថា Tikhanov ដែលបើកសណ្ឋាគារ រង្គសាល និងសាលាមត្តេយ្យក្នុងក្រុងព្រះសីហនុនោះ បានបញ្ជាការវាយប្រហារដែលបានឈានទៅដល់ការវាយតប់គ្នានៅកាស៊ីណូនោះ។ ជននេះកំពុងរត់គេចខ្លួននៅឡើយ។
ម្ចាស់អាជីវកម្មជនបរទេសជាច្រើននៅក្នុងក្រុងព្រះសីហនុបានលើកឡើងផងដែរថា Dragomir ធ្វើការឲ្យគ្រួសារលោក នីកូឡៃ ដូរ៉ូសិនកូ ពាណិជ្ជករជនជាតិរុស្ស៊ី។
នៅពេលត្រូវបានទាក់ទងកាលពីម្សិលមិញ លោក អូសថេប ដូរ៉ូសិនកូ កូនប្រុសរបស់លោក ដូរ៉ូសិនកូ ជាមន្ត្រីនគរបាលនៅនាយកដ្ឋានបុគ្គលិកក្រសួងមហាផ្ទៃបានមានប្រសាសន៍ថា Dragomir បានរស់នៅក្នុងក្រុងព្រះសីហនុជាមួយប្រពន្ធ និងកូនរបស់គាត់រយៈពេលយូរមកហើយ ប៉ុន្តែរូបលោកនិងឪពុករបស់លោកមិនដែលបានជួលបុរសរូបនេះទេ។
លោកបានមានប្រសាសន៍ថា “គាត់មិនដែលធ្វើការឲ្យក្រុមគ្រួសាររបស់ខ្ញុំទេ”៕ សារុន (រាយការណ៍បន្ថែមដោយ Ben Woods)