កាលពីម្សិល មិញ លោក ឈាង វុន អ្នកនាំាពាក្យរដ្ឋសភាបាននិយាយការពារការរារាំងការធ្វើសន្និសីទកាសែត ស្តីពីបញ្ហាព្រំដែនដែលគ្រោងធ្វើដោយក្រុមសមាជិកសភាគណបក្សសង្គ្រោះ ជាតិ ដោយលើកឡើងថា សភា”មិនមែនជាផ្សារត្រី” ទេ។
លោក ម៉ៅ មុនីវណ្ណ និងលោក អ៊ុំ សំអាន សមាជិកសភាគណបក្សសង្គ្រោះជាតិកាលពីថ្ងៃសុក្របានលុបចោលការធ្វើ សន្និសីទកាសែតដើម្បីរាយការណ៍ពីលទ្ធផលរបស់ខ្លួនពីការស៊ើបអង្កេត ថ្មីៗពីបញ្ហាព្រំដែនជាមួយវៀតណាមបន្ទាប់ពីលោក ហេង សំរិន ប្រធានរដ្ឋសភាបានបដិសេធមិនឲ្យពួកគេចូលក្នុងសាលសន្និសីទនៅសភា ដោយលើកឡើងថា ពួកគេមិនបានសុំការអនុញ្ញាតមុនពេលចុះទៅកាន់់ព្រំដែន។
លោក ម៉ៅ មុនីវណ្ណ បានលើកឡើងថា លោកនៅតែចង់ធ្វើសន្និសីទកាសែតដើម្បីប្រកាសពីលទ្ធផលនៃការធ្វើ ដំណើរចុះទៅខេត្តស្វាយរៀង ខេត្តកណ្តាល ខេត្តរតនគិរី និងខេត្តត្បូងឃ្មុំ កាលពីពេលថ្មីៗដដែល ប៉ុន្តែ លោក ឈាង វុន សមាជិកសភាគណបក្សប្រជាជនកម្ពុជាបានមានប្រសាសន៍ថា លោក ហេង សំរិន មានសិទ្ធិគ្រប់គ្រងអគាររដ្ឋសភាបើលោកយល់ឃើញថាត្រឹមត្រូវ។
លោក ឈាង វុន បានមានប្រសាសន៍ថា “ពួកគេជាសមាជិកសភា ដូច្នេះ ពួកគេត្រូវគោរពបទបញ្ជាផ្ទៃក្នុងរបស់សភា។ បទបញ្ជាផ្ទៃក្នុង…ចែងថា [លោក ហេង សំរិន] ទទួលខុសត្រូវសម្រាប់ដំណើរការរដ្ឋសភា ដូច្នេះហើយលោកមានសិទ្ធិអនុញ្ញាតឲ្យធ្វើឬមិនឲ្យធ្វើនៅរដ្ឋសភា”។
លោកបានបន្ថែមថា “រដ្ឋសភាមិនមែន ជាផ្សារត្រីដែលគេអាចចេញចូលតាមតែអំពើចិត្តនោះទេ។ ការធ្វើសន្និសីទកាសែតមិនមែនជាបញ្ហាសាមញ្ញទេ ពីព្រោះវាតម្រូវឲ្យមានការចេញកាតសម្រាប់អ្នកមកចូលរួមសន្និសីទ ហើយជាពិសេសសម្តេចប្រធាន [ហេង សំរិន] ទទួល ខុសត្រូវសន្តិសុខរដ្ឋសភា។ ប្រសិនបើពួកគេចង់ធ្វើសន្និសីទកាសែត ហេតុអ្វីបានជាពួកគេមិននាំអ្នកកាសែតទៅធ្វើសន្និសីទកាសែតនៅ ព្រំដែនទៅ?”។
លោក មុនីវណ្ណ បានមានប្រសាសន៍ថា លោក និងក្រុមសមាជិកសភាគណបក្សសង្គ្រោះជាតិដទៃទៀតនឹងចេញផ្សាយសេចក្តី ថ្លែងការណ៍ជាសាធារណៈនៅថ្ងៃនេះ ដោយបង្ហាញពីការទាមទាររបស់ខ្លួនឲ្យរដ្ឋាភិបាលចេញផ្សាយផែនទី ព្រំដែនជាមួយវៀតណាម និងរៀបរាប់លម្អិតពីដំណើរចុះទៅពិនិត្យព្រំដែនរបស់ខ្លួនកាលពីពេល ថ្មីៗ។
លោក មុនីវណ្ណ បានមានប្រសាសន៍ថា “ការ ច្រានចោលរបស់សម្តេច ហេង សំរិន មិនឲ្យប្រើប្រាស់រដ្ឋសភាដើម្បីធ្វើសន្និសីទកាសែតនោះគឺជាការរើស អើងនយោបាយ។ វាជាកន្លែងរបស់ប្រជាពលរដ្ឋ មិនមែនជាកម្មសិទ្ធិរបស់គណបក្សនយោបាយទេ”។
លោក សម រង្ស៊ី ប្រធានគណបក្សប្រឆាំងបានមានប្រសាសន៍ថា លោកនឹងពិភាក្សាជាមួយលោក កឹម សុខា អនុប្រធានគណបក្សថា តើត្រូវជំរុញឲ្យគណបក្សប្រជាជនកម្ពុជាអនុញ្ញាតឲ្យធ្វើ សន្និសីទកាសែតឬយ៉ាងណា ហើយបានលើកឡើងថា ច្បាប់ដែលតម្រូវឲ្យសមាជិកសភាសុំការអនុញ្ញាតពីលោក ហេង សំរិនដើម្បីចុះបំពេញបេសកកម្មនោះគឺជាការខុសឆ្គង។
លោក សម រង្ស៊ី បានមានប្រសាសន៍ថា “ក្នុង នាមជាសមាជិកសភា ពួកគេមិនចាំបាច់សុំការអនុញ្ញាតចុះបំពេញការងាររបស់ខ្លួន ដែលត្រូវតាមដានស្ថានភាពថា តើមានកង្វល់ពីប្រជាពលរដ្ឋឬយ៉ាងណានោះឡើយ។ ប្រជាពលរដ្ឋជាចៅហ្វាយ ហើយពួកគាត់មិនចាំបាច់សុំការអនុញ្ញាតពីចៅហ្វាយផ្សេងទៀតឡើយ”។
លោកបានមានប្រសាសន៍ថា “បញ្ហានានាតឹងរ៉ឹងណាស់ពីមុន ហើយគណបក្សប្រឆាំងមិនមានអំណាចសោះ។ ប៉ុន្តែឥឡូវនេះ យើងឃើញថា [វិធានបែបនេះ] កាន់តែមិន ទាក់ទងទៅទៀត ពីព្រោះដោយសារតែតុល្យភាពអំណាច ហើយវាមិនត្រឹមត្រូវទេក្នុងការរឹតត្បិតសិទ្ធិរបស់សមាជិកសភា ក្នុងការបង្ហាញលទ្ធផលនៃការស៊ើបអង្កេតដែលពួកគេបានធ្វើ”៕សារុន